Sociedá

Estu miercoles 27 de febreru va entamar nel Centru Asturianu de Madrid un cursu d’asturianu con una duración de 35 hores. Les clases, pa les que tovía ta abirtu’l plazu de matrícula, van dase tolos miercoles de 19:30 a 21:30 hores nes instalaciones del centru. El cursu va correr al cargu de Pablo Suárez García, doctor en Filoloxía especialista en Filoloxía Asturiana pola Universidá d’Uvieu.

La coalición Unidá, vien de presentar un escritu a la Casa Conceyu riberana nel que se denuncia l’incumplimientu del espediente toponímicu aprobáu yá nel 2006. La falta d’emplegu de la toponimia oficial nel conceyu, diz el comunicáu, “ye constante dende’l mesmu sitiu web oficial, a los escritos oficiales del ayuntamientu, pasando como non, pelos cartelos señalizadores de tol marcu municipal, dellos yá en males condiciones por mor de la so vieyura o porque tán entafarraos”.

Dende la coalición proponens “una igua de los cartelos que tean entafarraos acordies cola toponimia oficial y un compromisu por parte de la Casa Conceyu a respetala nos futuros camudamientos na señalización”. Amás de solicitar una versión n’asturianu del sitiu web “según lo establecío na Llei del Principáu d’Asturies 1/2001, de 6 de marzu, de Patrimoniu Cultural, les instituciones asturianes han protexer y preservar el patrimoniu cultural en toles sos manifestaciones, mesmamente la llingua, talamente los escritos oficiales asoleyaos pol conceyu habríen respetar tamién los topónimos oficiales”.

Esta denuncia, sumada a les feches pol Partíu Popular en Xixón y por otros partíos n’otros conceyos, amuesen que l’usu real de la toponimia oficializada sigue ensin facese efectiva, en dalgunos casos, más d’un añu dempués de la so oficialización per parte del Gobiernu d’Asturies.

Esti vienres 21 de febreru, como davezu dende l’añu 2000, ta cellebrándose’l Día Mundial de les Llingües Maternes por mor d’una iniciativa de la UNESCO. Esti garra especial importancia nel caso de les llingües en peligru de desapaición, como l’asturianu. Y precisamente dos miembros de la directiva de la Tertulia Cultural El Garrapiellu, tan nes cellebraciones pa esponer la situación anómala qu’anguaño vive la la llingua de nueso. Ente les xeres que van llevase al cabu na sede de la UNESCO ta un seminariu sobre plurilligüismu nel que va tomar parte’l Conseyu d’Europa.

46 organizaciones, ente asociaciones de muyeres, partíos políticos, sindicatos y colectivos sociales, van participar na mnanifestación por derecho al abortu que, embaxo’l lema “Nosotres decidimos” va salir de la plaza del Humedal, en Xixón esti xueves 21 de febreru, a les 19,30 hores. Enantes, el miercoles 20, va tener llugar la presentación de la mesma nel local de la plataforma asturiana pol derechu al abortu, nel edificiu del El Termometru n’Uvieu (Cai San Francisco, 21-3ºdcha).

La plataforma reivindica que l’abortu salga del códigu penal, denuncia l’acosu al que se ta sometiendo a les muyeres acoyíes a la llei pa interrumpir un embarazu nun deseáu y esixe una nueva normativa que garantize’lel derechu a interrumpir l’embarazu na rede sanitaria pública. Otres de les reivindicaciones quye van garrar voz na cai el sábadu ye la necesidá d’una educación sexual correcta nos centros escolares o l’accesu xeneralizáu a los medios anticonceptivos.

Participantes y más información

“Va facese billingüe dafechu”. Con estes pallabres y con una rueda de prensa n’asturianu al cargu de Jose Suárez Arias-Cachero na presentación de la esposición “Neolítico, de nómadas a sedentarios”, el PP d’Uvieu continua sacando l’asturianu a colación nel so particular cruze de declaraciones col PSOE. Arias-Cachero quiso contestar a les declaraciones d’Antonio Trevín nes qu’afirmaba que Gabino de Lorenzo namái qu’usaba l’asturianu “pa babayaes”.

“Nun vamos aceutar, y tamos demostrándolo con esti exemplu, espresiones d’esti calter vengan de quien vengan, sobre manera d’una persona que foi presidente del Principáu y nun fizo nada pola normalización del asturianu y que siendo delegáu del Gobiernu nun almite a trámite, nel rexistru de la Delegación, escritos n’asturianu”, apunto’l conceyal del Ayuntamientu d’Uvieu. Cachero quier qu’esta iniciativa sirva p’afitar el procesu de normalización de la llingüa.

“Neolítico, de nómadas a sedentarios”, va poder visitase hasta’l 25 de marzu nos locales de La Caixa na capital, anque los paneles namái que tan visibles en castellanu. Los folletos informativos, pol contrariu, si tan editaos nos dos idiomes.

L’asociación cultural El Garrapiellu va dar a conocer a la UNESCO cual ye la situación actual del asturianu. Una delegación, compuesta por Ánxel Nava y Sixto Armán,ta invitada al conceyu que’l Comite Intergubernamental pa la Salvaguarda del Patrimoniu Cultural Inmaterial de la UNESCO va cellebra en Sofía del 18 al 22 de febreru.

Los representantes de El Garrapiellu van centrar la so intervención n’amosar los problemes a los que se vien enfrentando l’asturianu como son la perda de falantes y la desproteición xurídica que sufren l’asturianu ya’l gallego-asturianu por mor de la non oficialidá. Tamien van falar del orixe ya’l crecimientu de la llingua y del panirama sociollingüísticu n’Asturies. La UNESCO, que ta cellebrando’l so Añu Internacional de les Llingües incluyó al asturianu na so llista de Llingües Amenorgaes en peligru.

La aerollínia de vuelos de baxu coste Easyjet, que vien operando nel aeropuertu d’Asturies dende haz dos años, va ampliar la so frecuencia de servicios a Madrid con un vuelu más de magar el 3 de marzu. Los billetes ya tan disponibles na web de la compañía y a precios dende los 20 euros. Nes últimes feches Easyjet tamien abrió una nueva ruta aerea ente’l Principáu y Xinebra.

La nueva frecuencia va salir cada día de Barajas a les 14:45 hores y despegará del aeropuertu de Santiago del Monte a les 16:45 hores. “Con esta ampliación EasyJet cubre todas las franjas horarias para volar a Madrid”, declaró Beatriz Fernández, directora de Marketing d’EasyJet na rueda de prensa.

El Conceyu de Corvera va cuntar con un serviciu de normalización llingüística. A esti alcuerdu llegaron esti miercoles la Conseyera de Cultura del Principáu, Encarna Rodríguez Cañas y l´Alcalde de Corvera, Jose Luis Vega. El nuevu serviciu va tar venceyáu a la Casa de la Llingua de Les Vegues. Asimesmu ambes partes alagamaron dellos compromisos pa remocicar la Casa Consistorial de Nubleo p’asitir elli l’archivu municipal y la meyora nos campos de fútbol de Manzaniella y Tresona y la piscina de Les Vegues.

Los sindicatos de la enseñanza sofitaron, nun comunicáu de prensa, la clase d’asturianu na cai que la Xunta pola Defensa de la Llingua va llevar al cabu esti sábadu na plaza La Escandelera d’Uvieu a les 13:00 hores. SUATEA, CCOO y FETE-UXT animen a tol mundiu a participar na clase, pa denunciar el denunciar el tratu ultraxante col que la Conseyería d’Educación trata a l’asturianu. Sobre manera con actuaciones como’l despreciu a la llingüa nel reciente borador del Currículum d’Educación Infantil

Según los sindicatos del sector les polítiques del executivu d’Areces van encaminaes a homoxenizar Asturies con otros territorios del estáu y acabar cola llingua asturiana. “Los osos americanos paecieron-y meyor que los d’equi y trayeron a Yogui, paeció-y too tan grande que lo d’equi antoxose-y ruín y pueblerín. Pa falar con Yogui nun val l’asturianu y asina nos van les coses”, denunciaren na nota de prensa refiriendose al presidente asturianu.

La Xunta pola Defensa de la Llingua va dar una clase n’asturianu esti sábadu (13:00 hores) na Plaza La Escandalera d’Uvieu. Con esta inciativa al aire llibre, los xuristes asturianos quieren denunciar les munches irregularidaes que se tan cometiendo por parte del executivu del Principáu cola enseñanza de la llingua na rede educativa d’Asturies. XPDL reclama al gobiernu midíes coherentes pa que se cumplan les lleis y normatives vixentes.

La clase na Escandalera ye abierta pa toll públicu que quiera dir y va cuntar con un mayestru d’asturianu pa deprender nociones básiques del idioma, dalgo, que según XPDL “deberie facese en toles escueles”. La Xunta pola Defensa de la Llingua Asturiana fai con esta iniciativa un llamáu a tola comunidá escolar, a los falantes y tou aquel que vive o trabaya n’Asturies pa que participe na movilización.