Sociedá

Recetes pa una convivencia distinta nun marcu social alternativu al d’anguaño. Eso ye lo que busquen los VI Alcuentros ‘Les otres cares del planeta’, qu’hasta el prósimu vienres desendolquen en Xixón un nutríu programa d’alderiques públicos, proyecciones y otros actos culturales centraos en reivindicar el papel de los ciudadanos d’a pie na tresformación del so entornu más inmediatu.

Con epicentru nel Antiguu Institutu Xovellanos de Xixón, los cinco collectivos qu’entamen l’eventu -Acsur Las Segovias, Lliberación, Ecoloxistes n’Aición, Inxeniería sin Fronteres y Radio Kras- aborden na tarde de güei, martes, los estremaos modelos de barriu y ciudá a partir de les esperiencies d’Eduardo Hernández, arquitectu especialista en drechu a la vivienda, y d’una representación de l’asociación de vecinos de La Trinitat Nova, en Barcelona, pioneros na participación vecinal.

El miércoles garrarán el relevu cuatro collectivos sociales alternativos -Ladinamo, Cambalache, Escanda y Ca Revolta-, como referentes d’una posible intervención de los ciudadanos nel propiu entornu, en tantu que la tarde’l xueves dedicaráse nel mesmu horariu y ubicación -19,30 hores nel Antiguu Institutu- a analizar esperiencies de consumu xustu dende los testimonios de responsables de les entidaes Picu Rabicu, L’Arcu la Vieya, La Ceiba y A Cova da Terra.

El puntu final pondránlu el vienres el pensador Eugenio del Río y el politólogu catalán Joan Font, que xunta dos representantes del municipiu sevillanu de Las Cabezas de San Juan, discutirán nun alderique abiertu sobro posibles calces pa la participación ciudadana nos asuntos públicos.

Les lletres asturianes treslládense d’Uviéu p’Avilés. La villa l’Adelántáu prepárase p’acoyer los dos actos centrales de les cellebraciones del 7 de Mayu: el discursu públicu que la presidenta de l’Academia de la Llingua, Ana Cano, pronunciará nel Auditoriu de la Casa Cultura municipal, y la manifestación pola oficialidá que previamente, entamada pola Xunta pola Defensa de la Llingua, recorrerá les cais de la ciudá.

La marcha tien previstu el so empiezu pa les siete de la tarde, una hora antes que l’Academia abra nel Auditoriu municipal avilesín l’actu solemne del XXV Día de les Lletres Asturianes con un discursu d’Ana Cano y la toma de posesión como académicu correspondiente de José Antonio González Vior.

El grupu folk Corquiéu rematará la sesión cola interpretación de varies pieces, y darréu d’ello daráse pasu a una espicha popular con música y bailles del país nuna carpa asitiada énte l’Auditoriu, frutu de la collaboración ente l’Academia y la Xunta Pola Defensa de la Llingua.

La Conseyería de Cultura, Comunicación Social y Turismu axúntase a la exaltación de la lliteratura n’asturianu cola apertura, el llunes 3 de mayu, d’una esposición nel Antiguu Institutu de Xixón sobro l’escritor homenaxeáu d’esti añu, el malográu mayestru xixonés Andrés Solar.

A él se-y dedicará una placa conmemorativa que va descubrise al día siguiente, martes, na so parroquia natal de Deva, mientres que la Biblioteca pública d’El Fontán, n’Uviéu, acoyerá’l miércoles 5 de mayu la presentación del llibru ‘Andrés Solar, una voz del surdimientu’ y de la cantata ‘Solar d’amor y arume verde’.

Esa obra musical estrenaráse’l xueves 6 nel Teatru Xovellanos de Xixón, el mesmu día en que va rendise-y homenaxe en Mieres al profesoráu de Llingua Asturiana. Los actos pesllaránse’l vienres 7, Día de les Lletres, con un descuentu xeneral del diez por cientu nes ventes de llibros n’asturianu y el regalu de la obra monográfica sobro Andrés Solar hasta fin d’esistencies.

Seis años ensin un desarrollu reglamentariu que permita avances significativos. Esi ye’l balance de l’aplicación na práctica de la Llei d’Usu y Promoción del Bable/Asturianu, en vigor dende abril de 1998 pero somorguiada nun ostracismu políticu qu’impide meyorar la salú de la llingua asturiana con fechos concretos na enseñanza, nos medios de comunicación y na toponimia, les tres grandes estayes práctiques nes que pretende actuar el testu llegal.

La falta de resultaos apalpables ye especialmente clara en puntos mui concretos como la creación d’un muérganu oficial de traducción asturianu-castellán, la garantía dafechu de la enseñanza de l’asignatura de Llingua nel sistema públicu o el propiu desarrollu reglamentariu de la Llei: Seis años depués de promulgáu el testu, l’órganu de torna nun esiste nin se prevé a curtiu plazu, queden escolinos que nun puen estudiar asturiano por falta de quórum nos sos centros y tovía nun se redactó’l desarrollu de la Llei por reglamentu.

N’otros casos, los fechos contravienen abiertamente los preceptos de la Llei d’Usu: Pesie a que la norma llegal faculta a los Ayuntamientos pa “adoptar les midíes necesaries p’asegurar la efectividá del exerciciu de los drechos llingüísticos” de los asturianos, les altes instancies de la Xusticia vienen revocando ensin escepción la coficialidá de la llingua asturiana nos conceyos. Llueu que Casu, Morcín, Llaviana y Bimenes acataren en primer instancia la revocación impuesta pol Tribunal Superior de Xusticia d’Asturies, el Tribunal Supremu anuló en marzu pasáu la coficialidá en Llangréu, igual que fixera en Castrillón n’ochobre de 2002.

Nel platu opuestu de la balanza, el Principáu reguló por decretu n’abril de 2001 la creación d’un Rexistru Xeneral de Capacitación en bable/asturianu y en gallego-asturianu pa docentes de Llingua, tal como prevía l’artículu 11 de la Llei d’Usu. Dotramiente, los servicios y oficines llocales de normalización, en francu procesu d’espardimientu, tán revelándose como organismos d’utilidá pa la defensa l’idioma nel ámbitu más cercanu al ciudadán, el municipiu.

Y no esencial, el restu son futuribles: L’acabante nacer Oficina de Política Llingüística, dependiente de la Conseyería de Cultura, enfótase en recuperar la operatividá de la Xunta de Toponimia del Principáu d’Asturies, prevé actuar nos currículos educativos y mantién l’habitual llinia de subvenciones a instituciones, editoriales, medios de comunicación y empreses en xeneral pa la difusión del asturiano, cola novedá de les ayudes a la edición de llibros de testu en llingua asturiana.

En total, el Principáu destina esti añu a la promoción llingüística 2,5 millones d’euros en subvenciones, de los que los medios de comunicación recibirán la mayor tayada (312.000 euros), frente a los 184.000 empobinaos a la producción editorial o a los 125.000 euros destinaos a los Ayuntamientos.

Textu íntegru de la Llei d’Usu y Promoción del Bable / Asturianu, nuna web del PAS

Los productos y servicios d’ociu y cultura son agora seis puntos más baratos n’Asturies qu’hai un añu, nuna situación más ventaxosa pal consumidor asturianu que pal d’otres comunidaes autónomes: Nel conxuntu l’Estáu, los precios de la cultura xubieron una décima nos últimos doce meses. Son cifres del Institutu Nacional d’Estadística (INE), qu’acaba asoleyar los datos del Índice de Precios de Consumu (IPC) referíos al mes de marzu.

Anque consumir cultura n’Asturies ye más barato qu’en marzu de 2003, la midición del INE amuesa que los precios de bienes y servicios d’ociu y cultura xubieron dos puntos respectu al mes anterior, febreru.

Pol so llau, la tasa acumulada d’inflación -indicador de la evolución del poder adquisitivu por variación de los precios no que va d’añu- ye na estaya cultural del -1,3 por cientu, o lo que ye lo mesmo, ente xineru y marzu los precios del ociu y la cultura baxaron n’Asturies un puntu y tres décimes.

No que cinca al conxuntu d’España, les tarifes pa consumir servicios culturales son una décima más cares qu’en marzu de 2003, mientres que la tasa d’inclación acumulada indica que los precios baxaron un 0,8 por cientu no que va d’esti añu.

Datos completos na web del INE

La Mancomunidá de la Sidra súmase al procesu d’espoxigue de la llingua asturiana nel ámbitu llocal. La llocalidá naveta de Paraes va acoyer una Oficina de la Llingua que contará col asesoramientu técnicu de la Conseyería de Cultura y manexará un presupuestu de 6000 euros. La persona que resulte designada como responsable d’esti nuevu serviciu –nomamientu qu’entá nun foi fechu oficial- deberá desplazase amás pelos seis conceyos de la comarca sidrera, según les necesidaes de cada Ayuntamientu.

El llabor del nuevu organismu consistirá na promoción del usu de la llingua asturiana na imaxe de les instituciones del conceyu, na documentación y anuncies oficiales, na publicidá y nos cartelos. L’usu por parte de los ciudadanos tendrá la mesma validez que’l castellán y los navetos podrán recibir amás formación llingüística.

L’alcalde de Bimenes, Emilio González; el presidente de la Mancomunidá, Javier Parajón; y el direutor de la Oficina de Política Llingüística’l Principáu y profesor de la Universidá d’Uviéu, Ramón d’Andrés, foron los encargaos de presentar esti proyeutu na Casa de Cultura de Bimenes.

Esta anuncia fízose con motivu de la presentación de los ganadores del primer concursu de comics n’asturianu, organizáu por esta mesma mancomunidá. La participación cifróse en 26 trabayos, unviaos dende distintos puntos de la xeografía asturiana. Les obres seleccionaes publicaránse nun boletín que va distribuyise per delles asociaciones, biblioteques y oficines d’información xuvenil.

El rostru d’Andrés Solar tá otra vuelta nes vieyes escueles de Deva, en Xixón, el centru escolar rural onde cursara los sos estudios primarios el desapaecíu autor, protagonista de la XXV Selmana de les Lletres Asturianes. Una placa conmemorativa recuerda dende ayeri al malográu escritor n’asturianu, fallecíu nun accidente de circulación hai agora venti años, como “llabrador de pallabres y tierres”.

El descubrimientu de la placa, que contó cola presencia de Lali Solar, hermana del homenaxeáu, pretende demostrar que la obra y la figura de Solar “permanez, como la piedra de les escueles”, según reivindicó el director xeneral de Política Llingüística del Principáu, Carlos Madera.

Xunta él, acudieron al actu d’homenaxe el primer teniente d’alcalde de Xixón, Pedro Sanjurjo, y dos conceyales más: la titular de Cultura, Mercedes Álvarez, y el responsable de la Zona Rural, Faustino ‘Venturo’. Flanqueólos el director de la Oficina de Política Llingüística del Principáu, Ramón d’Andrés.

La hermana d’Andrés Solar, que recibió un ramu de flores, amosóse visiblemente emocionada énte quienes resaltaron la figura del so hermanu como un autodidacta que supo contribuyir a meyorar el so entornu. Darréu, nel “llugar d’alcuentru cívicu” que suponen les vieyes escueles onde Solar estudiara, quedó oficialmente abierta la esposición ‘Llingua Solar’, un conxuntu d’obres d’arte contemporáneu trabayaes d’estremaos materiales.

La amuesa, entama pol Foru Arte y Ciudá, incorpora pieces de dos decenes d’artistes asturianos y reivindica la “oficialidá del llinguaxe visual”, en pallabres d’Ánxel Nava, coordinador de la entidá organizadora.

Defensa de la llingua asturiana, igual a terrorismu. Esa ye la ecuación que plantegó’l PP nel Plenu’l Conceyu de L.lena que sacó alantre un reglamentu d’usu del asturianu apoyáu pol restu de fuerces polítiques con presencia municipal, PSOE, IX-BA y URAS. Victorino Fernández, voceru llocal del PP, llamó-yos a toos ellos “terroristes” y dixo que la nueva ordenanza llingüística “paez inspirada por ETA”.

Les pallabres de Fernández, al que’l reglamentu pa propiciar el billingüismu se-y abulta propiu de “nacionalismos estremos”, foron darréu amatagaes pol alcalde de L.lena, el socialista Hugo Morán, que lu llamó al orde nel propiu Plenu ya esixó-y, ensin ésitu, que reculare no dicho.

El nuevu reglamentu municipal del usu l’asturiano en L.lena, qu’empezó ellaborase en febreru de 2003, foi consensuáu un mes depués na Comisión de Cultura per tolos partíos políticos con representación municipal, llueu d’incorporar les igües propuestes pol PP.

La ordenanza llocal abre la puerta pa que toles comunicaciones oficiales del Ayuntamientu puean ser n’asturiano amás d’en castellán, y prevé la formación de los conceyales y técnicos del Conceyu pa que los ciudadanos que quieran espresase n’asturiano alcuentren una interlocución correcta nesa mesma llingua.

L’Ayuntamientu de Llena oficializa’l billingüismu. Un reglamentu d’usu del asturianu garantiza la presencia d’esi idioma nes comunicaciones escrites de l’Alministración llocal con persones ya instituciones, na imaxe corporativa’l Conceyu y nel ámbitu oral, llueu de que l’Ayuntamientu forme a los sos trabayadores pa que falen asturiano con normalidá nel desendolcu de sos funciones.

Na práctica, el nuevu reglamentu va permitir qu’impresos, instancies, revistes institucionales ya intervenciones públiques tengan la llingua asturiana como idioma vehicular, en convivencia col castellán. Amás, los vecinos podrán ser atendíos n’asturianu cuando faigan dalguna consulta o trámite énte’l Conceyu.

La inciativa qu’agora cuaya, entamada en febreru de 2003 pol Serviciu de Normalización Llingüística de Llena, recibió’l sofitu formal de la Oficina de Política Llingüística’l Principáu, que precisamente s’enfota na promoción llocal del asturianu como vía sustancial p’hacia la normalización.

El PSOE gobierna’l conceyu llenense con 7 conceyales; IX-Bloque por Asturies tien 5; el PP, 4, y URAS ta presente con un conceyal.

Ramón D’Andrés, director de la Oficina de Política Llingüística del Principáu, quier poner llende a les sos declaraciones cruciaes cola Academia de la Llingua qu’alita la prensa escrita hai selmanes, y que tensaron enforma la relación ente los dos principales muérganos institucionales na defensa de la llingua. D’Andrés ufre otra vuelta collaboración a l’Academia y tien concertada una entrevista cola so presidenta, Ana Cano.

Les agües baxen turbies dende’l propiu nomamientu del filólogu xixonés al frente de la Oficina de Política Llingüística, n’ochobre pasáu. Pero la toma de posesión del cargu, el 13 de xineru, asoleyó otra vuelta la yá vieya rocea de l’Academia respecto a D’Andrés, miembru ‘díscolu’ de la institución n’especial pol so criteriu col gallego-asturiano.

Agora, acabante denunciar qu’un diariu asturianu manipuló unes declaraciones de so col envís d’alitar so engarradiella cola Academia, D’Andrés fai un nuevu llamáu pa la collaboración ensin paliativos ente la Oficina qu’él dirixe y la institución que preside Ana Cano.

Con esi oxetivu, y la consideración de l’Academia como institución capital na normalización del asturiano, el director de la Oficina de Política Llingüístca tien concertada yá una entrevista con Cano na que dambos van estudiar midíes pa garantizar una presencia digna de l’asturiano en toles estayes de la sociedá.