Sociedá

El Tribunal Constitucional afitó yá que la reclamación del Xulgáu de lo Contencioso Alministrativo d’Uviéu, que plantegaba la inconstitucionalidá de la Llei d’Usu del asturianu de 1998, nun tien base llegal. Y non solo eso, el Constitucional da la razón al lletráu del Principáu, Xurde Blanco, nel recursu presentáu contra una resolución que-y denegaba un permisu llaboral por tar n’asturianu. El TC faló claro y refuga “tola discrecionalidá a l’Alministración autonómica a la hora d’aceptar les comunicaciones que reciban nesa llingua”.

Con esta sentencia la Llei d’Usu queda dafechu avalada y los asturianos pueden usar la so llingua pa rellacionase cola alministración, ensin que viera l’altu tribunal necesidá de revisala. L’autu, cuenta, sicasí, col votu particular del maxistráu Manuel Aragón Reyes

El recursu que xeneró esti conflictu xurídiciu presentólu en 2007 el lletráu del Serviciu Xurídicu d’Asturies, Xurde Blanco, contra la resolución de la Conseyería de Presidencia yá citada. El tribunal al que-y reclamó por esti fechu foi quien mandó al Constitucional la Llei, que nel artículu 4.2 namás contemplaba les comunicaciones orales o escrites de los ciudadanos col Principáu d’Asturies, ensin facer mención dalguna a los asuntos que pudieren implicar a los funcionarios de l’Alministración cuando tean nesta condición. La sentencia déxalo claro y la Llei aplícase de la mesma forma.

En declaraciones feches a la COPE, Xurde Blanco esplicó que “nun ha estrañar que’l TC dea un tirón d’oreyes a l’alministración”, yá que según esplica’l xurista “ye la única llingua que nun se respeta n’absoluto nel estáu español”. Lo que calificó de “vergoña”, siendo pa Blanco “el Gobirnu d’Areces, el mayor enemigu de la llingua asturiana”.

Autu de 24/09/07, d’interposición de Custión d’Inconstitucionalidá escontra l’artículu 4.2 de la Llei del Principáu d’Asturies 1/98, d’Usu y Promoción del Asturianu. Recursu sobre Proteición de Derechos Fundamentales Nu. 117/07. Xulgáu Contencioso-Almin.

Según dio anuncia Andecha Astur, el pasáu sábadu, 27 de febreru la formación celebró un Conceyu Nacional nel que los sos militantes “tuvieren la oportunidá d’aldericar sobre delles custiones, ente les que s’atopaba la propuesta, na que s’entamó a trabayar va dellos meses, d’una xunidá d’aición” que según la formación permitiría “enanchar la capacidá de rempuesta a les continues agresiones que tantu nel tarrén nacional comu social ta careciendo Asturies”.

Asina, l a organización decidió convocar un nuevu conceyu,” nesti casu abiertu a la participación d’aquelles persones y organizaciones interesaes n’aldericar sobre esi procesu o participar direutamente nel mesmu”.

D’esti mou, el sábadu 13 de marzu nel Salón d’Actos de la Biblioteca Púbica Xovellanos de Xixón y de magar les diez y media la mañana, Andecha Astur convoca a organizaciones y persones interesaes nesti procesu a participar del conceyu abiertu.

La Xunta Pola Defensa de la Llingua Asturiana retoma l’actividá reivindicativa en Xixón y pa dar el pistoletazu de salida, esti vienres 5 de marzu va facese la re-inauguración del nuevu llocal onde se van aconceyar y trabayar, conxuntamente con otres asociaciones, a partir d’agora. Nel llocal va empezar a facese a los xueves un ciclu de charres sobre aspectos variaos como la normalización llingüística, la música n’asturianu, etc., de la que nunos díes la Xunta va dar anuncia.

Pal actu de presentación, que va empezar a les 20:00 hores, va facese una fiesta onde va haber comida de baldre y bebida a precios populares. El llocal nuevu ta situáu na cai Joaquín Alonso Bonet, 3 (Antigua Sidrería la Llosa), de Xixón. Dende la organización convoquen a tol mundu “a tomar una”.

L’Atles de los Bolos Asturianos (ABA) ye un proyectu de Carlos Suari, llicenciáu en Ciencies de l’Actividá Física y del Deporte con estudios n’Antropoloxía Social y Cultural, y consideráu etnógrafu especializáu nel patrimoniu lúdico-motor y la so aplicación a la enseñanza. Nél, l’autor quería afondar nos raigaños culturales de los xuegos de bolos n’Asturies, aprovechando pa facer un rastrexu del repertoriu, replantiando variables y clasificaciones de dalgunes investigaciones previes. Cola collaboración de munches persones, alministraciones y entidaes socioculturales qu’aportanon información o informantes d’altisimu valor pa esti trabayu, Suari espublizó yá dalgunes de les primeres conclusiones.

El trabayu, qu’atopó una ayuda del Principáu d’Asturies por un valor d’alredor de los dos mil euros, tuvo una duración de más de 10 meses y analizó cerca de 800 paquetes de datos ente la bibliografía y les visites, les entrevistes y les encuestes directes y diferíes feches nos setenta y ocho conceyos asturianos, l’oriente gallegu, el Norte de Llión y bona parte de Cantabria.

Amás, buscánonse referencies del restu del marcu européu que permitienon facer dalgunes interpretaciones de conxuntu. Agora y con too ello, prepárase un material divulgativu pal que ta buscándose forma y fontes de financiación en collaboración con Suburbia Ediciones. El llibru constará de tres partes, un ensayu, una guía de tolos xuegos de bolos asturianos y un miniatles coles considerances etnoxeográfiques más interesantes.

L’estudiu dexa afitao que son los tres tipos d’oxetivos conocíos quien abren la puerta a la organización de tol repertoriu. L’oxetivu puede ser valtar (V) o aventar (A) bolos y facer trayectories cola bola (T). Dende un puntu de vista cultural hai qu’estremar ente los xuegos tradicionales y aquellos que nes últimes décades sintetizaron les característiques de los primeros pa conformar xuegos modernos, davezu institucionalizaos.

Cola variable del tipu d’oxetivu, estremamos cuatro families. Xuegos de bolos a valtar (V), xuegos de bolos a valtar y aventar (VA), xuegos de bolos a aventar (A) y xuegos de bolos a valtar y a facer trayectories cola bola (VT). Les cuatro familes tán presentes n’Asturies, formando VT, VA y A bloques incompatibles, que nun comparten territoriu, y V un grupu discontinuu (posiblemente antiguu continuu) que puede compatibilizar con cualesquiera de los tres bloques. Ábrese con ello una desplicación filoxenética de los bolos, onde’l discontinuu V ye un afloramientu de xuegos más antiguos que los de los bloques VT, VA y A, que paecen más modernos y complexos y que pudienon dir anubriendo a los del grupu V por una demanda creciente de complexidá técnico-táctica qu’incentivara la competición, l’apuesta. Na rexón centroriental d’Asturies domina’l bloque VT, mentanto que nel occidente manden los bloques VA y A. Los más de los xuegos correspondientes al discontinuu V concéntrense na costa centroccidental asturiana.

Asturies ye’l llugar del mundu más densu y ricu en bolos, con 36 xuegos. De toles cultures investigaes nesti sen hasta la fecha, ye l’asturiana la que da un númberu más eleváu de xuegos de bolos, siendo amás un casu d’escepcional variedá, intensidá y trescendencia social. Con tolos datos recoyíos nel noroeste ibéricu podemos falar d’una secuencia xeográfica d’estos xuegos. Con predominiu del rasgu “a aventar”, ta una macrorrexón que va, pela llinia de costa, dende l’Atlánticu gallego-portugués hasta Carreño. Con predominiu del rasgu “facer trayectories cola bola”, atopamos otra macrorrexón que pel llitoral va dende Xixón hasta dalgunos kilómetros al Este de Santander.

Xuegos tradicionales de bolos n’Asturies:- VT: Cuatriada, Birle o bolu palma.- VA: Batiente tipu costeru, Batiente tipu interior, Bolos en ringlera, Bolos tipu Tinéu, Bolos tipu Sierra, Bolos tipu Somiedu, Bolos tipu L.lumés, Bolos tipu Cangas, Bolos tipu Ibias-Ayande, Birlos tipu A Veiga-Castripol, Birlos tipu Os Ozcos, Birlos tipu Taramunde-San Tiso.- A: Matabolos, Bolo das cincuenta, El bolo corto, Bolos tipu valle baxu del Navia, Bolos tipu valle altu del Navia, Bolos tipu Villaicabo. – V: Bolo rodao o bolos sueltos, Bolos tipu Valtraviesu, Bolinos, Cuatrín tipu Cuideiru, Cuatrín tipu Agones, Dexabolu, Cuarta, Bolos tipu Saliencia. Xuegos sintéticos/modernos de bolos n’Asturies:- VT: Cuatriada moderna, Bolu palma modernu, Estilu asturianu.- VA: Batiente modernu, Bolu vaqueiru, Bolu celta.- A: Bolos del Navia. – V: Bolo rodao modernu.

Un altu porcentaxe de les modalidaes yá desapaeció o ta a piques d’ello De los ocho xuegos sintéticos, seis tán federaos anguaño y namás ún ta desaparecíu. Sicasí, esi porcentaxe de desaniciu ye mui superior nos xuegos tradicionales, que vienen siendo escaecíos, sustituyíos o fagocitaos. Tolos que se conserven anguaño presenten graves problemes de viabilidá, fundamentalmente pol avieyamientu de los practicantes y pola perda poblacional de los llugares onde se xuega.

CSA La Perrera organiza un cursu d’“Iniciación a la llingua lleonesa” en Salamanca. El cursu-taller va celebase los xueves 4, 11 y 18 de marzu, a partir de les ocho la tarde na CSA La Perrera, asitiada nel númberu 7 de la cai Vitigudino 7, xunto a Plaza del Oeste, de Salamanca. Na realización del cursu collabora l’asociación “Agora Salamanca”.

La Sociedá Xeneral d’Autores fizo anuncia esti día del deséu d’entendese coles asociaciones asturianes y la so intención d’analizar la documentación apurrida por trés asociaciones organizadores de folixes nel conceyu de Villaviciosa, a les que reclama cásique 30.000 euros en conceutu de derechos d’autor. La Sociedá va estudiar lo apurrido polos trés colectivos, que planteguen unes cifres considerablemente inferiores a les pidíes pola entidá xestora.

La Conseyera de Presidencia, Xusticia ya Igualdá, María José Ramos, acompañada de la Directora del Institutu Asturianu de la Muyer, María Fernández Campomanes, presentó estos díes el programa d’actividaes del 8 de marzu, Día Internacional de les Muyeres. L’actu institucional, anunció la Conseyera, desendolcaráse esti añu na capital del conceyu de Valdés, L.luarca.

El programa, al igual qu’en años anteriores, inclúi distintes actividades; dalgunes d’elles puestes en marcha en collaboración con ayuntamientos asturianos y centros educativos. “Refleja’l trabayu en red que l’Institutu Asturianu de la Muyer desarrolla a lo llargo de tol añu pa facer estensivu’l valor de la igualdá en tolos municipios asturianos y tamién nel aula”, destacó la Conseyera.

L’actu institucional se desenrrollará nel Auditoriu del Conservatoriu Profesional del Occidente d’Asturies, ubicáu en L.luarca. Va entamar a les 17.30 hores y cuntará cola presencia del Presidente d’Asturies, Vicente Álvarez Areces; la Conseyera de Presidencia, Xusticia ya Igualdá, María José Ramos, y l’alcalde de Valdés, Juan José Fernández Pereiro, ente otros.

Al igual qu’en años anteriores, les pallabres institucionales compartirán espaciu con otres voces de la sociedá. Nesta ocasión a través de: María Berdasco Menéndez, investigadora científica especializada n’Oncoloxía Molecular del Institutu d’Investigación Biomedica de Bellvitge (Barcelona); José Ignacio Nieto García, Director del Institutu d’Enseñanza Secundaria Carmen y Severo Ochoa de L.luarca, o Elena Badallo León, coordinadora Sociosanitaria del Área Sanitaria I.

Precisamente en reconocimientu a “la capacidá, los conocimientos, la esperiencia y la creatividá de les muyeres”, como recueye la Carta Europea, nel actu recordaráse a dos valdesanes mui especiales: la poetisa Nené Losada y la bioquímica del Conseyu Superior d’Investigaciones Científiques, Margarita Salas, quién al traviés d’una entrevista grabada dirixirá unes pallabres a toles persones asistentes.

L’actu tará amenizáu con actuaciones musicales, ente elles la interpretación de varies piezes musicales a cargu del alumnáu del propiu Conservatoriu Profesional del Occidente d’Asturies. Tamién actuarán el grupu de música fusión Delagua, y la cantante de tonada asturiana, Mari Luz Cristóbal. Amás contaráse cola actuación de la trapecista Laura Bolón que reproducirá unes escenes del so espectáculu “Inmuyerable”.

Según anunciaron ayeri Ayuntamientu y Club, l’Sporting de Xixón va llucir nueva imaxe na so equipación. Y ye que les dos instituciones tán acabante firmar la renovación del so conveniu de patrociniu, que supón que la imaxe nueva de Xixón, estrenada va pocos meses, apaeza na camiseta y pantalón del equipu. Gracies a ello, que per primer vegada va apaecer el topónimu n’asturianu de la ciudá na equipación del club, anque va ser namás nel pantalón, con una visibilidá muncho menor que’l topónimu acastellanáu de la camiseta.

La renovación del conveniu supón una inversión de 2.050.000 d’euros per parte del Ayuntamientu de Xixón. El club ha usar el nome de la ciudá na so equipación hasta 2013, comprometíendose amás a organizar un partíu añal del qu’han donase los fondos consiguíos a los clús base de la ciudá, amás de 200 entraes por partíu.

El periódicu estatal Diagonal, presenta’l so suplementu trimestral dedicáu a Asturies, xunto cola revista d’información y opinión Atalántica XXII, que ta dirixida por Xuan Cándano.

L’actu de presentación va celebrase na Sociedá Cultural Xixonesa, a partir de les ocho la tarde, de mañana, xueves 25 de febreru.

La tertulia Pachín de Melás va aldericar alredor del Software Llibre na cervecería Astuera, de Xixón, na tarde de güei, martes 23 de febreru, y a partir de les ocho y media. Na mesma van participar Xabel García Pañeda, del Departamentu d’Informática de la Universidá d’Uviéu; Xandru Armesto, Maestru y miembru de Softastur; y Daniel Vicente y Arsenio Coto, del equipu creador del traductor Eslema.