Sociedá

El conseyeru de Xusticia y dirixente d’Izquierda Xunida, Francisco Javier García Valledor, ente la presentación de Rafael Palacios como candidatu a les prósimes elecciones autonómiques per parte del Bloque por Asturies, nuna candidatura independiente a la d’IX, llamentaba ayeri la falta de diálogu ente la so formación y el Bloque, asegurando que dende la so organización ‘debemos ser un poco más autocríticos tocante a la falta de comunicación’ ente les dos fuerces. Valledor considera ‘imprensincible renovar el pactu’, a lo que Jesús Iglesias, candidatu a les elecciones del 2007 por IX, añedió que ‘yá qu’hai voluntá común, podríemos empezar contactos en setimbre’.

El Bloque por Asturies concurrió coaligáu a Izquierda Xunida a los pasaos comicios. Sin embargo, ayeri presentaba una candidatura independiente pa les prósimes elecciones autonómiques, con Rafael Palacios a la cabeza de les llistes, achando la decisión a la ‘falta de diálogu con IX’, que presentó la so candidatura posponiendo les negociaciones col Bloque hasta’l prósimu mes de setiembre. Énte la falta de comunicación ente les dos fuerces, el Bloque por Asturies decidíase a presentar una candidatura propia, fechu qu’ayeri llamentaba Francisco Javier García Valledor, conseyeru de Xusticia y dirixente d’IX, manifestando que la so organizacón debía ‘ser un poco más autocrítica tocante a la falta de comunicación col Bloque’.

Valledor insistió na importancia de ‘renovar el pactu col Bloque’ y confió en que se ‘retomen los contactos pa que la situación nun se vuelva irreversible’. Rafael Palacios, qu’aseguró esperar ‘un cambiu d’actitú en cuantes a diálogu y negociación con otres fuerces’, nun descartó un posible alcuerdu nos prósimos meses y añedió que se van respetar los pactos autonómicos hasta que termine la llexislatura, mentes qu’en setiembre van presetar los candidatos locales.

Pela so parte, Jesús Iglesias, actual candidatu d’Izquierda Xunida pa les elecciones del 2007, aclarió que la falta de comunicación ente les dos fuerces d’izquierda ‘nun ye tanto cuestión d’autocrítica pela nuestra parte como de normalidá d’un partíu independiente como ye’l Bloque’. Sicasí, añedió que ‘yá qu’hai voluntá común, podríemos empezar contactos en setiembre’.

La Xunta pola Defensa de la Llingua Asturiana recupera la espublización de les sos Fueyes Informatives, basaes nunos boletinos de tirada periódica nos que fai memoria del trabayu fechu, treslladando asina la opinión de la organización sobre la situación de la llingua asturiana y de los derechos llingüísticos de los asturianos.

Conscientes de la importancia d’esti llabor informativu, la Xunta pola Defensa de la Llingua Asturiana vuelve recuperar la edición d’esta estaya, na que tamien trabayen dende la so páxina web http://www.exunta.org, con una llista de correu abierta na que s’informa de les noticies de la organización y, a partir d’esti nuevu boletín, cola espublización bimensual de les nueses Fueyes Informatives.

Nesti nuevu númberu de les Fueyes Informatives, la Xunta recueye la información sobre les campañes y actividaes feches nos últimos tres meses pola Xunta y Xunta Moza y pola plataforma Conceyu Abiertu pola Oficialidá, na que la Xunta ta implicada dafechu.

L’últimu Conseyu de Gobiernu enantes del periodu vacacional aprobó ayeri a última hora, y ensin que’l tema tuviere plantegáu nos temes a tratar nel día, l’espediente toponímicu de Nava que llevaba meses paralizáu, ensin recibir el preste que lu fixere oficial, depues de pasar tolos trámites alministrativos. Con esta aprobación, y la intención de siguir aprobando espedientes a partir del mes de setiembre, ruempese’l silenciu d’ocho meses colos qu’Alministración tenía bloqueada l’aprobación oficial de la toponimia.

Pesie a que les notes oficiales del Conseyu de Gobiernu nun contemplen l’aprobación d’esti nuevu espediente, fontes oficiales del Gobiernu confirmaron el vistu bonu a la toponimia naveta que, depues de llevar meses preparada y cola burocracia alministrativa previa cumplida, tovía nun recibiere esti últimu trámite pa recibir la reconocencia oficial.

Esti nuevu emburrión na aprobación de la toponimia, y el compromisu de siguir alantre con ella una y buena que termine’l periodu vacacional, ye frutu de la recien valoración del pactu de gobiernu nel qu’una de les mayores taches foi precisamente les torgues que per parte de l’Alministración recibíen la Xunta Asesora de Toponimia y los propios conceyos pa ver aprobaos los sos espedientes.

El Bloque por Asturies, formación política d’izquierdes qu’hasta’l momentu participaba del gobiernu del Principáu al travies d’un pactu robláu con Izquierda Xunida, presentó ayeri al so portavoz, Rafael Palacios, como candidatu a les prósimes elecciones autonómiques, terminando asina’l pactu de la presente llexislatura con IX. Tres d’un primer intentu por repitir aliances pal añu qu’entra, el Bloque por Asturies decidió presentar candidatura en solitario porque ‘existe la conyuntura adecuada’, según Palacios.

Anque’l Bloque por Asturies plantegare nes últimes selmanes la renovación del alcuerdu con IX, la postura del partíu encabezáu por Jesús Iglesias, que prefier aparcar les negociaciones hasta setiembre, fixo que cambiaren d’estratexa electoral, decidiendose a presentar una candidatura indepediente, con Rafael Palacios a la cabeza de les llistes.

Palacios, que llamentó la poca disposición d’IX pa negociar, anque matizó que nun se trata de denguna rotura, sinón del final d’una alianza, aseguró qu’esta decisión ‘ye lo meyor pa nosotros como formación política’, si bien Izquierda Xunida, pela so parte, nun descarta, tal y como tenía calculao, retomar l’alcuerdu a partir del prósimu mes de setiembre.

El Bloque por Asturies afronta d’esta manera una candidatura en solitario pa les prósimes elecciones autonómiques, que se van celebrar nel mes de mayu del 2007, anque, sicasí, nun descarta tampoco l’averase a postures d’otres formaciones polítiques, tal y como alcordaren n’abril nes sesiones del conceyu nacional del partíu, momentu nel que pensaben en reforzar el consensu y aclariar les directrices del programa electoral que teníen pensao compartir con IX.

El Cafetón d’Aviles celebra hasta’l prósimu día 14 la so VI Selmana Cultural, basada nuna serie de nueches nes que s’entemecen la maxa de los cuentos y de los magos, col teatru y la música, asina como los alcuentros solidarios nos que se van esponer diapositives informatives y organizar charres a beneficiu del Sahara, Nicaragua, Gambia y Colombia.

Tolos díes, a partir de les nueve y media la nueche, va poder esfrutase de diferentes sesiones como son les performances d’Anxel Nava y Nel Amaro, cuentos de la mano de Roxelio Crespo, Berto Peña, Rafa Ordoñez, Belen Rubio y Carlos Alba, maxa de Xulín d’Aviles y Guillermo, monólogos de Julio y teatru col grupu Momo.

Diferentes nueches musicales dedicaes al jazz y al folk, asina como la proyección de cortos n’asturianu son otres de les ufiertes de la VI Selmana Cultural del Cafetón d’Aviles que va durar hasta’l prósimu día 14 d’agostu.

La formación d’izquierdes nacionaliega Andecha Astur criticó nun comunicáu de prensa la decisión d’hermanar a los colectivos folclóricos asturianos Los Xustos, de Xixón, y el Grupu Pelayo, de Buenos Aires, por considerar que los grupos escoyíos pal mesmu representen l’antítesis de l’asturianía, razón pola que’l partíu nacionaliegu pidió ‘que nun se tomen más midides d’esti tipu ensin consultar a toes eses persones enfotaes na recuperación del verdaderu patrimoniu etnográficu asturianu’.

Manifestando la so ‘sorpresa’ ente esti hermanamientu, Andecha Astur valora’l trabayu del Grupu Pelayo de Buenos Aires, formáu por una sección de baille asturianu y una banda de gaites. Anque non tolos miembros d’esta formación son nacíos directamente n’Asturies, la so intención ye caltener los vínculos cola tierra d’orixe de los sos antepasaos, manteniendo los vínculos culturales y familiares cola rexón. Por eso, Andecha Astur estima la so participación nos cursos de la ‘Escuela d’Asturianía’, onde dalgunos monitores de reconocíu prestixu ponen clases en materies tales como baille asturianu, gaita, percusión, cantu, indumentaria tradicional, historia d’Asturies, llingua o mitoloxía.

Pa la formación nacionaliega, los conteníos d’estes materies ‘respuenden a tol trabayu desendolcau dende va más de 30 años por una montonera de xente esmolecío pola recuperación de tolo que constitui’l patrimoniu etnográficu del pueblu asturianu, en clara rotura colo que representaba la caricatura fecha durante’l franquismu pola nomada Sección Femenina que, nun lo escaezamos, yera un organismu oficial del Estau franquista, dependiente de la Falange Española y de las JONS.’ Por eso, Andecha Astur, quien asegura qu’ún de los grupos non vinculaos orgánicamente al aparatu estatal franquista pero que repitíen les mesmes aberraciones culturales de la dictadura ‘foi, y ye, precisamente l’escoyíu pa esti desafortunau hermanamientu’.

Entendiendo que lo que se-yos apriende na citada Escuela d’Asturianía ye l’antítesis de lo que signifiquen grupos como l’escoyíu pal hermanamientu, Andecha Astur manifiesta’l so ‘rechazu dafechu pal hermanamientu talu, por ser contradictoriu col espíritu de la Escuela’ y demanda ‘que nun se tomen más midides d’esti tipu ensin consultar a toes eses persones enfotaes na recuperación del verdaderu patrimoniu etnográficu asturianu’.

L’Ayuntamientu d’Aviles tien pensao ufiertar un nuevu cursu d’asturianu ente los meses d’ochobre y payares, en vista de la bona acoyida que tuvo’l primer cursu de llingua p’adultos que terminó’l pasáu 30 de xunu. Esti nuevu seminariu tendrá una ufierta de 60 hores (30 más que’l primeru) y afondará nel nivel d’asturianu de los participantes yá que munchos d’ellos piensen repitir la esperiencia de la primer edición de nivel básicu.

Los plazos p’apuntase a esti nuevu cursu de la Oficina de la Llingua d’Aviles, que tendrá un horariu de tarde, mesmo que l’anterior, pa facilitar la so compatibilidá col horariu de trabayu de los sos participantes, van abrise a partir del mes de setiembre.

La recepción a les delegaciones de los países celtes abrió la mañana del llunes nel Ayuntamientu de Lorient, nun Festival Intercélticu que permitía descansar a los representantes asturianos cola única salvedá del grupu Brenga Astur, qu’actuaba a les 5 de la tarde nel Palais de Congrés. Dellos miembros del grupu Ventolín foron los encargaos d’ufiertar nel Ayuntamientu l’amuesa cultural asturiana énte les autoridaes.

La recepción a les delegaciones de los países celtes cuntó esta vegada cola participación especial d’aboríxenes australianos qu’ufiertaron un espectácuilu de baille bien interesante polo especial y estremaos de l’amuesa cultural céltica. Amás d’esti baille, los representantes de Gales, Escocia, Irlanda, la Isla de Man, Cornualles, Galicia, Asturies y l’Acadie, ufiertaron estremaes actuaciones como homenaxe a la ciudá de Lorient, interviniendo xunta’l alcalde la ciudá los distintos delegaos, col asturianu Lisardo Lombarcía a la cabeza.

El grupo Ventolín foi nesta ocasión l’encargáu de bailar una pieza tradicional nel salón de plenos del Ayuntamientu y Lisardo Lombardía l’encargáu de facer el tradicional intercambiu de perdones col alcalde llorientés.

Pela tarde, alrodiu les 5 de la tarde, entamó la so actuación nel Palais de Congrés el grupu Brenga Astur que foi mui aplaudíu por un públicu entusiasta y entendíu que persupo reconocer la calidá d’esta formación de música folk que vien de Llanes a L’orient pa actuar entá mañana otra vuelta. Brenga Asturs despídese na nueche del martes con un conciertu nel Espace Bretagne.

La Comisión Executiva de la Federación Socialista Asturiana (FSA) a propuesta de Javier Fernández decidió que l’actual presidente asturianu volviera a presentase a una tercera elección. Si bien nel mes d’abril, la dirección estatal del PSOE, confirmara que los presidentes autonómicos del PSOE diben repetir candidatura, nel casu asturianu la decisión retrasóse hasta ayeri.
Mientres que Javier Fernández dixo que la candidatura socialista a la Xunta Xeneral “nun tendría fisures, siendo integradora de les diferentes corrientes de la FSA”. José Angel Fernandez Villa foi una de les voces crítiques de la reelección d’Areces, anque según asistentes al conceyu “les crítiques fueron seles”.
Cola reelección de Tini Areces como candidatu a la presidencia del gobiernu asturianu piésllase’l procesu d’elección de los cabeces de llista de los grupos con representación parlamentaria, siendo la única novedá la inclusión de Jesús Iglesias nes llistes d’Izquierda Xunida mientres qu’Ovidio Sánchez y Tini Areces repiten como candidatos del PP y del PSOE respectivamente.

El próximu llunes día 31 de xunetu, a les 13 hores, nel Salón d’Actos de la Escuela-Hogar de Santantolín (Ibias), entamen los XXIV Cursos de Branu de l’Academia de la Llingua Asturiana (Cursos Elemental y Avanzáu de Llingua Asturiana, Cursos d’Afondamientu Cultural y Llingüísticu y 2ª Fase del Cursu de Capacitación en Gallego-Asturianu).
Nel actu intervendrán, amás de la Presidenta de l’Academia, Dra. Ana Mª Cano González, y del Direutor de los Cursos, Dr. Xosé Antón González Riaño, l’Alcaldesa del Conceyu d’Ibias, Dª Nélida Barrero Pantiga, y el Conseyeru d’Educación y Ciencia, D. José Luis Iglesias Riopedre.
Los Cursos desarrollaránse ente los díes 31 de xunetu y 11 d’agostu y nellos participarán 150 alumnos y alumnes.