Sociedá

La cuarta edición de la Fiesta de les asociaciones entamó ayeri xueves na Playa de Pando de Xixón, organizada pol Conseyu de Mocedá de Xixón col envís de ser “un llugar abiertu a la participación de tola ciudadanía”. Na fiesta tienen el so espaciu asociaciones, xóvenes, colectivos y entidaes de tou tipu, que “enllenen de música fiesta, actividá y color el cementu del paséu de la Playa de Pando.

Hasta’l domingu va poder visitase y participar d’actividaes como conciertos, torneos deportivos, xuegos “pa grandes y pequeños”, arte y esposiciones, charres, alderiques y conferencies, percusión, flamencu, hip-hop, y otres actividaes.

Esti ye’l programa completu:

Vienres 1
12:30 hores Tertulia de LLABoral
La directora Rosina Gómez – Baeza Tinture, el comisariu xefe Erich Berger
13:30 hores Animación ManúManue
18:00 hores Alcuentru de Voluntarios europeos
19:00 hores Alcuentru col embaxdor de Nicaragua n’España. Organiza la Coordinadora de ONG´D d’Asturies.
20:00 hores Títeres
20:00 hores Conciertu de Vinilos. Dj Iván Lomas (Dj Pimp)
LLABoral. Centru d’Arte y Creación Industrial
21:30 hores Conciertu de Kozmics
23:00 hores Conciertu de CANTECA DE MACAO

Sábadu 2
12:00 hores Concursu de perros ensin raza. Proyecto Darko
12:00 hores Presentación de trabayos espuestos en Banquete_Nodos y Redes y Homo Ludens Ludens y películes del ciclu d’animación. LLABoral Centru d’Arte y Creación d’arte y creación industrial
17:00 hores Espectáculu de ManúManue (zapatones, percusión y trucos de maxa)
18:00 hores Presentación del Cuadernu de Diálogos pa la Cooperación colos pueblos indíxenes. Acsur las Segovias
18:30 hores Mesa sobre la situación actual de los pueblos indíxenes en Llatinoamerica. Coordinadora d’ONG´D
Presenta: Jordán Suárez Garea. Presidente del Conseyu de Mocedá de Xixón
Intervienen:
Sr. Augusto Cesar Zamora. Embaxador de Nicaragua n’España
Sr. Montes Estrada. Conceyal de Cooperación del Ayuntamientu de Xixón
Representante de la Coordinadora d’ONG´D d’Asturies
Sr Pablo Gutierrez Vega. Profesor Universidá de Sevilla
Sra. Aida María Quinatoa. Presidenta de la Coordinadora d’Ecuatorianos n’España. CONADEE
20:00 hores Performance colos xuguetes lletrónicos convertíos n’oxetos musicales del taller Soundtoys. LLABoral. Centru d’Arte y Creación Industrial
21:00 hores Conciertos: Finde Terrible (Hip- hop y Breakers)Solokolo y Fat Club
Básico
Eduakapenn1
Dj y Breakers
23:00 hores SHUGA WUGA Y LOREN

Domingu 3
17:00 hores Desfile de perros ensin llar. Proyecto Darko
18:00 hores Xuegos y deportes Tradicionales Asturianos. Tertulia Cultural El Garrapiellu
19:00 hores Exhibición de batuka. Ximnasiu Xtreem
19:30 hores Entrega de premios a les actividaes deportives
19:30 hores Proyección sobre Asturies
20:00 hores Mesa redonda “Música en Llingua de güei”
22:00 hores Conciertos de LA TARRANCHA Y SKAMA LA REDE

Francisco Javier García Valledor, diputáu d’IX-BA-Verdes, denunció esta mañana’l cambiu nel modelu de xestión del Parque Natural de Somiedu, el primer parque natural declaráu n’Asturies, qu’agora cumple los sos primeros 20 años d’esistencia. La modificación del modelu supón un xiru importante, en diferentes ámbitos, qu’atenten escontra los oxetivos de defensa del mediu ambiente colos que foi creáu. Na rueda de prensa desgranó diferentes asuntos qu’exemplifiquen esti cambiu, tanto per parte del Ayuntamientu de Somiedu, como per parte de la propia alministración rexonal.

L’alcalde de Sobrecobiu, Vicente Álvarez González, morrió güei pola mor d’un paru cardiacu, según confirmaron a Europa Press fontes socialistes del Nalón. La muerte del primer edil foi “inesperada” dafechu según almitieron responsables municipales, ya que se desconocía que’l dirixente socialista tuviere enfermu.

La muerte causó conmoción nel Conceyu y especialmente ente los socialistes. La Federación socialista Asturiana (FSA) unvió ya a la familia un telegrama espresando les sos condolencies.

El socialista Vicente Álvarez González ocupaba l’alcaldía de Sobrescobiu dende l’añu 1995 y gobernaba con mayoría absoluta. El rexidor foi nomáu presidente de la Mancomunidá de Servicios del Valle del Nalón a mediaos del 2006 tres la dimisión del alcalde de Llaviana, Marcial Barreñada. Tres les elecciones de mayu del 2007, el alcalde de Sobrescobiu foi confirmáu nel cargu. Pa Vicente Álvarez éste yera’l segundu periodu como presidente de la Mancomunidá del Nalón, puesto que lu fuera con anterioridá Marcia Barreñada y l’alcadesa de Llangréu, Esther Díaz.

La Fundación Príncipe d’Asturies tenía yá a finales de 2007 un patrimoniu valoráu en 22,7 millones d’euros. Asina lo espeya la memoria que se presentó esta selmana nel conceyu del patronatu de la institución.

Nesta memoria recuérdase que la Fundación tien como oxetivu primordial sufragar toles sos actividaes coles rentes del patrimoniu y mientres ello nun seya posible, la institución recurre a les aportaciones a títulu de sovención procedentes de diferentes personalidaes y instituciones, fundamentalmente de los integrantes, de los patronos y de los miembros protectores.

Nel 2007, el costu de les actividaes propies de la Fundación Príncipe d’Asturies ascendió nel 2007 a 7,1 millones d’euros. El presupuestu de gastos propios de la Fundación, el 55 por cientu tuvo destináu a la convocatoria, concesión y entrega de los Premios Príncipe d’Asturies. El 45 por cientu restante se dedicó a otru tipu d’actividaes como conciertos, esposiciones y alcuentros, asina como a los gastos xenerales de la institución.

El Conceyu Abiertu, asitiáu na cai Gascona d’Uviéu, acueye güei llunes a les ocho la tarde una charra-coloquiu entamanda pola organización Xente Gai Astur, na que va tar presente Ignacio Paredero, expresidente del Colectivu “Iguales”, estudiante de la Universidá de Salamanc y miembru de la Comisión Executiva de la FELGTB.

Na charra, titulada “Ser visible na universidá ¿una tarea imposible?”, va falase de les dificultaes que viven los alumnos homosexuales nos centro universitarios d’Asturies y del restu del Estáu.

El Conceyu Abiertu pola Oficialidá (CAO) aseguró güei nuna rueda de prensa delantre la Xunta Xeneral que delles agrupaciones llocales del PSOE presentaron enmiendes, de cara al congresu rexonal de la Federación Socialista Asturiana, previstu pa xunetu, a favor de la reconocencia de la oficialidá del asturianu nel Estatutu d’Autonomía.

El datu ufríalu Ernesto Suárez, miembru del CAO y voceru de la Xunta pola Defensa de la Llingua Asturiana (integrante del Conceyu) al final de la concentración que’l colectivu convocara delantre la Xunta Xeneral del Principáu, en favor de la oficialidá de la llingua.

Según asoleyaba Suárez aseguró que nel próximu boletín de la FSA van dase a conocer los nomes de de les agrupaciones llocales que presentaron delles enmiendes de cara al congresu, “dalgunes meyorando’l tratamientu del asturianu, y otros proponiendo ya la oficialidá”. El voceru aseguró que’l CAO tien constancia d’ello, anque nun desveló’l nome de les asamblees que presentaríen estes propuestes, “ya que va ser de dominiu públicu nos próximos díes”. Dende’l so puntu de vista, “ye un datu importante, non porque pensemos que la direutiva de la FSA vaya ceder na so negativa a reconocer la oficialidá, pero sí porque demuestra que dientro del PSOE hai xente a favor d’ello”. “Los responsables socialistes nun recueyen al sentir mayoritariu de la sociedá, incluyida la propia FSA”, añadió.

Esti miércoles, día 18 de xunu, a les 12 hores, l’alcalde de Casu, Elías Rodríguez Lozano, y el xerente de COGERSA, Santiago Fernández Fernández, presentaron a los medios el programa d’actividaes d’educación ambiental que se va a desenrrollar nel conceyu ente’l 19 y el 27 de xunu col obxetivo de facer alitar la participación ciudadana na recoyida selectiva de residuos.

El númberu de persones mayores de 15 años que falen euskera y castellan xorreció n’Euskadi durante los últimos 15 años, dende 1991 a 2006, un 6%. Trátase d’una meyora de 138.400 persones, lo que supón pasar de 419.200 billingües a 557.000, sigún se recueye na IV Encuesta Sociollingüística del Gobierno vasco, realizada al traviés de 7.200 cuestionarios y que se presentaba esti miércoles pela mañana.

Anguaño, el 30,1% de la población de la Comunidá Autónoma Vasca ye billingüe y el 18,3% entiende l’euskera pero nun lu emplega davezu, frente al 51,5% que sólo fala y entiende’l castellán.

El xuráu encargáu del Premiu Príncipe d’Asturies de Comunicación y Humanidaes dio anuncia ayeri de que’l buscador Google ye’l ganador d’esta categoria pa la edición de 2008 por mor de la so “contribución decisiva al progresu de los pueblos, penriba de les llendes ideolóxiques, económiques, llingüístiques y raciales”. Google ufre dende va años versión en gallegu, catalán y vascu, pero non n’asturianu, que nun ta ente les decenes de llingües nes que s’ufre’l buscador.

El xuráu solliñó “revolución cultural que supunxo Google en malpenes una década”, averando información de tol mundiu a millones de persones.

La candidatura de Google foi propuesta por José Luis Pardos, embaxador d’España y miembru del xuráu, col sofitu d’Al Gore y Vinton G. Cerf

El xuráu tuvo integráu por José Antonio Álvarez Gundín; Ignacio Bayón Mariné; Emilio Casinello; Alejandro Echevarría; Javier Gómez Cuesta; Javier González Ferrari; Álex Grijelmo; José Luis Gutiérrez; Miguel Ángel Liso; Manuel Lombardero; Ramón López Vilas; Catalina Luca de Tena; Hans Meinke; Ana Rosa Migoya; Jaime Montalvo Correa; Rosa Montero; Beatriz de Moura; Manuel Olivencia; Pedro Páramo; José Luis Pardos; Alberto Pico; José Antonio Sánchez; Ricardo Senabre; Jesús de la Serna; Enrique Ybarra y Juan Luis Iglesias Prada.

Esti vienres, 13 de xunu, a les 20:00 hores, va presentase’l documental “La violencia estructural en México: Los casos de Chiapas, Oxaca y Atenco”. Asinamesmo presentaráse tamién l’Informe y conclusiones de la sesta Comisión Civil Internacional d’Observación de los Drechos Humanos (CCIODH), a cargu d’Ana Herreros Borbolla, que pertenez a la Comisión d’Observación Internacional y al Comité de Solidaridá colos Pueblos de Cantabria.