Sociedá

Los galardonaos col Premiu Príncipe d’Asturies d’Investigación Científica y Técnica, l’español Ginés Morata y el británicu Peter Lawrence, ofrecieron una rueda prensa con motivu de la so llegada a Uviéu pa recoyer el premiu na que destacaron la valía de los investigadores españoles, pero llamentaron que’l país nun algamara ser “potente” nel desarrollu científicu-técnicu. Lawrence afirmó que los científicos españoles que trabayen en Reinu Xuníu o Estaos Xuníos destaquen pola so “creatividá y imaxinación”.

La ceremonia d’entrega de los Premios Príncipe de Asturias na so vixésimo séptima edición, que va tener llugar el vienres día 26 d’ochobre a les 18,30 hores, va tresmitise en directo al traviés d’Internet. Telefónica Data y Telefónica Servicios Audiovisuales van ser les empreses responsables y patrocinadores d’esta tresmisión que va permitir que les imáxenes del actu, ufiertaes por TVE, lleguen a tol mundu. Les ruedes de prensa de los díes 24 y 25, qu’emitirá TVE polos sos canales, y les conferencies impartíes polos galardonaos tamién se van poer seguir pola Rede na direición web de la fundación: www.fpa.es.

Ésti ye’l duodécimu añu consecutivu que la Fundación Príncipe de Asturias lleva a cabo esta iniciativa. Notres ediciones, la páxina foi consultada por decenas de miles d’usuarios.

Web de la Fundación

El XI Premiu Purificación Tomás organizáu pola Secretaría de Polítiques d’Igualdá del PSOE d’Uvieu va premiar a persones o entidaes con una llabor importante por en favor de la igualdá d’oportunidaes ente homes y muyeres. El plazu pa la presentación de les candidatures va tar abiertu hasta´l día 16 de payares.

Les propuestes habraán de presentase xunto con unma memoria qu’esplique la llabor de la persona o entidña participante y puen presentase na Casa del Pueblu del PSOE D’Uvieu (Jovellanos, 19)

L’Asociación Cultural N’ast tuvo conocencia estos díes de la decisión de la dirección del Istitutu de la llaboral de Xixón de ñegar l’asignatura d’asturianu a doce alumnos de bachilleratu. Según N’ast “la dirección desvió una vegada más a estos alumnos a otres asignatures”.

N’ast considera esti fechu “pergrave y una amuesa más de cuala ye la probetaya situación de la Llingua Asturiana nel sistema educativu”. Pa la organización ta vulnerándose’l drechu de los asturianos a deprender la llingua del país. Amás, la dirección del institutu ataca direutamente a l’asignatura “yá que’l grupu d’alumnos ye una parte importantes del total de los matriculaos”. N’ast denunció la selmana pasada una situación asemeyada nel IES de Llanes, onde una cuarta parte de los alumnos de bachilleratu quedaren ensin asturianu por mor de la negativa de la dirección del centru.

N’ast esixe nel comunicáu que “l’IES de La Llaboral, l’Institutu de Llanes y la conseyería d’educación tomen les midíes afayadices pa qu’estos alumnos puedan a la fin estudiar asturianu y fine asina la persecución de la nuesa llingua”. Hasta esi momentu, diz Xabel de Cea, presidente de N’ast “nun entraremos nuna braera escolarización n’asturianu”.

Los xóvenes de menos de 25 años de Catalunya, Baleares y Valencia son poco consumidores de productos culturales y de prensa y consumen más en castellán que en catalán, según amuesa esti día un estudiu de la Fundació Audiències de la Comunicació i la Cultura (FUNDACC).

L’informe ‘La dieta mediàtica i cultural dels joves’, presentáu esti día y qu’analiza’l consumu de los medios tradicionales y productos como Internet, llibros, cine, videoxuegos, música, conciertos, espectáculos y exposiciones ente la mocedá de los “paisos catalans” amuesa que’l castellán ye la llingua más frecuente na “dieta mediática y cultural” de los mozos.

Los datos revelen que en Valencia y Baleares el consumu de medios y productos culturales en catalán ye casi inesistente y que en Catalunya, el catalán sólo iguala o supera al castellán nos espectáculos y exposiciones.

Según el presidente de FUNDACC, Salvador Cardús, l’informe amuesa que “los xóvenes pasen fame cultural” y que “nun son meyores consumidores que los adultos no que cinca a los medios y otres práctiques culturales”. Tanto mozos como adultos dediquen por igual 4,6 horas al día a los medios de comunicación y un llibru cada 4 meses, una exposición al añu y un espectáculo cada 2.

L’Ayuntamiento de la capital lleonesa ta acabante d’asoleyar en lleonés les fueyes de matrícula de las actividaes promovíes pola Conceyalía d’Educación que dirixe Abel Pardo. A pesar de nun ser una llingua oficial, les fueyes d’inscripción nos cursos organizaos dende esta conceyalía apaecen con una tipografía mayor en lleonés qu’en castellanu, lo que fizo enfadar a la oposición del PP.

El responsable d’esta medida, el conceyal lleonesista Abel Pardo, aseguró que “asina se fadrá con tolo que faiga esta conceyalía” y recuerdó que cuando Amilivia yera alcalde y elli l’edil de Mocedá “diba too nesta llingua”.

“Enredar”, el programa d’ociu del Ayuntamientu de Llaviana empobináu a la mocedá va entamar esta mesma selmana embaxo la coordinación del grupu El Llar de Animación. Esta iniciativa ta pensada pa xóvenes d’ente 14 y 35 años y parte con un presupuestu inicial de 9.000 euros. Participa nelli l’Ayuntamientu de Llaviana y l’Institutu Asturianu de la Mocedá.

Tolos vienres y sñabados d’ochobre y payares va haber xeres nel Centru d’Innovación y Desenrrollu del Altu Nalón. Personalización de camisaetes, capoeira, trabayos manuales, cursos de baille o d’artes marciales son dalgunes de les xeres que se van desendolcar en Llaviana durante los prósimos meses.

“Demientres el xuez del Xulgáu de lo Contencioso-Alministrativo númberu 3 d’Uviéu, anecia en que ye inconstitucional unviar escritos n’asturianu a les Alministraciones Públiques y provoca una cuestión d’inconstitucionalidá por once pallabres na llingua llariega, calteníes nun impresu redautáu en castellán que l’Alministración del Principáu d’Asturies refugó tramitar, la Casa Real tramita y resuelve una solicitú d’un llargor de 24 páxines, escrita dafechu en llingua asturiana, que-y empobinó l’Aconceyamientu de Xuristes pol Asturianu”. Con estes pallabres da anuncia Xuristes pol Asturianu a la rempuesta que recibiere de la Casa Real y que contradiz la situación que pa col asturianu tien l’Alministración nel Principáu.

Nesa carta, denúnciase que l’Alministración educativa “incumple toles obligaciones a les que l’Estáu español se comprometió, nel añu 2001, cola ratificación de la Carta Europea de les Llingües Rexonales o Minoritaries”.

La Casa Real, “tres ‘acusar recibo a la carta y documentación’ de ‘cuyo contenido hemos quedado enterados’, informa que ‘ha transmitido la misma a la Consejería de Educación y Ciencia del Principado de Asturias, que es el órgano competente para que la estudie y, en su caso, le haga llegar la resolución que proceda'”. Dende l’Aconceyamientu de Xuristes pol Asturianu queden “al aguarde de ver si’l Conseyeru d’Educación tien cuayu pa da-y a la Casa Real el mesmu tratu que-yos da a los funcionarios de la so Conseyería que-y dirixen un escritu n’asturianu: nun da-y trámite. Tamién a que se-y esplique al pueblu asturianu por qué’l gobiernu d’Areces ta en rebeldía escontra los mandaos de la Carta Europea de les Llingües Rexonales o Minoritaries”.

Una nueva edición de la feria de desembalaje d’antiguedaes d’asturies, qu’esti añu llega a la so octava edición, entama esti día nel Palaciu de Congresos de la Feria Muestres de Xixón. L’eventu qu’añalmente trea a Xixón a los meyores anticuarios nacionales tamien va cuntar nesti añu cola presencia de profesionales del sector de Francia y Alemania.

Un total de 36.000 piezes de 84 anticuarios van tar a la venta hasta’l 14 d’ochobre nesti eventu organizáu pola Cámara de Comerciu de Xixón y la empresa catalana Llobregat Lúdics. La entrada al recintu cuesta 4 euros y los horarios son: de 17:00 a 21:00 hores, el d ía 11 y de 11:00 a 21:00 los díes 12 y 14.

La Oficina de Política Llingüística del Principáu d’Asturies ta acabante d’asoleyar el cartafueyu ‘Ría del Eo. Informe y conclusióis’, un llibrín que recueye los trabayos de la Comisión nomada pa conocer la toponimia del Eo y qu’agora axunta les conclusiones pa poneles a disposición de les persones intereses nel tema.

Nel llibru respuéndese a preguntes bien problemáticas hasta va poco ‘¿Cómo se llama la Ría que fai de frontera ente Asturies y Galicia?’, una controversia pública que llevó a la Xunta Asesora de Toponimia del Principáu d’Asturies a aconceyar un grupu d’espertos de la fastera, que formaron la ‘Comisión pral Estudio da Denominación da Ría’ cola idea de partida de dar rempuesta a dos entrugues: Qué denominaciones son tradicionales y mayoritaries a dambes dos orielles de la Ría y cuál d’elles ye la más aconseyable pa proponese como nome oficial intercomunitariu de la Ría. El llibru unvíase de baldre a quien lu pida pel corréu opll@princast.es