Sociedá

L’Asociación de Vecinos Xovellanos de Xixón va facer el próximu domingu una danza prima na plaza San Miguel. Esta asociación vien baillando la danza prima tolos primeros domingos de cada mes. L’obxetivu d’esta actividá ye recuperar la tradición de baillar la Danza Prima.

L’Academia de la Llingua Asturiana convocó, como vien faciendo semestralmente, la preba de conocencia de la llingua asturiana. La prueba fadráse’l día 27 de xineru, y la inscripción tará abierta dende’l día 15 hasta’l 25 de xineru. Esta prueba tien por aciu reconocer la conocencia básica del idioma de les persones que seyan declaraes aptes nel nivel básicu según calces seguíos pola Institución.

Academia de la Llingua Asturiana

Una representación al más altu nivel del Partíu Popular d’Asturies visitó ayeri la II Amuesa d’Artistes pola Oficialidá organizada pol Conceyu Abiertu pola Oficialida. La delegación popular visitó les obres amuesaes col envís de “sofitar a les artes d’Asturies” asina como respaldar a la llingua y cultura asturianes.

La delegación del PP d’Asturies que visitó la II Amuesa d’Obres d’Arte pola Oficialidá tuvo encabezada pol Secretariu Xeneral de la Organización, Reiniero Álvarez; la candidata a l’alcaldía de Xixón y senadora por Asturies, Pilar Fernández Pardo; el presidente del PP en Cangas, Manuel Rodríguez Blanco; l’escritor y miembru de la executiva del PP en Xixón, Humberto González; la diputada autonómica Cristina Coto; y el conceyal Manuel Pecharromán; asina como dellos militantes del PP y de Nueves Xeneraciones del PP.
Pilar Fernández Pardo declaró que l’envís de la visita ye amuesar el sofitu del PP a los artistes asturianos, sorrayando que l’Amuesa d’Obres d’Arte pola Oficialidá ta compuesta na so totalidá por obres d’artistes asturianos. La senadora y conceyala xixonesa reclamó qu’esta nun “seya la última esposición” d’esti calter no referente al arte.
La conceyala xixonesa tuvo pallabres pa referise a la recién dimisión del Conseyu Asesor de la Llingua en Xixón, Conseyu al que respaldó na so decisión. Sobre la redacción de les Ordenances Municipales Fernández Pardo considera que se trata d’un incumplimientu del compromisu algamáu por PSOE ya IX en Xixón. La vocera del PP en Xixón dixo que nunca nun pudo sofitar estes Ordenances porque nunca nun llegaran. Según Pilar Fernéndez Pardo l’apoyu a la llingua asturiana, dende l’Ayuntamientu de Xixón, ye nulu polo qu’entiende la decisión adoptada pol Conseyu Asesor.

Pa Reiniero Álvarez, secretariu xeneral y diputáu de la formación na Xunta Xeneral del Principáu d’Asturies, la so presencia tenía l’enclín de reconocer l’esfuerzu d’un colectivu de la sociedá civil “que ye una parte importante de la sociedá asturiana”.
El Secretariu Xeneral del PP d’Asturies no tocante a les conversaciones que la formación ta teniendo col CAO dixo qu’esistía un “compromisu de resolver, y superar el problema llingüísticu na próxima reforma del estatutu”. Reiniero Álvarez afirmó que nos últimos trenta años “l’únicu avance llegal foi la Llei d’Usu del Asturianu”, aprobada en 1998 durante la presidencia de Sergio Marqués, y que “dende esi momentu nun se volvió a avanzar” na cuestió normativa. Reiniero Álvarez afitó qu’el Partíu Popular “ye’l gran partíu de la oposición, y alternativa de gobiernu” y que seimrpe amuesó una especial sensibilidá hacia la cuestión llingüística. Como preba de les sos pallabres citó la presencia de destacaos asturianistes nes files de la formación política.

El representante del Conceyu Abiertu pola Oficialidá, Fernando Ornosa, reconoció’l llabor desendolcáu pol Foru Arte Ciudá y pol Coleutivu de les Artes Plástiques d’Asturies por sofitar les reivindicaciones del CAO a la hora de cambiar el marcu llegal de la llingua asturina. Ornosa agradeció la presencia de la delegación popular nesta II Amuesa, asina como la sensibilidá amuesada pa que na próxima reforma del estatutu la “redacción del artículu cuartu se faiga a midida de tolos y toles asturianes”.

La Xunta pola Defensa de la Llingua Asturiana falló’l pasáu 18 d’avientu los ganadores de los Premios Andrés Solar correspondientes a 2006. El Pegoyu correspondió al grupu Felpeyu, “como reflexu y homenaxe a la creación musical n’asturianu”. El Madreñazu correspondió al presidente autonómicu Vicente Álvarez Areces “pola s trayectoria llamentable de despreciu y agresión constante al nuesu patrimoniu llingüísticu”

Los Premios Andrés Solar concédense a les persones que más se destacaron na defensa de la normalización llingüística na so categoría positiva, el Pegoyu. Asina mesmo estos Premios conceden un “galardón”, el Madreñazu, a aquelles persones que se destacaron na so belixerancia y oposición a la normalización social del asturianu.
La ceremonia d’entrega de los Premios Andrés Solar va facese’l sábadu 20 de xineru nel Salón d’Actos del Anitguu Institutu Xovellanos de Xixón.

La Xunta pola Defensa de la Llingua Asturiana concedió’l Pegoyu al grupu Felpeyu, “como reflexu y homenaxe a la creación musical n’asturianu. Con esti premiu la Xunta pola Defensa de la Llingua “reconoz el llabor dundamental pa la normalización de la llingua asturiana que vienen faceiendo, en xeneral, les persones que trabayen nel ámbitu de la musica n’asturianu, y en particular, el grupu Felpeyu”. La Xunta reconoz el compromisu militante pa cola reivindicación llingüística amuesáu por Felpeyu, asina como la so disponibilidá pa collaborar y respaldar les campañes de la organización pro-derechos llingüísticos.

El Madreñazu de los Premios Andrés Solar 2006 correspondió al presidente autonómicu, Vicente Álvarez Areces. Pal xuráu la trayectoria d’Álvarez Areces “ye llamentable” pola so actitú respectu a los derechos y al patrimoniu llingüísticu asturianu. El xuráu fizo mención a l’actitú “represiva y antidemocrática” pa coles persones implicaes na defensa de la llingua asturiana.

L’actividá empresarial asturiana venceyada a la cultura medró nos dos últimos años cola creación de 100 empreses culturales nel país. Actualmente, según les estadístiques del Ministeriu de Cultura, n’Asturies esisten un total de 1.111 empreses culturales.

Nel conxuntu del Estáu español esisten unes 63.000 empreses vinculaes a la producción cultural nes sos diferentes vertientes. En base a estos datos el númeru d’empreses que n’Asturies dediquen la so actividá a la cultura supón l’1,85% del total estatal.
Les estadístiques proporcionaes pol Ministeriu de Cultura nun proporcionen los datos relacionaos cola actividá empresarial durante 2006, anque sí lo faen nel periodu correspondiente al añu 2005. Nesi añu les empresees relacionaes colos espectáculos y otres actividaes artístiques yerén 490, del total de 1.049 col que cuntaba Asturies en 2005. Les artes gráfiques y los servicios venceyaos al sector cultural sumaben 262 empreses y les qu’empobinen el so llabor a la edición sumaben un total de 135.
Nel añu anterior a la puesta en funcionamientu de la canal autonómica de comunicación el sector audiovisual cuntaba con 66 empreses. A estes 66 empreses hai qu’amestar les 18 relacionaes cola producción y emisión de radio y televisión.
Amás d’estes empreses nel estudiu ministerial aparecen 46 empreses relacionaes cola xestión de biblioteques, archivos o museos, 30 de reproducción de soportes grabaos, y 2 vinculaes a la fabricación d’instrumentos musicales.
Respectu al empléu xeneráu por estes empreses en 2005 el sector cultural asturianu tenía un total de 9.000 puestos de trabayu.

L’asociación cultural El Tueru de Llanes denunció’l “cinismu” del Ayuntamientu del conceyu oriental pola “marxinación” a la que somete a la llingua asturiana. Énte les quexes d’esti colectivu alcuéntrase la “falta de respetu y desconsideración” hacia la toponimia aprobada pol mesmu Conceyu.
El Tueru criticó que les nueves señales que se tán poniendo en Llanes siguen ensin reflexar la toponimia “reglamentaria”.
El conceyu de Llanes ye un de los conceyos qu’aprobó’l so espediente toponímicu en 2007. Pa l’asociación El Tueru los carteles han reflexar el “raigón cultural” del conceyu.

Una delegación de representantes del Partíu Popular d’Asturies va visitar esta tarde, a partir de les 19,00 hores, la II Amuesa d’Artistes pola Oficialidá que entama’l Conceyu Abiertu pola Oficialidá nel espaciu Astragal del Conseyu de Mocedá de Xixón. La delegación, al más altu nivel, tará encabezada por Reiniero Álvarez, secretariu xeneral del PP d’Asturies y Pilar Fernández Pardo, candidata a l’alcaldía de Xixón por esta formación.

Xunta a Reiniero Álvarez y Pilar Fernández Pardo tarán Cristina Coto, coordinadora d’organización del PP n’Asturies y dalgunos de los conceyales xixoneses de la formación política.

La Fundación Municipal de Cultura de Xixón aumentará’l so presupuestu hasta los 10,5 millones d’euros en 2007, lo que supón una xuba del 5,15% respectu a 2006. Esta Fundación Municipal ye la encargada de la xestión ente otres xeres de la Oficina de la Llingua de Xixón o del Muséu del Pueblu d’Asturies.

La Conceyala Delegada de Cultura del Ayuntamientu de Xixón, Mercedes Álvares, presentó ayeri’l presupuestu de la Fundación Municipal de Cultura, Educación y Universidá Popular. Ente los diferentes apartaos de gastu d’esta Fundación la mayor parte empobínase a la xestión de los centros municipales, cola intención de “mantener la calidá y ufrir una programación diversificada”. La conceyala, asina mesmo, presentó les cifres d’usuarios de los diferentes servicios culturales de la Fundación qu’en 2006 algamaron la cifra de 1.900.000 usos.

La Oficina de la Llingua de Xixón tendrá un presupuestu de 152.600 euros. Esti presupuestu ye’l que proporciona directamente la Casa Conceyu xixonesa, polo que nun s’incluín les diferentes partíes presupuestaries que se puedan algamar per otres vies. El Muséu del Pueblu d’Asturies tendrá una aportación de 840.900€. Los estudios arqueolóxicos que se vienen faciendo nel conceyu tendrán un presupuestu de 399.300€; l’aria de mocedá 604.600€; la Universidá Popular 636.300€; la rede de museos de Xixón 1.288.000€; la promoción de les artes 1.186.200€; los órganos de gobiernu de la Fundación tendrán un presupuestu de 158.900€.

La Fundación Juan Muñiz Zapico conmemora los trenta años de la perda del históticu sindicalista asturianu. Los actos entamarán el día 4 de xineru de 2007 con un actu institucional nel cementeriu de La Frecha, conceyu de L.lena, a partir de les 12,00, pa siguir a partir de les 13,30 hores cola amuesa y proyección d’un documental sobre la transición n’Asturies, esti últimu actu fadráse nel Salón d’Actos de la Casa de la Música de Mieres.

Fundación Juan Muñiz Zapico

El Conseyu de gobiernu cellebráu’l 21 d’avientu aprobó los espedientes toponímicos de Colunga y La Ribera. Con esta aprobación los conceyos qu’oficializaron la so toponimia en 2006 quédense en cuatro, Xixón y Nava fueron los otros dos conceyos qu’oficializaron los sos topónimos tradicionales.

La Xunta de Toponimia sicasí siguió trabayando en bien de conceyos, faciendo los sos espedientes toponímicos pa la so aprobación previa nos plenos de les cases conceyu pa que depués de la so aprobación sían empobinaos al Conseyu de Gobiernu, órganu colexáu que tien la competencia nesta xera.