Sociedá

Navelgas, nel conceyu de Tinéu, va celebrar esti domingu la XXVIII edición del Día de los Pueblos d’Asturies y esti añu l’homenaxe va centrase en Les Arriondes, capital del conceyu de Parres, que recibe’l gallardón “Palomba de la Fraternidᔠpor ser “un referente de villa asturiana convertida nun importante centru de servicios”.

Tamién va recibir homenaxe’l presidente d’Honor de Duro Felguera, Ramón Colao Caicoya, que recibirá’l gallardón “Choscu d’Oru” pol so llabor solidariu.

L’asociación cultural “El Hórreo de Barcia”, del conceyu de Valdés, va recibir el gallardón “Arándanu de Plata” pol so exemplu como movimientu ciudadanu.

Esti sábadu, 23 d’agostu, en La Pola, conceyu de Llaviana, celébrase otra nueva edición del célebre Descensu Folklóricu del Nalón, una xornada na que se tien de baxar el ríu colos métodos más divertíos ya inverosímiles.

La fiesta ta declarada d’Interés Turístico Rexonal y llega hasta’l so destín final, la ponte de La Chalana dempués d’un quilómetru y mediu de percorríu pel ríu.

Pa les meyores embarcaciones hai dos premios: la sopera y la soperina, pa los más pequeños.

Según les cifres oficiales emitíes pol Centru d’Arte y Creación Industrial de La Llaboral, dirixíu por Rosina Gómez Baeza recibió nos 16 meses que lleva abiertu 78.000 visites, ye dicir, alredor de 195 asistentes por día. Unes cifres mui baxes teniendo en cuenta la inversión fecha na instalación y les promociones, como la gratuidá de la visita los miércoles o les visites d’escolinos, habituales.

Los vecinos de la parroquia de La Montaña, asitiada nel conceyu de Valdés, entamen pa próximu sábadu 30 d’agostu, una sestaferia medioambiental titulada “I Xornada de L.limpieza del Ríu Negru”. La salida va ser a les 10 de la mañana dende’l Campu de Belén, encomenzando la llimpieza nel pueblu de Concernosu.

A tolos participantes daráse-yos un bocadillu y un refrescu. Al finar la xornada los participantes van xuntase nel Campu Belén pa celebrar una espicha, animada con música d’acordión.

Pa una meyor organización, los entamadores piden a les persones que tean interesaes en participar que llamen a ún de los siguientes teléfonos: 985640083/ 626189608/ 696713256 o se comuniquen al traviés del corréu belen@belendevaldes.es

L’actu ta entamáu pola Asociación de Vecinos “Virgen de Belén” cola collaboración del Escelentísimu Ayuntamientu de Valdés, Caxa Rural d’Asturies, Caxastur, Supermercados El Árbol, Panadería Aldín, La Casona de Belén y Jose “El Panaderu”.

Dellos particulares tán presentando estos díes reclamaciones nel propiu llugar y nos rexistros del Conceyu de Xixón pol incumplimientu nel usu de la toponimia oficial del conceyu nel pabellón que l’Ayuntamientu tien nel recintu ferial Luis Adaro. Nel llugar pueden vese topónimos como “Cimadevilla” o “Jove”, en llugar de los oficiales Cimavilla y Xove y el topónimu Xixón nun apaez en nengún llugar del estand, sustituyíu siempres pola forma castellanizada.

Pa les persones que presentaron la protesta “ye llamativo qu’un ayuntamientu del PSOE ya IX-Bloque, que presume de fomentar l’usu del asturianu nun tenga nin un res d’asturianu na so esposición pública na FIDMA”, lo que pa ellos demuestra “la so falta de voluntá”.

Esta protesta súmase a la que va díes ficieren los mesmos particulares sobre la presencia del asturianu nel pabellón del Gobiernu d’Asturies de la Feria Internacional de Muestres d’Asturies, qu’esti añu ta dedicáu a la nueva páxina web del Gobiernu, estrenada va dellos meses nuna versión trillingüe (castellán, asturianu ya inglés), de lo que nin siquier se diz nada nel estand.

Asturnews ufre’l modelu de reclamación remitíu polos particulares que tán presentando estes protestes formales y que pue presentase nel rexistru municipal, nos centros integraos de Xixón, o nel rexistru del Principáu.

https://www.asturnews.com/index2008.php?idn=6999

L’asturianu Samuel Sánchez llevó esta mañana a lo cimero al deporte asturianu algamando laprimer medalla d’oru d’España na prueba ciclismu na que ganó a los otros cinco corredores qu’aportaron xunta elli a la meta con un intelixente sprint nel que s’echo a mandrecha y dió-y a pedal con muncha más fuercia y seguridá que los especialistes que diben a la so vera.

Samuel Sánchez algamó la medalla d’oru de la prueba de ruta al superar al sprint al italianu Davide Rebellin y a Fabian Cancellara, medalles de plata y bronce respeutivamente.

Nuna nota de prensa asoleyada esti sábadu, la Xunta Direutiva del Aconceyamientu de Xuristes pol Asturianu afala a iguar un conceyu hermanu nel que puedan organizase los non profesionales del drechu que compartan los SOS principios y estratexes.

El determín de “desprovincializar” la xusticia y aportar col conflictu llingüísticu del país al Tribunal Constitucional y, llegáu’l casu, al Européu de los Drechos Humanos, tien un trabe económicu impuestu pel pesu de la carga a repartir ente’l mediu centenar d’asociaos al Aconceyamientu de Xuristes pol Asturianu, llende que torga más d’una iniciativa amañosa.

D’otra miente, dementres l’impedimentu al emplegu de la nuesa llingua guaña en toles actividaes profesionales y perdayuri, el conflictu social que xenera nun se materializa n’actuaciones aposentaes y bien empobinaes al oxetivu, por toos perseguíu, de respetu social a los drechos de los falantes d’asturianu, quiciás pola rocea que’l común de la ciudadanía amuesa nel intre de vese abocada a entamar una reclamación alministrativa y, entá más, xudicial. Rocea vieya y xustificada porque los poderes públicos n’España diséñense d’abenayá más pa servir al estáu qu’al ciudadán, pero que nun tien porque alloñamos tanto del poder como pa nun aprovechar les resquiebres y contradicciones que xenera y más cuando’l camín tien l’acabu en tribunales internacionales, de xuru ensin tantos posos imperiales y centralistes y dengún franquista.

Poro, pa entrambes les dos coses –sofitar económicamente’l frente llegal del conflictu llingüísticu y enanchalu a toles sos manifestaciones, encadarmando les aiciones sociales y llegales oportunes- y a suxerencia de delles persones que vienen alendando a l’asociación ensin poder ser parte d’ella, la Xunta Direutiva del Aconceyamientu de Xuristes pol Asturianu afala a iguar un conceyu hermanu nel que puedan organizase los non profesionales del drechu que compartan los nuesos principios y estratexa y a talu efeutu FAI UN PRIMER LLAMÁU A CIUDADANOS QUE TEAN PEL LLABOR D’ALENDAR UNA ASOCIACIÓN DE SOFITU AL ACONCEYAMIENTU DE XURISTES POL ASTURIANU Y ENANCHAMIENTU DE LOS SOS OXETIVOS, PA QUE MANIFIESTEN ESI COMPROMISU AL TRAVIÉS D’UN CORRÉU LLETRÓNICU UNVIÁU A LA DIREICCIÓN xuristespolasturianuarrobahotmail.com SO LA TEMA “ASTURIES YE POSIBLE”.

El Garrapiellu dio anuncia de la decisión de “facer un llamáu a la Sociedá Civil Asturiana énte les agresiones que ta sufriendo la llingua y la cultura asturiana”. Los miembros de la organización recuerden los últimos casos: “el refugu na Universidá d’Uviéu y la ponencia del Artículu 4º del Estatutu que roblaron los partíos mayoritarios ensin escuchar les reivindicaciones de bona parte de la sociedá asturiana”.

Dende la organización quieren “afitar, una vegada más, el compromisu de la Tertulia Cultural El Garrapiellu cola defensa de la llingua y la cultura asturiana en toles sos manifestaciones”. Pa ello, comenten dende l’asociación “facemos nuestra la convocatoria de la Academia de la Llingua Asturiana el xueves 17 pasáu na Cámara del Auditoriu d’Uvieu”. Amás “llamamos a toles persones que como nosotros nun quieren que la nuesa esencia como pueblu desapaezca nin que tea lligada al desapegu del políticu de turnu”:

El Garrapiellu “esixe” el reconocimientu del derechu a usar la nuesa llingua. “Una vegada más y como siempre: L’ASTURIANU LLINGUA OFICIAL” remata’l comunicáu.

El Barómetru de vezos de llectura y compra de llibros 2007, ellaboráu por Conecta pa la Federación de Gremios d’Editores d’España (FGEE), col patrociniu de la Dirección Xeneral del Llibru, Archivos y Biblioteques del Ministeriu de Cultura amosó que la media de llectura nel Estáu descendió en comparanza col añu pasáu, hasta’l 56’9%. Penriba de la media tán siete comunidaes: Madrid, con un 65’7%; Cataluña con un 59,3%; Canaries col 58,7%; Asturies, en cuarta posición col 58,4% y darréu, Aragón (58,2%), País Vascu (57,4%) y les Islles Baleares, col 57%.

Cantabria y Navarra son les dos úniques comunidaes qu’igualen la media estatal con índices del 56,9%. Amás de la Comunidá Valenciana, al final de la clasificación tán La Rioxa (55,8%), Murcia (54,9%), Castiella y Lleón, col 54’3%; Andalucía (52,2%) Castiella – La Mancha (51,8%), Galicia (51,2%) y Estremadura (49,5%).

El direutor del Institutu Asturianu de la Mocedá, Guillermo Martínez Suárez, inauguró’l sábadu al mediudía nel Festival Intercélticu de Lorient la Muestra d’Artes Plástiques d’Asturies 2007, denomada esti añu “Q (7×7)” y que ta allugada nel ámbitu escénicu del Arte de los países celtes na Cámara Comerciu de Lorient. Enantes de colar pa París onde tenía otru grupu d’asturianos colos que s’axuntar, trabayando n’ambitos sociales, tuvo tiempu pa interesase poles actuaciones de los gaiteros asturianos nel MacCrimmon.

L’amuesa inaugurada por Guillermo Martínez, va tar abierta hasta’l final del Festival, el domingu 10 d’agostu. L’amuesa recueye como tolos años obres plástiques de los artistes mozos seleicionaos na cabera edición de la Muestra, dende José Jorge Nava Montes (ganador del Premiu Asturies Moza d’Artes Plástiques 2007 pola so obra fotográfica)a Jorge Faes Ruiz, Úrsula Faya Alonso o Virginia López Fernández (nel ámbitu pictóricu); y Patricia Vázquez Fuentes, Sandra Paula Fernández Fernández y Alicia Jiménez (na fastera d’escultura ya instalación).

Na inauguración de l’amuesa, Guillermo Martínez tuvo acompañáu de la téunica del Institutu la Mocedá encargada de la mesma, Margarita Llamas.