Sociedá

La Xunta pola Defensa de la Llingua Asturiana ta acabante convocar, como cada añu, la manifestación pola oficialidá del Día de les Lletres Asturianes, que nesta ocasión va celebrase l’8 de mayu, a partir de les siete de la tarde y con salida na Estación del Norte d’Uviéu. El lema escoyíu n’esta ocasión ye “Agora tenemos la palabra, l’asturianu llingua oficial”, col que la Xunta quier destacar “el valor insustituíble del nuesu patrimoniu llingüísticu y la so importancia central na construcción del futuru d’Asturies”.

Los responsables de la XPDLLA camienten que’l movimientu de reivindicación llingüística consiguió va trenta años “acutar un día del calendariu nel que la llingua asturiana sería la protagonista, un día nel que destacamos, un día nel que reivindicamos los mesmos derechos llingüísticos que disfruten cuantayá’l restu ciudadanos del Estáu”. Recordando que “venimos sufriendo una clase política acomodada nes instituciones, despreocupada, irresponsable y belixerante que vien faciendo tolo posible por anular cualquier mínimu avance na dignificación y normalización de la llingua asturiana”.

Per otru llau, y según el manifiestu col que faen un llamáu a la manifestación “la sociedá civil vien dando muestres clares de qu’hai una mayoría amplia y plural que siente apreciu por esti idioma”. Una movilización ciudadana qu’exemplaricen enl casu de “los intentos d’esclusión del asturianu na Escuela de Maxisteriu” na que “una mayoría amplísima de docentes y representantes d’alumnos non solo evitó la desapaición de les titulaciones de llingua asturiana sinón que foi quien a incorporales la vez primera dientro los nuevos planes d’estudiu”.

A les puertes d’una nueva reforma del Estatutu d’Autonomía d’Asturies la XPDLLA ve “necesario dar otru pasu y llograr el reconocimientu del asturianu como llingua oficial”.

Güei, xueves, 23 d’abril, a les 19.30 hores, nel Salón d’Actos de la Cátedra Gaspar Melchor de Xovellanos d’Estensión Universitaria de la Universidá d’Uviéu y por mor del Día del Llibru, va facese una llectura al rodiu de la universidá “entendida en toles sos dimensiones”. Los testos va ser d’autores como Virginia Wolf, Ernesto Sábato, Eduardo Galeano, Augusto Roa Bastos, etc.y l’actu ta abiertu al públicu.

L’Academia de la Llingua Asturiana dio anuncia esta tarde de los detalles del actu de celebración del XXX Día de les Lletres Asturianes, que va celebrase’l vienres 8 de mayu nel Teatru Campoamor d’Uviéu. Na Xunta Estraordinaria de la institución va nomar académicu d’honor al gaiteru José Ángel Hevia Velasco.

L’actu va abrise con un entamu musical a la gaita, de Yago Bullago, al que va siguir la Xunta Estraordinaria de la directiva académica, col nomamientu d’Hevia y el discursu institucional de la Presidenta de l’ALLA, Ana Cano. Darréu va celebrase una llectura de poemes del primer númberu de Lletres Lliterariu y van sentise los sones del grupu Xuacu Amieva Folk.

Como ye tradicional, l’Academia organiza darréu una espicha nel restorán La Gruta, al que pue acudise apuntándose nel teléfonu 985 211 837, primero del 6 de mayu.

La Conceyalía de Cultura Tradicional y Llingua Asturiana del Ayuntamientu de Xixón y Ediciones Trabe presenten el llibru “Llingua, clase y sociedá”, que recueye les actes del seminariu celebráu n’Uviéu col mesmu nome. Nel actu, que va celebrase a les siete la tarde nel Salón de Recepciones de la Casa Conceyu de Xixón, van tar presentes los coordinadores, Rafael R. Valdés, Xulio Viejo y Rubén Vega; y el teniente alcade Jesús Montes Estrada “Churruca”.

El Seminariu Llingua, Clase y Sociedá, celebráu na Universidá d’Uviéu ente los díes 27 y 30 de marzu de 2006, supo poner en contactu filólogos, hestoriadores y sociólogos y facer qu’hubiera alderique y intercambiu d’idees. Amás, foi a que les ponencies se centraran sobre manera nel usu idiomáticu distintu que se da ente les clases populares y la vanguardia del movimientu obreru y nel analís d’actitúes, mentalidaes y ideoloxíes llingüístiques, derrompiendo caminos nuevos y necesarios.

Esti llibru ye resultáu directu d’aquel Seminariu, ufiertando al públicu xeneral les ponencies qu’ellí se lleeron, a cargu de dalgunos de los meyores investigadores y profesores de les distintes disciplines dende les que s’analizó’l fechu llingüísticu y la so dimensión social.

La cifra de negocios nel sector servicios baxó un 16,9% en febreru n’Asturies, meyorando la cifra estatal del 20,5%, la mayor de los seis últimos años.

Según los datos espardíos pol Institutu Nacional d’Estadística (INE), l’actividá nel sector tuvo un comportamientu negativu en toles comunidaes autónomes, siendo Asturies, xunto con Cantabria, la tercera con una menor cayida, per detrás de Galicia (-14,2%) y Aragón (-16,3%).

El Salón de Recepciones va acoyer a partir de la una y media la presentación del Pallabreru del Fútbol, un diccionariu con tolos conceptos venceyaos a esti deporte. Na presentación van tar, l’alcaldesa de Xixón, Paz Fernández Felgueroso, el Conceyal de Cultura Tradicional y Llingua Asturiana, Jesús Montes Estrada, y el Conceyal de Deportes, José Ramón Tuero, amás d’una representación del Sporting de Xixón, asina como miembros de peñes y clús de fútbol base.

Del Pallabreru del Fútbol, qu’inclúi , asoleyáronse 5.000 exemplares de 28 páxines con ilustraciones y con un presupuestu de 9.050 euros.

Esta nueche pasada morría, a piques de cumplir 82 años, la escritora d’El Franco, María del Socorro Tellado López, conocida como Corín Tellado. L’autora consiguió convertise, na so llarga trayectora lliteraria, na escritora más lleida en castellán, con namás Miguel de Cervantes per delantre. A principios d’añu, esta asturiana internacional asoleyaba’l so apoyu a la oficialidá nesti vidiu nel qu’amuesa que nunca esceció los sos raigaños asturianos.

Tellado escribió a lo llargo de la so vida más de 4.000 noveles, de les que llegó a vender en vida más de 400 millones d’exemplares.

Los sos restos tán yá nel Tanatoriu de Xixón, la ciudá na que vivió la mayor parte de la so vida, y que güei llora, col restu d’Asturies, pola muerte de la so escritora más internacional.

La Conseyería de Mediu Ambiente del Principáu va facer esti próximu martes día 14 otra suelta de les oses Paca y Tola con machu Furacu nel recintu de Proaza, pa tentar por segundu añu que l’osu cubra a dalguna de les oses. L’oxetivu ye aprovechar tola temporada de celu pal operativu, según informó la viceconseyera de Mediu Ambiente, Belén Fernández, tres d’aconceyase con responsables de la Fundación Osu Asturies.

Asturies, Cantabria, Ceuta y Melilla “tán a lo último de la llista” en potencia fotovoltaica según un estudiu de la Comisión Nacional de la Enerxía (CNE) qu’afita que nel mes de xineru de 2009, el nivel ascendía a 3.207 megavatios, un 318,1 por cientu más que l’añu anterior y un xorrecimientu de cásique’l 2000 por cientu, en comparanza colos datos d’hai dos años.

Castiella La Mancha, Estremadura y Andalucía son les tres comunidaes d’España “con más potencia fotovoltaica conectada a la rede”.

L’estudiu diz qu’Asturies, Ceuta y Melilla “tovía nun crearon nengún proyeutu nos sos territorios”, mentantu Canaries, por exemplu, tien una potencia de 90 megavatios, y un xorrecimientu del 500 por cientu, y Galicia el 300 por cientu.

El Colectivu Cultural La Iguiada de Noceda del Bierzu, en collaboración col Patronatu de Turismu del Conseyu Comarcal d’El Bierzu, ta acabante editar un númberu especial de la so revista “La Curuja”, dedicada al “Vocabulario de Noceda del Bierzo”, fala del tueru asturianu.

La revista, de la que s’asoleyaron alredor de 300 exemplares, presentóse’l 25 del mes pasáu na Casa de les Cultures de Bembibre cola presencia del autor, Manuel Cuenya, que lleva años preparando’l testu, del que comenta “les mios fontes principales fueron mios padres, dalgunos vieyos del llugar y entendíos na materia de Noceda”.