Sociedá

Andecha Astur de Ribeseya estrena col nuevu añu una páxina web, na direición www.andecharibeseya.tk, que quier que seya’l so muérganu d’espresión oficial. La páxina entama con un comunicáu recien de la organización sobre “l’atristayante realidá que sufren los y les usuaries del polideportivu de Ribeseya”

Sigún se recueye na propia páxina, Andecha Ribeseya quier qu’esta nuea ferramienta “sirva pa poder acercar a tolos vecinos de Ribeseya’l trabayu desendolcáu nel conceyu polos nuesos militantes y simpatizantes, asina como tamién recoyer y almacenar tolos nuesos materiales ya eso”. Tamién espera que seya sitiu d’alcuentru de tola xente comprometía cola xusticia social y que creya n’otru sistema de facer les coses del conceyu.

La Conseyera de Cultura, Ana Rosa Migoya, nel marcu d’una entrevista a el Diario El Comercio el pasáu domingu, amuesóse contraria a la Oficialidá “por suponer una obligación”. Dende’l Conceyu Abiertu pola Oficialidá afitábase que la única vía de sobreviviencia pal idioma ye la de la oficialidá. Asina mesmo dende la XPDLLA acalariábase que la única obligación, en casu d’oficialidá, correspondería-y a l’alministración y non a la ciudadanía.

El domingu pasáu, nel marcu d’una entrevista al diariu El Comercio, la Conseyera de Cultura, Ana Rosa Migoya afirmaba que “la oficialidá del asturiano implica una obligación que nun tamos dispuestos a asumir”. La Xunta pola Defensa de la Llingua Asturiana y el Conceyu Abiertu pola Oficialidá respondieron a estes afirmaciones feches pola responsable de cultura del gobiernu asturianu. La XPDLLA afirma, nel so comunicáu, que “Dicir que la oficialidá supondría la obligación de conocer y usar l’asturianu ye desconocer la llexislación en materia llingüística del Estáu, llexislación que namás obliga a conocer y usar el castellanu y non nenguna otra llingua de les comunidaes autónomes” afitando que les úniques obligaciones, nuna situación d’oficialidá, son les de l’alministración.

Na entrevista a El Comercio la Conseyera afirmaba, a la entruga sobre la posición favorable d’Izquierda Xunida respeuto a la oficialidá del asturianu, qu’el so trabayu empobinábase a ganar les elecciones por mayoría absoluta. Sobre la cuestión llingüística reafitóse na postura del so partíu “nun somos partidarios de la oficialidá” afirmó la responsable de cultura. Pa la Xunta pola Defensa de la Llingua les pallabres d’Ana Rosa Migoya suponen el reflexu d’una “actitú reaccionaria en contra de la llingua asturiana”. La Conseyera refirióse a que s’amuesaba favorable a la llibertá d’usar l’idioma llibremente, “pero ensin obligación”, sobre esta cuestión la Xunta pola Defensa de la Llingua fai alcordanza d’una moción del Grupu Socialista nel Congresu de los Diputaos na que se define la oficialidá como ““Algo muy sencillo, que cada ciudadano tiene la libertad de elegir y el derecho de usar el idioma oficial que le plazca” del Diariu de Sesiones de 14 de febreru de 2006. La Xunta pola Defensa de la Llingua entrúgase nel comunicáu sobre’l fomentu de la llingua asturiana, al que se refier la Conseyera, nel ente de comunicación audiovisual públicu asturianau, nel que la organización de defensa de los derechos llingüísticos considera esisten “prohibiciones al usu del asturianu”.

Fernando Ornosa, portavoz del Conceyu Abiertu pola Oficialidá, dixo que “si Migoya considera que l’asturianu ye un patrimoniu tan importante, ¿por qué permite que tea discrimináu?”. Dende’l CAO atacáronse la “zarrazón y intransixencia” de la Conseyera de Cultura asturiana. Asina mesmo dende la plataforma d’asociaciones en sofitu a la oficialidá de la llingua na prósima reforma del Estatutu se facía la comparación con casu del Partíu Popular, que “ta amuesando una actitú muncho más dialogante”. La negativa a la Oficialidá del asturianu, fai que los responsables del CAO s’entruguen si “los asturianos somos diferentes a los demás”, en clara referencia al estatutus xurídicu del restu de llingües nel Estáu español.
El portavoz del Cao, Fernando Ornosa, afitó que ye pernecesariu un consensu políticu na Xunta Xeneral que permita arbitrar el cambiu llegal afayadizu pa la sobrevivencia del idioma” estes pallabres facíense en rellación a que la única “vía que certifica’l futuru de la llingua ye la de la oficialidá”.

Entrevista en el diariu El Comercio a Ana Rosa Migoya

El miércoles 10 de xineru, a les 21 hores, Fernando Ornosa y Xosé “Ambás” van presentar en La Casa Posafuelles el tercer volume del Atlas Sonoru de la Llingua Asturiana.
Esti tercer volume del Atlas, editáu pol Archivu de la Tradición Oral del Muséu del Pueblu d’Asturies, cuenta con grabaciones feches nos conceyos d’Ayer, L.lena, Mieres, Morcín y Riosa.

La VIII Cimera ente Asturies y Galiza fadráse los díes 16 y 17 de xineru n’Uviéu. Esti alcuentru desarrolláu énte los presidentes de Galiza y Asturies tien por obxetivos constituir nueve meses de trabayu qu’aborden cuestiones comunes a los dos países

El Bloque Nacionalista Galego pide que l’alcuentru énte Touriño y Areces, que se va facer en febreru, aborde la cuestión del ensiñu del gallegu na fastera del Navia-Eo. Pa los socios de gobiernu del Partíu Socialista de Galiza esta alcuentru supondría un bon momentu p’abordar les rellaciones culturales y llingüístiques énte Asturies y Galiza.
El portavoz del Bloque Nacionalista Galego solicitó que l’alcuentru énte los presidentes de Galiza y Asturies, Touriño y Areces, aborde cuestiones como la enseñanza del gallegu. Los socios del PSdG nel gobiernu del país vecín consideren que l’alcuentru ente los presidentes ha tratar más temes que los de les infrastuctures, entendiendo qu’han profundizar nos llazos culturales, pa d’esta forma “romper los tabúes”.
El voceru nacionalista gallegu esplicó que la propuesta de la educación del gallegu, fuera de Galiza, ye un fechu que se vien desenvolviendo na comarca llionesa d’El Bierzu, onde por mor d’un alcuerdu ente la Xunta de Galiza y la Xunta de Castilla y Lleón, los escolinos reciben clase de gallegu. Nesti sen el portavoz gallegu afala al entendimientu énte los dos gobiernos p’algamar los sos fines.
Asina mesmo’l portavoz del BNG pedía que nel alcuentru s’abordaren tames d’importancia pa los dos países como son la xestión de les cuenques fluviales. Nesti sen Asturies podría participar na xestión del río Miño.

Entama la II Selmana Cultural Moscones en Xixón. L’Atenéu de La Calzada acoyerá estos alcuentros qu’añalmente se faen en Xixón. El primer d’estos alcuentros fadráse la tarde de güei 8 de xineru tarde, a partir de les 20,00, con una mesa redonda na que participarán delos deportistes moscones. Nesti alcuentru participarán los deportistes Santi Pérez, Oscar Vázquez y José Arconada, tamién tará’l Director Xeneral de Deportes, Daniel Gutiérrez Granda. Les actividaes continuarán el martes cola conferencia de la historiadora Beatriz Canitrot. El miércoles col escritor Fernando Flórez y el xueves el grupu Traslluz representará Contigo pan y Cebolla

L’asociación H.aXareos y Asturnews entamen un sortéu que va repartir 10 exemplares de la publicación Formientu sobre la lliteratura más moza en llingua asturiana. El primer númeru d’esta publicación recoyó testos de 27 creadores nacíos énte 1977 y 1988. Anque la poesía seya la técnica dominante, los más mozos y moces autores asturianos desenvuelven la so lliteratura tamién na ensayística o nel rellatu curtiu.

Concursu

Dende’l 4 de xineru Corvera ta instalando la so señalización n’asturianu. Esta midida afectará a los más de 150 núcleos habitaos del conceyu. Sicasí la primer fase, que yá ta en funcionamientu, d’esta campaña de rotulación sólo va afectar a 29 de los llugares del conceyu.

Los topónimos que s’actualizarán a la denominación tradicional van ser: El Castiellu, Los Espinos, La Sierra, El Molín, La Peruyal, El Moncó, La Estebanina na parroquia de Molleda; na parroquia de Cancienes los topónimos afectaos pola actualización serán La Peluca, La Cabaña, La Pedrera, La Rebollada, Moriana, Bango, Taúxu, El Campu la Vega y Cancienes de Riba; na parroquia de Les Vegues l’adecuación toponímica entamará por Molleda de Riba; y na parroquia de Solís Taraño, Casal, Santa Mariña y El Pontón tendrán la so toponimia oficial visible.
La campaña con un presupuestu d’alredor de 4000€ tien una subvención de la Conseyería de Cultura de 3500, aportando’l restu’l conceyu de Corvera.

Los actos d’alcordanza de la memoria de Juan Muñiz Zapico, l’históricu sindicalista y políticu asturianu, axuntaron a más de mil doscientes persones nel actu fechu nel cementeriu de La Frecha, conceyu de L.lena. Ente los participantes nesti actu tuvieron Vicente Álvarez Areces, presidente d’Asturies; Antonio Pino, secretariu xeneral de Comisiones Obreres d’Asturies; o dellos dirixentes del PCA encabezaos pola secretaria xeneral Noemí Martín. L’actu concluyó cola interpretación del cantar “Al home de la unidá”, escrita por Manuel Asur n’alcordanza de Juan Muñiz Zapico.

Homenaxe a Juan Muñiz Zapico “L’home la unidá”

Los internautes asturianos reclamen el dominiu .ast como seña d’identidá de la comunidá asturianofalante na rede. Con esti fin un grupu d’internautes acaben de crear l’Ensame pol puntu AST una comunidá dende la que concienciar sobre lo afayadizo d’identificar les páxines escrites n’asturianu embaxo esti dominiu.
Siguiendo l’exemplu de la creación del dominiu .cat a finales de 2005 esti grupu d’internautes tien por aciu amuesar la presencia de la llingua y la cultura asturiana na rede mediante la creación d’esti dominiu.
L’Ensame pol puntu AST tien entamada una campaña na rede na que mediante una imaxe se reclama la creación d’esti dominiu.

Ensame por un puntu ast

Esti xueves 4 de xineru conmemórase’l trenta cabudañu del accidente de circulación que provocó la muerte del históricu sindicalista asturianu Juan Muñiz Zapico. La Fundación Juan Muñiz Zapico entama con esti homenaxe un añu d’actividaes n’alcordanza de la memoria del únicu asturianu encausáu nel procesu 1001, del que saliera con una pena de 18 impuesta pol Tribunal d’Orde Públicu.

Nacíu en La Frecha, L.lena, nel añu 1941 entamó’l so llabor sindical al ser escoyíu como enllace sindical nes elecciones sindicales de 1963. En 1964 Juan Muíz Zapico entamaría la so militancia nes Comisiones Obreres y nel Partíu Comunista. Muñiz Zapico ye ún de los 460 Xuraos d’Empresa que participaron na toma de la Casa Sindical de Mueres nel añu 1966. Acusáu, xunta otros camaraes, d’asociación ilícita y propaganda illegal por firmar el manifiestu y participar nes xornaes de llucha del 1 de febreru y del 27 d’ochobre de 1967. Esta condena llevaríalu a tar dos años nes cárceles d’Uviéu, Jaén y Segovia.
En 1970 ye nomáu miembru del Comité Rexonal del PCE. Dende esi momentu tresllada la so residencia a Xixón, ciudá na qu’intensifica la so actividá sindical, causa esta de numerosos despidos y de la persecución policial.
En 1972 ye deteníu nel Conventu de los Padres Oblatos de Pozuelo de Alarcón (Madrid), entamándose’l Procesu 1001 y siendo condenáu a 18 años pol Tribunal d’Orde Públicu’l 20 d’avientu de 1973; tres la muerte de Franco recibe un indultu’l 30 de payares de 1975. La so vuelta a Asturies produciría una gran represión policial nes cais de Xixón y Mieres el día 4 d’avientu de 1975.

Dende’l so regresu a Asturies, Juan Muíz Zapico, participa nel desendolcu orgánicu y formal de les Comisiones Obreres, de les que fuera parte sel Secretariáu Xeneral na Asamblea de Barcelona, na qu’espuso una Ponencia sobre’l Reforzamientu Orgánicu de Comisiones. En xunetu de 1976 ye elixíu pa participar nel Comité Central del PCE, que se fadría en Roma. Juan Muñiz Zapico xugaría un perimportante llabor na Xunta Democrática y depués na Coordinación Democrática d’Asturies.
La cabera detención prodúxose a la salidá de la Universidá d’Uviéu; na so vida d’activismu políticu sufrió 7 aós de carcel, 5 despidos, 4 multes gubernatives y 2 condenes del TOP y fizo 4 fuelgues de fame. El so prestixu y les sos capacidaes d’analís ficieron que Juanín fuere un de los protagonistes indiscutibles de la Transición, que nun vio. El dos de xineru de 1977 sufría un accidente de tráficu nel que fallecería. El so entierru, el 4 de xineru de 1977, convertiríase nuna de les mayores publiques de la Transición n’Asturies con más de 20.000 participantes.