Sociedá

Los grandes premios institucionales a la creación y comunicación n’asturianu pasen a ser cuatro: A los veteranos ‘Xosefa Xovellanos’ de novela, ‘Xuan María Acebal’ de poesía y el más mozu ‘Enriqueta González Rubín’ de periodismu escritu súmase un nuevu galardón, desdoblamientu d’esti últimu, empobináu a premiar con 3.000 euros el meyor trabayu periodísticu audiovisual concebíu y emitíu dafechu en llingua asturiana.

Según publicó’l Boletín Oficial del Principáu d’Asturies (BOPA) na so edición d’ayeri, na presente edición de 2004 mantiénse nos mesmos términos la convocatoria del ‘González Rubín’ pa testos asoleyaos en prensa escrita, con una dotación de 3.000 euros, pero créase una segunda categoría pal sector audiovisual pensada pa galardonar les emisiones radiofóniques o televisives de tema llibre y de cualquier xéneru, difundíes dende el 1 de xineru pasáu y feches dafechu n’asturianu.

El restu de la convocatoria de los grandes premios que’l Principáu concede añalmente p’alitar la creación en llingua asturiana y el so usu periodísticu nun varía sustancialmente respecto a 2003: Certifícase la defunción del premiu ‘Máximo Fuertes Acevedo’ d’ensayu, que yá nun se convocara l’añu pasáu y les dotaciones siguen siendo de 6.000 euros pa les meyores obres de narrativa y poesía. Eso sí, la convocatoria asoléyase esti añu con dos meses de retrasu sobro 2003, yá que’l BOPA recoyó l’añu pasáu les bases de los premios na so edición del 24 de marzu.

El plazu d’almisión d’orixinales, que nun podrán tar premiaos en concursos anteriores, finará’l 30 d’ochobre, y el xuráu emitirá’l so veredictu nun plazu máximu de 45 díes a partir d’esa fecha.

Bases íntegres de la convocatoria nel BOPA

El primer añu de Gobiernu en coalición de PSOE ya Izquierda Xunida-Bloque por Asturies supuso, según el propiu Executivu, un “claru avance” na promoción y protección de la llingua asturiana. Asina lo sostién l’Executivu nuna valoración oficial asoleyada ayeri na qu’anuncia l’inminente desendolcu de la Llei d’Usu y Promoción del Asturianu y cambios na política editorial y de comunicación.

Según el documentu nel que los partíos qu’ostenten l’Executivu autonómicu faen repasu de los sos primeros doce meses d’acción conxunta, un añu depués qu’echare a andar el Gobiernu de coalición, los planes inmediatos del Principáu pal asturianu pasen tamién por “entainar l’aprobación del Plan de Normalización Sociollingüística”, afitar la normalización del gallegu-asturianu y l’afondamientu na collaboración d’axentes sociales ya instituciones.

Al marxe d’esa declaración d’intenciones, el restu l’epígrafe dedicáu a evaluar la xera’l Gobiernu na estaya de les señes d’identidá asturianes ocúpalu la reivindicación del llabor yá fechu: PSOE ya IX-BA destaquen la creación de la Oficina de Política Llingüística y los primeros pasos de la Xunta de Toponimia, y tilden de “mui significativu” l’aumentu de la presencia de la llingua asturiana nos centros educativos.

Nesta estaya de la enseñanza, los tres partíos nel Gobiernu cifren nun 85 por cientu los colexos nos que s’imparte Llingua y aseguren qu’esi porcentaxe ye del 81 por cientu nos centros públicos de Secundaria, pero reconocen darréu que “debemos espardir más la impartición del asturianu nel Bachilleratu y na Educación Infantil”.

Los dos últimos párrafos de la valoración del Executivu sobro’l so primer añu d’actuación na política llingüística céntrense en destacar “l’incrementu considerable” de los cursos de formación n’asturianu empobinaos a funcionarios -7 en 2003, 22 en 2004- y en en recordar que’l Principáu ta suscribiendo convenios con conceyos qu’echen a andar les sos respectives oficines municipales de normalización.

Medio enllenu, medio vacíu

Hasta equí, el vasu medio enllenu. La parte correspondiente pa quien quiera ver medio vacíu el recipiente del llabor gubernativu evidéncienla les midíes comprometíes en xunetu de 2003 nel pactu de Gobiernu de les que nada nun se diz nel documentu qu’agora revisa esi pactu. Asina, por exemplu, el testu firmáu hai un añu afitaba la presencia normalizadora del asturianu nel diseñu de la futura radiotelevisión autonómica, el puxu de la llingua nos medios de comunicación y l’aprobación de la Llicenciatura de Filoloxía Asturiana, cuestiones que nun se menten na revisión del pactu.

La Federación Socialista Asturiana (FSA-PSOE) ya Izquierda Xunida-Bloque por Asturies aconceyaron ayeri n’Uviéu pa evaluar los doce primeros meses d’acción del Gobiernu en coalición de dambes fuercies, que quedó constituyíu hai agora un añu.

De la xuntanza, a la qu’acudieron los principales cabezaleros de los socialistes -Javier Fernández, secretariu xeneral de la FSA, y Vicente Álvarez Areces, presidente’l Principáu-, d’Izquierda Xunida -Jesús Iglesias, coordinador n’Asturies- y del Bloque -Rafael Palacios, voceru d’esa fuercia- salió un documentu de doce fueyes nel que se reflexa, según el propiu Gobiernu, que ta yá en marcha el 75 por cientu de les midíes concretes alcordaes nel pactu firmáu hai agora un añu.

Testu íntegru del pactu de Gobiernu ente FSA-PSOE ya IX-BA, firmáu el 3 de xunetu de 2003

La Fundación ‘Príncipe de Asturias’, domiciliada n’Uviéu y convocante de los premios añales del mesmu nome, acumula un patrimoniu de 16 millones d’euros, más de 2.200 millones de les vieyes pesetes. La cifra recuéyese na memoria d’actividaes entamaes en 2003 pola entidá, que prepara pal añu prósimu un estensu programa de cellebraciones pa conmemorar el so XXV aniversariu.

Conforme se concreta nesi documentu, acabante asoleyar, la Fundación ‘Príncipe’ gastó a lo llargo del añu pasáu un total de 3,95 millones d’euros nes estremaes actividaes qu’entamó, una cantidá de la que la mayor parte -el 64 por cientu- foi a parar a la convocatoria, concesión y entrega de los premios ‘Príncipe’. Más discretu foi’l porcentaxe que se dedicó a actividaes musicales: Un 11,5 por cientu.

El restu de perres que salieron del arcón de la Fundación en 2003 empobináronse a sufragar les ayudes y subvenciones que la entidá otorga periódicamente, asina como los gastos xenerales de funcionamientu.

Magar d’eses grandes cifres, la Fundación ‘Príncipe de Asturias’ declara na so memoria qu’entá nun pue cumplir el so envís de costear toles sos actividaes coles rentes producíes pol so patrimoniu, polo qu’ha siguir recurriendo a inyecciones económiques d’estremaes personalidaes ya instituciones, n’especial les que lleguen de los patronos y los denominaos miembros protectores de la entidá.

Nesti sen, el Patronatu ‘Príncipe de Asturias’, que sofita l’actividá de la fundación homónima, axunta a los presidentes de más de 40 empreses españoles, la mayoría d’elles les principales multinacionales de la banca, la enerxía, la comunicación y l’alimentación. Asina, na llista de patronos figuren, ente otros, los presidentes de Telefónica, Repsol, Cepsa, BP España, Iberdrola, Endesa, Unión Fenosa, El Corte Inglés, Prisa, Vocento, Banesto, Banco Santander Central Hispano, BBVA, Banco Pastor, Nestlé y Corporación Peñasanta.

Amás de la concesión y entrega de los premios ‘Príncipe’, cuya gala d’entrega foi siguida por 1,2 millones d’espectadores, la Fundación ‘Príncipe de Asturias’, dirixida por Graciano García, entregó en 2003 el galardón al Pueblu Exemplar d’Asturies a la llocalidá de Navelgas, participó nes cellebraciones del Día de la Hispanidá en Nueva York, mantuvo una intensa actividá musical al traviés de los sos tres coros y concedió tres beques d’investigación.

El periodista arxelín Jean Daniel algama’l ‘Príncipe’ de Comunicación pol so “compromisu cola verdá”

Carreño y El Franco abren el camín efectivu de la recuperación de los topónimos tradicionales. La Xunta Asesora de Toponimia del Principáu tien ultimaos sendos informes p’afitar los nomes de llugar n’asturianu en dambos conceyos, primeros en solicitar la intervención del organismu asesor y cabezaleros nuna llista de siete municipios a la qu’ayeri s’axuntó l’Ayuntamientu d’Ayer.

Na so tercer xuntanza ordinaria, que se cellebró na sé de la Conseyería de Cultura, Comunicación Social y Turismu, allugada n’Uviéu, los miembros de la Xunta Asesora consensuaron los espedientes toponímicos de Carreño y El Franco, si bien queden “seis o ocho duldes” que sedrán resueltes darréu pa cumplir col siguiente pasu qu’establez la llei: Unviar la propuesta de topónimos a dambos ayuntamientos pa qu’estos -y dean el so preste y la devuelvan, aprobada, a la Xunta.

De sutaque se cumpla esi trámite, que fontes del organismu asesor prevén “rápidu”, la Xunta de Toponimia podrá elevar el correspondiente informe al Conseyu de Gobiernu pa qu’ésti fixe por decretu los topónimos oficiales de cada conceyu. Lo qu’entá nun decidió la Xunta ye si l’unvíu al Gobiernu de propuestes yá aprobaes polos conceyos va facese en tandes “de dos, de seis o de diez”, decisión de la que va depender cuándo va promulgase’l primer decretu del Executivu afitando los nomes tradicionales de llugar como válidos a tolos efectos n’indicadores de carreteres, mapes, planos y documentación oficial.

Hasta agora, ocho conceyos encamentaron los informes pertinentes pa recuperar la so toponimia: Carreño, El Franco, Llanes, L.lena, Llangréu, Xixón y Ayer, cuyes solicitúes yá tán en poder de la Xunta; y Castrillón, que ya comunicó l’unvíu de la documentación necesaria.

Col envís de nun interrumpir el so llabor durante’l veranu, la Xunta Asesora de Toponimia, constituyida’l pasáu 18 de mayu, cellebrará a lo menos una xuntanza nel mes d’agostu.

Noticia, adelantada n’Asturnews, de la petición de Carreño y El Franco

La Xunta de Toponimia del Principáu d’Asturies enfréntase a un llabor creciente. L’organismu asesor, qu’esta tarde cellebra n’Uviéu la so tercer xuntanza ordinaria, recibió yá comunicación de siete conceyos que piden informes pa recuperar los sos nomes de llugar n’asturianu, nun procesu gradual nel que les últimes peticiones cursáronles los municipios de Xixón y Castrillón.

Dambos conceyos quieren afitar en señalizaciones de carretera, mapes y documentos oficiales los sos topónimos en llingua asturiana y empobinaron yá a la Xunta la documentación pertinente pa la recuperación de los términos usaos tradicionalmente pa designar paraxes, caleyes, parroquies, pueblos y ciudaes.

Asina, diose un pasu más nel gotéu de corporaciones llocales que-y dan xera a la Xunta Asesora de Toponimia pa qu’esti organismu determine la corrección de los nomes tradicionales de llugar. Hasta agora, otros cinco conceyos -Carreño, El Franco, Llanes, L.lena y Llangréu- reclamaren formalmente l’actuación de la Xunta p’afitar la so toponimia.

L’aniciu de los trámites nun equival a la validez inmediata de los nomes propios propuestos pol organismu asesor, dependiente de la Conseyería de Cultura, Comunicación Social y Turismu, sinón que ye precisu un decretu del Gobiernu autonómicu p’aprobar cada informe de la Xunta y elevar asina los topónimos a la categoría d’oficiales.

Sólo depués de promulgáu esi decretu echará a andar la maquinaria alministrativa pa llevar a la práctica l’aplicación de los nomes tradicionales en documentos, mapes, planos y cartelos indicadores de carreteres, estaya esta cabera pa la que la Conseyería de Mediu Ambiente, Ordenación del Territoriu ya Infraestructures tien reservada una partida específica dientro’l so presupuestu.

El Principáu ponse de plazu hasta 2007 p’afitar l’usu de la toponimia tradicional

El partíu políticu que tien la llave de la declaración del asturianu como llingua oficial lidera la normalización llingüística nel ámbitu llocal. El PSOE, agora al frente’l Gobienu central y cuyos 22 diputaos autonómicos sedrán claves na inminente reforma l’Estatutu d’Autonomía del Principáu d’Asturies, controla 10 de los 15 conceyos implicaos en polítiques efectives de defensa y promoción del asturianu.

Esi ye’l númberu total de municipios que, o bien cuenten con un serviciu propiu de normalización, o encamentaron yá informes a la Xunta Asesora de Toponimia -que cellebra güei n’Uviéu la so tercer xuntanza ordinaria- pa recuperar los sos nomes tradicionales de llugar n’asturianu. D’ellos, los socialistes gobiernen en Xixón, Llanes, L.lena, Llangréu, Siero, Carreño, El Franco, Cabranes, Colunga y Nava, ayuntamientos toos ellos implicaos n’estremaos graos na normalización social del idioma asturianu.

Nos conceyos restantes, el PP controla dos -La Villa, incluyida nel inminente Serviciu Llingüísticu de la Mancomunidá de la Sidra, y Gozón, que xunta Carreño yá convocó una plaza pa esbillar al responsable de Política Llingüística de la Mancomunidá del Cabu Peñes-; Izquierda Xunida-Bloque por Asturies gobierna en Castrillón, que quier recuperar la so toponimia tradicional; URAS rixe Sariegu -tamién integráu na Comarca de la Sidra-, y un políticu independiente ta al frente’l Conceyu Bimenes, pioneru na declaración de la cooficialidá nos ayuntamientos y miembru d’esi mesmu ente supramunicipal.

Magar que’l poder efectivu col que cuenta’l PSOE ye distintu en cada conceyu, acordies cola mayoría qu’ostenta y colos pactos de gobiernu que-y garanticen el gobiernu n’importantes ayuntamientos como Xixón, les Corporaciones llocales de signu socialista afítense como cabezaleres nel procesu de normalización social entamáu recientemente cola puesta en marcha de servicios llingüísticos municipales y la creación, en xineru pasáu, de la Oficina de Política Llingüística del Principáu.

Ensin embargu, los dirixentes del PSOE implicaos nel Gobiernu autonómicu vienen refugando aceptar espresamente la cooficialidá del asturianu na inminente reforma estatutaria, a la espera qu’empiecen les conversaciones pa consensuar esa reforma, y eviten sistemáticamente comprometer la oficialidá nes sos intervenciones públiques.

Al mesmu tiempu, militantes de les Mocedaes del PSOE participen nel acabante presentar Conceyu Abiertu pola Oficialidá, plataforma cuyu únicu oxetivu ye la declaración del asturianu como llingua oficial na nueva redacción del Estatutu y na que tamién participen, de forma inédita, representantes del PP d’Asturies.

El Muséu Etnográficu del Pueblu d’Asturies estrénase como centru formativu na tradición pa los más neños. Dientro de la nueva etapa que’l centru abrió cola incorporación dafechu del pabellón de la ‘Expo’ y colos güeyos puestos n’afitase como’l mayor equipamientu etnográficu del Principáu, el muséu plantega pa tolos sábados del veranu tres talleres de fotografía, baille y construcciones en maera.

L’envís de les actividaes, que cuenten col patrociniu del Ayuntamientu de Xixón, ye averar les tradiciones asturianes a les xeneraciones más moces, yá que los talleres -de dos hores de duración y con un preciu d’inscripción de 3 euros- pretenden dir más allá’l meru deprendizaxe d’habilidaes y amosa-yos a los neños vezos y costumes de los sos mayores.

Asina, l’actividá de fotografía partirá de la bayurosa colección se semeyes del muséu pa que los más pequeños puean ver cómo yeren los asturianos d’antaño, mientres que’l taller de construcción de maera familiarizará a los participantes con entretenimientos tradicionales fechos con esi material.

En tercer llugar, l’actividá de baille y cantu quier deprende-yos a los neños pieces del repertoriu asturianu que valieron como ún de les principales diversiones de xeneraciones anteriores.

Esti últimu taller repetiráse en cinco feches, a diferencia de los dos restantes, pa caún de los cuales tán programaes cuatro feches. L’arranque de les actividaes, que van prollongase hasta’l caberu sábadu de setiembre n’horariu de 11 a 13 hores, ta previstu pal prósimu 3 de xunetu, y la inscripción pue formalizase nel númberu de teléfonu 985182960, correspondiente al propiu Muséu Etnográficu.

L’economista estaoxunidense Paul Krugman, espertu en política monetaria, divulgador nes páxines de ‘The New York Times’, entusiasta defensor de la globalización pero enforma críticu col Gobiernu de George Bush pol so populismu, ye’l nuevu Premiu ‘Príncipe de Asturias’ de Ciencies Sociales, depués que’l xuráu alcordara esti mediudía concede-y el galardón n’atención a les sos innovadores aportaciones a la doctrina económica contemporánea.

Tarrecíu pola drecha norteamericana nel poder pero tamién pola izquierda tradicional por ser abiertamente procapitalista, Krugman exerce como caderalgu na Universidá de Princeton, en Nueva Jersey, y ta consideráu ún de los más destacaos especialistes en crisis financieres de polítiques emerxentes. Nesti sen, predixo l’españíu de la convertibilidá del pesu arxentín respecto al dólar, que tuvo nel orixe de la más reciente y grave crisis económica n’Arxentina.

La candidatura de Krugman, la única que s’axuntó a última hora a la llista d’aspirantes nos momentos previos a la constitución, ayeri, del xuráu, impúsose na final a los filósofos Tzvetan Todorov y Rüdiger Safransk, y desplazó na primer ronda a otros candidatos como la Corte Penal Internacional, l’antropólogu francés Claude Levi-Strauss, l’ex canciller alemán Helmut Schmidt y l’Institutu Colombianu d’Antropoloxía y Hestoria.

En total, el xuráu tinía enriba la mesa un total de 24 aspirantes propuestos y avalaos dende Alemania, Bolivia, Bulgaria, Colombia, Ecuador, Estaos Xuníos, Francia, Holanda, México, Perú, la República Checa y España.

Paul Krugman ye’l tercer premiáu na edición númberu 24 de los Premios ‘Príncipe de Asturias’, depués que l’escritor y xermanista italianu Claudio Magris algamara’l ‘Príncipe’ de les Lletres y un grupu plurinacional de cinco oncólogos fora distinguíu, la selmana pasada, col galardón d’Investigación Científica y Técnica.

El Premiu ‘Príncipe de Asturias’ de Ciencies Sociales busca reconocer el llabor de persones o collectivos cuya actividá creadora o investigadora seya relevante en beneficiu de la Humanidá nes estayes de l’Antropoloxía, el Drechu, la Economía, la Xeografía, la Hestoria, la Sicoloxía, y la Socioloxía. Na edición de 2003, el galardón recayó nel sociólogu Jürgen Habermas.

El Partíu Popular (PP) participa per primer vegada de forma activa nun movimientu que reclama de forma “inescusable” la oficialidá de la llingua asturiana. El Conceyu Abiertu pola Oficialidá, qu’ayeri se presentó n’Uviéu, axunta a más d’ochenta organizaciones polítiques, sindicales, cíviques y culturales nun llabor qu’albidren durará tres años y qu’ha cuayar na declaración “irrenunciable” del asturianu como llingua oficial na inminente reforma del Estatutu d’Autonomía del Principáu.

Esa oportunidá perdióse na última revisión del testu, aprobada en xineru de 1999, y agora que la cuestión de la oficialidá “ta más madura, namás fai falta un emburrionín social” p’algamala. Asina lo entiende el miembru de la Xunta pola Defensa de la Llingua Asturiana Fernando Álvarez Balbuena, que fexo de voceru’l collectivu na presentación de la plataforma y que sorrayó que’l llabor qu’agora s’entama tien una fecha de caducidá: El Conceyu disolveráse cuando se faiga efectiva la prósima reforma estatutaria, daqué que Balbuena camentó que nun va ser una realidá a lo menos hasta mediaos de 2007.

Pa entós, esperen los integrantes del Conceyu, la oficialidá debe ser un fechu, frutu d’un “altu consensu que yá esiste” na sociedá asturiana y productu, n’ultima instancia d’una decisión política. Por esa razón, tien especial relevancia la participación del PP -anque inda ensin firmar el manifiestu fundacional- nes reuniones onde se deciden los futuros pasos del collectivu. Amás de los populares, que participen como partíu, el PSOE ta presente al traviés de la so estaya de Mocedá, y los representantes del Conceyu Abiertu enfótense en contar cola firma de dambes organizaciones “nun plazu razonable”.

De ser asina, tolos partíos políticos con representación parlamentaria na Xunta Xeneral del Principáu avalaríen espresamente la petición de la oficialidá de la llingua asturiana na nueva redacción del Estatutu, yá qu’Izquierda Xunida-Bloque por Asturies figura yá como firmante’l manifiestu.

De fechu, los miembros del Conceyu Abiertu pola Oficialidá -cuya reivindicación apoyen esplícitamente los principales sindicatos d’Asturies, CCOO, UXT, CSI, USO y Suatea- esperen incorporar darréu nueves firmes qu’avalen el so manifiestu, nel que s’esixe la declaración del asturianu como llingua oficial na renovación del Estatutu pa que “sía posible facer vida con total normalidá tanto n’asturianu como en castellanu”.

L’asuntu cuerre priesa, según Pilar Fernández, representante del Conceyu, yá que la oficialización ta teniendo un camín “tan llargu, que igual nos muerre la llingua nes manes”. Y nesa futurible declaración d’oficialidá va ser vital, aseguraron los representantes del collectivu, que se mantenga la percepción “que yá hai, por parte de los grandes partíos políticos, de qu’esti procesu (la oficialidá) yá nun tien vuelta”.

No inmediato, el Conceyu Abiertu pola Oficialidá trabayará tanto n’esplica-y a la ciudadanía qué supondrá la declaración del asturianu como llingua oficial, como na reivindicación social p’asoleyar que trátase d’una cuestión “de drechos ciudadanos”.

Carreño y Gozón dan el primer gran pasu p’hacia la normalización del asturianu dende l’Alministración llocal. Los dos ayuntamientos qu’integren la Mancomunidá del Cabu Peñes abren un procesu de selección pa elixir al responsable del futuru serviciu municipal de normalización llingüística, esbilla que supondrá la puesta en marcha efectiva d’esa oficina, llamada a integrase na rede normalizadora de la llingua asturiana nos conceyos.

Darréu finen les prebes de selección del responsable del nuevu serviciu municipal de Cabu Peñes, na que los aspirantes podrán inscribise inda hasta’l 30 de xunu, los ayuntamientos de Carreño y Gozón axuntaránse dafechu a los conceyos de Xixón, Llangréu y L.lena, onde yá funcionen oficines de normalización, y alitarán la puesta en marcha definitiva d’organismos asemeyaos en Siero y na Mancomunidá de la Sidra, a puntu tamién d’echar a andar.

Con esi esquema completu, la promoción y defensa del asturianu nel ámbitu municipal aportará a más de 400.000 persones, casi la mitá de la población del Principáu, tal como quedó asoleyao na presentación de la rede de normalización llingüística nos conceyos, hai agora un mes.

Según asoleyó el Boletín Oficial del Principáu d’Asturies (BOPA) na so edición del pasáu vienres, la persona que resulte seleccionada p’asumir la dirección del nuevu serviciu llocal de normalización tendrá una xornada llaboral de 21 hores selmanales y desempeñará’l so llabor con un contratu temporal prorrogable a partir del 1 de xineru de 2005, acordies con un conveniu inda por firmar ente la Mancomunidá del Cabu Peñes y la Oficina de Política Llingüística del Principáu.

Promulgación de la midida nel BOPA