Sociedá

L’asociación avilesina Esbardu regularizó la so situación cola SGAE, ingresando los atrasos por drechos d’autor de 1998 a 2004. Una situación que-y permitiría volver a acceder a ayudes públiques y polo tanto, a organizar el Festival Intercélticu d’Avilés, que l’Ayuntamientu siguió celebrando embaxo’l nome de Beltaine, énte la imposibilidá de siguir apoyando al Festival, que llegó a tener embargada pola SGAE, la marca del eventu, que ta declarada Fiesta d’Interés Turísticu Rexonal.

El director de la SGAE nel Noroeste, Javier Vidal, mostróse satisfechu por esta regulación de los atrasos referentes al Intercélticu d’Avilés. Según informó la Sociedá Xeneral d’Autores y Editories, Vidal dixo que “la música de raíz necesita del nuesu respetu y cariñu”. “Ye fundamental reconocer, primero, el trabayu del autor o del arreglista, figura imprescindible y valiosa nesti ámbitu, y dempués da-y el so xustu salariu pa garantizar la continuidá de la nuesa herencia cultural”, esplicó.

El Centru Municipal xixonés de L’Arena va acoyer una charra divulgativa de la psicóloga Lourdes Dibuja Barreiros, na que va falar del fenómenu conocíu como los “Supergüelos del sieglu XXI”, güelos encargaos de los ñetos poles múltiples ocupaciones llaborales de los sos padres. L’actu va entamar a les siete y media la tarde, esti miércoles.

Jesús Sanz Montes, recién nomáu Obispu d’Asturies, llegó esta fin de selmana a Uviéu pa tomar posesión del cargu. Na so homilía usó l’alemán y l’italianu pa dirixise a los pelegrinos que nel so camín p’hacia Santiago de Compostela, pasaben esta fin de selmana per Asturies y a los miembros de distintos estamentos esclesiasticos que vinieron hasta la toma de posesión del obispu. Saenz Montes quixo amás estrenase na so primer lliturxa rematando la misa con un frase n’asturianu: “Santina de Cuadonga, ayúdamos nel camín pa llegar al to Fíu; préstame tanto, tanto llegar hasta vosotros…”.

Un niciu de lo que pue ser un meyor tiempu pal asturianu dientro de la Ilesia’l país, que llegó a prohibir bautizos, mises y casorios n’asturianu nel pasáu; y qure siempres tuvo bien pocos xestos pa cola llingua de los sos feligreses.

Bloque por Asturies pidiere yá al Obispu qu’usare l’asturianu al poco del so nomamientu, y d’ente les reacciones positives, ta la del conceyal de cultura d’Uviéu, José Suarez “Felechosa” que dixo que ye “tremendamente gratificante” yá que pal conceyal conservador “Demuestra talante y respetu hacia los nuesos raigaños”.

Homilía completa, onde Saenz fizo usu del asturianu

El presidente de la Real Academia Galega, el recién escoyíu Xosé Luis Méndez Ferrín, declaró a los medios esta fin de selmana que ta a favor de la oficialidá del asturianu, anque non na zona del Eo-Navia, onde reclamó la oficialidá del “gallegu d’Asturies con un tratamientu especial”. El presidente del país vecín dixo qu’a él-y da rabia “muncha rabia, que l’asturlleonés seya cooficial en Mirando del Douro y reconocíu pola República Portuguesa, y l’asturianu nun lo seya n’Asturies dafechu”.

Pal presidente de la RAG les úniques llingües que se falen ente los ríos Navia y Eo son “el gallegu y el castellán” y poro, “han ser oficialies dambes dos”. Sicasí, el nuevu presidente del organismu gallegu acepta la posibilidá de llegar a un “consensu normativu” cola Academia de la Llingua Asturiana pal occidente d’Asturies, “siempres y cuando esta dexe d’asturianizar con coses como camudar la “ll” por “y” en pallabres como ‘trabayar’”, punxo como exemplu. Anque reconoz “l’occidente d’Asturies ye otra cosa, y tien de tener un tratamientu especial, y nós apoyamos les normes del gallegu d’Asturies del Navia-Eo”.

Amás Ferrín reconocío que l’occidente d’Asturies “ye un ámbitu que nun compete a Galicia”, pero señaló qu’él ta en contactu con movimientos culturales y persones del Navia-Eo. “Dellos de los nuesos escritores mozos son de la zona, como Eva Moreda, magnífica novelista en gallegu, que ye d’A Veiga, hai un importante cultivu del gallegu, unos autores más dialectales y otros mas normativos, pero muncho más que n’El Bierzu”.

Al rodiu del conflictu ente Galicia y Asturies por esta cuestión Ferrín dixo tar deseando “que desapaeza”, reconociendo ser “amigu de munchos escritores asturianos y de persones que defenden l’asturianu, polo qu’esti tema ta como envelenáu”. Pidió que quedare claro que ye “un gran amigu de la llingua asturiana”. Ya incluso l’Academia de la Llingua Asturiana espublizaba nel pasáu una obra de so, tornada al asturianu,-“Retornu a Tagen Ata”, y mientres que la editorial Trabe facía lo mesmo con “Doce cuentos”.

Sobre l’asturianu añadió “L’asturianu ye l’asturianu y forma parte d’una unidá llingüística venerable, antigua, que sobrevive hasta Portugal, y Lleón, y que tien que ser oficializaos dafechu, non como vergoñosamente ta hasta agora” a lo qu’añadió “Asturies ye mui complicada, tampoco nun ye nada malo”.

Si dalgo comparten la RAG y l’ALLA, acullá d’unos criterios filolóxicos que paez que nun acaben de coincidir, ye la falta de medios, yá que’l presidente de la institución gallega pidió tamién estos díes a tolos partíos políticos un pactu parllamentariu pa dotar a l’Academia de medios, casu asemeyáu al que socede cola ALLA, que lleva años col presupuestu conxeláu y con una sede que diba ser temporal y va pa los trenta años.

L’Obispu d’Uviéu nuevu, Jesús Sanz Montes, sorprendía esta fin de selmana al usar delles frases n’asturianu na so homilía inaugural. Una decisión que pal Bloque por Asturies, que-y pidiera va tiempu esi usu, da “una lleición a les clases dirixentes”. El Bloque cree qu’agora ye’l tiempu de “felicitar” a Monseñor Jesús Sanz Montes “pol detalle de respetu y reconocencia nel so estrenu a la llingua y a tolos asturianos, independientemente de les sos creencies”.

La formación nacionalista esperaba na so nota de prensa qu’esto “nun quede nun detalle simbólicu y seya’l primer pasu d’un cambiu que lleve al idioma a la normalidá dafechu dientro de la ilesia.”, pero l’Arzobispu, en declaraciones feches güei en La Nueva España, nun paez compartir esti pruyimientu. Saezn Montes comentó que-y dixeron estos díes “coses mui guapes, en castellán y n’asturianu” pero que nun entamó “a estudiar asturianu, como tampoco nun deprendí n’Aragón la fabla aragonesa”, reconoz.

L’Obispu camienta que nun sabe “la implantación que pue tener l’asturianu” y diz que “si se m’entiende en castellán voi falar en castellán, anque eso nun quita si hai que dicir delles pallabres n’asturianu, como lo fici en la Catedral, lo faiga”.

A la vista d’estes declaraciones paez que, pel momentu, la normalización de la llingua asturiana nun va dar pasos importantes dientro de la Ilesia d’Asturies.

Sanz Montes estrenóse como Obispu con delles frases n’asturianu

L’actu, que va celebrase a les 20 hores, va incluyir la presentación de dos llibros de la editorial Suburbia, “Les vides incompletes” de Xandru Fernández, y “Cácabos d’adoquín” d’Iván Cuevas, cuntando amás cola participación de la filóloga María Cueto.

La mini xira del llibru de Cuevas zárrase’l miércoles 27 de xineru nel Cafetón d’Avilés, a les 21 hores, y cola intervención del filólogu Fernando Alvarez-Balbuena.

Partidarios y amigos del xestor del Muesú Etnográficu de Grandas de Salime, José Naveiras “Pepe El Ferreiro”, tán acabante convocar una concentración delantre de la sede de la Conseyería de Cultura, asitiada nel Edificiu Calatrava d’Uviéu. La concentración va coincidir col conceyu nel que se tien previsto decidir la so destitución como director del Muséu, dende les 15:15 y hasta les 17:15.

Pepe El Ferreiro podría ser destituyíu como director del Muséu Etnográficu de Grandas de Salime

El consorciu que xestiona’l Muséu va aconceyar, embaxo la presidencia de la Conseyera de Cultura Mercedes Álvarez, esti martes, y col únicu envís de cesar al director actual Pepe El Ferreiro y nomar a un nuevu director.

José Naveiras Escanlar “Pepe El Ferreiro” foi’l principal impulsor d’esti muséu reconocíu como ún de los meyores museos etnográficos del Estáu, gracies a la gran cantidá d’apareyos tradicionales qu’axuntó’l so creador y que si nun fuera por él tendríen desapaecío.

Nel consorciu que va decidir mañana la so destitución tán representaos les conseyeríes de Cultura y Mediu Rural, la Universidá d’Uviéu, Caxastur, l’Ayuntamientu de Grandas de Salime y l’Asociación d’Amigos del Muséu de Grandas. Siendo presidíu pola Conseyera de Cultura.

Detrás de la destitución de Pepe El Ferreiro tán les sos protestes escontra los poderes públicos pola falta d’apoyu a la cultura tradicional y al Muséu que dirixe.

Blogue de Pepe’l Ferreiro

El prósimu vienres 22, na sidrería La Galana (asitiada Plaza Mayor de Xixón), y a partir de les 18 hores, tendrá llugar la entrega de premios del 3er Concursu de Semeyes La Sidra, qu’entama la revista del mesmu nome. Tamién se fadrá nel actu la inauguración de la esposición de les 20 semeyes preseleccionaes pol xuráu, que ta formáu polos fotoperiodistes Xurde Margaride, Luis Sevilla, Juan Carlos Tuero y José Ramón Navarro.

Les semeyes que resultaron gallardonaes na presente edición del Concursu fueron Sidra en San Xuan (1º premiu) de Pedro Romero Moya,Refrescando (2º premiu) de Maite Beistegui San Ildefonso y Manos Manzanas (3º premiu) de Kike Matas.

Güei, xueves 21 de xineru, a les 19:30 hores, nel Foro Abierto de la llibrería Cervantes d’Uviéu (cai Doctor Casal, númberu 9) va presentase públicamente’l llibru La cultura del tejo (Editorial de Urueña), del que ye autor Ignacio Abella.