Sociedá

Otru Día de les Lletres. Hailu que yá perdió la cuenta de cuántos años llevamos manifestándonos, saliendo a la cai a esixir un derechu fundamental de la persona: la posibilidá llegal d’usar la llingua propia en cualquier situación de la vida. Los demócrates de verdá diben plasmar si supieren que n’Asturies, con decades yá de gobiernos democráticos, tovía ye illegal usar otra llingua que nun seya’l castellanu. ¡Y fálennos d’imposición a nós, que somos los que la sufrimos! ¡Guapa manera de da-y la vuelta a una culpa que nun ye más que de los que nos nieguen derechos!

Llega’l Día de les Lletres y conseyeros y directores xenerales asoleyen los grandes llogros en política llingüística y faen declaraciones rotundes. La Xunta pola Defensa de la Llingua Asturiana enxamás va criticar los avances qu’haya na promoción del asturianu: bien ta que s’oficialice la nuesa toponimia, qu’aumenten los presupuestos pal nuesu idioma…, pero lo que nun vamos almitir ye que se mienta y se quiera embabucar a la xente. Y ye que dellos responsables de la Federación Socialista Asturiana y del Partíu Popular vuelven col cantar de qu’ellos tán pola promoción, pola protección, pola voluntariedá y non pola oficialidá y la imposición. Yera pa rise pola floxedá de razonamientos tan ruinos… si nun supieremos que la mentira milenta veces repetida acaba caltrizando na opinión pública. A eso tán xugando.

Queremos dicilo alto y claro, otra vez más: promoción y oficialidá, voluntariedá y oficialidá nun son conceptos escluyentes. La oficialidá nun ye imposición. Imposición ye la situación que sufrimos agora onde namás el castellanu ye llegal. La oficialidá ye dalgo tan cenciello como que se reconozan los derechos llingüísticos a tolos asturianos y asturianes, falen la llingua que falen. ¿Cómo-yos costará tanto entendelo? ¿Será que la so idea de democracia nun ye más qu’un barniz qu’echen según la so comenencia?

Hai otra mentira más nesi tipu de declaraciones. Y ye que la promoción ensin más, ensin una marcación llegal d’oficialidá lleva a la desaparición progresiva de la llingua minorizada. Ehí tán los estudios sociolóxicos pa demostralo, pero tamien la nuesa esperiencia diaria. ¿Que llingua fala la mocedá d’Asturies depues de tantos años y de tantos gobiernos asturianos partidarios de la famosa «promoción»? ¿Cómo quieren qu’una llingua gane falantes y prestixu si ye illegal usala?

El problema ye que los amantes de la promoción y de la llibertá —pero que se nieguen a conceder la oficialidá— nun ye que tean confundíos y nun se dean cuenta: ye que lo dicen a sabiendes. Y dicen coses como que l’asturianu yá lo pue usar quien quiera, qu’hai oficialidá de facto… Claro, deben dicilo poles munches asociaciones que nun puen llegalizase presentando la documentación n’asturianu, o poles tesis doctorales refugaes por tramitase n’asturianu, o polos munchos escolinos que nun puen estudiar asturianu nos sos centros, o polos estudiosos que nun puen presentar una ponencia n’asturianu nun congresu entamáu por una institución oficial que se llama —nun vos rir— Institutu d’Estudios Asturianos. Esa ye la realidá de la promoción a cencielles: indefensión llegal, marxinación, represión.

Tamos nun momentu políticu importante pal futuru del asturianu y del gallego-asturianu. En tol Estáu español tán reformándose los sos estatutos y n’Asturies tamos tamien nesi procesu. Ye la ocasión pa incluyir la oficialidá y por eso cientu cincuenta entidaes asturianes tamos trabayando por esparder esi mensaxe per Asturies nel Conceyu Abiertu pola Oficialidá. Son munches les declaraciones que se tán faciendo sobre les postures de cada partíu, pero tamos enfotaos en qu’Asturies nun pue ser diferente nin menos que naide. A la fin, el bon xacíu, la sensatez, l’altura de mires tien que s’imponer nos cabezaleros de la FSA y el PP perriba de les zunes personales y el provincianismu. Tienen que se poner a l’altura de la sociedá asturiana que, mayoritariamente, nun tien esos mieos y esos prexucios que tienen dellos políticos.

Sicasí, refórmese l’estatutu d’equí a dos meses o d’equí a dos años, con pactu ente los partíos mayoritarios o ensin el, fagan lo que fagan, un estatutu ensin oficialidá diba ser un fraude, una burlla. Dirán lo que quieran, lo que yá tán diciendo: que nun hai demanda, que la xente nun lo quier, pero ellos saben que la oficialidá ye l’únicu tema social y cultural que se vien reivindicando en tolos debates estatutarios y ye’l que vien movilizando nestes decades a más xente y a más entidaes y asociaciones. ¿Cuánta demanda social hai pa la montonera de lleis que s’aprobaron na Xunta Xeneral? ¿Midió daquien la demanda de caúna d’elles? ¿Cuntaron a la xente que se manifestaba? Non. Nun son más que sides pa nun s’encarar cola realidá: qu’hai un sector mui importante de la sociedá que reclamamos daque que ye de xusticia y que ye una vergüenza que partíos que se dicen democráticos entá nun garantizaren esi derechu.

Pero que-yos quede bien claro: la nuesa llingua nun va desapaecer por decretu o por un estatutu que nun recueya la oficialidá. Y el movimientu de reinvindicación tampoco. Equí tamos y equí vamos siguir tando pa llograr la oficialidá. Nun nos val otra cosa. Somos mui necios y amás tenemos tola razón y tol derechu. ¡L’asturianu, llingua oficial, yá!

La Escuela de Seronda en Xixón y los Conseyos de Mocedá pidieron nun comunicáu públicu, el respetu pa los derechos llingüísticos de los falantes d’asturianu y gallego-asturianu asina como pa les ordenances municipales de la llingua nos conceyos. D’esta manera, espresaron tamien el so apoyu a los Conseyos Asesores y a les Oficines de la Llingua que dende los conceyos vienen trabayando nesi sen.

Nel comunicáu, invitábase a tolos conceyos asturianos ‘al diálogu constructivu pa entrar ensin prexuicios nel alderique de Normatives y Ordenances Municipales de la Llingua, pa protexer los drechos llingüísticos, d’alcuerdu col sentir de la población y les encuestes sociollingüístiques, nel marcu de la vixente Llei d’Usu y Promoción del Bable/Asturiano y los planes de normalización de les Oficines de Política Llingüística’.

El portavoz d’Izquierda Asturiana (IAS), Ignaciu Llope, desixe un cambiu radical nel discursu y l’actuación de Vicente Álvarez Areces, presidente del Gobiernu del Principáu d’Asturies, no tocante coles ‘lleendes urbanes’ y apunta que, mentes que nel gobiernu gallegu ta considerada una “lacra” la emigración de la mocedá más cualificada, Areces y el gobiernu asturianu aporfien en calificala de “mera movilidá xeográfica de mozos dinámicos” nel contestu europeu.

El portavoz d’Izquierda Asturiana (IAS) Ignaciu Llope, señaló güei, a raíz de les nueves declaraciones de Vicente Álvarez Areces sobre la emigración de mocedá asturiana, que el presidente metió dientro ‘d’una Europa na que se fomenta la movilidá’; el contraste ente la visión y el discursu que tienen sobre’l mercáu llaboral, la cohesión social y los intereses de los ciudadanos un gobiernu como l’asturianu, que ye ‘un meru xestor d’una debacle económica y social y otro gobiernu, el gallegu, que tien visión de país y nun tenta xustificar lo inxustificable’.

Según Llope, estas declaraciones d’Areces súmense a les que ‘facía hai unes selmanes el Conseyeru d’Industria, Graciano Torre, que comentaba, tocante a les decenes de miles d’asturianos que tolos años tienen que dexar el país pa trabayar fuera, que llonxe de ser un problema o una tendencia a correxir, tábemos ente la mera movilidá xeográfica de mozos con una mentalidá dinámica’.

Respetive a esto, Llope fixo comparanza con unes declaraciones del secreatrio xeral de emigración gallegu, Manuel Luis Rodríguez, que nuna intervención nel parllamentu gallegu aseguraba que ‘taben perdiendo más mozos y con meyor formación que los que recibe’ polo qu’aseguró que ‘Galicia ta dexando marchar activos mui importantes’, lo que tachó como una gran lacra pal so desarrollu. Pa Llope, ‘la mera comparanza de les declaraciones pon na so xusta midida la visión de país, de condiciones llaborales, de bienestar y de serviciu a la ciudadanís que tienen los políticos asturianos, y en concretu’l presidente Areces, en comparación colos gallegos’. Razón pola que’l portavoz d’IAS pidió un cambiu radical nel discursu y na política económica asturiana nesi sen.

Esti llunes a la una la tarde, el filólogu Xuan Santori presentó dientro de los actos programaos en LlibrUvieu 2006, el so llibru ‘Milenta Voces (Visiones del Surdimientu)’, editáu por Trabe, como resultáu d’un observatoriu pa ver la evolución del procesu de recuperación cultural del asturianu.

Xuan Santori (Uvieu, 1968) ye llicenciáu en Filoloxía Inglesa. Tien publicaos tres llibros de poesía: Zunes, 1998; Les inconveniencies de la especie, 2000 y Bis a bis, 2004. Amás de les traducciones Poesía epica anglosaxona (1999) y Una vez n’Europa (2000) de John Berger, ye autor d’Alministrar la tierra. ¿Que ye que ye la ecología? y Mercar pa vivir. ¿Que ye que ye’l consumismo?

Esti miercoles día 10 de mayu a les doce la mañana, el Salón de Grados del Departamentu d’Historia de la Universidá d’Uvieu va acoyer un coloquiu basáu nel llibru recien editáu por Gabriel Santullano y que lleva por títulu ‘La prensa clandestina en Asturias’. Xunta l’autor, van participar nel debate Ruben Vega, del Departamentu d’Historia Contemporánea; Sara Fresno, responsable del aparatu de prensa clandestina del PCE en Xixón nos años setenta; y Javier Ramos, responsable de la publicación ‘Noticias 1973’ y collaborador de ‘Verdad’.

L’historiador Gabriel Santullano ye l’autor del volume “La prensa clandestina en Asturias”, editáu pol sellu uvieín KRK embaxo l’agospiu de la Fundación Juan Muñiz Zapico. El llibru estudia les publicaciones de la resistencia antifranquista dende la entrada del exercitu rebelde na seronda de 1937 hasta la muerte del dictador en 1975.

Santullano, especialista n’hestoria contemporánea y militante activu de la izquierda antifranquista nos años sesenta y setenta, presenta nesti estudiu un minuciosu trabayu d’investigación sobre la voz de los que nun teníen voz tres la derrota republicana y prosiguíen la so llucha al traves del poder de la palabra.

Güei ha ser pa nós, y pa tolos asturianos y asturianes, un día de gayola y de contentu, porque ye un día d’homenax a la lliteratura asturiana, a los homes y muyeres que la ficieron vidable, nel pasáu y nel presente; y, darréu d’ello, un día d’homenax a la llingua na qu’alita. Gracies al bon facer de munchos de los nuesos escritores podemos dicir con orguyu que la lliteratura asturiana ye yá una realidá bultable, en cantidá y en calidá, que se pue midir ensin rocees coles lliteratures que se faen nes otres llingües del estáu; y ello magar los pilancos qu’enarten l’idioma que-y val de mediu d’espresión.

La Xunta pola Defensa de la Llingua Asturiana convoca un añu más la so tradicional manifestación del Día de les Lletres cola que demanda’l reconocimientu llegal qu’oficialice esta llingua, equiparando asina los derechos de los falantes d’asturianu colos de los falantes de castellán. La manifestación que, mesmo que n’anteriores convocatories, va salir a les siete y media la tarde de la estación de la Renfe d’Uvieu, va acabar a les puertes del teatru Filarmónica onde l’Academia de la Llingua Asturiana cellebra’l so actu institucional nel qu’esti añu Manuel García Galano va tomar posesión como Miembru d’Honor.

Arriendes del discursu institucional de la Presidenta de l’Academia de la Llingua Asturiana, l’actu va abrise cola actuación del gaiteru Iñaki Sánchez Santianes y la cantante de tonada Bibiana Sánchez García; y va pesllase col grupu folk DRD.

L’Academia de la Llingua Asturiana, siguiendo’l facer entamáu la edición pasada, fai un brinde a los asistentes pa que, na midida de les sos posibilidaes, lleven traxe asturianu de mou qu’esti puea, pasu ente pasu, dir asitiándose nos actos más solemnes.

Hai que dicir que la sesión academica podrá siguise en tol mundu en tiempu real al travies d’Internet, darreu que l’ALLA quier festexar con Radio Sele’l fechu de llevar 20 años nes ondes, nun inequívocu compromisu cola normalización social de la llingua asturiana.

Como vien socediendo tolos años, llueu del actu academicu habrá una espicha, abierta a la participación de tola xente, nel restaurante La Gruta, con bailles y música asturiana.

Güei a les ocho la tarde Inaciu Galán y González va presentar na Llibrería Ítaca de Xixón, na cai Marques de Casa Valdes, 80, el Diccionariu Básicu Asturinu-Ingles, Ingles-Asturianu. L’actu va ser introducíu pol escritor Humberto González, presidente del Conceyu d’Escritores Asturianos.

Na presentación va facese una llectura de poemes traducíos del asturianu al ingles y del ingles al asturianu por dellos poetes.

El presidente del Principáu, Vicente Álvarez Areces, anunció esta mañana nuna entrevista cola axencia de noticies Europa Press que tien pensao siguir alantre col procesu de reforma del Estatutu, pesie a les crítiques d’IX y del PP. El xefe del Executivu asturianu mantúvose firme na so idea de ‘cumplir hasta l’últimu puntu’l calendariu que pactemos’, alvirtiendo-yos a les otres fuerces polítiques que ‘quien trate de distanciase del procesu va tener que desplicá-yoslo a los asturianos’.

Areces aseguró que nel plazu de dos selmanes va tar preparáu’l dictame del Conseyu Consultivu pal so debate, cola fin d’aprobar esi testu antes de que termine esta llexislatura.

Tocante a les declaraciones de Valledor, criticando la postura de la FSA na reforma estatutaria, Areces manifestó nun compartir tales opiniones espresaes pol conseyeru de Xusticia ‘como miembru d’IX y non del Gobiernu’. Sicasí, el presidente del Gobiernu asturianu dixo qu’estes diferencies nun van ‘torgar l’acción de Gobiernu’.

Tachando de ‘falta de personalidá y coherencia’ la negativa del PP a debatir la reforma estatutaria, Álvarez Areces aseguró que nun se tien de renunciar a tala reforma qu’otres comunidaes tán negociando. Y añedió que si’l PP sigue cola mesma zuna ‘va pagar un preciu políticu porque va tener que desplicá-yoslo a tolos asturianos’.

El coordinador xeneral d’Izquierda Xunida d’Asturies, Jesús Iglesias, dixo ayeri que la culpa de que nun s’arreglare nesta llexislatura la reforma del Estatutu sedría del ‘Partíu Popular, que nin siquier ta dispuesta a participar nel debate’. Pela so parte, el conseyeru de Xusticia, García Valledor, amenazó a la Federación Socialista Asturiana con que nun se mantendría’l pactu de Gobiernu si deciden pactar l’Estatutu asturianu n’esclusiva col PP.

Los dirixentes d’IX entienden que’l debate de la reforma del Estatutu d’Autonomía, que’l PSOE decidió continuar pesie a la negativa del PP, tien de ser aplazáu hasta que los populares decidan participar nel mesmu. Por eso, Iglesias aseguró que ‘la prioridá agora ta nel debate social’, razón pola qu’IX convocó pa esta selmana a los sos órganos directivos col envís de que faigan les propuestes de conteníos pal nuevu Estatutu. Pa ello van tener reuniones con diferentes ámbitos culturales, empresariales y sindicales, na busca de que-yos dean les sos opiniones respetive a esta tema.

Valledor fue más duru colos sos compañeros de pactu de Gobiernu al asegurar que’l modelu d’Estáu que ta defendiendo’l PSOE asturianu ‘ta más cerca de les tesis del PP que de les de Zapatero’. Énte lo que tachó de ‘busca desesperada’ per parte de los socialistes d’apoyu nes files del PP, el conseyeru de Xusticia alvirtió que ‘si hai un alcuerdu billateral PSOE-PP sobre l’Estatutu, va ser mui difícil, por nun dicir imposible, mantener el pactu de Gobiernu o firmar otru’.