Sociedá

El Principáu d’Asturies organiza la XII edición de la Bolsa de Contratación Turística d’Asturies , que se va facer ente güei y mañana nel Palaciu de Congresos del Recintu Ferial de Xixón. Nesti alcuentru empresarial van participar 45 mayoristes de viaxes, y 213 empresarios y asociaciones profesionales asturianes, que proceden de dellos subsectores como hoteles, apartamentos, ases d’aldea y empreses de turismu activu.
L’aciu d’estes xornaes ye potenciar l’intercambiu comercial ente’l sector turísticu del país y les empreses mayoristes de viaxes, de forma que cada operador tenga un espaciu priváu de trabayu, onde podrá facer contactos individualizaos coles empreses mediante cites previamente concertaes.
La Bolsa de Contratación consolidóse a lo llargo d’estos 12 años como un preséu de valir y accesible pal afitamientu d’un foru añal de contactos empresariales nel sector turísticu. Asina mesmo, configuróse como un útil indispensable pa la promoción global d’Asturies como Destín Turísticu. Durante les Xornaes de Trabayu prevéese llevar a bon puertu unes 2000 entrevistes.

El Conseyeru de Xusticia, Francisco Javier García Valledor, inauguró ayer l’Arribada 2006 con una intervención na que se crítico a aquellos que quieren arrinconar a la llingua asturiana. Pal Conseyeru de Xusticia “la xente que trabaya pola lliteratura asturiana y que vive a diariu normalizando una llingua que dalgunos quieren facer anormal, fuera de la norma legal, estigmatizándola con disculpes tan mentiroses como probes, como dicir, por exemplu que la Oficialidá de la llingua asturinana sería una imposición intolerante”, dixo’l Conseyeru na so comunicación inaugural.
García Valledor aseguró qu’esta situación “nun favorez que se conoza la verdadera dituación d’un idioma nel que los derechos de los sos falantes tán permanentemente conculcao”. Al tiempu que fizo una felicitación a les editoriales y escritores que tán faciendo un llabor normalizador recordando, y n’especial, a la clase política la obligación pa qu’esti esfuerciu nun quede “nes repises del escaezu”.
La primera xornada de l’Arribada entamóse con Xuan Santori y la so comunicación sobre “Los viaxes d’Ulises en casa” enantes d’entamar un alderique xunta a Ismael González Arias, Xosé Nel Riesgo y Milio Rodríguez.
David Rivas va inaugurar la segunda xornada con una ponencia titulada “L’erotismu, el ratu y l’asturcón”. Darréu entamara l’alderique nel que, amás del propiu Rivas, participarán Humberto González, Xosé María Vega y Frichu Yustas.

Les Xornaes Internacionales d’Estudiu de l’Academia de la Llingua, que cumplen el so primer cuartu de sieglu, entamaron estiu llunes con una perinteresante conferencia del Caderalgu de la Universidá de Girona Joseph María Nadal Farreras y un delles comunicaciones sobre aspectos del consonantismo asturianu y la metafonía amás d’una propuesta sobre’l vocabulario científicu nel Diccionaru (DALLA). Ana Cano felicitóse na inauguración de les Xornaes d’aportar al númberu XXV y de la participación nes mesmes, tan numberosa ya interesante como otros años.

Na primer conferencia de les Xornaes, el Caderalgu de la Universidá de Girona Joseph María Nadal Farreras faló del camudamientu de les fronteras llingüístiques nesti sieglu XXI y de los problemas que va suponer la globalización pa manches llingües minoritaries, hasta’l puntu de qu’esti seya’l sieglu del desaniciu de les llingües minoritaries.

Darréu de la conferencia, nes comunicaciones d’esta primer xornada, Xosé Llluis García Arias fizo un averamientu a los aspectos evolutivos del consonantismo asturianu, emplegando pa ello la voz “cálamu” (caña) y les munches variantes conseñaes per elli nun estudiu que s’espublizará darréu. Fermo F. Fernández Suárez y Carmen Toro averáronse al léxicu científicu del Diccionario de la Llingua Asturiana, que na so consideración tien un aspeutu perimportante, en comparación con otros diccionarios de llingües minoritaries: “le emplegu de los binomiales científicos, que perafiten la especie de la que se fala”. Poro, tamién atalantaron qu’hai entá munchu camín per andar poa normativizar dafechu los nomes d’animales y plantes, siendo a combinar l’enguedeyu tradicional que los llingüistes tienen colos munchos sinónimos y homónimos que describen especies mui asemeyaes pero enforma diferentes.

Laura Rodríguez, Andrea Miranda, Alejandro Rodríguez, Juan Ignacio Santos, Liliana Díaz, Miguel Cuevas, Ruth González y Mercedes Alvarellos foron los encargaos de presentar otres tres comunicaciones, enantes de que Beatrice Schmid, de la Universidá de Basilea, punxera puntu final a la xornada del llunes cola conferencia “La expresión de la obligación y la necesidad en los textos jurídicos asturianos medievales”.

Na xornada del martes tienen d’intervenir sobre temes que van de la lliteratura del entamu del sieglu a les nueves tecnloxíes, Xosé Ramón Iglesias Cueva, Xosé Lluis Campal, Aurelio González Ovies, Mar Martín, Isabel Jardón, Miguel Ramos Corrada, José Arsenio Coto y el director d’Asturnews, Próspero Morán López, que falará a lo postrero de la xornada sobre “La comunicación dixital en llingua asturiana”.

El Conceyu Abiertu pola Oficialidá ta acabante de convocar una manifestación col lema “Na Reforma l’Estatutu, L’Asturianu Llingua Oficial”, que va salir de la Estación del Norte d’Uviéu a les 18:00 del sábadu 18 de payares.

Nel branu, el Conceyu Abiertu pola Oficialidá (CAO), entidá formada por más de 170 asociaciones en favor de la oficialidá de la llingua asturiana, recoyó numberoses firmes en xornaes d’apoyu organizaes en llugares como’l paséu de la playa de Xixón. Baxo’l mesmu lema col que se convoca agora esta manifestación pal 18 de Payares (‘Na reforma del Estatutu, l’asturianu llingua oficial’), miembros del CAO repartireron folletos ente los asturianos durante tol branu pa desplicar la necesidá d’esti reconocimientu oficial pa la llingua.

El Conceyu pola Oficialidá vien organizando con munchu ésitu nos últimos meses una serie de campañes reivindicatives per diferentes ciudaes asturianes. Y ente elles, destacó la Caravana pola Oficialidá que recorrió dalgunes de les principales villes promocionando y treslladándo-y a la sociedá la necesidá de reconocer na prósima reforma estatutaria la oficialidá de la llingua.

El pilotu asturianu de Renault proclamóse campeón del mundu de Fórmula 1 por segunda vegada al acabar segundu nel Gran Premiu de Brasil, revalidando’l títulu qu’algamara la temporada pasada nel mesmu circuitu que güei, Interlagos, onde’l brasileñu Felipe Massa impúsose nun trunfu hestóricu.
L’asturianu algama un campeonatu bien peláu al pilotu de Ferrari Michael Schumacher, qu’abandona la competición depués de convertise nel meyor pilotu de la hestoria, y qu’acabara cuartu nesti Gran Premiu de Brasil y segundu nel Campeonatu Mundial.
El pilotu alemán, siete vegaes campeón del mundu, foi’l máximu rival de Fernando Alonso, qu’hasta la cabera vuelta d’esti Mundial, nun selló’l so títulu. Fernando Alonso va correr la siguiente temporada en McLaren-Mercedes, onde tamién va llevar el númeru 1, el númeru de los campeones.

Don Felipe y Doña Letizia presiden esta tarde la ceremonia d’entrega de los Premios Príncipe d’Asturies. Esta ye la segunda vegada na que la Princesa d’Asturies acompañé a Don Felipe na ceremonia, dao que na última edición nun asistió al alcontrase na recta final del so primer embarazu.
La ceremonia d’entrega de los Premios, prevista pa les 16,30 hores aconceyarña nel escenariu del Teatru Campuamor d’Uviéu a tolos galardonaos. Nesta ocasión, sedrán cuatro de los y les premiaes quienes intervengan na gala que tará presidía pol Príncipe d’Asturies. Paul Auster, William H. Gates, Mary Robinson y M. Venneman sedrán los encargaos de dirixise al públicu en representación del restu de premiaos y premiaes.
L’actu aconceyará nel teatru uvieín a autoridaes estatales y autonómiques, amás d’embaxadores y otres personalidaes del ámbitu social y cultural, miembros de los xuraos y galardonaos d’otres ediciones.

L’actu d’entrega de los Premios entamará cuando’l Príncipe d’Asturies conceda la pallabra al presidente de la Fundación y tres d’elli falará’l premiu Príncipe d’Asturies de les Lletres 2006, Paul Auster. Darréu entamará la ceremonia d’entrega de los premios. L’orde col que se van entragar los Premios sedrá como vien darréu:

• Comunicación y Humanidaes: National Geographic Society, recoyíu por John Fahey presidente de la Sociedá.
• Artes: Pedro Almodovar
• Cooperación Internacional: Fundación Bill y Melinda Gates, recoyen Willian H. Gates y Mimi G. Gates.
• Investigación Científica y Técnica: Juan Ignacio Cirac
• Lletres: Paul Auster
• Ciencies Sociales: Mary Robinson
• Concordia: UNICEF, recoyíu por Ann M. Veneman
• Deportes: Selección española de baloncesto, recoyen los miembros de la mesma

Tres recoyer los galardones sedrá’l padre de Bill Gates, William H. Gates, el primeru en dirixise al públicu. Depués d’elli Mary Robinson y Ann M. Veneman pesllarán les intervenciones de los y les galardonaes.
Don Felipe de Borbón dará’l pesllé definitivu col so tradicional discursu tres el que la Banda de Gaites “Ciudad de Oviedo” interpretará l’Himnu d’Asturies darréu d’ello l’herederu del tronu español dará anuncia de la convocatoria de los Premios pal añu 2007.

Nun hai places. Esa ye la rempuesta más repetida nes axencies de viaxes cuando los liles d’aficionaos de Fernando Alonso, resucitaos milagrosamente tres la carrera de Suzuka van en masa a les ventanielles a la gueta d’un billete d’avión que los lleva a São Paulo, en Brasil. Una ciudá que va camín de convertise en sitiu de perigranación deportiva asemeyada a la del estadiu Santiago Bernabéu, el campu de golf d’Augusta o la pista central de Roland Garrod. Si Fernando Alonso algama l’únicu puntu que necesita nel circuitu brasileñu, sedrá campión de Fórmula 1 por segunda vegada consecutiva. Y sedrálo nel mesmu llugar.
La carrera de Xangai, cola cayía y perda de la famosa tuerca que fizo qu’Alonso perdiere 19 segundos (sicasí entró en meta superáu sólo por Shumacher) fizo cayer los ánimos. El gran Michael Shumacher volvía, alagamaba’l llideralgu de la clasificación a falta de dos prebes y apaeció casi como un enemigu imbatible. Pero lo que se perdió en China ganóse en Xapón, poco más d’una selmana depués, cuando l’alemán de Ferrari se retirara envueltu nuna nube de fumo.
El fechu de que la llucha pol títulu tea lo emocionanta que ta y qu’amás vaya a decidise nun llugar relativamente cercanu y asequible económicamente, movilizó a les peñes y aficionaos del pilotu uvieín, qu’amenacen con inundar la ciudá brasileña nuna espectacular marea azúl. Les peñes corrieron a organizar viaxes pa poder presenciar les sesiones de clasificación y la carrera, mientres que les axencies de viaxes aseguren que nun pueden facer nada más y que nun cuntaben con que too fuera decidise precisamente na última carrera.
Mientres, nel ambiente flota la solombra de la sospecha y se fae remembranza de les hazañes de Shumacher, de quien se teme que quisiere sacar a Alonso de la pista y poder tener asina opciones. Nun diba ser la primer vegada que dalgo asina pasara, anque los optimistes recuerden que foi precisamente l’alemán quien quisiere facelo con Jacques Villeneuve en 1998 y qu’entós-y salió’l tiru pela culata: Shumacher quedó fuera y Villeneuve ganó’l títulu.
Renault yá afirmó que va correr col so motor más fiable, más esmolecíos d’arañar un solo punto, tolo que necesita, que de cualaquier otra cosa, que pa eso yá ta Fisichella, compañeru d’Alonso. Shumacher da’l títulu por perdíu y Alonso ye l’únicu que diz qu’esto entovía nun acabó. Y mientres tantu los aficionaos asturianos, los del Principáu, los de São Paulo y los de tolos Centros Asturianos, guarden armes a la espera d’una nueva alegría.

El próximu llunes 23 d’ochobre, a les 16:30 hores, entamen nel Salón d’Actos de la Facultá de Filoloxía, les XXV Xornaes Internacionales d’Estudiu de l’Academia de la Llingua Asturiana
Abre les sesiones d’estes XXV Xornaes una conferencia del Dr. Josep María Nadal Farreras de la Universidá de Girona titulada “Lenguas y fronteras en el siglo XXI” a la que seguirán les de Beatrice Schmid (Universidá de Basilea). Xosé Ramón Iglesias Cueva (miembru de númberu de l’Academia de la Llingua Asturiana), Eloy Gómez Peñón (Universidá de Cantabria) y Aurelia Merlán (Universidá de Costanza). Amás d’estes conferencies, completen estes Xornaes d’EStudiu un total de 19 comunicaciones qu’estudien cuestiones llingüístiques, sociollingüístiques, lliteraries, culturales, etnográfiques y de comunicación dixital y nueves tecnoloxíes.
Ente otros comunicantes: X. Ll. García Arias, Fermo F. Fernández, Arturo Morales, X. Ll. Campal, Aurelio González Ovies, Miguel Ramos, Prospero Morán, director d’Asturnews, y Nicolás Bartolomé.
Al empar y con motivu de celebrase los XXV años de les Xornaes, faise una esposición que col títulu de “Una xera de 25 años” recueye los cartelos anunciadores de toles ediciones y una amuesa de toles publicaciones de l’Academia. La esposición n’horariu de mañana y tarde, tará abierta nel Edificiu Departamental del Campus del Milán hasta’l miércoles 25, cuando se piesllen les xornaes.

El Conceyal de Cultura d’Uviéu, Alfonso Román, anunció la creación d’estos premios lliterarios en llingua asturiana tres años depués de la so aprobación. A la primer edición d’estos premios podrán presentase relatos curtios, teatru y poesía. Los ganadores de cauna de les categoríes recibiran 3000€ y l’asoleyamientu de la obra, habiendo dos premios de 1000 y 600€ pa los finalistes a los que tamién se-yos asoleyarán los trabayos premios. Los orixinales pueden presentase hasta’l 31 de marzu de 2007. El conceyal de cultura d’uviéu, Alfonso Román, dixo que los premios formen parte del compromisu que l’ayuntamientu uvieín adoptara en mayu de 2005 y que nun se pudiere desenvolver por razones técniques.
El xuráu va tar compuestu pola Academia de la Llingua, Asociación de Llibreros, Cátedra Alarcos y la Conceyalía de Cultura.

Ente les audiencies que’l Príncipe d’Asturies va conceder destaca la de l’asociación cultural El Llacín, promotora y divulgadora de la cultura

tradicional del oriente del país. L’alcuentru ente l’asociación y l’herederu de la corona española va facese güei xueves dende les 17 hores nel hotel de la Reconquista.
L’asociación cultural EL Llacín de Porrúa, conceyu de Llanes, nació en 1994 depués de la donación, d’un indianu purruanu, d’una güerta y delles cases al pueblu llaniscu. Cola fin de difundir la cultura y les tradiciones del oriente asturianu l’asociación entamó’l Muséu Etnográficu del Oriente d’Asturies, el Mercáu tradicional de Porrúa, la Banda de Gaites El Llacín, la escuela de música tradicional de Porrúa, asina como bien de publicaciones pa cumplir con esta finalidá. Anguaño l’asociación cultural El Llacín cunta con más de 500 socios.