Sociedá

L’Academia de la Llingua Asturiana va presentar esti xueves el llibru El Mirandés: situación sociolingüística de una lengua minoritaria en la zona portugueso-española, asoleyáu na so coleición «Estaya Sociollingüística».

L’actu tendrá llugar el xueves 18 de febreru a les 20 hores nel “Club de Prensa Asturiana” de La Nueva España c/ Calvo Sotelo, 7 d’Uviéu. Nél intervendrán Ana María Cano, presidenta de l’ALLA; Xosé Lluis García Arias, miembru de númberu de l’Academia; António Bárbolo (Miranda do Douro) y Aurelia Merlan, autora del trabayu.

El Centru de Referencia de la Cultura y la Llingua Asturiana Casa de los Alberti de Ciañu va acoyer esti sábadu, 20 de febreru, el II Sidra&Blogues. Nel trescursu l’actu van ponese delles charres sobre internet y el desarrollu de redes sociales n’asturianu amás de facese entrega de los premios al Meyor Blogue n’asturianu del añu 2009, l’actu rematará con alderiques sobre’l tema alredor d’unes botellines de sidra pelos chigres de Ciañu. El II Sidra&Blogues entámalu la Xunta de Blogues en llingua asturiana y collaboren nél l’Ayuntamientu de Llangréu, Softastur y Xareos! Xestión Cultural.

Los actos van entamar a les cinco la tarde, cola recepción de la Banda de Gaites Escuela de Musica Tradicional de l’A.P.A. del Conservatoriu Valle del Nalón. Darréu van celebrase delles charres: “1996” por David Guardado (Espertu n’internet, Director Zona Atlántica Prensa Ibérica Dixital y cofundador d’Asturies.com); “Comunidᔠpor Poli Mencía (Espertu en redes Sociales y diseñador de la campaña “Doi la Cara pola oficialidá”) y “Escoyeta de Plataforma” por Marquinos (Co-autor del blogue Ta pa Ponga y espertu en software llibre).

A les 18:15 hores van entregase los premios al Meyor Blogue n’asturianu del añu 2009, remate la xornada con alderique alredor de sidra pelos chigres de Ciañu.

El Conceyu de Piloña va celebrar esti añu’l ‘Día Internacional de la Llingua Materna’, el próximu 21 de febreru, cola firma d’un conveniu de collaboración cola Academia de la Llingua Asturiana y l’abertura d’una esposición basada nel llibru ‘Arroz, agua y maíz’, de Berta Piñán. Esti llibru foi’l ganador de la primer edición del premiu ‘María Josefa Canellada’ en 2008.

El conveniu va firmase esti llunes 22 de Febreru nun actu públicu na Casa La Cultura de L’Infiestu, “col envís de trabayar conxuntamente na promoción, espardimientu y dignificación social del usu del asturianu nel conceyu de Piloña”, según una nota de prensa asoleyada esti día pola Oficina de Normalización Llingüística.

La esposición que ya s’inaugurare tamién nestos díes baxo’l nome de “Arroz, agua y maíz” ta basada nel llibru homónimu de Berta Piñán, ilustráu por Elena Fernández, que ganó la primer edición del Premiu María Josefa Canellada va poer visitase na mesma Casa la Cultura hasta’l 26 d’esti mes de febreru.

Tres informes de la Plataforma per la Llengua, que comparen diferentes países plurilingües pa valorar la presencia de les distintes llingües falaes cola situación del catalán, finen cola conclusión de que “el catalán ye la llingua más desprotexida de la Unión Europea en rellación al númberu de falantes”. L’estudiu fai un analís de Suiza, Finlandia, Bélxica, Canadá y España, comparando la reconocencia llegal que tien el catalán nel Estáu español cola situación qu’esperimenten otres llingües con característiques semeyantes nel contestu européu, pero escaez

La conclusión ye que’l d’España ye un “casu esaxeráu y estravagante”, siendo l’únicu en tola Unión Europea que “nun reconoz ante esta instancia una llingua que ye falada por más del 10% de la población nin pretende pidir la oficialidá, pese a tener oportunidaes”, según la Plataforma per la Llengua.

Los informes planteguen que se fai un “tratu discriminatoriu” contra’l catalán y lléndase’l so usu, con polo menos 500 lleis qu’imponen el castellán nel territoriu; señala tamién la non reconocencia como llingua oficial, pese a que la falen más de nueve millones d’habitantes, y la imposibilidá del usu del catalán en webs oficiales como la Casa Real o l’Exércitu”. “Según la Plataforma, el catalán sería la 14ª llingua dientro de la Unión Europea, con un 17% de población que lo fala, pero tovía asina nun ye oficial dientro del España nin de la Unión Europea y namás se reconoz en dellos territorios de dominiu llingüísticu”, añadió. Los trés estudios plantegen el casu esceicional d’España dientro de trés aspectos, que son la presencia de les llingües propies en webs oficiales, el tratu reconocíu que reciben dientro de la Unión Europea y del Espaciu Schengen, y les disposiciones llegales qu’imponen el castellán primero que’l catalán. Los informes aseguren que’l catalán ye dafechu inoráu en webs institucionales del Estáu, el Gobiernu, el Parlamentu, l’Exércitu y el Tribunal Constitucional, según el tresporte públicu o l’axenda oficial. “Ye la única llingua non reconocida, pese a tener tantos falantes, y cuenta con más de 500 disposiciones, normatives y reglamentos que l’anulen frente al castellán, como Etiquetar tou tipu de productos en castellán, según aeropuertos, carreteres, industries, tresportes, avisos al consumidor, documentos d’Alministración, denominaciones d’orixe, ente otros”, añaden.
Web de la Plataforma per la Llengua qu’ufre los informes

Ix d’Uviéu vieno acabante criticar por elevadísimu’l presupuestu de 900.000 euros que l’Ayuntamientu de la capital asturiana va empobinar a l’Antoloxía de la Zarzuela que ta programada pal branu, sigún asoleya nuna nota de prensa na que destaca como exemplu de gastos escesivos los honorarios del actor Arturo Fernández: “insultante na actual conxuntura”.

El coordinador d’IX d’Uviéu diz que “la contratación de cantantes llévase nel más estrictu secretismu, sin que’l fechu d’audicionar de manera llimpia abra nenguna puerta, dao que too respuende a los intereses creaos ente intermediarios y axentes artísticos”. IX tamién apunta que nada nun se tendría d’oxetar a esta manera d’actuar “si nun fuere que tamos falando de dineru públicu y nun tiempu de crisis económica”.

IX atalanta inxusto qu’Uviéu namás “seya un paraísu profesional pa los artistes foriatos o pa los habituales asturianos colos que siempre se ceunta pa la única producción propia, que ye la zarzuela de branu”.

El próximu sábadu 13 de febreru la organización d’esquierda soberanista Fai! tien convocada una concentración tres del secuestru permanente de los espacios públicos de Llanera per parte de la so corporación y dempués d’un escandalosu casu de censura llingüística, onde l’alministración del conceyu prohíbe la espresión n’asturianu.

Fai! vien de presentar, en rueda de prensa celebrada esti miércoles día 10 nel local de les asociaciones vecinales de Llanera, una movilización a la que sigún los convocantes lleguen “dempués d’una bayura de despropósitos y neglixencies alministratives per parte de los rexidores de Llanera”. El descontentu de Fai! ta xeneráu poles torgues constantes que per parte de la conceyala de Cultura Belén López se vienen dando pal usu d’espacios públicos como la casa la cultura o de la mocedá de Posada.

La organización convocante espardió ente la prensa un pliegu de documentos nos que s’incluyía una cronoloxía onde se detallen les comunicaciones ente les partes pa solicitar l’usu d’un espaciu públicu, que vien siendo reiteradamente refugáu.

Nel primeru de los casos l’ayuntamientu diera’l vistu bonu d’entamu pa posteriormente retirar el permisu ensin dar nenguna esplicación per escrito, al tiempu que de manera oral, la propia conceyala afirmaba, n’actitú censora, que “nosotros tenemos que saber quiénes usen los nuestros locales y qué temes van tratar nellos”.

De la mesma manera, Fai! solicitare un espaciu pa facer un mural promoviendo l’asociacionismu nel conceyu col lema “Faciendo Asturies dende Llanera”. Esti mural, confeccionáu el mes pasáu, yá foi esborriáu probablemente énte lo “pernicioso y negativo” del so mensaxe.

Nesta segunda ocasión, nin siquiera se ñega l’usu d’equipamientos del pueblu, sinón que directamente nun s’almite la propia solicitú por tar escrita n’asturianu, violando los derechos a la non discriminación llingüística de les y los asturfalantes, recoyíos na Declaración Universal de los Derechos Humanos, asina como nel estatu d’autonomía d’Asturies, la llei d’usu y la mesma constitución española.

Énte esti panorama, Fai! tresmitió al Aconceyamientu de Xuristes pol Asturianu (AXA) un dossier con una rellación de los fechos pa que dende l’asociación se tomen les midíes oportunes no que cinca a la defensa llegal de los derechos llingüísitcos.

Por tolo espuesto, Fai! convoca una concentración que col lema “DEMOCRACIA PA LLANERA: pol usu de los espacios públicos y escontra la represión llingüística” va celebrase esti sábadu 13 de febreru a les 12.30 hores delantre l’ayuntamientu en Posada.

Al tiempu, la organización fai un llamáu al sofitu y a la participación de toles persones y organizaciones vecinales, polítiques y culturales que vienen careciendo los métodos antidemocráticos de la corporación dirixida pol popular José Avelino Sánchez, asina como a les qu’en toa Asturies sufren les mesmes discriminaciones per parte de l’alministración pol fechu d’espresase n’asturianu.

Tamién se quier dar les gracies a tolos entes, asociaciones y organizaciones (Vecinos d’Agüera, Conseyu de la Mocedá del Principáu d’Asturies, UNA Mocedá, Izquierda Xunida de Llanera, Aconceyamientu de Xuristes pol Asturianu), asina como a tolos ciudadanos qu’a títulu personal ufrieron el so sofitu inmediatu a Fai!. Darréu de la concentración, y nel mesmu sitiu, Fai! va a informar a la xente con tolos detalles d’esta coyuntura, abriéndose a la busca en comuña de propuestes pa superar esta situación insostenible onde se busquen continuamente formes de torgar la participación y les reivindicaciones ciudadanes.

El rector de la Universidá d’Uviéu, Vicente Gotor, presentó esti xueves xunto a la Conseyera de Cultura y Turismu del Principáu d’Asturies, Mercedes Álvarez, el traductor automáticu castellán-asturianu-castellán. Asturnews espubliza esti vienres una entrevista con ún de los sos responsables principales, el profesor Xulio Viejo.

L’actu tuvo llugar a les 12.00 hores nel Aula Clarín del Edificiu Hestóricu de la Universidá d’Uviéu.

El traductor Eslema ye una ferramienta informática pa la traducción instantánea de tou tipu de testos dixitales que desendolcaron a comuña Universidá d’Uviéu y Gobiernu del Principáu d’Asturies durante los postreros 24 meses.

Nuevu traductor en llinia

Donosti va acoyer los díes 18 y 19 de febreru un conceyu de la rede pa la Promoción de la Diversidá Llingüística (NPLD), na que representantes europeos van averar esperiencies y proyectos sobre llingües como l’eusquera, el catalán, e gallegu, el galés, l’escocés, l’estoniu, el bretón, l’occitanu o’l frisiu, ya inclusu’l suecu, que ye llingua minoritaria en Noruega.

El viceconseyeru de Política Llingüística del Gobiernu vascu, Ramón Etxezarreta, presentó esti día los detalles del alcuentru, qu’aconceyará a espertos del ámbitu político-alministrativu y científicu en llingües de “dimensión reducida en cuanto a la so estensión”, xunta la conceyala d’eusquera en San Sebastián, Ainhoa Beola, y la conceyala de la candidatua Donostia 2016, Marisol Garmendia. Les sesiones que se van celebrar en San Sebastián van tar zarraes al públicu xeneral y a los medios y tienen de tratar el balance presupuestariu del 2009 y los proyectos desarrollaos a lo llargo del añu pasáu, asina como les propuestes pal 2010.

El Grupu d’Opinión ALGAMAR suma la so voz a “les múltiples quexes pola inxusticia cometida escontra Pepe El Ferreiro”. La so destitución considerenla un ataque a los procedimientos democráticos y a la cultura patrimonial del Navia-Eo.

Sigún l’Asociación, “talamente paez qu’ente tantu muséu de cartón-piedra a los responsables políticos de la Conseyería de Cultura nun-yos cuadraba’l llabor d’una persona que durante munchísimos años foi atropando y dignificando el padremuñu cultural de la so zona. Les disculpes son de lo más estrafalario, pero les razones son evidentes: imponer la so voluntá, reprimir la disidencia crítica y dexar claro que los museos y l’actividá cultural nun ha valir pa caltener y potenciar la cultura propia. Seique pensaren que diba ser otru casu más de deu mandón, que yá naide-yos retruca. Pero esta vez nun vamos callar”.

La vocera del Grupu Municipal Socialista nel Conceyu d’Uviéu, Paloma Sainz, y la conceyala del so partíu, Margarita Vega, criticaron esti día nuna rueda prensa tres de la xunta de la Comisión d’Economía del Ayuntamientu, que’l Conceyu d’Uviéu conceda a la Fundación Gustavo Bueno una sovención pública mayor que les que reciben la Ópera d’Uviéu o’l Muséu de Belles Artes.

Sainz cifró en 800.000 euros el dineru recibíu pola Fundación nel añu 2008, de los que, 628.000 euros invirtiéronse na esposición ‘Oviedo Doce Siglos’.