Sociedá

La presidenta de l’Academia destacó un añu más nel Día de les LLetres Asturianes la importancia de la oficialidá pa llograr una normalización del idioma, pero esta vegada pidió tamién una “Universidá asturiana” que mire pa Europa “pero tamién p’Asturies”, como condición imprescindible pa que la normalización social de la llingua y tamién de la cultura d’Asturies seyan una rialidá.

Como nun podía ser dotramiente, la oficialidá foi la reivindicación cimera del discursu académicu, como obxetivu d’una llingua que como la presidenta s’enfotó en recordar tien ya dende hai tiempu una gramática, un diccionariu trabayáu y significativu de la riqueza terminolóxica del asturianu, una lliteratura perimportante, “y una base social favoratible” a esa oficialidá que consideró imprescindible pala vraera normalización del asturianu, al tiempu que consideraba innecesaria una llei d’usu “que nun tien altor llegal suficiente”.

Sigún Ana Cano, “l’Estatutu d’Autonomía habrá recoyer de mou esplícitu la oficialidá de la llingua asturiana nel territoriu del Principáu d’Asturies. Y ye dempués cuando tendrá que venir una llei de Normalización Llingüística, afayada a la nuesa realidá, qu’estableza, colos pautos y prudencies que se quiera, les distintes fases progresives del procesu, acordies colos oxetivos y perspeutives de futuru que se planteguen”.

Ana Cano tamién amosó crítiques nidies al nuevu Gobiernu autonómicu asturianu polos problemes educativos que se tán produciendo nel procesu de normalización. Son reivindicaciones vieyes que nun son a cristalizar en realidaes nidies y que van de la especialidá en Filoloxía Asturiana, que se niega en Madrid ensin argumentu académicu, a la especialidá de Llingua Asturiana pa los profesores d’Educación Infantil o la inclusión de l’asignatura nos currículos de Primaria y Secundaria. Con idénticu enfotu, Ana Cano dixo que ya nun se pue dexar d’encarar la enseñanza de toles materies col asturiano como llingua vehicular, que ye lo que-yos asocede a toles demás llingües del Estáu.

Un actu brillante

L’actu institucional de l’Academia de la LLingua Asturiana nel XXV Día de les Lletres entamó como se vien faciendo davezu dende hai unos cuantos años col son de la gaita. Xuacu Amieva foi l’encargáu d’entamar una xornada na que, baxo la batuta de la periodista Sonia Avellaneda como presentadora, foron desfilando los elementos qu’añu tres d’añu componen esti actu que por primera vegada se treslladaba a Avilés.

Col auditoriu enllenu, destacaba n’Avilés la numberosa representación política, cola presencia del Conseyeru de Xusticia, Francisco Javier García Valledor, a la testa, amás de l’Alcaldesa de Castrillón, d’IX; el conceyal de Cultura d’Avilés, del PSOE; los conceyales d’IX del conceyu y una granible representación de toles fuercies polítiques que sofiten la oficialidá de la llingua asturiana nos sos programes políticos.

Tres del entamu, el telón dexó ver a los académicos de númberu que recibíen esti añu como correspondiente al doctor José Antonio Fernández Vior en reconocimientu al so llabor investigador de la fala del Navia-Eo. Tanto Vior na so curtia pero intensa intervención como la presidenta de l’Academia, nel so discursu, encamentaron a la sociedá asturiana respetu pa los falantes del occidente asturianu estremaos de los falantes de gallego y de los que falen dafechu asturianu occidental.

Una llectura de poemes y una amañosa esbilla de cancios del nuevu discu de Corquiéu, que se tien de grabar tres del branu, y de dellos de los más nomaos d’esti grupu de folk de Ribesella, que vien d’una xira por Europa y taba acabante d’aportar dende Escocia, punxeron el meyor finxu a una xornada que tien ya un calter propiu y definíu y a la que namái-y falta l’aportar de la oficialidá, pa que nun tea que ser cada añu esi l’estribillu obligáu d’un resume añal de l’actividá académica alrodiu del asturianu.

La Conseyería de Cultura, Comunicación Social y Turismu del Principáu d’Asturies desembolsó un total de 216.442 euros n’estremaes subvenciones nel trimestre caberu de 2003. El Festival de Cine de Xixón, con poco más de cien mil euros, y cuatro asociaciones de mocedá, con unos ingresos conxuntos de casi 60.000, llevaron la mayor parte de les ayudes económiques concedíes pol departamentu que dirixe Ana Rosa Migoya.

Según espubliza el Boletín Oficial del Principáu d’Asturies (BOPA) na so edición de güei, la mitá de les perres que Cultura gastó en subvenciones durante los tres meses caberos del añu pasáu foron a parar a les arques del 42 Festival Internacional de Cine de Xixón, que recibió 107.000 euros.

Dientru tamién de la política habitual de sufragar parte de les actividaes culturales periódiques que tienen llugar n’Asturies, la Conseyería subvencionó con 12.000 euros la publicación de la obra ganadora del Premiu d’Ensayu Xovellanos, que saca a la cai Ediciones Nobel.

El restu de desembolsos destináronse a infraestructures ya asociaciones de la estaya de mocedá: ‘Mujeres Jóvenes’, Andeas, ‘Estudiantes progresistas’ y ‘Valle del Turón’.

os Conceyos, los de L.lena y Santalla d’Ozcos, recibieron 27.800 y 10.800 euros respectivamente
Promulgación de la midida nel BOPA

El Gobiernu autonómicu tien que pisar l’acelerador y arrancar nel camín de la defensa del asturianu. Asina lo entiende la Xunta Pola Defensa de la Llingua Asturiana, qu’esti mediudía avisó n’Uviéu del grave riesgu de desapaición nel que s’alcuentra l’asturianu fundamentalmente por mor de la perda de falantes ente neños y mozos. Pa esixir igua a esa situación, la Xunta convoca una manifestación n’Avilés el prósimu vienres, Día de les Lletres Asturianes.

La marcha saldrá a les siete de la tarde de la estación d’autobuses y morrerá nel auditoriu de la Casa Cultura, onde l’Academia de la Llingua va cellebrar l’actu institucional del Día de les Lletres. Darréu de la sesión, Xunta y Academia entamarán en comuña una espicha popular.

Esi sedrá el llau festivu. No estrictamente reivindicativo, la Xunta camienta que ye impresdincible una política llingüística “valiente y clara”, muncho más pallá de “fechos puntuales y d’alcordase del asturianu sólo nos díes de fiesta”. Asina lo defende el militante de la Xunta Xulio Casado, qu’amás reclama una normalización de la enseñanza de la llingua nos distintos niveles educativos y tilda de “intolerable” la non reconocencia de la validez de la especialidá de Filoloxía Asturiana.

Asinamesmo, a la Xunta abúltase-y imprescindible una presencia amañosa de la llingua asturiana na Alministración del Principáu y nos medios de comunicación, nun procesu alitáu polos poderes políticos.

L’epicentru sedrá la demanda inequívoca d’oficialidá. La presidenta de l’Academia de la Llingua Asturiana, Ana Cano, centrará la so intervención nel actu solemne del XXV Día de les Lletres Asturianes, que se cellebra el vienres n’Avilés, n’esixi-yos a les autoridaes polítiques la declaración dafechu de l’asturianu como llingua oficial aprovechando l’actual momentu de formientu de posibles cambios nos estatutos d’autonomía.

Na mesma llinia de les pallabres que pronunció ayeri en Xixón durante la inaguración de la XXV Selmana de les Lletres, la presidenta de l’Academia de la Llingua fará el vienres un alegatu pola oficialización del asturianu como midida imprescindible pa poder avanzar en cualquier dirección na normalización y defensa del idioma.

Cano sorrayó amás la significación de la inminente cellebración del Día de les Lletres na so edición númberu venticinco como una amuesa de l’aprosimación de l’Academia a la variedá llingüística que s’emplega na franxa comprendida ente los ríos Navia y Eo, nel estremu occidental d’Asturies, yá que por primer vegada va ingresar na institución un académicu estrechamente vinculáu a esa zona y esa variedá, José Antonio Fernández Vior.

L’actu col que l’Academia de la Llingua quier cellebrar el XXV Día de les Lletres Asturianes tendrá llugar a partir de les 20 hores nel auditoriu de la Casa Cultura d’Avilés. Tres de la sesión solemne, que finará con una actuación del grupu Corquiéu, los asistentes sumaránse a una espicha popular nuna carpa esterior, en collaboración y xuntanza cola Xunta Pola Defensa de la Llingua Asturiana.

L’asturianu tendrá un usu dignu, “en tiempu, cantidá y calidá”, na futura radiotelevisión pública asturiana. Asina lo comprometió esti mediudía en Xixón la conseyera de Cultura, Ana Rosa Migoya, na inaguración oficial de la XXV Selmana de les Lletres Asturianes, Nesi mesmu actu, la presidenta de l’Academia de la Llingua, Ana Cano, esixó-y al Gobiernu autonómicu qu’incluya la oficialidá na futurible reforma del Estatutu d’Autonomía.

Esa sedría, según Cano, la meyor manera de rendi-y homenaxe al malográu escritor xixonés Andrés Solar, cuya alcordanza protagoniza esti añu los actos de la Selmana de les LLetres. Inda más cuando la situación política ye propicia tres del cambiu de collor políticu nel Executivu central y anúnciase un procesu global d’afitamientu de l’autonomía de les estremaes comunidaes. “Nun queremos siguir siendo diferentes, nun perdamos esti tren”, alitó la presidenta de l’Academia.

Díxolo nel estráu. Fuera’l salón d’actos del Antiguu Institutu, onde se desendolcó la presentación de la XXV Selmana de les Lletres, la conseyera de Cultura, Comunicación Social y Turismu respondió-y a Cano énte les entrugues de los periodistes: El Gobiernu atiénse al marcu normativu esistente -Estatutu actual, Llei d’Usu del Asturiano-, pero ta dispuestu dafechu a entrar nel discutiniu de cuestiones como la que punxo enriba la mesa Ana Cano.

Previamente, Migoya espardiera na so intervención delles pincelaes de les iniciatives que la Conseyería de Cultura tien en marcha na estaya de política llingüística: La Xunta de Toponimia tien yá nomaos a los sos representantes y ta llistu el so reglamentu internu, polo qu’empezará a funcionar darréu, asesorada amás por Fernando Álvarez Balbuena y Xulio Viejo; reforzaráse la rede municipal de normalización del asturianu; y el Plan de Normalización Sociollingüística tará aprobáu enantes qu’acabe esti añu.

No abstracto, Ana Rosa Migoya precisó que la conseyería que dirixe va echar tol fuelgu pa “desatrancar la cuestión llingüística, dende’l realismu y ensin roces”. Dexando pel camín dalgunes alusiones en clave interna a les engarradielles internes nel sen del asturianismu -“La defensa del asturianu nun ye monopoliu de nengún grupu ideolóxicu”, la conseyera completó la so intervención mirando pa la enseñanza: Ye voluntá de Cultura ameyorar el tratamientu de la Llingua Asturiana como asignatura n’escueles ya institutos, asina como afitar l’estudiu del gallegu-asturianu como veriedá llingüística singular na zona comprendida ente los ríos Navia y Eo.

“Un exemplu de compromisu y trabayu pa col país y la llingua asturiana cuando casi too taba por facer”. Nestos términos reivindicó esti mediudía la presidenta de l’Academia de la Llingua Asturiana, Ana Cano, la figura d’Andrés Solar, que merez una esposición monográfica nel Antiguu Institutu de Xixón hasta’l prósimu 7 de mayu.

Solar, que ye’l primer autor lliterariu del Surdimientu al que se-y dedica una Selmana de les Lletres -nesta ocasión la edición númberu venticinco-, dexó tres d’él una obra granible que, destacó Cano, foi amás un modelu llingüísticu mui útil n’aquellos tiempos de los primeros pasos de la normalización del idioma.

Pa reconocer esi calter pioneru, l’Ayuntamientu de Xixón pondrá-y el nome d’Andrés Solar a una caleya del so llugar natal, la parroquia xixonesa de Deva. L’homenaxe a l’alcordanza de Solar, fallecíu nun accidente de circulación hai agora venti años, complétase cola edición de dos llibros: un estudiu sobro la so vida y el so tiempu, y una recuperación de parte de la so obra lliteraria n’edición asoleyada por Editora del Norte y cordinada por Vicente García Oliva.

El patiu del Antiguu Institutu Xovellanos de Xixón ufre a lo llargo de toa esta selmana una visión de conxuntu de lo que significó el pasu d’Andrés Solar pola cultura asturiana nun momentu de plenu espoxigue identitariu. Fotografíes, pegatines, cartafueyos y cartelos d’época recuperen la memoria d’un militante al que-y tocó vivir años decisivos nel procesu d’afitamientu de la llingua y cultura asturianes.

Dos mil escolinos participen dende güei nes cuarenta actividaes de les IX Xornaes de la Llingua y Cultura Asturianes, cuyu programa inclúi un taller de radiu, una práctica de llabores de telar tradicional y la promoción del asturianu n’Internet por parte de los propios alumnos. La iniciativa ye frutu de l’andecha de doce colexos del conceyu, la Fundación Municipal de Cultura y la Oficina Municipal de la Llingua.

Una evocación central tará nel cogollu de toles actividaes: L’alcordanza de la escritora xixonesa María Teresa González, fallecida en 1995, cuya desapaición foi fondamente sentida pola comunidá asturianista. A partir d’esi referente, los escolinos tendrán amás ocasión pa tomar contactu col deporte tradicional, l’artesanía’l país y la música coral.

Too cola llingua asturiana por principiu, coincidiendo nel tiempu cola cellebración de la XXV Selmana de les Lletres Asturianes, qu’ayeri presentó formalmente la Conseyería de Cultura y que va arrancar precisamente en Xixón al mediudía del llunes qu’entra.

Los Premios ‘Príncipe de Asturias’ reciben el sofitu del principal organismu internacional na protección y promoción de la cultura. L’axencia de les Naciones Xuníes pa la Educación, la Ciencia y la Cultura, la Unesco, reconoz el valir mundial de los galardones p’afitar el patrimoniu cultural de la Humanidá y anuncia qu’avalará espresamente los actos conmemorativos del XXV aniversariu de la fundación qu’entrega los premios.

Esa efemérides cumpliráse en setiembre de 2005, venticinco años depués de la constitución n’Uviéu de la Fundación ‘Príncipe de Asturias’ col envís cimeru d’exaltar y espardir los valores científicos, culturales y humanísticos d’ámbitu universal. Al añu siguiente de la so creación, en 1981, la fundación entregó per primer vegada los sos premios.

El sofitu espresu de la Unesco vien a reconocer agora una llarga actividá na promoción de la cultura y les ciencies del mundu, personalizada nes figures que dende hai ventitrés años recueyen los sos galardones nun solemne actu que se cellebra na seronda nel Teatru Campoamor d’Uviéu.

Nesti sen, el xaponés Koichiro Matsuura, director xeneral de la Unesco, aconceyará’l prósimu 14 de mayu en París colos máximos responsables de la Fundación Príncipe, Graciano García y José Ramón Álvarez Rendueles, pa firmar un documentu nel que l’axencia de la ONU oficializa el so sofitu.

El prósimu 10 de xunu axuntaráse n’Uviéu el primeru de los xuraos que va conceder los Premios ‘Príncipe de Asturias’ na so edición de 2004, el correspondiente a la Estaya de Lletres. La Fundación recibió yá más de cien mil cartes sofitando les doscientes candidatures presentaes con calter xeneral.

Los neños ingresaos nel Hospital de Cagüeñes, en Xixón, recibirán llibros n’asturianu gratis pa cellebrar la Selmana de les Lletres. L’asociación xuvenil Dixebra Astur repartirá el prósimu sábadu 8 de mayu nel centru hospitalariu los más de 80 llibros infantiles n’asturianu que tien axuntaos, sumándo asina la so iniciativa a los actos conmemorativos de la XXV Selmana de les Lletres Asturianes.

L’actu enmárcase na campaña ‘Nengún neñu ensin llibru n’asturianu na Selmana de les Lletres’, y tendrá llugar a les 12 del mediudía. La mayoría de los llibros fueron donaos poles propies editoriales, qu’amosaron un gran interés en sofitar esta campaña.

Nel actu d’entrega de los llibros contaráse cola presencia de representantes de la direutora de la Oficina de la Llingua del Ayuntamientu de Xixón Maria Xosé Rodríguez, a la qu’acompañarán representantes de Xunta Moza y del Conseyu de la Mocedá de Xixón.

La Conseyería de Cultura, Comunicación Social y Turismu quier que los Ayuntamientos falen y escriban n’asturianu. Nuna carta empobinada a los alcades de los 78 conceyos d’Asturies, el Gobiernu’l Principáu anima a los rexidores llocales a usar públicamente l’asturianu como seña del compromisu col idioma, coincidiendo cola cellebración, a partir del llunes prósimu, de la XXV Selmana de les Lletres Asturianes.

Asina lo anunció esta tarde el director de la Oficina de Política Llingüística, Ramón d’Andrés, na presentación oficial de los actos de la Selmana de les Lletres, flanqueáu pol director de Política Llingüística y Promoción Cultural, Carlos Madera, y pola conseyera de Cultura, Ana Rosa Migoya, quien destacó la novedá que supón dedica-y per primer vegada la principal cita añal de la lliteratura asturiana a un autor del Surdimientu, el malográu xixonés Andrés Solar.

La conseyera sorrayó amás otres dos singularidaes respecto a años anteriores: l’estrenu de la primer cantata n’asturianu -‘Solar d’amor y arume verde’, de Carlos José Martínez y Xulio Ramos-, y el cumplimientu’l vixésimu aniversariu de la entrada de la llingua asturiana nos centros d’enseñanza, fechu que se produxo en 1984.

Pol so llau, Carlos Madera fexo un llamáu a los ciudadanos a esfrutar de los diversos actos de la Selmana de les Lletres “porque ye un festexu de tola xente d’Asturies” y amosó la intención del departamentu que dirixe de defender ensin prexuicios l’idioma asturianu, que tildó de “bien cultural”.

Con un presupuestu d’unos 90.000 euros, la XXV Selmana de les Lletres Asturianes xirará ente’l llunes 3 y el vienres 7 de mayu al rodiu de la figura d’Andrés Solar, escritor xixonés fallecíu nun accidente de tráficu hai agora venti años. El programa d’actos previstos inclúi una esposición sobro la so vida y obra y la edición de dos llibros cola so figura como epicentru: Una amuesa de la so obra, que tará a la venta, y un llibru monográficu sobro Solar ellaboráu por quince autores, que va regalase nel trescursu’l vienres 7, Día del Llibru y el Discu n’Asturianu.

A la presentación de la vixesimuquinta edición de la Selmana de les Lletres asistieron amás Gloria Fernández, en representación de la Tertulia Cultural El Garrapiellu, y María Xosé Rodríguez, responsable de la Oficina municipal de la Llingua de Xixón. Dambes entidaes collaboren na organización de la Selmana de les Lletres Asturianes.