Sociedá

As xornadas culturales conocidas como Outono en Bual que s’han a celebrar en Bual (Asturias) entre el venres 5 y el sábado 6 de decembre, pechan el cartel d’este 2014 con abondos concertos, conferencias, talleres, gastronomía, productos del país y esposicióis.

El venres 5, a xornada vei empezar ás 19:00 na Casa da Cultura de Bual, unde a organización y úa representación del conceyo van presentar as xornadas y as dúas esposicióis qu’han a tar colgadas durante todo el festival: úa d’Andrés Rodríguez Monteavaro, titulada «Paisaxes postindustriales: úa mirada al patrimonio esqueicido» y, outra, de Sveta Poutilina, col título «Torbón de llume / Огненный дождь».

Despóis d’estos actos de presentación y benvida, ha a chegar a música, da mao del grupo de folk gallego A Carricobanda. É a primeira vez qu’este conxunto vén a Asturias y nun vei ser el última, porque el guitarrista é Roi Sampedro, músico da antiga formación bualesa Mezá.

Pral sábado 6, a xornada vei tar mui concurrida, xa que dende a mañá vei haber ben actividades, que s’han a prolongar hasta entrada a noite. Lo primeiro vei ser el taller de cestas de bringa, a cargo de Verónica Álvarez, de Lláscara Xeoturismu y Desarrollu Rural, que vei enseñar al público cómo se fain as tradicionales paxas de toda a vida con texido vexetal. Despóis, de tarde, ás cuatro y media, Ramsés Ilesies ha a puer al público dereto y en danza col sou taller sobre baile tradicional da zona Navia-Eo, nel que van poder participar tanto grandes como pequenos y pral que nun se necesitan nocióis d’este tipo de bailes pr’asistir. Condo remate este pequeno curso d’introducción ás danzas tradicionales, a Casa da Cultura ha a contar con Llorián García, que vén a Bual a dar úa conferencia titulada «Gaitas ouguidas, gaitas escuitadas. Celtismo, disciplina corporal y redefinición da escuita nel fenómeno das bandas de gaitas asturianas», que nun ha a deixar indiferente a naide y que vei sobre todo dirixida a músicos tradicionales y a todo el público que quira conocer a filosofía d’úa banda de gaitas.

Despóis da xornada de tarde, el Asociación Xuvenil Mezá ha a ter preparada a cía. Este ano, y despóis del ésito del edición anterior, vei haber un comedor popular nel que se van poder degustar productos del país y da terra ben cociaos. Haberá menú «omnívoro» y vexetariano pra todos os gustos y os vales han a poder comprarse durante todo el Outono.

Pr’acabar el día, ás 23:30, van empezar os concertos nel Helenias da Frieira de Bual. Este espacio é úa novedá pras astividades na villa bualesa, xa qu’hai muitos anos que nun s’organiza nada neste antigo edificio que foi cine y teatro y que tantas festas armóu durante el siglo xx. Os primeiros en tocar van ser Os Pampirolos, el grupo de gaitas de Grandas, que xa tocaron el ano pasao en Bual y que son os culpables del famoso «Legao del Galo», que tanto trunfóu nas redes sociales.

Despóis, Tuenda, grupo de folk asturiano que nun precisa de presentación, con Pepín de Muñalén, Ambás y Elías García. El prato forte ha a ser el grupo gallego Chotokoeu, que vén de dar úa xira por toda Europa y que acaba en Bual el sou periplo continental. El último grupo da noite vei ser Misiva, conxunto de punk-rock de Grau qu’el organización del Outono tía ganas de trer á villa bualesa dende hai dalgún ano.

A esto, hai que xuntar a novedá da rifa d’úa cesta de productos del país, tanto alimenticios como d’artesanía, valorada en más de 180 euros. As participacióis tán vendéndose y volando nos bares da villa de Bual y el sorteo vei ser el día 7 de decembre. A cesta conta con productos das empresas Embutidos Pico de Fiel, Queixeiría d’Abredo, Queisos Ca Sanchu, Cosmética Terraveya, Cerveza Caleya, Sidra L’Allume, Artesanía Verdenaz, discos y llibros en gallego-asturiano, úa fotografía d’Andrés Rodríguez Monteavaro, ovos de Pitasana, y muitas cousas máis.

Cumple este mini-festival autoxestionao de música, gastronomía, arte y lliteratura sete anos, dende qu’alló pol 2008 organizara en Bual el Asociación Xuvenil Mezá úas modestas actividades col nome d’Outono Cultural. El fin d’este proyecto é motivar y dar un pouco de vida al occidente asturiano y, sobre todo, espertar as mentes d’aquellos que pasan el día delantre da televisión y da cultura institucional. Tamén, este evento quer ser un acto de reivindicación das dúas llinguas tradicionales d’Asturias, el asturiano y el gallego-asturiano, y por esta razón faise tresversal el uso d’ellas nas xornadas, así como a posta en valor da cultura del país y da súa evolución nel siglo xxi, llonxe d’esteriotipos y de clichés impostos por ningún dogma oficial.

Os actos van ser de baldre. A cultura asequible pral público é a base da filosofía del Asociación Xuvenil Mezá, que xa conseguíu afianzarse y ferse un furaco dentro das entidades organizadoras d’eventos de relevancia cultural en Asturias.

Pol Outono xa pasaron noutros anos nomes tan relevantes como Alfredo González, Mapi Quintana, Pepe el Ferreiro, Martxelo Otamendi, Guadi Galego, Pablo Texón, Michael Lee Wolfe, Jacobo de Miguel ou a xente de Felpeyu, Vallarna, Skainhead y La Tarrancha. Esta é úa señal inequívoca de qu’as xornadas que s’han vivir el 5 y el 6 de decembre en Bual xa forman parte da cultura popular asturiana.

La Conseyera d’Educación, Cultura y Deporte del Principáu d’Asturies participa esti miércoles en Ciañu en les Xornaes culturales De castilletes y carbón. L’actu va tener llugar na Casa los Alberti a les 20 hores y Ana Rodríguez García va lleer la ponencia Política Cultural n’Asturies.

Esta actividá forma parte de la programación de les xornaes culturales De Castilletes y Carbón qu’organicen la Fundación Nuberu y l’Ayuntamientu de Llangréu y que van tener continuidá col recital lliterariu Compañeru dame tira nel que, cola coordinación de Chechu García, van intervenir Miguel Allende, Milio Rodríguez Cueto y Solinca Turbón.

Les xornaes culturales De castilletes y carbón compleméntense cola esposición La Mina y la Mar que pue visitase demientres esti mes de payares na Casa los Alberti de Ciañu y col conciertu que’l grupu Nuberu va dar en Sobrescobiu’l 4 d’avientu, día de Sta. Bárbara.

Hai unos díes conocíase en País de Gales la política llingüística de la marca de supermercaos Lidl, que prohibía a los sos emplegaos facer usu del galés con otros trabayadores, incluyendo los descansos, y colos clientes, a nun ser qu’estos nun pudieren falar inglés, daqué que va a la escontra de la llegalidá vixente nel país británicu. L’asociación “Cymdeithas yr Iaith Gymraeg” foi la responsable de denunciar esta situación, algamando una rápida rempuesta de la cadena alemana, que dixo que revisaría les sos polítiques. Y agora Iniciativa pol Asturianu vieno de solidarízase con estes asociaciones en defensa de llingües minorizaes n’Europa.

D’otra miente, esta selmana dábase tamién a conocer la multa de 66.000€ que’l Gobiernu español-y imponía a l’asociación valenciana “Acció Cultural del País Valencià” por da-y puxu a les emisiones de Catalunya Ràdio na Comunidá Valenciana, una situación asemeyada a la que nun hai muncho tuvieron espuestos, cuando se-yos condergó con otra multa de más de 400.000€ por una aición asemeyada con emisiones de la televisión pública catalana TV3, multa qu’agora’l Gobiernu tien orden de reembolsar a l’asociación.

Nun comunicáu asoleyáu esti día, Iniciativa pol Asturianu afita qu’en dambos casos, “la Vocalía de Rellaciones Internacionales d’Iniciativa vieno acabante d’amosar el so fonderu sofitu a dambes organizaciones y a dambes comunidaes de falantes como exemplu de la so política y los sos entamos de solidaridá pa colos falantes de llingües minorizaes y en peligru nel mundu, dalgo qu’en dambos casos recibió una cálida bienllegada per parte de les organizaciones enantes mentaes”.

La Puela d’Allande acueye, un añu más, el Seminariu d’Estudios Asturianos de la Fundación Belenos. Estes xornaes d’estudiu, que lleguen a la so XV edición, van desendolcáse los díes 29 y 30 de payares y nesta ocasión van tratar sobre La tradición de la bébora n’Asturies: la sidre ya’l vinu.

El sábadu 29 ye’l día acutáu pa la presentación de ponencies, coles intervenciones, n’horariu de mañana, de Juan Redondo Losada (Averamientu a la hestoria del vinu de Cangas: d’APROVICAN a la DOP), Carolina Pelaz Soto (La vide ya’l vinu en Cangas del Narcea: patrimoniu material ya inmaterial), Inaciu Hevia Llavona (La sidre tradicional asturiana: oríxenes, procesos y preseos) y José María Díaz Díaz (La orixinalidá ta nel orixen: los aguardientes de sidre); y, yá pela tardi, David Rivas Infante (La sidre y los sos rituales na sociedá asturiana) y Xosé María García García (Facer sidra en casa. Una esperiencia práutica: dende la esbilla de la mazana hasta la preba de la sidre’l duernu). El domingu 30 van visitase una viña, una bodega y el Muséu del Vinu, too ello en Cangas del Narcea.

El preciu de la matrícula ye de 30 € y la inscripción considérase fecha namái que col ingresu d’esi importe na cuenta bancaria de la Fundación Belenos. Amás, esiste la posibilidá d’agospiu opcional en réxime de pensión completa en “La Nueva Allandesa” a un preciu por persona de 60 € (igual que cola matrícula, la reserva queda afitada col ingresu del importe na cuenta de la Fundación Belenos).

Pa más información sobre’l XV Seminariu d’Estudios Asturianos pue contautase cola Fundación Belenos nos teléfonos 985244811 / 616242319 o nel corréu lletrónicu seminariubelenos@gmail.com.

Por cuenta de los 30 años de los Premios Andrés Solar de la Xunta pola Defensa de la Llingua Asturiana, abre a tola xente interesao la posibilidá de proponer candidatures tanto pal Pegollu (el premiu que reconoz a aquella persona o entidá que destacare nesti añu 2014 por normalizar l’usu del asturianu), como pa la Madreña de purpurina (pa quien fixere tolo contrario y fore protagonista d’ataques o desprecios al asturianu).

Les candidatures, razonaes, han unviase enantes del 25 de payares a info@exunta.org y un xuráu va valorar los méritos y escoyer ente toles candidatures presentaes.

L’actu d’entrega de los premios sedrá’l 20 d’avientu en Xixón.

La Llegra da un pasu alantre, tres el desagospiu del CSOA La Madreña -y con ello, la perda del primer Espaciu La Llegra- que fai a esta iniciativa pal alderique y l’acción unitaria de la izquierda soberanista asturiana abrir un nuevu llocal n’Uviéu. El nuevu Llar la Llegra va ser un espaciu autoxestionáu pa siguir coles dinámiques de trabayu colectivu que venía desendolcando dende febreru de 2014. Tamién un escaparate pa visibilizar y normalizar a la izquierda soberanista asturiana; amás d’un sitiu plural, abiertu a otros movimientos sociales y culturales.

Yá hai llocal arrendáu. Agora namás se necesita facer frente a les obres y asegurar la vidabilidá económica del proyectu. Pa ello, La Llegra va entamar una campaña de crowdfunding (financiación colectiva al traviés d’Internet) y de cuotes voluntaries col qu’autoxestionalo.

La II Xornada de “Llingua Asturiana y Educación” va averar les TICS a la clas d’asturianu esti xueves 13 de Payares na Sala de Graos, Facultá de Formación del Profesoráu y Educación de la Universidá d’Uviéu, con un programa nel que les nueves tecnoloxíes y la so presencia na clas de primaria y secundaria van protagonizar una bona parte de les ponencies.

La xornada va entamar a les 10,00 de la mañana cola presencia de Julio Antonio González García, Vicerreutor de Profesoráu y Ordenación Académica (Universidá d’Uviéu), Inmaculada González Gómez, Primer teniente d’alcalde del Conceyu d’Uviéu, y Ana María Fueyo, direutora xeneral de Política Llingüística del Principáu d’Asturies, amás de Juan Carlos San Pedro Veledo, Decanu de la Facultá de Formación del Profesoráu y Educación y Raúl Carbajal López, Coordinador académicu de la xornada.

Tres de la inauguración, el programa va desenvolvese con un primer bloque d’averamientu a la llingua nel contestu educativu que va abrise con una ponencia al cargu de Xose Antón González Riaño, Profesor titular de la Universidá d’Uviéu que lleva por títulu “La Llingua Asturiana y el Proyeuto Llinguística de Centru”.

Tres d’ella, la relación de la llingau col gobiernu asturianu discutirase na ponencia qu’entamra a dicatar a les 11,35 hores Ana María Fueyo, direutora xeneral de Política Llingüística del Principáu d’Asturies, col títulu de “El Principáu d’Asturies y la Llingua Asturiana”.

Y darréu d’ello, de les 12,20 hores hasta las 13,20 hores intervendrá José Luis Remis, Asesor Téunicu Docente en la Conseyería d’Educación y Ciencia del Principáu d’Asturies.

El tercer bloque enfotaráse na tradicion oral asturiana na escuela pública, siendo Xosé Antón “Ambás” y Ramsés Ilesies los encargaos d’averar al públicu a la “Importancia de la Música y del bail.le tradicional na Educación Primaria”. Y de 13,45 hores hasta les 14,00 hores fadrán tamién una Despedida musical.pela tarde tan previstes delles ponencies sobre la importancia de la llingua asturiana ma formación de mayestros y mayestres al cargu de Jesús García Albá, Catedráticu de la Escuela Universitaria de Maxisteriu, con docencia na Facultá de Formación del Profesoráu y Educación, Universidá d’Uviéu que falará sobre “La Llingua Asturiana nel procesu deprendimientu-aprendidax del Conocimientu Social, Natural y Cultural”.

Y dende les 15,55 hores hasta les 16,20 hores presentarase’l proyeutu didáuticu “El Cantar del Vasu” por parte de los integrantes de Xuncir: Poli Mencia, Iván Huerga y Pablo Quiroga (proyeutu nel que collaboren Algamar Producciones, Xunta Pola Defensa del Asturianu y el Serviciu de Normalización Llinguística de Conceyu de Siero).

El Bloque final será el de les Nueves Tecnoloxíes nel que d de de les 16,20 hores hasta les 16,50 falarán Xandru Armesto, mayestru de Llingua Asturiana na Educación Primaria y collaborador de Softastur sobre “La presencia de la Llingua Asturiana nel sieglu XXI: rede Internet y telefonía móvil”; Pablo Rodríguez Medina, llicenciáu en Filoloxía Hispánica y especialista en Filoloxía Asturiana, dende 16,50 hores hasta les 17,20 hores sobre “Tic y destreces llingüístiques”; y dende les 17,20 hores hasta les 17,50 hores Vítor Suárez, mayestru d’Educación Primaria, sobre la “La Wikipedia n’asturianu: una propuesta didáutica pa les nueses clases”.

Finalmente, tres d’un pinchéu pa los asistentes a la xornada na cafetería de la Facultá de Formación del Profesoráu, dende les 18,20 hores hasta les 19,30 celebrarase una mesa redonda sobre La Llingua Asturiana dende la perspeutiva sindical, na que van participar agrupaciones sindicales como SUATEA ya UXT, y dende les 19,30 hores hasta les 20,00 hores presentarase una COMUNICACIÓN al cargu de la Xunta Estudiantil Asturiana. “La Llingua Asturiana na mocedá: Presente y perspeutives de futuru”.

Páxina en Facebook de la Xornada

L’Academia de la Llingua Asturiana pieslla ESTI XUEVES 6, na Facultá de Filosofía y Lletres de la Universidá d’Uviéu, les XXXIII Xornaes Internacionales d’Estudiu. Les Xornaes tuvieron ayeri como protagonista la propuesta d’Inaciu Galán d’adautar los actuales estudios d’asturianu p’adultos al sistema européu homologáu.

L’Academia de la Llingua Asturiana celebra estos díes les XXXIII Xornaes Internacionales d’Estudiu na Facultá de Filosofía y Lletres de la Univerisdá d’Uviéu y dientro d’elles Inaciu Galán, profesor, periodista y presidente d’Iniciativa pol Asturianu propunxo ayeri una “Adautación del enseñu d’asturianu al Marcu común européu de referencia pa llingües”. Nesta comunicación compartió col públicu la so idea sobre los pasos a dar pa la homologación de los niveles de conocencia de la llingua asturiana dientro del marcu común européu.

Dende l’añu 2001 la mayor parte de les llingües europees vienen adautando los sos niveles d’enseñu p’adultos a esti nuevu marcu, cada vegada más xeneralizáu y conocíu pola so graduación en niveles dende l’A1 hasta’l C2. Galán quier animar con esti trabayu a les instituciones asturianes a dar los pasos que permitan homologar col Marcu de Referencia Européu pa Llingües los actuales niveles de reconocencia establecíos pola Academia de la Llingua Asturiana y otres entidaes como la Universidá d’Uviéu.

L’establecimientu del nuesu sitema permitiría una meyor identificación de los niveles de conocencia y de les competenencies de los usuarios, de cara al establecimientu de niveles de conocencia pa les places de funcionariáu, que dende l’aprobación de la Llei d’Usu del Asturianu de 1998, pueden tener al asturianu como unu de los baremos a tener en cuenta.

Les xornaes finen esti xueves coles comunicaciones de Clara Elena Prieto Entrialgo; Pablo Suárez García; José Antonio Méndez Sanz, Adolfo García Martínez & José Ángel Gayol; Alberto Gómez Bautista; Manuel de Abol-Brasón; Xulio Llaneza Fernández; Xuan Xosé Lajo y Loreto Díaz Suárez que van desenvolvese ente les 14 y les 16 hores.

Darréu d’estes comunicaciones dirá la ponencia de los profesores Margarita Fernández Mier (Universidá de Lleón) y David González Álvarez (Universidá Complutense) «Una arqueoloxía pal paisaxe rural asturianu». Les Xornaes pesllarán cola conferencia de la profesora Coloma Lleal Galcerán (Universidá de Barcelona) titualada «Ideología lingüística y lexicografía».

La Fundación Nuberu y l’Ayuntamientu de Llangréu siguen desenvolviendo les V Xornaes Culturales De Castilletes y carbón y tornen esti xueves col programa charres “Los xueves de castilletes y carbón” tolos xueves d’esti mes de payares na Casa los Alberti de Ciañu. Esti ciclu ponencies va abrilu a les 20 hores l’Académicu de la Llingua y Presidente de la Fundación Nuberu Pablo Xuan Manzano.

La Fundación Nuberu y l’Ayuntamientu de Llangréu, frutu del conveniu de colaboración robláu ente dambes dos instituciones, siguen cola programación de les V Xornaes Culturales De Castilletes y carbón.

Dempués de rematar esti mes d’ochobre’l ciclu cine Baxando pa la galería, les xornaes culturales De castilletes y carbón siguen col programa charres Los xueves de castilletes y carbón que van desenvolvese tolos xueves d’esti mes de payares na Casa los Alberti de Ciañu.

Esti ciclu ponencies va abrilu, esti xueves 6 de payares a les 20:00 hores l’Académicu de la Llingua y Presidente de la Fundación Nuberu Pablo Xuan Manzano que va lleer la ponencia Academia de la Llingua Asturiana, 34 años de trabayu.

Los xueves de castilletes y carbón van siguir el xueves 13 cola intervención de los cineastes Marcos Martínez (Remine) y Pablo Casanueva (Bernabé) que van falar sobre’l procesu creativu na producción cinematográfica.

Ana González Rodríguez, Conseyera d’Educación Cultura y Deporte del Principáu d’Asturies participará’l miércoles 19 dando llectura a la ponencia Política cultural n’Asturies.

Los xueves de Castilletes y Carbón van rematar el 27 payares con un Recital poéticu d’escritores asturianos coordináu por Chechu García.

L’actividá de De castilletes y carbón se complementa cola esposición La Mina y la Mar que pue visitase demientres esti mes de payares na Casa los Alberti de Ciañu y pa poner el ramu, el 4 d’avientu día de Sta Bárbara, va tener llugar un conciertu del grupu Nuberu en Sobrescobiu.

El filólogu de la Universidá d’Uviéu, Enrique del Teso, protagonizó, xunto cola nueva páxina web de l’Academia de la Llingua Asturiana, la primer de les Xornaes d’Estudiu d’esta institución. El profesor de la Universidá d’Uviiéu xustificó que la construcción de la normativa de la ‘llingua’ asturiana vaya basase n’elementos autóctonos propios, anque tean quedando en desusu, y non na fala popular del ‘amestáu’. Del Teso atalanta que sedría un yerru lo contrario porque “entainaría’l procesu de desapaición dafechu del asturianu”.

Enrique Del Teso protagonizó una de les primeres ponenecies de les ‘Xornaes Internacionales d’Estudiu’, qu’entama l’Academia de la Llingua na Universidá d’Uviéu, col títulu de “L’amestáu urbanu. Cuestiones de normativa y llingua escrita”.

Del Teso asumía na so ponencia que l’actual normativización de la llingua pue nun torgar la so desapaición, pero cola normativización del amestáu, el procesu diba ser muncho más rápido. Asina, considera que’l ‘Spanglish’, col que facía la comparanza del amestáu asturianu, va finar desapaeciendo porque la cuarta xeneración d’emigrantes llatinos que vivan n’EEUU yá namás van falar inglés.

Nesta primer xornada tamién intervino Clarinda de Azevedo Maia, de la Universidá de Coimbra y nel actu de presentación, tomaron parte la presidenta de l’Academia de la Llingua, Ana María Cano, la decana de la Facultá de Filosofía y Lletres, Cristinal Valdés, y la vicerrectora d’Investigación, Paz Rendueles. Entamaron los actos cola presentación de la nueva páxina web de l’Academia, al cargu de David Melendi, presidente del Colexu d’Inxenieros Informáticos, y de los nuevos númberos de les revistes Lletres Asturianes y Ciencies.

Les Xornaes siguen esti miércoles con delles otres ponencies en forma interesantes ente les que s’alcuentren les de Xosé Ramón Iglesias Cueva, Pablo Rodríguez Medina, Inaciu Galán y Vicente García Oliva. La xornada finará con una ponencia de José Miguel Lamalfa Díaz, de la Universidá d’Uviéu, que tien por títulu “Cuando examen les abeyes”: Primer testu lliterariu n’asturianu y la so importancia na historia de la lliteratura.

Programa completu de les Xornaes d’Estudiu