Tecnoloxía

La resultancia del estudiu en superficies realizáu pola Universidá d’Uviéu en Mieres y la población de Urbiés ye que nun hai datos concluyentes. En detalle, la responsable d’esti proyectu investigador, Alba Ardura, indicó que l’equipu que fixo’l trabayu de campu detectó «traces» de coronavirus, pero nun ye posible asegurar, añedía, qu’hubiera presencia de covid-19.

Ello ye que la investigadora dixo que «lo raro» fuera atopalo «porque cuando se fixo la recoyida d’amueses, de n primavera, nel conceyu había una bien baxa incidencia d’andaes».

La pasada primavera, miembros del equipu d’investigación ARENA de la Universidá d’Uviéu presentaron un proyectu d’investigación énte’l European Open Science Cloud (EOSC) que foi concedíu. L’oxetivu del proyectu yera mapear la presencia del Covid-19 nel ambiente, tomando Mieres y Urbiés como campu d’estudiu, por aciu l’analís del ARN ambiental (Arna).

Esta acción diba desenvolvese al traviés d’una estratexa de ciencia ciudadana, cuntando cola collaboración de voluntariáu na co-creación de conocencia sobro l’impactu del SARS-Cov2 en fómites y agües.

Nuna convocatoria abierta na que collaboró’l Conceyu de Mieres y el Club de la Evolución, captóse l’interés pol proyectu de 141 ciudadanos y ciudadanes mayores d’edá y con distintos perfiles sociales y profesionales.

Ente xunetu y agostu pasaos, investigadores del proyectu, la catedrática de genética Eva García Vázquez y la doctora en bioloxía Alba Ardura, xuntu col profesor de pedagogía Eduardo Dopico, diseñaron un taller formativu sobro’l SARS-CoV2 que foi lleváu a cabu nel Edificiu d’Investigación de la Universidá d’Uviéu nel campus de Mieres.

El rector, Santiago García Granda, quien allegó a Mieres a la presentación de los datos del estudiu, recordó qu’a esti taller asistieron 45 persones voluntaries con edaes entendíes ente los 24 y los 68 años, onde se-yos informó y formó nes conocencies científiques actuales sobro este coronavirus específicu, pasando dempués a ellaborar ellos mesmos, xuntu al equipu investigador, un protocolu pa la detección de la so presencia en materiales inertes y agües.

Una vegada adquiríes les habilidaes instrumentales básiques, el voluntariáu, convertíos en ciudadanos científicos, llevaron a cabu un trabayu de campu pela ciudá de Mieres y la parroquia rural de Urbiés tomando 157 amueses físiques d’elementos comunes d’usu públicu, como bancos de parque, elementos de xuegos infantiles, caxeros automáticos, vasos, teléfonos móviles, suelas de zapatos, puertes y asientos d’estaciones d’autobús y trenes, fontes públiques, bancos d’ilesies y apoyabrazos, barandielles pa esteriores, monedes, papel moneda, llaves, buzones de corréu, botes de basura, máquines espendedores, timbres d’intercomunicación, manijas de puertes, elementos publicitarios estáticos, máquines d’exercicios xeriátricos, contenedores de donación de ropa y zapatos, botones de semáforu pa peatones, contenedores de reciclaje de bateríes, carrinos de compres de supermercaos o dispensadores públicos de xel hidroalcohólicu.