Sociedá

La Comisión Antiviolencia propunxo esti día multes de 60.000 euros y cinco años de prohibición d’accesu a recintos deportivos pa 67 aficionaos del Real Sporting y del Sevilla,miembr os de los grupos Ultra Boys (Sporting) y Biris Norte (Sevilla) que s’enfrentaron el 13 d’avientu peles cais de Xixón, enantes del alcuentru de fútbol que dse disputara n’El Molinón. Esta propuesta ye’l resultáu de la investigación policial entamada tres de los incidentes.

La Fundación Belenos ta acabante asoleyar una entrega nueva de la so revista, “Asturies. Memoria encesa d’un país”, centrada nesta ocasión na publicación de les actes del VIII Seminariu d’Estudios Asturianos de la Fundación Belenos, que tuvo dedicáu a los “Ámbitos de la mitoloxía asturiana”.

Na introducción de la revista, la Fundación reconoz que ye consciente de que “nunos tiempos enforma complexos pal futuru del nuesu país, el compromisu públicu na construcción d’una indentidá asturiana ye dalgo que la Fundación Belenos considera vital pa la continuidá hestórica y cultural d’esti pueblu milenariu, polo que tornamos faer un llamáu a la sociedá asturiana pa que nun seya ésti l’epílogu de la nuesa hestoria”.

Nesta entrega nueva, con gran profusión d’ilustraciones, van atopase artículos d’Alberto Álvarez Peña («La mitoloxía asturiana nel marcu de les mitoloxíes europees», Jesús Suárez López («La cervantina bendita y la culiebra maldita: raigaños fonderos d’un esconxuru asturianu contra la picadura de la culiebra»), Cristobo de Milio Carrín («Xanes y vírxenes: el cultu a la Bona Señora n’Asturies»), Nicolás Bartolomé Pérez («Notes de mitoloxía lleonesa») y Ramón Sordo Sotres («Mitoloxía cántabra: definición, personalidá y parentescu»).

Como ye vezu, la Xunta pola Defensa de la Llingua Asturiana pon clase d’asturianu un añu más. El cursu entama’l miércoles 27 de xineru, nel llocal uviedín de la organización, el Llar Solidariu, na cai La Gascona 12, 3u. El cursu tien 60 hores de duración ónde según la organziación “los alumnos van poder deprender el bon usu del idioma tanto a nivel escritu como oral”.

L’horariu va ser de 19’00 a 20’30 hores, los llunes y miércoles (horariu provisional hasta concretar cola xente matriculao). El preciu de la matrícula completa ye de 50 €.

Toles persones interesaes pueden apuntase llamando al 985 229 553 o pasando pel local (a partir de les 16:00 y hasta les 20:00 hores).

Llucía Fernández Marqués presentó na Xunta d’Escritores el númberu 72 de la revista La Sidra, una publicación que lleva más de seis años nel mercáu y que nos númberos últimos aumentó’l númberu de páxines y la calidá del papel, llegando a los 3.000 exemplares de tirada, según esplicó Fernández Marqués.

La redactora de la revista esplicó los conteníos de la revista y les actividaes entamaes pol Ensame Sidreru, qu’asoleya la revista y “fai otra montonera d’actividaes”, ente los que destacó “concursos de semeyes y ensayu”.

Sobre esti úlitmu, el concursu d’ensayu sobre la sidra, anuncióse’l ganador de la primer edición que foi Fernán Gonzali Llechosa, que col trabayu “Diccionariu Sidreru” resultó ganador del mesmu.

La obra yá ta editada y va entregase a los soscritores de la revista y vendese darréu nes llibreríes.

Una investigación que desendolcare hai poco un equipu d’investigación de la Universidá de Salamancha (USAL) fina afitando que’Asturies soportaba hai 305 millones d’añostemperatures tropicales y que taba enllena de viesques que dieron llugar a los depósitos de carbón de la rexón, alugándose nel centru del supercontinente nomáu como ‘Pangea’.

Los nuevos datos revélense na investigación que ficiera Gabriel Gutiérrez, en collaboración con Arlo Weil, de la Universidá de Bryn-Mawr (Filadelfia), y que se publicará nel próximu númberu de la revista científica sobre xeoloxía más antigua del mundu, ‘Journal of the Geological Society of London’.

El CMX torna otra vuelta, col entamu del segundu trimestre llectivo, col programa de promoción de la participación y l’asociacionismu xuvenil “Participa” a los Centros d’Educación Secundaria de Xixón.

el Conseyu de Mocedá de Xixón ta realizando esti programa de promoción de la participación y l’asociacionismo “Participa” en distintos centros d’educación secundaria de la ciudá a lo llargo del cursu escolar 2009 – 2010. Col aniciu del segundu trimestre llectivo incorpórense los centros de MATAJOVE y MONTEVIL y darréu fadránlo’l JOVELLANOS y el ROCES.

L’Aconceyamientu de Xuristes pol Asturianu vien de formalizar, énte’l Tribunal Superior de Xusticia d’Asturies, la so demanda escontra l’Alcuerdu del Conseyu de Gobiernu de la Universidá d’Uviéu, de 28 de mayu de 2009 (BOPA de 27 de xunu), pol que s’aprueba’l Reglamentu pa la presentación y receición d’escritos en bable/asturianu, peles razones darréu:

1ª. La Universidá foi tresferida a l’Alministración del Principáu d’Asturies per Real Decretu 848/1995. Arriendes d’ello, el Decretu 233/2003, pel que s’aprueben los Estatutos de la Universidá d’Uviéu, nel so artículu 6 dispón que l’usu de la llingua asturiana “tendrá’l tratamientu qu’establezan l’Estatutu d’Autonomía y la llexislación complementaria, garantizándose la non discriminación de quien la emplegue”.

2ª.- Quier ello dicir que la Universidá d’Uviéu tien de respetar el mandáu del artículu 4 del Estatutu d’Autonomía d’Asturies y con elli lo dimpuesto nel artículu 4.2 de la Llei 1/1998, de 23 de marzu, d’usu del bable/asturianu: “Tendráse por válidu a tolos efeutos l’usu del bable/asturianu nes comunicaciones de pallabra o per escritu de los ciudadanos col Principáu d’Asturies”. Poro, la llei nun pon torga dala a tales comunicaciones nin por razón de la materia, nin por la condición del ciudadán, nin pol muérganu al que s’empobinen, nin por nenguna otra condición.

3ª.- Por contra, l’Alcuerdu impugnáu, quier llendar la posibilidá d’empobinar escritos a la Universidá per razón:

a) Del receutor: namás permite los empobinaos a los Muérganos Xenerales, colo qu’escluye los que se quieran facer a los Muérganos de Gobiernu de Facultaes y Escueles, Departamentos ya Institutos Universitarios d’Investigación, pente otros (artículu 1 y, per conexón, 2, 3 y 4).

b) De la forma: solo tramitará los escritos presentaos “per comparecencia personal”, dexando fuera, por exemplu, los fechos pente medies de representante (artículu 2 y per conexón, 3, 4).

c) Del procedimientu: “nel marcu de procedimientos alministrativos entamaos pela parte interesada” (si’l procedimientu s’entama d’oficiu, el ciudadán afectáu nun pue empobinase a la Universidá n’asturianu) y siempres que nun seyan “procedimientos complicaos, de tramitación urxente o de curtios plazos de resolución, talos como los rellativos a reclamaciones eleutorales, solicitú de convocatories d’esamen especiales o estraordinaries, reclamaciones escontra pruebes d’accesu a la Universidá, incidentes de recusación o cualquier otru que, peles razones espuestes, determine’l Rector”. Al cabu: pue emplegase l’asturianu en cásique nengún procemientu alministrativu na Universidá d’Uviéu y siempres y cuando-y dea pela gana al Rector consentilo (artículu 2 y per conexón 3 y 4).

4ª.- Al Aconceyamientu de Xuristes pol Asturianu abulta-y nulu de planu l’Alcuerdu impugnaú por conculcar dafechu’l principiu de xerarquía normativa (una norma inferior, nun pue aminorgar los drechos reconocíos n’otra superior, nesti casu la Llei 1/1998) proclamáu nel artículu 9.3 de la Constitución y desendolcáu pelos artículos 51 y 62 de la Lei 30/1992, de Réxime Xurídicu de les Alministraciones Públiques y del Procedimientu Alministrativu Común.

La tasa de paru na zona euru xorreció hasta’l 10% nel mes de payares de 2009, algamándo una décima más que nel mes d’ochobre. Esapaña caltúvose nesa cifra, aportando a un desemplegu del 19,4% y tornando otra vuelta a ser el país de la eurozona cola tasa más elevada.Los datos ufriolos esti día la oficina comunitaria d’estadístiques, Eurostat, que rexistró nel conxuntu de la Unión Europea un xorrecimientu d’otra décima sobre ochobre, algamando’l 9,5%.

El Bloque por Asturies púnxose en contactu a traviés d´una carta con Javier Guillén, Direutor de la Vuelta Ciclista a España, qu´esti añu cumple 75 años y va pasar per Asturies los díes 12 y 13 del mes de setiembre.

L´oxetivu de la misiva yera recordá-yos a los organizadores de la prueba ciclista que usen los topónimos que son oficiales nes etapes asturianes como manda la llei.

El Bloque por Asturies púnxose a la total disposición de los organizadores de la Vuelta Ciclista a España y encamentó-yos que pa cualquier dulda contactaren cola Conseyería de Cultura y que ye la que realmente tien que mirar porque se respete la toponimia oficial.

Paeznos qu´hai poco que pueda resultar tan normalizador como una de les pruebes deportives más importantes del mundu respete los nuestros topónimos tradicionales y encamentamos a la Oficina de Política Llingüística faiga tolo posible p´algamalo.

El sortéu de la Llotería de Navidá, nel que cada asturianu xugaba esti añu una media de 78,4 euros (más d’84 en total), repartió n’Asturies parte de dellos del tercer y quintos premios, siendo Corvera, con 9,5 millones d’euros repartío col tercer premiu del númberu 10.104, el conceyu más afortunáu esti añu, gracies a la venta de 19 series fecha na alministración asitiada nel centru comercial Parque Astur, en Tresona.

Trés quintos premios dexaron cantidaes más modestes na alministación 8 de la cai Menéndez Pelayo de Xixón, con 50.000 euros correspondientes a una serie del númberu 43.802; otros 50.000 pol 43802 na 1 d’A Veiga y la mesma cantidá pol 49.271 na númberu 3 de La Felguera (Llangréu); mientres que l’alministración númberu 1 d’Avilés asitiada na Plaza’l Parche, repartió 200.000 euros col 31.821.