Sociedá

L’Academia de la Llingua Asturiana abrió esti llunes 16 el plazu de matriculación pa la so Preba de Conocencia semestral, correpondiente a xineru. Los interesaos en concurrir al esame de la institución llingüística tienen hasta’l prósimu 26 d’esti mes pa formalizar la so inscripción.

La fecha pa la celebración de la preba ye’l prósimu 28 de xineru y l’exame va consistir nun exerciciu escritu (dictáu, torna, exercicios gramaticales, redaición) y otra parte oral (conversación). La convocatoria puede consultase na web oficial de l’Academia o na sé de la institución na cai Santa Cruz, 6, 2u. d’Uviéu.

Preba de Conocencia

La Xunta pola Defensa de la Llingua Asturiana decidió concede-y el ‘madreñazu’ de los sos premios añales Andrés Solar al director xeneral del Ente Públicu de Comunicación del Principáu, José Ramón Pérez Ornia “como responsable últimu de que l´asturianu tea escluyío d´esti organismu y del despreciu que ta sufriendo la llingua asturiana nel procesu de creación d´esti ente públicu”.

La Xunta personaliza en Pérez Ornia la falta de compromisu de la radiotelevisión autonómica col idioma asturianu y cola so normalización, talo reflexa’l fallu del premiu negativu d’esta organización cívica pa la que “la puesta en marcha del Ente de comunicación y les declaraciones de los sos reponsables ta espeyando non solo que la Televisión nun va ser n´asturianu sinón que nun esiste nengún tipu de planificación pa la presencia de la llingua y la so normalización, dexando asina en papel moyao los cacarexaos Pautu de Gobiernu y el Plan de Normalización”. Nesi sen La Xunta recuerda la impugnación que fexo en 2005 del procesu de selección del personal del Ente Públicu y anuncia que va siguir trabayando nel so llabor de denuncia y concienciación “pa que los medios públicos asturianos tengan presentes l’usu y seyan una ferramienta pa salvar la nuestra llingua, non pa facela desaparecer”.

Nel apartáu positivu de los Premios Andrés Solar, la Xunta concéde-y el Pegollu, a la empresa informática Araz Net S.L. “pola so xera en favor del usu y l´espardimientu de la llingua asturiana”.

L’actu d’entrega de los Premios Andrés Solar va facese el prósimu 27 de xineru nel Antigu Institutu de Xixón y darréu de la ceremonia, la Xunta entama la so tradicional espicha, pa la que tien puestes a la vienda les entraes a un preciu de venti euros.

El presidente del Principáu Vicente Álvarez Areces adelantró esti viernes 13 que nel prósimu cume de los gobiernos d’Asturies y Galicia que va celebrase los díes 29 y 30 de xineru l’axenda de trabayu va cubrir “prácticamente toles estayes de l’acción del Gobiernu na Xunta y n’Asturies”. La polémica propuesta del BNG sobre conceyos limítrofes, sicasí, esclúise d’esta axenda común ente les dos comunidaes ya qu’a xuiciu del presidente asturianu: “nengún de los Gobiernos tien el menor interés en buscar eses cuestiones”.

Respective a la propuesta de los socios de coalición del executivu de Pérez Touriño sobre un nuevu estatutu pa Galicia -qu’armó un gran espolín va unes selmanes a esti y al otru llau del Eo- el presidente del Principáu caltién que “les propuestes de les formaciones polítiques que puedan tar integraes en Gobiernos son propuestes de les formaciones polítiques, non d’esos Gobiernos”. Álvarez Areces cuenta que, nesi sen “los dos Gobiernos tenemos un programa de trabayu nel que nun figuren esos temas y queremos construir en positivo el futuru d’Asturies y Galicia y vamos cooperar estrechísimamente pa que sea asina”.

El cabezaleru del executivu autonómicu asturianu anunció un cume llaráu de proyectos comunes ente la nuestra comunidà y la gallega pa presentar énte’l gobiernu del estáu, “munchos d’ellos bien relevantes”, según la calificación d’Areces, que tamién dio n’apellidar l’axenda del cume d’a finales de xineru como de “bien densa y dilatada”.

El secretariu xeneral de la Federación Socialista Asturiana (FSA) Javier Fernández anunció la intención del so partíu de ver entamada y rematada la reforma del Estatutu d’equí a un añu. El másimu responsable de los socialistes asturianos refugó entamar una ampliación del autogobiernu “dende una idea identitaria” y apuesta por facelo “polo que puede suponer en cuantes a la prosimidá de los ciudadanos a les instituciones”.

El cabezaleru de la FSA afirmó en declaraciones a la emisora territorial de Radio Nacional d’España n’Asturies qu’énte la reforma “habrá que evaluar qué competencies son les que nos van permitir meyorar el desarrollu d’Asturies, l’ equilibriu social y territorial, y non cambialo por cambialo o por asumir competencies que, en dalgunos casos, puen tar meyor en manes del Estáu».

Respective a los plazos del debate estatutariu Fernández afirmó que “la nuestra intención ye que’l procesu s’abra agora y que pueda tar finalizáu por estes mesmes feches l’añu que vien”. Pal dirixente socialista esta reforma nun supón “nengún tipu d’imposición, nin una urxencia, pero ye razonable tomar la iniciativa nesti tipu de coses».

El conteníu de la reforma que defende’l PSOE n’Asturies fue claramente especificáu por Javier Fernández. Pa la FSA hai “dalgunes competencias que pueden ser interesantes” pal Principáu y la reforma sería necesaria nesi sen “non dende la idea identitaria que tienen n’otros territorios d’España, porque la personalidá d’Asturies ye mui marcada pero nun s’enfoca a lo político, sinón polo que puede suponer en cuantes a la prosimidá de los ciudadanos a les instituciones naquelles competencies qu’entendamos que pueden exercese de manera más eficaz dende la proximidá”, dixo Fernández na entrevista que güei reproducen diversos medios escritos asturianos.

La Federación Socialista Asturiana (FSA) nun ta dimpuesta a aceptar la cooficialidá na prósima reforma del estatutu. Asina lo dexó claro’l secretariu xeneral de los socialistes asturianos en declaraciones feches a RNA cuando manifestó que’l so partíu va refugar “cláusules d’imposición a aquellos que nun quieran falar llingua asturiana”.

El responsable másimu de la FSA resumió la postura que va caltener la so fórmación ènte les propuestes d’incluir la oficialidá na reforma estatutaria que planteen los sos socios d’Izquierda Xunida-Bloque por Asturies: “protexer l’asturiano, sí; cooficializalo, na medida qu’eso tien un elementu d’imposición, nun va a ser la postura de la FSA-PSOE”, afirmó rotundu énte los micrófonos de Radio Nacional.

El director xeneral de Promoción Cultural y Política Llingüística, Carlos Madera anunció esti viernes 13 n’Avilés que los espedientes toponímicos d’esti conceyu y del vecín de Corvera podíen tar aprebaos pal prósimu mes de mayu. Colos espedientes d’Avilés y Corvera son ya cuarenta y ún los conceyos que solicitaron la revisión de los sos nomes de llugar pola Xunta de Toponimia.

Madera asistió’l pasáu viernes a la reunión d’esti organismu asesor nel Palaciu de Valdecarzana na villa del Adelantráu y presidió un aconceyamientu nel que tamién tuvo presente l’alcalde avilesín Santiago Vega.

Los trabayos fechos hasta agora pola Xunta Asesora de Toponimia del Principáu consiguieron recuperar más de 3.000 nomes de llugar cola so forma tradicional. De los cuarenta y ún conceyos que solicitaron la so revisión toponímica son diez los que ya vieron aprebáu’l decretu correspondiente pa la oficialización de los nomes propuestos pola Xunta toponímica: Llanes, Carreño, El Franco, Gozón, Llangréu, L.lena, Sariego, Cabranes, Bimenes y Villaviciosa. El Conseyu de Gobiernu tien enriba la mesa pendientes d’oficializar los espedientes d’otros ocho conceyos Aller, Colunga, Nava, Ribera d’Arriba, Llaviana, Morcín, Pezós y Salime, a los qu’agora se sumen los d’Avilés y Corvera.

El Conseyu de Ministros del gobiernu español va dar esti viernes 13 lluz verde al proyectu de llei que reconoz les llingües de signos española y catalana nel estáu. El proyectu que va aprobar el gobiernu quier garantizar el derechu de los alrodiu d’un millón de ciudadanos con discapacidá auditiva a comunicase cola Administración y colos diversos servicios públicos na llingua de signos y a ser respondíu de la mesmamiente.

El testu que va ver el vistu bonu del Conseyu de Ministros contempla que cualaquier persona sorda pueda cuntar con un intérprete nes sos relaciones coles diverses administraciones y servicios públicos como los sanitarios o d’enseñanza. La nueva llei va garantizar tamién el derechu a deprender la llingua de signos y el derecho a usala, al través d’intérpretes y otros medios, como’l subtituláu, en determinaos ámbitos. Nel proyectu améstase amás que les administraciones educatives habrán determinar qué centros ufierten enseñanza “billingüe” y facilitar tolos medios a les persones sordes pa que puedan acceder a la comunicación coles distintes instancies públiques.

Según los datos que remana’l Ministeriu de Trabayu y de Servicios Sociales nel estáu español hai alrodiu d’un millón de persones sordes, que seríen les que van beneficiase más directamente d’esta nueva llei. El proyectu del gobiernu central contempla la “oficialidá” tanto de la llingua de signos española-castellana como la catalana.

L’asociación qu’organiza la fiesta vaqueira del Alto d’Aristébano opónse a que persones del mesmu sexu puedan casar pol ritu folklóricu inspiráu nes bodes tradicionales de los brañeiros asturiano que promociona de cuantayá esta romería añal. Les bases pa la inscripción de los posibles ‘mozos’ recalquen claro que los solicitantes habrán ser heterosexuales y la organización de la folixa afirma que cualaquier solicitú de pareyes gais o lesbianes van refugase dafechu.

La presidenta de l’Asociación Amigos del Festival Vaqueiro, responsable d’organizar la romería d’Aristébano, xustificó el non afayamientu de la fiesta a la nueva realidá llegal nel estáu respective a casorios de persones del mesmu sexu que la ‘vaqueirada’ tenta recrear una celebración tradicional y que n’antaño una boda ente dos homes o dos muyeres “yera impensable”.

El Festival d’Aristébano celébrase tolos años l’últimu domingu del mes de xunetu y tenta recrear les bodes tradicionales de los vaqueiros del occidente asturianu nuna folixa qu’algama cada branu una gran repercusión mediática. La romería fue entamada pol folklorista Modesto González Cobas en plenu franquismu y abondos colectivos d’investigación etnográfica, asina como los propios vecinos de la zona d’orixe vaqueiru, tienen descalificao la posible fidelidá de la folixa a la tradición y considérenla una falsificación con más enfotu nel espectáculu que nel conteníu cultural.

La revista dixital cántabra dedicada a les llingües minoritaries, “Alcuentros”, asoleya un nuevu númberu cola edición d’iviernu nel que s’analiza l’asturianu oriental y nel que s’entrevisten a los profesores de la Facultá de Filoloxía de la Universidá d’Uvieu, Xulio Viejo Fernández y Xose Lluis García Arias.

En sendes entrevistes a Xulio Viejo y Xose Lluis García Arias, los profesores de la Universidá d’Uvieu analicen la formación histórica del patrimoniu llingüísticu cántabru y la gramática histórica, respectivamente. Pela so parte, Jesús González Vizán, miembru de l’Asociación zamorana Furmientu, estudia l’estáu de les fales zamoranes n’actualidá. Rául Molleda García dedica’l so artículu a la toponimia cántabra, mentes que Silvia González Goñi aporta unos apuntes sobre la fala y el lexicu de la Merindad de Sotoscuevas (Burgos).

Esti sestu númberu complétase con un artículu sobre l’asturianu oriental, ellaboráu por Francisco García González.

Revista Alcuentros

El palaciu de Valdecarzana acueye esti viernes 13 al meudía l’aconceyamientu de la Xunta Asesora de Toponimia del Principáu con representantes del Ayuntamientu d’Aviles pa entamar la revisión del nomenclátor municipal. La reunión forma parte de les avezaes que l’organismu d’espertos de l’administración autonómica celebra colos responsables de los conceyos solicitantes de la igua de los sos nomes de llugar.

El director xeneral de Promoción Cultural y Política Llingüística de la Conseyería de Cultura, Carlos Madera y el responsable de la Oficina de Política Llingüística del Principáu, Ramón d’Andrés asisten al aconceyamientu de la Xunta de Toponimia n’Avilés al llau de la comisión multidisciplinar d’especialistes encargada de la revisión toponímica d’Asturies. Avilés xúntase asina con esti pasu a los conceyos -cásique la mitá del total de la nuestra comunidá- n’entamar l’apertura del so espediente toponímicu.