Política

Xulio Viejo y Roberto González Quevedo tán acabante facer una propuesta a la directora de la Escuela de Maxisteriu de la Universidá d’Uviéu, Gloria López Téllez, pa que proponga la creación d’unos estudios reglaos d’asturianu, asemeyáu al títulu acabante aprobar en Filoloxía.

Los estudiantes de Maxisteriu van poder cursar unos estudios de cualificación que van denomase “cualificadores”, y que van constar d’ente 30 y 60 créitos. La idea de los profesores que ficieron la propuesta ye l’asturianu se sume a les titulaciones de Llingua Estranxera, Educación Física o Musical, a mou d’especialización.

Téllez nun quixo pronunciase sobre’l tema, pero delles organizaciones yá se mostraron a favor. Ye’l casu del Conceyu Universitariu pol Asturianu y la Xunta Moza.

El Conceyu Universitariu pol Asturianu (CUPA), amosó nun comunicáu que vuelve “a mostrar el so apoyu a la creación de los títulos y especialidaes d’asturianu necesaries en Maxisteriu”, como yá lo espresare la organización nel puntu 4.4 del Programa Electoral al Claustru de la Universidá d’Uviéu, en mayu de 2008. Pal CUPA “dempués del pasu hestóricu de l’aprobación del Minor d’asturianu en Filoloxía ye’l momentu de siguir dando pasos na normalización del asturianu y la creación d’esti pernecesariu títulu en Maxisteriu, ye una de les prioridaes nesti campu”.

El CUPA confia amás en que la propuesta de solución pal asturianu en Maxisteriu “va volver a tener l’apoyu del Rector, Vicente Gotor”, que pal Conceyu “dende l’entamu del so mandatu vien amosando’l so apoyu a los estudios de llingua asturiana y a la normalización del asturianu na Universidá”.

La Xunta pola Defensa de la Llingua Asturiana anunció que prepara yá una campaña a favor de la creación d’una mención d’asturianu en Maxisteriu. Dellos representantes de la XPDLA aconceyaron cola directora de Maxisteriu “ensin que llegaren a nengún compromisu”.

Los diputaos del PP, Alejandra Cuétara y Ramón Cañal, alvirtieron güei de que van vixilar fondamente cada euru de gastu del Gobiernu Asturianu y qie va desixir al Executivu d’Areces que “nun siga marafundiando’l dineru públicu”. Pa esto van desixir una batería de declaraciones de caún de los miembros del gobiernu pa que dean cuenta de los gastos.

Nuna rueda prensa que convocaron esti día y na que volvieron a referise al “altu nivel d’adeudamientu” del Executivu, Cañal y Cuétara dexaron afitada la so opinión que’l Gobiernu “miente a los contribuyentes” al falar sólo de la deuda de l’Alministración pública y non del Principáu. El PP insistió otra vuelta na deuda total que dicen va alcontrase penriba los 1.901,5 millones d’euros y non los 972 que diz el Gobiernu.

EL vicealcalde de Lleón Javier Chamorro, desautorizó esti llunes al conceyal d’Educación y Cultura Lleonesa, el tamién integrante d’Unión del Pueblo Leonés (UPL) Abel Pardo, al vetar l’enfotu del conceyal de “normalizar” a lo llargo d’esti 2009 l’usu compartíu del asturlleonés y el castellan na documentación oficial del Ayuntamientu.

Abel Pardo lleva tiempu plantegando que la convivencia de les dos llingües nos documentos oficiales alcuéntrase recoyida “nel pactu de gobiernu”, robláu ente’l PSOE y UPL, polo que yera “de necesaria aplicación”. Pero, como yera d’esperar, la cadarma del partíu llionesista, representada nel vicealcalde de Lleón, nun ta pol llabor de normalizar l’emplegu de la nuesa llingua na comunidá vecina.

Nes sos declaraciones, Javier Chamorro dio como razones lo “complicao” que sedría editar miles de documentos tornaos a los dos idiomes.

L’escritor ya investigador Xandru Martino ta acabante mandar a los medios una carta, titulada “Nel mio nome, non”, na que retira’l so sofitu a la formación Izquierda Xunida-BpA-LV, a la que se venceyare diendo nes sos llistes al Conceyu de Ribeseya. La razón d’esti fin del so apoyu ta nes declaraciones últimes de Jesús Iglesias sobre la reforma del Estatutu d’Autonomía: “Si nun hai reforma del estatutu, nun hai problema”. Escaeciendo pa Martino, con estes pallabres: “qu’anguañu existe un estatutu que nun reconoz la oficialidá de la llingua asturiana y que’l Gobiernu del que van a formar parte ye’l principal culpable del desaniciu del asturianu y la so futura desapaición”.

Xandru Martino Ruz, (Ribeseya 1966) ta llicenciáu en filoloxía francesa, diplomáu en maxisteriu y especialista d’asturianu pola Universidá d’Uviéu. Narrador, traductor, poeta, ensayista… premiáu en delles ocasiones. Tien asoleyaos un “Diccionariu básicu ilustráu asturianu-castellanu” (2006) y “Refraneru Temáticu” (2008) na editorial Picu Urriellu. Foi profesor d’adultos nel Conceyu Colunga durante cinco años y dos más nel Conceyu Caravia. Tamién foi profesor d’adultos de los cursos de l’Academia de la llingua n’Asturies y Lleón. Nel mundu musical ye conocíu por ser autor de les lletres del Grupu Folk Corquiéu.

Artículu completu de Xandru Martino “Nel mio nome, non”

Según pudo saber la redacción d’Asturnews, na Asamblea Xeneral del Conseyu de la Mocedá d’Uviéu celebrada estos díes nel Auditoriu de la capital d’Asturies, Diego Asenjo González, Secretariu Xeneral de les Mocedaes Socialistes d’Uviéu (JSO/MSU) entrugó a la presidencia de la Executiva del CMU la razón pola que “yá nun s’entrega la documentanción n’asturianu”.

Énte la entruga, Paulino Feito, presidente del Conseyu uviedín, comentó que “no que cinca al tema del asturianu creo que se ta faciendo bien, anque tenemos menos recursos y hai que facer más esfuerciu”. Feito agradeció l’esmolecimientu de les MSU y pidió que “treslladaren al so partíu políticu (FSA-PSOE), eses preocuaciones ensin atacanos a nós”. “Porque’l PSOE ye’l partíu más represor”, añadió.

El representante socialista dixo saber mui bien que tenía que tresmitir al so partíu, y según espresó “les MSU siempre trabayaron a favor del asturianu”.

Esti prosimu Sabadu 3 de Xineru el Muerganu antirrepresivu popular SOFITU tien convocada una manifestación y un conciertu escontra’l xuiciu a Fer, l’audiencia nazional española y la llei antiterrorista.

La manifestación tién salida a les 17:30 de la plaza’ l’Humedal y faera un percorríu peles cais de Xixón. Darreu, a les 19 hores, SOFITU entama un conciertu antirrepresivu pa facer frente a los descomanaos gastos que representa defender a Fer na audiencia nazional d’españa y tolos gastos que vién teniendo.

La sidra de mazana seleicionao, sidra natural avalao por un certificáu de calidá, va superar esti añu que fina’l millón de llitros de producción. Esta sidra ta ellaborao con 20 variadaes de mazana autóctono por Sidra Trabanco, El Gobernador, Muñiz, La Nozala, Peñón y Foncueva.

Estes son les previsiones de los seis llagaraes que participen nesta marca de calidá y que mayaron más de 1,5 millones de kilos de mazana collechao n’Asturies. D’esta manera, los llagareros produciríen 1,12 millones de llitros de sidra, superando nun 12% la collecha del 2006, la última que taba fecha pola tradicional vecería. Por embargu, ye un 44% inferior a la collecha 2007, un añu récor pa la sidra de Mazana Seleicionao al superase los 2 millones de llitros.

José Marcelino Menéndez Cuervo, de 41 años y natural de Lluanco (Gozón), ye’l nuevu Direutor Xeneral de Pesca del Principáu d’Asturies, dientru l’organigrama de la Conseyería de Mediu Rural y Pesca. Menéndez Cuervo sustitúi nel cargu a José Ignacio Cabrera Calvo-Sotelo, depués de que se-y propunxere’l cargu a José Antonio Madiedo y qu’esti renunciare por motivos personales.

José Marcelino Menéndez Cuervo ye téunicu especialista na rama Martítimo-Pesquera pola Escuela Náutico Pesquera de Xixón y, dende 1992, trabaya como axente d’Inspeición y Vixilancia Pesquera del Principáu d’Asturies.

El coordinador xeneral d’IX Asturies, Jesús Iglesias, llamentóse güei n’Avilés de nun tener reconocida la oficialidá de la llingua asturiana, porque díbe”mos tener otru argumentu dende Asturies” pa negociar el nuevu sistema de financiación pales comunidaes autónomes.

Iglesias dixo tamién que’l sistema tien de garantizar la suficiencia pal caltenimientu de los servicios públicos y les prestaciones sociales.

El dirixente d’IU, nuna rueda de prensa ofrecida n’Uviéu, sorrayó que la introducción de criterios sobre población, avieyamientu o espardimientu, son importantes, pero non definitivos. “La clave que va determinar si’l modelu va tener recursos abando va ser l’emponderamientu de caún de los criterios”, señaló. “Oxalá tuviéremos reconocida la oficialidá de la llingua asturiana, porque teníemos otru argumentu dende Asturies”, dixo.

La nueva conseyera de Cultura y Turismu del Principáu d’Asturies, Mercedes Álvarez González, asumió esti llunes, a propuesta del actual Presidente y cola unanimidá de tolos patronos, la presidencia de la Fundación Laboral Centru d’Arte y Creación Industrial (Xixón).

Mercedes Álvarez ye llicenciada en Filolosofía pola Universidá d’Uviéu y foi conceyala de Cultura y Universidá del Conceyu de Xixón ente 1999 y 2007, añu en que foi elixida diputada autonómica. Los patronos de la Fundación agradecieron al Presidente saliente, Jesús Manuel Hevia-Aza Fernández, el so trabayu y dedicación.

El Patronau de la Fundación quedó integráu cola nueva incorporación como vien darréu: Mercedes Álvarez González (Presidenta), Jorge Fernández León (Vicepresidente), Nicanor Fernández (Vicepresidente segundu); José Pedreira (secretariu) y Juan Cueto Alas y Agustín Tomé Fernández, xunta los representantes del Ministeriu de Cultura, l’Ayuntamientu de Xixón, l’Autoridá Portuaria, Caxastur, Fundación Telefónica, Sedes S.A. (vocales), amás d’Alcoa (miembru corporativu estratéxicu) y Constructora San José, Dragados, Duro Felguera y FCC (miembros corporativos asociaos).