Sociedá

Acaba de salir el númberu 17 d’El Llumbreiru, la publicación trimestral de l’asociación asturlleonesita “Furmientu”. Nesta ocasión cunta con una sección de noticies onde amuesen noticies como la torna al llionés d’El Prencipicu, el ñacimientu del Club Xeitu o la tercer edición del certame de La Caleya.

Amás hai dos estayes complementaries “Nombres de calles y plazas en leonés. Tierra del Pan y Lampreana” y “Lliteratura n’asturllionés de Zamora: Fábulas d’Esopo”.

Accesu a la revista en llinia

Esta fin de selmana presentóse nel puestu de salvamentu de la playa de Rodiles el cartafueyu “Midíes de Seguridá nes playes”, una campaña que va a la gueta d’un doble oxetivu, “l’informativu y el preventivu, ofreciendo conseyos a los usuarios de les playes de la Mancomunidá de la Comarca de la Sidra sobre’l procedimientu d’actuación más apropiáu ante situaciones de riesgu nes playes”.

Los materiales didácticos de la campaña van repartise nos puestos de socorru, centros de salú, centros escolares y oficines de turismu. De la mesma manera, editóse material específicu pa socorristes nel que se detallen normes de primeros auxilios.

El xueves 23, a partir de les siete la tarde, nel Salón de Recepciones de la Casa Conceyu de Xixón, va presentase la obra “Discursos llingüísticos y movimientu obreru na Asturies decimonónica”, ganadora del Primer Premiu «Fierro Botas», na so edición de 2008. Xunto al autor, va tar un representante de la editorial Trabe y el Tercer Teniente Alcalde y Conceyal de Cooperación, Cultura Tradicional y Llingua Asturiana, Jesús Montes Estrada.

L’actu ye públicu, va dase un exemplar a los asistentes.

El Premiu Fierro Botas tien, per otru llau, la so convocatoria de 2009 abierta hasta’l 31 d’agostu, con ensayos de más de 50 fueyes sobre Asturies o la cultura rusa y eslava, amás de los movimientos obreros y sociales.

Bases completes del concursu

Güei, vienres 17 de xunetu, a les 12:00 hores, presentóse nes instalaciones de Protección Civil-Salvamentu de la playa Rodiles, la Campaña Informativa Sobre Midíes de Seguridá en Playes y Cadena de Sobrevivencia, entamada pol Serviciu de Normalización Llingüística de la Mancomunidá Comarca de la Sidra, cola ayuda de la Conseyería de Cultura y Turismu. La campaña, col eslogan “Na mar… ¡Nun sías calamar!”, ta compuesta de materiales que se van repartir per diversos llugares de la costa de la comarca y que contienen conseyos preventivos, midíes d’autoprotección en casu d’accidente nes playes, pautes d’actuación en primeros auxilios, etc. cola novedá del usu normalizáu de la llingua asturiana pa esti fin preventivu.

Otru añu más, l’asociación cultural xixonesa Tertulia Cultural “El Garrapiellu” prepárase pa facer la perconocida ruta andariega ente Xixón y Cuadonga, una travesía que nesta asociación vien faciéndose dende va venti años. Son al rodiu quince mil los andariegos que tolos años, camín de Cuadonga, pasen pelos ablucantes paisaxes que-y dan forma a esta sienda que percorre los conceyos asturianos de Xixón, Villaviciosa, Piloña, Parres y Cangues d’Onís.

La ruta Xixón a Cuadonga tien al rodiu de 75 quilómetros. La marcha entama en Xixón, más concretamente en Deva pa dempués d’unes poques xornaes, polo xeneral faise en dos díes de camín, llégase al santuariu de Cuadonga. Pa ello, hai que siguir les marques que punxo l’Asociación Cultural El Garrapiellu. Éses marques son trisqueles (tamién llamaes garrapiellos), hai dellos llugares onde se punxeron cartelos de madera.

La Tertulia Cultural El Garrapiellu quier poner tamién de manifiestu, el so interés nel sen de da-y un emburrión a esta ruta como posible motor económicu de les fasteres rurales asturianes peles que pasa, atrayendo un turismu secañosu de cultura y paisaxe.

Tamién-y prestaria que valiere como noyu de desendolcu llaboral pa la xente moza, afitando asina población nos disminuyíos pueblos asturianos. Hai dellos años punxose, dende El Garrapiellu, munchu enfotu en facer un área recreativa en Sorribes (Piloña) nun llugar bien apegau al camín que conduz a Parres, pa ello ficienrose aconceyamientos col Ayuntamientu Piloña. Esti añu, por fin paez qu’entamen les obres, ye por ello que facemos nuesa la idea d’esi llugar onde esparder na ruta que va a Cuadonga.

La prósima Marcha a Cuadonga, tendrá llugar los díes 24-26 xunetu. Saldráse’l vienres 24 xunetu a les 8:30 la mañana dende la ponte de piedra de Deva, xunto’l llavaderu, y ta abierta a xente de toa triba al preciu de 65 € pa socios y 70 € pa non socios, incluyendo una furgoneta pa echar un gabitu coles maletes, nueches en Sietes/Anayu y Llames de Parres, cena del sábadu en Llames de Parres, almuerzu del domingu en Llames de Parres y autobús de vuelta dende Cuadonga hasta Xixón.

Pa la xente que s’incorpore a la marcha’l sábadu, el preciu ye: 48 € pa socios y 53 pa non socios.

Los interesaos han ponese en contautu con Tino Lozano nel teléfonu 606 390 344.

La Xunta pola Llingua cree qu’Asturies renuncia a millones d’euros na financiación por nun declarar la oficilidá del asturianu nun comunicáu que fizo públicu esti martes.

La Xunta pola Defensa de la Llingua Asturiana quier denunciar nesti comunicáu l’actitú irresponsable y contraria a los intereses de los ciudadanos que ta teniendo’l Gobiernu Asturianu na negociación de la financiación autonómica.

Nuna situación de crisis económica grave, falta de trabayu y recorte nos servicios públicos, los dirixentes asturianos, “escoyíos pa procurar el bienestar y desarrollu de la sociedá, quieren más dexase llevar polos sos propios prexuicios y rechazar los millones d’euros (cuasique 30, nel casu de Galicia) que l’Estáu va tresferir a les comunidaes autónomes que recueyen nos sos estatutos la cooficialidá de les llingües propies. D’esta manera, los políticos asturianos siguen aneciando non solo na falta de reconocimientu de la igualdá xurídica de los falantes d’asturianu, sinón tamién nel despreciu de partíes presupuestaries que diben valir, a un tiempu, p’asegurar derechos de los sos ciudadanos y pa estimular l’actividá económica d’Asturies. L’usu d’argumentaciones demagóxiques y mentiroses pa tratar de confundir a la sociedá asturiana sobre la situación de desdexamientu evidente que sufre la llingua asturiana nun ye almisible, viniendo como vien de los responsables políticos que cobren por iguar y tornar la situación de retrocesu del idioma y d’indefensión de los sos falantes”.

Por eso, dende la Xunta pola Defensa de Llingua Asturiana pidese “una reforma del Estatutu que reconoza la oficialidá de la llingua asturiana pa que los ciudadanos asturianos tengamos derechos cívicos y económicos fundamentales pal futuru d’Asturies”.

Esti sabadu 18 de Xunetu, nel Centru Deportivu de Llamorgal, va cellebrase la primer Xornada d’esti Campionatu Asturianu de Liriu, que ya yé una realidá. A les 10:00 tendrá llugar la llegada de los equipos participantes, Asturliriu, Quirinal Liriu Espor y Espor[a], toos ellos fundadores del Conceyu Nacional de Liriu, y nun primer actu procederan a roblar los principios que van rexir esta competición.

Depúes de los actos protocolarios, llega’l momentu de amenar los lirios escontra’l castru del CNL. Los participantes disputarán un total de 30 carreres, tres les cuales conoceremos al vencedor d’esta primer Xornada, fechu historicu pal espor d’esti país.

Darréu de la competición oficial, ye hora de apurri-y el liriu a tou aquel que quiera participar nel I Abiertu Barreñón, que tará en xuegu dende les 12:00 hasta les 13’30, coincidiendo col avituallamientu, preparáu pol CNL pa tolos participantes.

L’Aconceyamientu de Xuristes pol Asturianu denuncia lo que nun ye sinon un casu nidiu de marxinación de la llingua asturiana qu’incumple toles lleis de proteición tanto de la llingua mesma como de la igualdá y méritu nes convocatories públiques.

Según se describe nuna nota fecha pública esti llunes, “Per Resolución de la Viceconseyería de Modernización y Recursos Humanos, de data 23 d’abril, modificada per otres del 30 d’abril y 3 de xunu (BOPA de 24 d’abril, 3 de mayu y 4 de xunu respeutivamente), l’Alministración del Principáu d’Asturies convocó a concursu-oposición pal ingresu nel Cuerpu de Mayestros, estableciendo ente los méritos a valorar na fas de concursu les “espublizaciones rellacionaes cola especialidá a la qu’opta l’aspirante” (separtáu 3.2.1 del bloque III), fasta 0,35 puntos y les “espublizaciones sobre otra especialidá a la qu’opta l’aspirante” (separtáu 3.2.2 del bloque III), fasta 0,15 puntos. Nada recueyen les bases sobre la llingua emplegada”.

Por embargu, “nel intre de xustificar les puntuaciones provisionales de los opositores, l’Institutu Asturianu d’Alministración Pública “Adolfo Posada” -muérganu nel que, casualmente, ocupa un altu cargu funcionarial, per nomamientu “a deu”, la muyer d’Álvarez Areces- ensin sofitu llegal dalu alcuerda que “les espublizaciones n’asturianu, magar seyan de la especialidá, baremaránse pel separtáu 3.2.2”. Al acabu: les espublizaciones rellacionaes cola especialidá feches en cualquier idioma del mundiu (vivu o muertu) puen algamar fasta 0,35 puntos nel concursu pal accesu al Cuerpu de Mayestros del Principáu d’Asturies, pero si la llingua emplegada na espublización foi la propia del país, l’asturiana, entós la puntuación másima posible ye de 0,15 puntos”.

La discriminación ye según l’Aconceyamientu de Xuristes pol Asturianu “arriendes d’inconstitucional, antiestatutaria, provocatible y faltona, ye dafechamente arbitraria porque nun tien sofitu nes bases del concursu-oposición. Poro, dende l’Aconceyamientu de Xuristes pol Asturianu encamientamos: 1u. A los opositores afectaos que recurran la Resolución del Institutu “Adolfo Posada”, de 9 de xunetu, no que cinca a la menor valoración de les espublizaciones en llingua asturiana. Pa ello puen cuntar col asesoramientu, tanto en vía alministrativa como contenciosa, de los nuesos xuristes. 2u. A los sindicatos de la enseñanza que desixan les esplicaciones del casu a la Conseyera d’Alministraciones Públiques y Voz del Gobiernu, responsable cabera d’esta sangrina discriminación.

Europa Press difunde esti día unes declaraciones de la presidenta de l’Academia de la Llingua, Ana Cano, pidiendo a los cargos políticos a nivel autonómicu que “seyan conscientes de lo que faen y de la so responsabilidá” si nun declaren oficial la llingua asturiana na próxima reforma del Estatutu d’Autonomía, un oxetivu pal qu’anuncia que “va trabayar tolo que puea”. Les declaraciones de l’Axencia de Noticies coinciden nel tiempu cola anuncia de la forma de repartir ente les comunidaes el fondu de 11.000 millones qu’inclúi cantidaes importantes pales comunidaes billingües, pero que nun podrá disfrutar Asturies por nun declarar oficial la llingua asturiana.

La responsable de la Institución amosó tamién neses declaraciones seguridá de que la llingua asturiana va desapaecer “nun tardando muncho tiempu seguramente”, si nun s’aplica esta midida.

El Plenu de l’Academia de la Llingua Asturiana na so xunta celebrada ayeri, 25 de xunu, n’Uviéu, elixó como Presidenta, por unanimidá, a la doctora Ana María Cano González, que dirixe esta institución dende’l 25 de mayu de 2001. La so Xunta de Gobiernu anterior foi tamién renovada.

Formen parte d’esta nueva Xunta de Gobiernu, Miguel Ramos Corrada como vicepresidente; Roberto González-Quevedo González, como secretariu; Urbano Rodríguez Vázquez, como vicesecretariu; y Carlos Lastra López como ayalgueru.

Estos cargos tendrán un llargor de cuatro años, según los estatutos de l’Academia de la Llingua Asturiana.