Sociedá

Esti sábadu, 5 de setiembre, va celebrase’l “IV Ruxidoiru Ayandés” na capital d’Allande, La Puela. Esti eventu vien organizándolu l’asociación El Rapigueiro dende l’añu 2005 cola idea d’axuntar cultura y folixa: conferencies, presentaciones de llibros, conciertos y una “ruta gastronómica” acompañada de música pelos chigres de la “vil.la”. Ente les actividaes destaca una ponencia onde se fai comparanza d’horros asturianos y turcos, como’l que pue vese na semeya qu’acompaña a esta noticia.

L’actu va sirvir d’inauguración, a les 18:00 hores nel Café Centro y embaxo’l nome “De las paneras d’Ayande a los horrios de Turquía”. Nel.la van participar l’antropólogu Armando Graña y Bernardo Busto cola ponencia “Dende Ayande a Turquía buscando horrios ya paneras” que va facer un repás a los tipos d’horros que s’alcuentren n’Europa.

Paul Zardaín va facer una intervención con “Serander, ambarlar, horrios ya paneras de La Mar Negra” y p’acabar la invitada holandesa Ingrid van der Voort va afondar tamién na temática de los horros turcos con “Más allá de Ayande. La koiné decorativa en el antiguo Imperio de Trebisonda”. La entrada ye de baldre.

A les 19:00 hores entama la parte folixera de la xornada con un pasacáis al son de “La Bandina los Eólicos”. La ruta, comenten los organizadores “fai una pausa en cada chigre pa desgustar pinchos típicos del país”.

Los establecimientos estrahoteleros asturianos volvieron a rexistrar en xunetu un incrementu bultable, consolidando los bonos resultaos que vienen rexistrando a lo llargo del añu. Campings, apartamentos y agospios rurales incrementaron la so cuota de clientes, les pernoctaciones y la tasa d’ocupación, según datos del Gobiernu d’Asturies.

Según les modalidaes, los camping ganaron en xunetu un 23,53% de viaxeros, los apartamentos, un 42,39%, y el turismu rural, un 27,70%, porcentaxe, esti últimu, que pasa en 14 puntos la media de la España Verde. En cuantes a les pernoctaciones, los camping crecieron un 13,75%, los apartamentos, un 21,11% y el turismu rural, un 17,33%.

El resultáu global de los agospios, sumaos los hoteles, llanza un resultáu favoratible enforma. Los establecimientos rexistraron 272.546 clientes, un 8,32% más que nel mes de xunetu de 2008, y 783.879 pernoctaciones, lo que supón un crecimientu del 6,28%. Dambos datos tán mui perriba de la evolución de la “España Verde”, que ganó un 2,10% de turistes y un 1,92% de pernoctaciones.

L’acumuláu de los datos de los siete primeros meses espublizaos pol INE confirma que los agospios estrahoteleros conviértense nún de los grandes motores del turismu n’Asturies. Dende xineru atendieron a 206.896 clientes, un 26,19% más que nos siete primeros meses de 2008 y les pernoctaciones crecieron un 17,75%, algamando les 714.213. Si se sumen los hoteles, Asturies abruga yá’l millón de turistes y yá rebasó les 2.200.000 pernoctaciones.

Mañana miércoles, 2 de setiembre, les fiestes de la Gúía, que se celebren nel conceyu de Llanes, celebre una nueche folc na que van participar los grupos Verdasca, Vacayoru y Pa Muskis. La folixa va entamar a partir de les diez de la nueche.

Estes son les declaraciones Pedro Luis Fernández, residente de GAM, empresa asturiana llíder estatal nel sector del alquiler de maquinaria d’obra. Les declaraciones fízoles na Escuela Internacional de Branu d’UGT, onde amás d’oponese al enseñu de les llingües propies y pidir más hores pal enseñu del inglés, albidró fundamental un cambiu nel sistema educativu porque, según el so criteriu, “na Universidá nun s’enseñen habilidaes, como retórica o redacción”.

Los responsables de la campaña Doi la cara, que pidi la oficialidá del asturianu al traviés de semeyes d’asturianos col lema de la mesma, algamó ayeri 9.999 sofitos, con una semeya sacada delantre del Tag Mah.al, na India.

La campaña entamó va poco más d’un añu embaxo la organización del Conceyu Abiertu pola Oficialidá y consiguió sofitos d’importantes personalidaes públiques.

Páxina coles 9.999 semeyes

El proyeutu d’Atles de los Bolos Asturianos, recién aprobáu pola Conseyería de Cultura del Principáu na so llinia d’investigaciones sobre Asturies, preséntase abiertu a la collaboración ciudadana y busca datos que permitan trazar delles variables influyentes pa la confección d’un atles que dea desplicación a la bayura bolística asturiana.

Anque’l norte del Atles ye correlacionar etnoxeografía colos rasgos internos d’estos xuegos, ente los sos oxetivos tamién tán ampliar el volume d’información sobre los bolos asturianos y la enmienda de dalgunos errores persistentes nos trabayos previos, mesmo na coyida de los datos que na so interpretación científica. Esta investigación, empobinada por Carlos Suari, cuenta cola aprobación de científicos de prestixu d’universidaes de Cataluña, País Vascu, Castiella y Asturies y d’axentes de la rede deportiva de los bolos.

Toles persones que quieran facer dalgún comentariu, que tengan dalgún datu (del tipu que seya) o anécdota sobre cualesquier modalidá asturiana de bolos o que conozan a terceres que puedan aportalos, cuenten con unes señes electróniques de contactu bolosasturianos@gmail.com y un llugar de discutiniu y coordinación en Facebook.

Asinamesmo, valórense especialmente les recomendaciones sobre llugares d’interés pa visitar o les puntualizaciones sobre los trabayos bolísticos asoleyaos hasta la fecha. Les persones qu’aporten cualesquier información al Atles apaecerán, siempre que-yos preste, na nómina de collaboradores del proyectu y recibirán una copia dixital del trabayu cuando tea rematáu, a finales d’añu.

Anque ye de gran interés toa información sobre aspectos rellacionaos colos bolos de cualesquier puntu d’Asturies, 12 árees en 42 conceyos concentren la máxima importancia pa esti trabayu:

1. Llanes (parroquies occidentales), Cabrales y Onís. 2. Xixón (parroquies occidentales), Corvera, Avilés, Castrillón (parroquies orientales), Illas, Llanera (parroquies occidentales), Les Regueres, Uviéu (parroquies occidentales), Candamu y Grau. 3. Tameza, Proaza, San Adrianu, Teberga, Quirós y L.lena (parroquies meridionales). 4. Tinéu (parroquies meridionales), Salas, Miranda, Valdés. 5. Cangas (Parroquies nororientales). 6. Ibias y Degaña. 7. Ayande. 8. Villayón, Eilao, Navia y Bual. 9. Pezós y Grandas de Salime. 10. Ozcos (Vilanova, Santalla, Samartín). 11. Taramundi, San Tiso d’Abres, A Veiga. 12. Castropol, Tapia y El Franco.

Contautu: Carlos Suari

La Llaboral, Ciudá de la Cultura consolidóse como un destín preferente pal turismu, la cultura y l’ociu, tanto pa los asturianos como pa los turistes. Dende l’entamu del añu y al 10 d’agostu pasáu, un total de 34.034 persones disfrutaron del serviciu de visita guiada al edificiu diseñáu por Luis Moya.

Del total de visitantes, el 55,49% procedía d’Asturies, el 39,18% d’España, y el 5,33% restante del estranxeru, principalmente de Francia, Estaos Xuníos y Alemaña. Los visitantes asturianos proceden na so mayoría de Xixón, Uviéu y Avilés, mientres que los usuarios d’España son, mayoritariamente, orixinarios de Madrid, Castiella y Lleón y Andalucía.

Xuan Ramón Pertierra Argiz, conocíu popularmente como Xuan Pertierra, finó esta selmana a los cincuenta años (cumplía 51 el próximu 30 d’agostu). A lo llargo de la so vida participare nel movimientu asturianista dende estramaos campos, participando na so mocedá de la Lliga Celta d’Asturies. Pertierra yera abogáu criminalista y foi parte en munchos de los casos con más sonadía, asocedíos na ciudá de Xixón nos últimos años.

Dende 1994 yera miembru del PAS y nesti tiempu ocupó cargos institucionales, siendo Secretariu Xeneral de l’Agrupación Llocal de Xixón dende xunetu de 2004 hasta la so dimisión en mayu de 2007, amás de miembru de la Executiva Nacional de la mesma formación ente 2001 y 2007. Foi candidatu a diputáu y conceyal en delles ocasiónes. Dexó vilda y un fíu.

El Partíu Asturianista amosó yá’l llutu nun comunicáu, mesmo qu’otres formaciones asturianistes.

Les families asturianes ya puen solicitar, dende esti martes, al traviés de la páxina Web www.asturias.es y del teléfonu 012 sofitu económicu que baco’l nome de ‘cheque-bebé’ se prometiere hai tiempu.

El Boletín Oficial del Principáu d’Asturies (BOPA) asoleya esti día la resolución coles bases reguladores de la convocatoria, cola reforma aprobada’l pasáu miércoles pol Conseyu Gobiernu.

Esti sofitu calgama a los 500 euros y empobínase pa toos aquellos nacimientos asocedíos dende’l 1 de payares de 2008 teniendo accesu les families asturianes con una renta d’hasta 45.000 euros anuales.

Calcúlase que más de 7.000 families asturianes puean beneficiase d’esta ayuda que supón un coste total de 3.647.000 euros.

El Gobiernu d’Asturies informó ayeri de los les Medayes d’Asturies 2009, gallardones añales que van entregase en setiembre. La formación musical Nuberu va recibir Medaya de Plata, xunto col investigador químicu José Barluenga, l’alpinista Rosa Fernández, el restorán Casa Consuelo d’Outur (Valdés), l’Asociación d’Amigos de la Ría de Navia y l’Asociación Asturiana Empresa Familiar.

Les Medayes d’Oru van pal vicepresidente del Conseyu de Ministros de Cuba, José Ramón Fernández “Gallego Fernández” y el xurista xixonés Aurelio Menéndez.