Sociedá

El vicepresidente segundu de Caxa España y presidente de la Executiva provincial del PSOE en Lleón, Francisco Fernández (PSOE), ufrió esti día unes ablucantes manifestaciones qu’entá nun foron confirmaes nin refugaes dende Asturies afitando que la entidá d’aforros caltuvo contactos con Caxastur sobre una posible fusión ente dambes entidaes.

“Tengo que dicir que yo nun tuve contactos, pero sí los hubos y m’imaxino que los va haber. Lo que me paez absurdu ye dicir qu’ante situaciones nueves nun se tengan que tomar midíes. Si agora tenemos que tomar midíes porque hai una situación complicada, diferente, seguramente pasáu mañana vamos tener otres y a lo meyor hai que tomar eses midíes. Nun entiendo a eses persones que dicen agora sí, d’esta manera, y mañana non”, foron les declaraciones del cabezaleru de Caxa España.

El Gobiernu d’Asturies ta desplegando una actividá intensa de promoción turística nel marcu de la Feria Internacional de Turismu FITUR ’09. L’axenda de trabayu tuvo marcada la selmana pasada pola celebración del “Día d’Asturies”, que contó cola presencia del Presidente Areces encabezando una amplia representación institucional, pola firma de trés Convenios (el de “La España Verde”, el del “Camín de Santiago” y el d’“Estaciones Náutiques”) na qu’intervieno la Directora Xeneral de Turismu, Elisa Llaneza Álvarez.

Per otra banda, Asturies tuvo protagonismu especial na denomada “Noche Q”. Nel trescursu d’esti actu’l ICTE (Institutu pa la Calidá Turística Española) entregó les nueves certificaciones de calidá y dio a conocer les empreses que caltienen estes certificaciones. El Principáu d’Asturies algamó 20 nueves certificaciones y renovó 23, “cifres bultables en dambos casos”, según informa’l Gobiernu.

El Conceyu de L.lena presentó hoy, día 3 de febrero a les 11h nel Salón de Plenos de la Casa Conceyu, la última campaña dirixida a los más pequeños del Conceyu. La campaña consiste na edición de 6 modelos de cartelos nos que se trabaya un vocabulariu mui usáu como ye: el patiu, la cai, la clas, el comeor, el bañu y el cuerpu humanu.

Los carteles van repartise peles escueles del Conceyu, nes ludoteques y nel serviciu de pediatría.

Con esta campaña, el Serviciu de Normalización Llingüística pretende siguir reforzando la llingua de los más pequeños. Los carteles, nos que se recueye vocabulariu bien cercanu a los nenos, tienen en común l’usu de la variante llingüística de L.lena. Así, los críos del conceyu salen al preu, garren un pletu pa comer, toquen el xibletu o duel-yos el costezu.

La iniciativa pretende ser tamién una ferramienta de trabayu pa los enseñantes del conceyu, yá qu’actualmente hai bien poco material didácticu que recueya ñla variante llingüística del conceyu.

La campaña fízose cola ayuda de la Conseyería de Cultura con una subvención de 500€ y en collaboraicón cola Rede de Normalización Llingüística nos Conceyos.

La moda asturiana va tar presente a partir de güei, vienres 30 de xineru y hasta’l 2 de febreru, na Feria de Moda más prestixosa d’Europa, “Pret a Porter de Paris”.

La empresa asturiana Comercializadora de Moda del Norte presenta esta selmana en París la so nueva colección de la marca Mamatayoe pa la próxima Seronda-Iviernu 2009-2010.

L’académicu de númberu de l’Academia de la Llingua, Emilio Barriuso Fernández, dexonos tres d’una llarga trayectoria investigadora esti xueves. L’entierru ye esti vienres a les 13 hores na ilesia de San Xuan el Real, n’Uviéu.

Emilio Barriuso Fernández ye Doctor en Filoloxía Románica pola Universidá d’Uviéu dende 1973, Catedráticu de Llingua y Lliteratura y miembru de númberu del Instituto de Estudios Asturianos dende 1986, amás de miembru de númberu de l’Academia de la Llingua Asturiana dende mayu de 1994.

Ente los sos principales trabayos espublizaos alcuéntrense los que vienen darréu:

* “El léxico de la fauna marina en los puertos pesqueros de Asturias central”, IDEA, Uviéu, 1988 (ye la 2ª parte de la Tesis Doctoral, calificada nel so momentu con “sobresaliente cum laude”). * “La lengua marinera de Asturias”, IDEA, Uviéu 1987. * “Terminología de la arboladura y el velamen en los barcos pesqueros de Asturias central”, ARCHIVUM, XXIII (1973), PP.215-231. * “Ictionimia y diccionario académico: pargo, pagel y rubiel”, Boletín de la Real Academia Española, LXI (1981), 141-154. * “El buey de mar (Cancer pagurus) en la ictionimia asturiana”, BIDEA 107 (1982), PP. 161-171. * “Unos animales marinos llamados delfines”, SOFECA, Candás, Xixón, 1985, pp. 21-23. * “Los nombres de los barbados en el puerto de Tazones”, Revista Cubero, Villaviciosa, 7 (1986), pp. 24-27. * “Problemas léxicos de la fauna marina: los nombres de los espáridos en la costa de Asturias”, ARCHIVUM, XXIX-XXX (1979-80), pp. 56-584. * “La sapa (Pachygrapsus marmoratus)”, Homenaxe a Álvaro Galmés de Fuentes, III, Madrid-Uviéu, 1987, pp. 21-24. * “El ictionimo mielga (Squalus acanthias) y su raigambre latina”, Homenaxe al Prof. Tomás Recio, Aula abierta, Institutu de Ciencies de la Educación, Universidá d’Uviéu, 41-42 (1984), pp. 47-55. * “Terminología del mar y accidentes marinos en los puertos pesqueros de Asturias central”, Actes V Congresu Internacional d’estudios llingüísticos mediterráneos, CSIC, Madrid, 1977, pp. 85-95. * “El léxico vulgar de la arquitectura naval en los puertos de Asturias”, Atti XI Congresso internazionale di linguistica e filologia romanza, Nápoles-Amsterdam, 1977, pp. 285-304. * “Bable y habla marinera en Asturias “, Actes II Asamblea rexonal del bable y tradiciones populares asturianas, Uviéu, 1975. * “Sinominia y fenómenos conexos en la ictionimia marina de Asturias”, Actes del XVI Congresu internacional de llingüística y filoloxía romániques, Palma de Mallorca, 1985, pp. 523-530. * “El galicismo en la lengua marinera de Asturias”, Acter XVII Congresu internacional de llingüística y filoloxía romániques, (Aix-en-Provence, 1983), Marseille, 1985, pp. 49-61. * “Toliñes, foques y tortugues nos ñomes de la mar d’Asruries”, Lletres Asturianes 17 (1985) pp. 21-23. * “Sol léxicu ictionímicu d’Asturies”, Lletres Asturianes, 30 (1988), pp. 115-119. * “Lésicu míticu na fala marinera d’Asturies”, Lletres Asturianes 49 (1993), pp. 101-105. * “Atlas léxico marinero de Asturias” RIDEA (2002).

Les comunidaes de Castiella y Lleón y Asturies valoren la posibilidá de collaborar na preparación de la candidatura a Patrimoniu Mundial de los Caminos de Santiago del Norte Peninsular, ente ellos, los que pasen por dambes autonomíes según asoleyaron esti día nuna declaración conxunta de dambes comunidaes tres de la celebración del Comité d’Enllace y Coordinación del Protocolu Xeneral de Collaboración ente Asturies y Castiella y Lleón.

Les dos comunidaes tamién trabayen nel estudiu de proyeutos comunes en materia de promoción cultural como les rellaciones ente les instituciones museístiques y l’intercambiu d’información en materia d’archivos y biblioteques.

El vienres 23 de xineru presentóse na Casa Conceyu de La Pola Siero una campaña del Serviciu de Normalización Llingüística promocionando la llingua asturiana nel deporte. Patrocínense los equipos junior y senior del Club Baloncestu Siero dotándolos d’equipación de camiseta y pantalón pal xuegu, colos logotipos de la Conseyería de Cultura y Turismu del Principáu d’Asturies, del Conceyu Siero y del Serviciu de Normalización Llingüística, qu’estrena logotipu.

La entrega formal de les equipaciones féxola la conceyala d’educación, cultura y deportes, Mª Luz Quince Cifuentes, al presidente del club, José Rodríguez Valdés, y al direutor deportivu, Luis Canga; nel actu tamién taba presente’l responsable del SNL, Xosé Firmu García Cosío.

L’equipu senior xugó’l sábadu nel polideportivu de La Pola Siero; la derrota énte’l Pumarín sitúalu na segunda posición de la primer categoría de la lliga autonómica de baloncestu. Los junior xugaron el domingu pela mañana. El club yá cumplió quince años y tien amás categoríes infantiles y escueles de baloncestu en La Pola, Llugones y urbanización La Fresneda.

Dientro de la mesma campaña editáronse tamién 2000 trípticos col oxetivu de fomentar esti deporte ente la población escolar y esparder y normalizar l’usu de la llingua asturiana nel ámbitu deportivu. Tienen forma de balón de baloncestu ya incluyen unes nociones elementales, con un testín, un dibuxu esplicativu y el calandariu del equipu senior del Club Baloncestu Siero. El diseñu ye de Poli Mencía y el dibuxu de Sidoro Villa.

El presupuestu total de la campaña ye de 1500 €, toos ellos subvencionaos pola Conseyería de Cultura y Turismu. La intención del Conceyu Siero, manifestada pola conceyala, ye solicitar subvención a la Conseyería en siguientes convocatories pa poder llevar la iniciativa a otros deportes con presencia en Siero.

El Gobiernu del Principáu d’Asturies, conxuntamente colos conceyos d’Uviéu, Xixón y Avilés, les Cámares de Comerciu de les tres ciudaes, y la Federación Asturiana d’Empresarios (FADE), en representación de la marca ‘Ciudades de Asturias’, participa esta selmana en Fitur Congresos 2009 en Madrid presentando la ufierta Cultural de los Conceyos como referencia cimera.

Fitur Congresos ye’l salón profesional dedicáu íntegramente al Turismu de Conceyos y Viaxes d’Incentivos onde’l Principáu d’Asturies va promocionar la calidá y capacidá de les nueses tres ciudaes como destín escelente nesti segmentu turísticu.

La directora de la Oficina de Política Llingüística del Principáu, María Antonio Pedregal Montes, la vicealcaldesa del Ayuntamientu de Corvera, Belén Toro, y la conceyal decultura, Cinta Mántaras, van presentar esti vienres a les 13 hores na Casa de la Llingua, les nueves funciones y actividaes que van desarrollase na so nueva etapa como sé del Serviciu de Normalización Llingüística, venceyáu a la Rede de Servicios de Normalización.

Nel actu de presentación va facese entrega d’un folletu informativu y va presentase’l DVD “Corvera, una historia pa descubrir”.

La Xunta pola Defensa de la Llingua Asturiana cumple esti miércoles día 21 de xineru 25 años y va desendolcar por mor d’ello un programa d’actividaes que se presentaba esti día a les 12 del mediudía cel Conceyu Abiertu n’Uviéu, na Cai Gascona, 12. Na presentación participaron Xune Elipe, María Xosé Martínez y Carlos Pulgar que dieron anuncia a los actos conmemorativos a cellebrar el sábadu 31 de xineru prósimu, nel Muséu de Belles Artes d’Asturies y les diverses actividaes programaes col motivu del aniversariu a lo llargo del 2009.

Güei 21 de xineru, la Xunta pola Defensa de la Llingua Asturiana cumple 25 años. Nel mesmu día de güei nel añu 1984, fíxose nel Salón d’Actos del Muséu de Belles Artes d’Asturies l’Asamblea Fundacional de la Xunta pola Defensa de la Llingua Asturiana.

Les persones que participaron d’aquella punxeron en marcha un proyectu que cuayó. Una iniciativa plural na que cualquier persona enfotada na defensa del idioma pudiere axuntar esfuerzos independientemente de la so afinidá política o ideolóxica. Pa ello, la Xunta sería dende entós hasta agora una organización que solo tien ún únicu ámbitu d’actuación: el la defensa de la llingua asturiana, una organización independiente y apartidista, con vocación y capacidá pa xenerar consensos amplios na reivindicación de los nuesos derechos llingüísticos.

N’estos venticinco años venimos defendiendo que la llingua asturiana ye un patrimoniu común de tolos asturianos y asturianes, y qu’esi patrimoniu común nun pue ser instrumentalizáu nin capitalizáu por nenguna corriente política o idiolóxica. Asinamesmo, los derechos llingüísticos son derechos qu’hai que llograr pa toles persones que vivimos n’Asturies y por eso, toos debemos poder participar na so construcción.

La Xunta pola Defensa de la Llingua Asturiana ye una realidá afitada que cuenta con una estructura fuerte y estable, con capacidá d’actuar y visibilizar ente la sociedá asturiana les nueses demandes y propuestes. Una estructura complexa basada na participación de los y les activistes, que trabaya n’aries como’l mantenimientu de los locales, la financiación de la organización, la configuración de redes de comunicación, la toma de decisiones y el diseñu y realización de campañes.

La Xunta cuenta agora tamién con una estaya de mocedá, la Xunta Moza, que ye quien a facer rescamplar el conflictu llingüísticu ente la mocedá asturiano, n’ámbitos especialmente importantes como’l de los derechos llingüísticos na educación, y que tamién ye quien a mantener dalgo fundamental en cualquier organización: el relevu xeneracional de la militancia.

Güei festexense venticinco años y na Xunta creen que deben facelo, y la razón fundamental pa cellebralo ye que la Xunta tópase nel meyor momentu organizativu de la so hestoria, con capacidá y ganes pa siguir trabayando y construyendo na defensa d’esti idioma.

Por ello, a lo llargo d’esti añu 2009 van entamar delles actividaes especiales alredor d’esta conmemoración y van vincular a ello tamién, toes aquelles que vienen faciendo de manera estable añu tres añu: la movilización pola oficialidá del Día de les Lletres Asturianes, el Conciertu pola Oficialidá o la entrega de los Premios Andrés Solar.

El primer actu conmemorativu va facese’l prósimu sábadu 31 de xineru a les seis de la tarde, nel mesmu sitiu onde se ficiera l’asamblea fundacional de la Xunta que como dicíemos primero ye’l Salón d’Actos del Muséu de Belles Artes. Ellí va facese balance de los años d’historia de la organización, va acompañase la presentación cola proyección de vidios y imáxenes d’actividaes feches pola Xunta nesti tiempu; y tamién vamos cuntar cola actuación musical del cantautor asturianu Alfredo González. Una de les voces que más tán sonando nel panorama musical na nuesa llingua.

Al acabar la ceremonia va ufrise un pinchéu a los asistentes nel chigre de la Xunta, La Casa Posafuelles, que ta na Cuesta la Vega 10 d’Uviéu.

Pa esti actu conmemorativu, la Xunta pola Defensa de la Llingua Asturiana quier facer un llamáu a la participación de toes aquelles persones qu’a lo llargo estos años militaron o collaboraron de dalguna manera cola organización. Tamién esperamos cuntar cola presencia de compañeros d’otres organizaciones y instituciones de defensa del asturianu, y d’aquelles otres d’otros ámbitos que comparten esfuerzos con nosotros nel Conceyu Abieru pola Oficialidá.