Sociedá

El Conceyu d’El Franco sumóse esta selmana a los de San Tiso d’Abres y de Cuaña nel so refugue a la inclusión de les fasteres de Navia-Eo nos territorios culturales de la candidatura galaico-portuguesa a la UNESCO. Mentantu el sofitu de la Federación d’Asociaciones del Occidente a la candidatura provoca la dixebra ente los colectivos que la integren.

El plenu del Ayuntamientu d’El Franco rechaza la iniciativa de Galicia y Portugal ensin entrar a valorar el so conteníu fonderu y declara facelo más “poles formes que pol fondo”, sobremanera por incluir conceyos asturianos ensin tener en cuenta a les instituciones autonómiques y locales de la comunidá. L’alcaldesa del conceyu, Cecilia Pérez, del PSOE espresó’l so “respetu absolutu” pola candidatura y llamentó la manera na que s’inxertaron nella territorios del Navia-Eo “ensin tenelos en cuenta”.

Per otru llau diversos colectivos integrantes de la Federación d’Asociaciones del Occidente desmarcáronse del sofitu brindáu pola xunta directiva d’esta plataforma a la declaración del patrimoniu oral inmaterial galaico-portugués como Patrimoniu de la Humanidá. Asociaciones de Bual, Porcía y A Veiga llamentaron la decisión de la xunta directiva de la Federación de brindar esti sofitu ensin consultar a los grupos que la formen. Una d’elles, San Tirso del Eo va celebrar esti viernes 28 un “magosto” n’Abres nel que se va presentar la candidatura galaico-portuguesa y al que tán invitaos los asistentes a la polémica Escola Fermín Penzol de Ribadeo qu’escomienza mañana.

La presentación énte los medios del programa de la I Escola Permanente Fermín Penzol de Ribadeo valió pa que la conceyala de Cultura del conceyu agospiador Mari Luz Álvarez llamentara l’ausencia de la Xunta pola Defensa de la Llingua y de Xeira nes xornaes. La responsable de Cultura de Ribadeo, del BNG, criticó a les asociaciones asturianes y acusóles de ser “títeres” de l’Academia de la Llingua.

La edil nacionalista calificó de ‘boicot’ l’anunciu de Xeira y la Xunta de nun acudir a la Escola Fermìn Penzol y lo que calificó de “absoluta dependencia” de l’Academia d’estos colectivos, controlaos, a xuiciu de la conceyal “al través de la fidelización de beques, ayudes y subvenciones”.

Les declaraciones de la edil de Cultura de Ribadeo recibieron darréu el retruque d’Izquierda Asturiana (IAS). La formación nacionalista asturiana considera “intolerable” el fechu de qu’un cargu públicu critique a una institución llingüística asturiana “acusándola prácticamente de práctiques mafioses, acusase a les organizaciones referenciales de defensa del asturianu y del gallegu asturianu, Xunta pola Defensa de la Llingua Asturiana y Xeira, de ser títeres sin opinión propia que respuenden a les órdenes d’instancies esternes y atacase a partíos políticos asturianos acusándolos de facer crecer una polémica inesistente”, asina como de “emponderar l’actitú d’un Presidente, Tini Arecestá, que ta siendo el más nefastu nel ámbitu de la defensa de los derechos llingüísticos y de la cultura de los y les asturianes de tola democracia”, afirma IAS.

La formación nacionalista asturiana caltién que “énte la falta de respuesta apropiada por parte de les instituciones únicamente nos queda la organización d’un movimientu ciudadanu que consiga despertar les conciencies y les acciones de los políticos” y considera “un bon momentu” pa facelo la prósima convocatoria’l 5 de payares d’una manifestación entamada pol Conceyu Abiertu pola Oficialidá.

L’asociación cultural Xeira espón nun comunicáu les razones poles qu’esti colectivu refuga les xornaes sobre normalización llingüística que van entamar el prósimu fin de selmana en Ribadeo y afirma que nelles conflúi “úa maniobra orquestada dende Galicia y un sector del asturianismo”. El colectivu acusa a Política Llingüística de nun rechazar les intromisiones de Galicia y de “connivencia” con éstes.

Xeira caltién que nes xornaes de la Escola Fermín Penzol “hai ausencias clamorosas como a del Academia de la Llingua Asturiana” al pesar de tar planteaes como un alcuentru pa tender pontes ente Galicia y Asturies. Pa esta asociación mientres se facía la convocatoria de les xornaes produciéronse dellos fechos que formaríen parte de la maniobra denunciada como la publicación d’un editorial favorable a la oficialidá del gallego n’Asturies nel semanariu Les Noticies y les declaraciones feches dende la Oficina de Política Llingüística, que pa l’asociación cultural de Navia-Eo “tampouco tein esplicación inocente”. Xeira ye especialmente dura col departamentu de la Conseyeria de Cultura: “esta institución, que ten el llabor de protexer, preservar y promocionar a nosa llingua, y a responsabilidá de diseñar as mididas que favorezan el sou uso social y garanticen os nosos deretos llingüísticos, nin rechaza os argumentos filolóxicos esgrimidos por Galicia, nin espón ningún que los contradiga”, afirma esti colectivu pal qu’esti fechu “nestas circunstancias nun se pode interpretar más que como úa postura de connivencia”.

L’asociación cultural que preside Xosé Miguel Suárez enumera una serie d’iniciatives que califica de “intromisiones dende Galicia” como la elaboración del Plan de Normalización de la Xunta, el nomamientu d’un representante pa Navia-Eo de la Real Academia Galega, la promoción de la candidatura a la UNESCO galaico-portuguesa en San Tiso o la propuesta sobre llingües del estáu d’ERC. Xeira considera “inaceptable cualquer iniciativa que, sala d’unde sala, contemple y día esfouto al interés de Galicia por impoñer a llingua gallega nun territorio que nun é de sou”.

Nel comunicáu fechu públicu l’asociación eonaviega reafirma la identidá propia de la fala d’esos conceyos y l’asturianidá de la zona: “nun falamos gallego, Galicia nun ten nada que dicir, y non sólo porque esto sía administrativamente outra comunidá”. Finalmente el colectivu cultural considera que “el futuro da llingua que se fala nel Navia-Eo decídenlo os sous falantes a través das súas asociacióis, y das súas institucióis académicas y políticas”.

La escritora ya investigadora Marta Mori d’Arriba abre esta tarde la última de les sesiones de les XXIV Xornaes Internacionales d’Estudiu de l’Academia de la Llingua Asturiana. Mori va falar del sentimientu d’esiliu interior na xeneración protagonista de la poesía asturiana contemporánea. El pieslle va ponelu Inaciu Llope con una conferencia sobre’l xuegu d’identidaes na Tierra Navia-Eo.

“L’exiliu interior. El sentimientu de la tierra na poesía asturiana contemporánea” ye’l títulu de la conferencia que Marta Mori va pronunciar a les 16.30 na Facultá de Filoloxía. Van siguila na última de les Xornaes d’Estudiu de l’Academia les comunicaciones d’Aurelio González Ovies: “Venti maneres de morrer: l’eufemismu de la muerte”;Ana Isabel Llaneza Vioque con “N’alcordanza del compromisu de Mánfer de la Llera”; Esperanza Mariño Davila: “Naquellos años d’amargor y esperanza colos ‘Escritos del papel rosa’ d’Alberto Cobreros Gil”; Xosé Lluis Campal: “El teatru mineru de José León Delestal. Notes sobre ‘Oro negro'”; Rafael Rodríguez Valdés con “El bable y los bablistas. La paya nel güeyu axenu…, un documentu de Matías Conde”; y Xosé Ramón Iglesias Cueva: “L’orixe social de los autores de la lliteratura asturiana.Formación intelectual”. A les 19.30 Inaciu Llope va poner pieslle a les Xornaes cola conferencia: “Xuegu d’identidaes na Tierra de Navia-Eo. Un averamientu críticu”.

Representantes de la Xunta pola Defensa de la Llingua y de Xeira ufiertaron esti llunes 24 una rueda de prensa conxunta pa desplicar les razones del so refugue a participar nel congresu de Ribadeo sobre normalización llingÚística organizáu pola Universidá de Vigo. Les estremaes inxerencies foriates na realidá llingüística asturiana, la falta d’información de los organizadores y la sospecha de que se trataba en cierto d’un actu de reafirmación galleguista son les razones que tornaron a la Xunta y Xeira.

Pa entrambes asociaciones anguaño nun se dan les condiciones necesaries nes que pueda desenvolvese un alcuentru como’l programáu pal prósimu fin de selmana en Ribadeo. Iniciatives como la candidatura galaico-portuguesa qu’inclúi parte del territoriu asturianu, la propuesta d’ERc pa oficializar el gallego nel Navia-Eo o el conteníu del Plan Xeneral de Normalización Llingüística de Galicia no que cinca a los conceyos d’Entrambasaguas son fechos que faen imposible nestos momentos, a xuiciu de la Xunta y Xeira, un entendimientu con colectivos del otru llau del Eo.

Los representantes de les organizaciones cíviques asturianes coincidieron en señalar la falta d’un marcu llegal afayadizu n’Asturies, como’l que podía ufiertar la oficialidá, pa que “otros dende fuera quieran facer lo que dende equí nun se fai”.

La Xunta pola Defensa de la Llingua y l’asociación Xeira aprovecharon la rueda de prensa pa facer un llamamientu a la ciudadanía pa la convocatoria el prósimu sábadu 5 de payares n’Uviéu d’una manifestación del Conseyu Abiertu pola Oficialidá.

El profesor de la Universidá d’Uviéu y ex presidente de l’Academia de la Llingua Xosé Lluis García Arias fue l’encargáu d’abrir les XIV Xornaes Internacionales d’Estudiu qu’organiza la institución llingüística asturiana na Facultá de Filoloxía. Les Xornaes siguen esti martes 25 coles intervenciones de Carmén Alén Garabato y Francisco Llera Ramo, ente otros.

Pal profesor García Arias la presencia de palabres d’orixe árabe nel dominiu astur-lleonés nun ye tan significativa como n’otros dominios llingüísticos peninsulares. Inda asina unos tres mil términos del idioma asturianu pueden tener los sos raigaños etimolóxicos nes fales mozárabes, según amosó l’ex presidente de l’Academia na conferencia cola que s’abrieron els Xornaes d’Estudiu.

La comparanza de la llingua asturiana y la occitana como idiomes en situación minorizada va ser el tema sobre’l que trate la comunicación de la profesora Carmen Alén Garabato cola que se reanuden les Xornaes esta tarde na Facultá de Filoloxía. El sociólogu Francisco Llera Ramo va ser l’encargáu de pesllar la sesión d’esti martes 25 con una ponencia titulada “Aspeutos sociollingüísticoa y políticos nel conceyu de Xixón”.

Na segunda de les Xornaes tamién van intervenir Iván Cuevas sobre la emigración asturianista en Barcelona, Fernando González del Álamo alrodiu d’una polémica sobre l’asturianu de 1965, María del Mar Martín sobre les ilustraciones nos llibros infantiles, Armando Murias alrodiu de los anglicismos nel vocabulariu mineru y Eva del Solar sobre rasgos llingüísticos de la parroquia de Caldones.

Esti llunes 24 escomiencen na Facultá de Filoloxía d’Uviéu les XXIV Xornaes Internacionales d’Estudiu de l’Academia de la Llingua. Ente los participantes tán Carmén Alén Garabato que va falar de les asemeyances na minorización del occitano y l’asturiano; Francisco Llera, que va tratar d’aspectos sociollingüísticos y políticos en Xixón, ya Inaciu Llope que da una conferencia sobre’l xuegu d’identidaes na tierra de Navia-Eo.

El profesor Xosé Lluis García Arias va ser l’encargáu d’abrir les XXIV Xornaes a les 16.30, con una conferencia sobre arabismos nel dominiu llingüísticu astur. Diverses comunicaciones sobre fonética y toponimia van siguir a la conferencia de García Arias na primer xornada, que va rematar el profesor Philip Obrist con una ponencia sobre “Filix y los sos derivaos na toponimia asturiana”.

Mañana martes ye Carmen Alén Garabato la que va abrir les xornaes a les 16.30 con una conferencia titulada “Dalgunes consideraciones sobre la situación sociollingüística de dos llingües minorizaes: occitano y asturiano”. A les 19.00, después de delles comunicaciones sobre diversos aspectos de la realidá cultural asturiana, Francisco Llera Ramo lleerá la so ponencia “Aspeutos sociollingüísticos y políticos nel conceyu de Xixón”.

L’académica Marta Mori va abrir les Xornaes d’Estudiu nel so últimu día, el miércoles 26, a les 16.30 con una conferencia titulada “L’esiliu interior. El sentimientu de la tierra na poesía asturiana contemporánea”. Darréu de les comunicaciones, a les 19.30, Inaciu Llope pieslla les xornaes cola conferencia “Xuegu d’identidaes na tierra del Navia-Eo. Un averamientu críticu”.

XXIV Xornaes Internacionales d’Estudiu

Una comisión internacional d’espertos va decidir el prósimu 25 de payares respective a la candidatura del Patrimoniu Oral Inmaterial galaico-portugués presentada por instituciones y colectivos de los dos países riberanos del Miño. La conseyera de Cultura de la Xunta de Galica afirmó nun actu d’apoyu a la candidatura celebráu nel Museo do Pobo Galego de Compostela que’l so gobiernu va defendela “con uñes y con dientes”.

La titular gallega de Cultura, Ánxela Bugallo manifestó sentise “namorada” de la iniciativa y quiso resaltar el so optimismu sobre l’ésitu de la candidatura: “les meigues tán conxurándose pa ganar”. Pel so llau, el presidente de l’asociación promotora de la iniciativa, el colectivu “Ponte…nas ondas”, Santiago Veloso, tamién s’amosó optimista sobre’l resultáu de les deliberaciones de la UNESCO: “falta poco más d’un mes pa que’l nuestru patrimoniu s’esparda pel mundu”, dixo.

El coordinador d’Izquierda Xunida d’Asturies Jesús Iglesias amosóse contentu col resultáu de la negociación de la so coalición nel gobiernu asturianu pa rematar el proyectu de presupuestos autonómicos. Pal cabezaleru d’IX les cuentes del Principáu pal prósimua añu “espresen el compromisu de la comunidá autónoma cola sociedá asturiana!.

Iglesias indicó que s’empleen “tolos recursos” de los que puede disponer el gobiernu rexonal pa tentar resolver los problemes de los asturianos”, con medíes como’l salariu social, la intervención na contención del preciu de vivienda o iniciatives pa potenciar l’empléu xuvenil.

El coordinador d’Izquierda Xunida destacó l’importante porcentaxe destináu a gastu social, el 65 por ciento del presupuestu y el incrementu nes partíes de I+D+i (25 por ciento), les destinaes a la Universidá (11 por ciento), a política social (15 por ciento), a la llucha contra los riesgos llaborales (15,43 por ciento) y a la cooperación al desarrollu (26,24 por ciento).

El prósimu llunes 24 escomiencen na Facultá de Filoloxía d’Uviéu les XXIV Xornaes Internacionales d’Estudiu de l’Academia de la Llingua. Ente los participantes tán Carmén Alén Garabato que va falar de les asemeyances na minorización del occitano y l’asturiano; Francisco Llera, que va tratar d’aspectos sociollingüísticos y políticos en Xixón, ya Inaciu Llope que da una conferencia sobre’l xuegu d’identidaes na tierra de Navia-Eo.

El profesor Xosé Lluis García Arias va ser l’encargáu d’abrir les XXIV Xornaes el llunes 24, a les 16.30, con una conferencia sobre arabismos nel dominiu llingüísticu astur. Diverses comunicaciones sobre fonética y toponimia van siguir a la conferencia de García Arias na primer xornada, que va rematar el profesor Philip Obrist con una ponencia sobre “Filix y los sos derivaos na toponimia asturiana”.

El martes 25 ye Carmen Alén Garabato la que va abrir les xornaes a les 16.30 con una conferencia titulada “Dalgunes consideraciones sobre la situación sociollingüística de dos llingües minorizaes: occitano y asturiano”. A les 19.00, después de delles comunicaciones sobre diversos aspectos de la realidá cultural asturiana, Francisco Llera Ramo lleerá la so ponencia “Aspeutos sociollingüísticos y políticos nel conceyu de Xixón”.

L’académica Marta Mori va abrir les Xornaes d’Estudiu nel so últimu día, el miércoles 26, a les 16.30 con una conferencia titulada “L’esiliu interior. El sentimientu de la tierra na poesía asturiana contemporánea”. Darréu de les comunicaciones, a les 19.30, Inaciu Llope pieslla les xornaes cola conferencia “Xuegu d’identidaes na tierra del Navia-Eo. Un averamientu críticu”.

Programa completu de les XXIV Xornaes d’Estudiu