Sociedá

L’Academia de la Llingua Asturiana va zarrar, esti xueves 24, el plazu pa matrículase na primer prueba de conocencia d’esti añu, que se cellebrará’l prósimu sábadu 26 de xineru. La segunda oportunidá p’algamar el diploma de conocimientu básicu del asturianu a nivel 1 va facese en mayu.

La prueba va tener dos partes, una escrita (dictáu, torna, exercicios gramaticales, redaición) y otra falada (conversación) na que se van valorar los conocimientos gramaticales, d’espresión escrita y oral asina como la conocencia del allugamientu de la llingua dientro de la sociedá asturiana y del procesu de normalización en que ta inxerta.

Na web de l’ALLA hai más información sobre la prueba y sobre la bibliografía necesaria pa preparar esti esamen, ente ella la Gramática de la Llingua Asturiana y les Normes ortográfiques espublizaes pola institución.

La ceremonia d’entrega de los XXIII Premios Andrés Solar va cuntar mañana pela tarde, a les 19:30 hores, cola participación de Toli Morilla.

La ceremonia va entamar mañana sábadu 19, a les siete y media de la tarde, nel salón d’actos del Antiguu Institutu Xovellanos de Xixón. Ellí va facese entrega del Pegollu, Premiu Andrés Solar 2007, a l’equipu de fútbol L’Entregu CF en reconocimientu a la so aportación a la visualización y normalización de la llingua asturiana nel ámbitu del deporte. El xuráu de los premios valoró mui positivamente la voluntá firme del equipu na defensa del nome verdaderu del so llugar, L’Entregu, y la so difusión en tou tipu de medios deportivos y xeneralistes.

D’otra banda, faráse entrega de la Madreña Purpurina al secretariu xeneral de la FSA-PSOE Javier Fernández Fernández pola so trayectoria d’ataques y esibiciones de prexuicios contra la llingua asturiana y contra los derechos llingüísticos de los asturianos y asturianes.

L’actu incluirá tamién la tradicional llectura del discursu añal de la Xunta pola Defensa de la Llingua Asturiana nel que se fará repasu de lo que’l 2007 dio se sí no tocante a la realidá de la llingua asturiana. Tamién va haber momentu pa la folixa na espicha que, como vien siendo vezu, va facese en acabando la ceremonia. El preciu pa la espicha ye de 25 euros por persona, los y les que quieran apuntase puen facelo nel teléfonu de la Xunta: 985 229 553.

Cola implantación en tol estáu de les ayudes a la emancipación de plena actualidá, va cellebrase una xornada d’alderique sobre la necesidá d’implantar una renta básica pa tolos ciudadanos na casa la cultura de La Pola, en Siero. La cita ye esti sábadu 19 de xineru de 09:30 a 14:00 hores, y na mesma van participar dellos de los mayores defensores d’esti conceutu, Daniel Raventós, Doctor en Ciencies Económiques y profesor de Teoría Sociolóxica y Ciencies Sociales na Universidá de Barcelona o Jordi Arcarons, Doctor en Ciencies Económiques y Catedráticu d’Economía na mesma universidá. Los dos son miembros destacaos de la rede de renta básica.

Según Raventós y Arcarons l’estáu diba tener que pagar una cantidá de dineru mínima a caún de los ciudadanos, trabaye o nun trabaye remuneradamente. Esta renta tendría que pagase namái pol mesmu fechu de ser ciudadanu d’esi estáu y pa España taría alredor de los 330 euros, que ye la cantidá que ta xustu por encima del umbral de pobreza.

El borrador del Currículu d’Educación Infantil que presentó’l martes la Conseyería d’Eduación, nel que nun apaez por nenguna parte la enseñanza del asturianu, tuvo tamiem rempuesta por parte de la Xunta pola Defensa de la Llingua Asturiana. La Xunta denunció que l’asturianu namái tien una presencia testimonial, por detras d’otres llingües, nun documentu que nun respeta la llei d’usu nin l’alcuerdu de Plantiyes d’Educación Infantil y Primaria, que dexa afitao que cada centru tien que tener un especialista de llingua asturiana.

Pa los responsables de Xunta pola Defensa de Llingua, el borrador de Currículu del gobiernu ignora una realidá como ye la presencia que tien l’asturianu como idioma vivu ente la población infantil de les escueles. “En llugar d’encarar una cuestión tan fundamental, el documentu escapa d’ella como si fuera un tabú”. La Xunta llamentó, por últimu, qu’estes polítiques tean llogrando que la llingua tenga cada día menos presencia na sociedá asturiana, a base d’arrequexar la so enseñanza nes primeres estayes del sistema educativu.

La Xunta Defensa de Llingua tamien denuncia l’arrequexamientu de la llingua nel currículu

La organización de mocedá d’Andecha Astur, Darréu, entamó l’añu 2008 distribuyendo ente los sos militantes y simpatizantes 5000 calendarios col llogotipu de Darréu y el llema “Enxamás nun seremos españoles, enxamás mos someteremos”. La organización quier asina esparder l’usu de los meses n’asturianu y “concenciar a la mocedá asturiana de la necesidá de la independencia”.

L’11% de les persones qu’en 2007 fueron a un congreu tuvieron como llugar d’arribada Asturies. El nuesu país conviértese asina na cuarta comunidá autónoma con más congresos, superada namás por Madrid, Andalucía y Cataluña. Los datos diéronlos estos díes la Conseyera de Cultura y Turismu, Encarna Rodríguez y la Directora Xeneral de Turismu, Elisa Llaneza.

Pa la Conseyera esti “ye un fitu, pues les comunidaes que mos superen son les más potentes del país”. Amás recordó que se creció “un 28%» nun periodu que nun inclúi tol añu, porque los congresos se celebren ente xineru y mayu y en setiembre y ochobre”.

La Mesa pola Normalización Lingüística detectó no que va de cursu un “incumprimento masivo” de la docencia oral en gallegu, especialmente n’Educación Infantil, polo qu’urxe a la “Consellería de Educación” un “Plan de Formación en Galego para o profesorado”.

Según publica esti martes Europa Press, el presidente de la Mesa, Carlos Callón, afitó esti ámbitu como principal núcleo deficiente nel cumplimientu del “Decreto do Galego no Ensino”, qu’entró en vigor nel presente cursu, y sobre’l que dixo tar “esperanzado” d’equí a que fine’l cursu pa que les cifres de cumplimientu “evolucionen”.

La Mesa pola Normalización pide que tanto la Consellería de Educación como la Secretaría Xeral de Política Lingüística actúen pa paliar esta situación y sofiten la edición de los llibros de testu necesarios pa les enseñances nos qu’entá se detecten necesidaes abondes.

La Mesa pola Normalización Lingüística detectó no que va de cursu un “incumprimento masivo” de la docencia oral en gallegu, especialmente en Educación Infantil, polo qu’urxe a la “Consellería de Educación” un “Plan de Formación en Galego para o profesorado”.

Según publica esti martes Europa Press, el presidente de la Mesa, Carlos Callón, afitó esti ámbitu como principal núcleo deficiente nel cumplimientu del “Decreto do Galego no Ensino”, qu’entró en vigor nel presente cursu, y sobre’l que dixo tar “esperanzado” d’equí a que fine’l cursu pa que les cifres de cumplimientu “evolucionen”.

La Mesa pola Normalización pide que tanto la Consellería de Educación como la Secretaría Xeral de Política Lingüística actúen pa paliar esta situación y sofiten la edición de los libros de texto necesarios pa les enseñances nos qu’entá se detecten necesidaes abondes.

La Estaya de Llingua Asturiana d’Avilés va desenrrollar una campaña de normalización llingüística nos comericos de la ciudá coincidiendo coles rebaxes d’iviernu qu’entamen estos díes. La campañana va consistir nel repartu de cartelos y material publicitariu n’asturianu.

Nuna primer etapa van repartise cartelos anunciadores de les rebaxes d’iviernu, darréu van repartise bolses de plásticu con una lema n’asturianu y na cabera fase, van distribuyise lletreros anunciadores colos nomes de les frutes, verdures, carnes y pescaos. Otres ciudaes como Xixón yá entamaron campañes asemeyaes nos últimos meses.

Na madrugada d’esti martes 8 de xineru morrio Mundo Collada, asturianista que foi conceyal por Villaviciosa ente 1995 y 2003, dempues d’una complicación nuna operación quirurxica. Retiráu del mundiu políticu dende 2003 por propia iniciativa, Collada foi un de los primeros conceyales asturianistas de la hestoria pol Partíu Asturianista; grupu del que coló na so última epoca nel consistoriu por desalcuardos cola llinía política. Tres retirase de la política n’activu, que non de la reivindicación, Mundo Collada exercía como enólogu nos llagares Sidras de El Gaitero en Villaviciosa.