Política

El Partíu Popular fizo esti día anuncia de que va llevar a la Sindicatura de Cuentes les contrataciones que se ficieron d’artistes, representaciones y personal técnicu, per parte del director de Llaboral, Mateo Feijoo, por albidrar qu’estes persones taben rellacionaes “personal o profesionalmente” col mesmu.

Los diputaos del PP na Xunta Xeneral del Principáu, Emilio Pérez Cuevas y Elma Alonso ficieron denuncia pública de que nel centru danse “procedimientos que nun encaxen y que son difícilmente xustificables”.

Según el PP, contratóse a la propia esposa de Feijoo, Maite Dono, nún de los espectáculos, y a otros artistes llevaos pola so propia axente, Paloma Chueca. Amás, citose la contratación pa tres actuaciones del Centru Coreográfricu Gallegu, col que’l director de La Llaboral trabayó hasta’l 2007, y col que “reconoz que caltién una estrecha rellación”. Tamién denunciaron la contratación Miguel Ángel Camacho como director d’iluminación, cuando nel centru yá hai otra persona encargada d’esti llabor, Rafael Mojas.

Elma Alonso, informó de que’l mencionáu Miguel Ángel Camacho ta cobrando al mes 5.250 euros más IVA. Añadió tamién que’l personal contratáu ta ganando 2.756 euros mensuales, un “insultu pa los casi 75.000 paraos qu’hai n’Asturies y un espilfarru” opinó.

L’importe qu’añalmente cuesten los salarios de tol personal técnicu del centru asitiase según el PP nos 132.288 euros más IVA.

Andecha Astur tien convocáu un Conceyu Xeneral Estraordinariu pal dos de mayu cola fin d’escoyer los miembros de la Xunta Executiva y la Xunta Xeneral y tratar la participación nes elleiciones al Parllamentu Européu de la organización nacionalista asturiana.

El máximu órganu d’esta organización nacionalista d’izquierdes va aconceyase’l 2 de mayu, a les 16:30 hores en primer convocatoria y a les 17:oo hores en segunda, nel Edificiu Municipal Polivalente de Noreña pa facer la elleición de los miembros de los órganos del partíu (Xunta Executiva y Xunta Xeneral) y aldericar sobre la participación d’Andecha nes elleiciones europees. Nel Conceyu Xeneral tien de tratase al respetive un informe sobre l’estáu de la custión y la ratificación de posibles alcuerdos con otres organizaciones politiques.

Nuna situación de la que veníen dando anuncia los fechos dende hai meses, Valledor dexó afitao esti vienres qu’estudia abandonar el so acta de diputáu tres desmarcase del so grupu na votación d’una moción sobre educación.

El diputáu d’IX-BA-Verdes, Francisco Javier García Valledor, que fora’l cabezaleru del cartel autnómicu hai cinco años, dixo esti vienres a los medios que tanto elli como’l so grupu parlamentariu y la organización política a la que pertenez van abrir un periodu d’unos díes pa esbillar si se caltien como diputáu na Xunta Xeneral o si abandona’l so acta de parlamentariu.

Nos pasiellos de la Xunta, Valledor declaraba a los periodistes que la situación que se vivió nel plenu, cuando nun emitió votu dalgún hacia una moción del PP sobre educación, a la escontra del criteriu del so grupu parlamentariu, que la refugó xunto al PSOE, yera bona amuesa de la situación que vive dientro’l grupu parlamentariu d’IX. La moción proponía la retirada del plan d’evaluación docente y la convocatoria de la mesa sectorial, demandes de los sindicatos d’enseñanza sofitaes polos populares y pol propiu diputáu d’IX.

El Bloque por Asturies denunció esti día que’l serviciu de normalización llingüística de Llaviana lleva dellos díes peslláu, polo que desixe la correición darréu de la situación y anuncia midíes ante la Comisión de Conflictos del Pautu ente IX y PSOE si nun se ve iguada la situación darréu.

El voceru del Bloque por Asturies, Pablo Fernández, manifestó esti vienres la so esmolición pol pieslle de la oficina y la situación de la trabayadora de la mesma y dexó nidio que nel Bloque “tenemos constancia de que l’Ayuntamientu fizo tolos deberes pa qu’esti serviciu tuviere continuidá”, resonsabilizando “única y esclusivamente” a la Conseyería de Cultura y a la Direición de Política Llingüística.

Pal Bloque por Asturies esti tipu de situaciones danse pola “incompetencia” de los miembros del equipu de Gobiernu.

Xosé Lluis García Arias, primer director de la revista Lletres Asturianes, comentó na so presentación del númberu 100 de la publicación, esti martes, cuestiones de la hestoria de l’Academia de la Llingua Asturiana y de la propia revista. Asturnews ufre la declaración completa.

El Bloque vieno acabante pidir a la FSA y el PP que reflexonen sobre la posibilidá d’algamar la oficialidá del asturianu tres l’aprobación de la mención en Maxisteriu, sobre la que’l voceru d’esti partíu felicitó a la comunidá universitaria por sumase “a otra serie de resultaos que muestren que la sociedá asturiana, cuando se-y entruga en concreto pol apoyu a la llingua, siempre se manifiesta favorablemente”.

El voceru del Bloque por Asturies (BA), Pablo Fernández, foi esti día l’encargáu de facer el pidimientu a la Federación Socialista Asturiana (FSA) y al PP pa que “reflexonen” sobre la so postura nel tema de la oficialidá de la llingua asturiana, faciendo alcordanza de la existencia d’encuestes que confirmen “l’apoyu mayoritariu” y mencionando otros resultaos como l’aprobación del Minor en Filoloxía, porque “too esto avala que la sociedá ta a favor del asturianu”.

UNA, Unidá Nacionalista Asturiana, vieno acabante d’asistir esta pasada fin de selmana como organización convidada a la asamblea de la Alianza Libre Europea en Barcelona. La ALE ye una federación de partíos nacionalistes europeos, na que conviven partíos de gobiernu con partíos pequeños, que busca una voz común de los pueblos y les cultures d’Europa y na que hasta’l momentu Asturies nun tenía representación.

Dende’l pasáu xueves hasta la mañana del sábadu celebróse en Barcelona l’asamblea xeneral de l’Alianza Llibre Europea (ALE), la federación qu’agrupa a munchos de los partíos nacionalistes d’Europa. Unidá Nacionalista Asturiana (UNA) participó nesta asamblea como organización convidada, como un primer pasu nel procesu d’incorporación de la UNA como miembru de plenu derechu.

Una delegación d’Unidá Nacionalista Asturiana (UNA) desplazóse a Barcelona convidada pola organización pa participar en dellos eventos de l’Asamblea Xeneral de l’Alianza Llibre Europea. La delegación taba compuesta por dos miembros de la Executiva Nacional d’UNA, Daniel Fernández, responsable d’Ayalguería y Vivienda, y Yolanda González de la Estaya Xurídica. A lo llargo de los trés díes d’asamblea los representantes de la UNA tuvieron conceyos colos partíos miembros de l’ALE nos que los delegaos de les organizaciones polítiques europees recibieron información sobre la UNA, asina como sobre la situación polírtica y social n’Asturies y sobre la llingua asturiana.

Tanto los partíos colos que se caltuvieron conceyos como l’equipu directivu de l’ALE interesáronse pol proyectu d’Unidá Nacionalista Asturiana (UNA) y amosáronse mui receptivos a la incorporación de la mesma a l’ALE como miembru de plenu derechu. Yolanda González y Daniel Fernández tamién aconceyaron con Nelly Maes, presidenta de l’Alianza Libre Europea, y Günther Dauwen, Director de la federación (ver semeya). Nel conceyu apautóse qu’UNA entama oficialmente’l procesu pa incorporase a l’ALE, yá que la organización cumple colos requisitos necesarios pa pertenecer a ella. Asumir los oxetivos de la federación y que’l partíu cuente nes sos files con representantes institucionales son los principales requisitos qu’hai que cumplir pa poder pertenecer a esta xuntura de partíos europeos.

L’Alianza Llibre Europea creóse en 1981, buscado axuntar les fuerces de les organizaciones polítiques europees que defenden la soberanía de los sos países o de minoríes nacionales dientro de les llendes d’Europa. Na actualidá son 32 los partíos que pertenecen a ella (dende partíos de gobiernu hasta pequeños partíos de minoríes nacionales europees) y tien representación nel parlamentu européu al traviés de 5 diputaos que s’encuadren dientro del grupu parlamentariu Los Verdes Europeos/Alianza Libre Europea. Ente los partíos pertenecientes dellos tán presentes en gobiernos de los sos países (Cataluña, Gales, Escocia…) y toos tienen dalgún tipu de representación institucional nos parlamentos o nos conceyos.

El miércoles 25 de marzu del 2009 el Conseyu de Gobiernu del Principáu d’Asturies aprobó’l Decretu pol que se determinen los topónimos oficiales del conceyu de Yernes y Tameza.Próximamente van publicase nel Boletín Oficial del Principáu d’Asturies (BOPA). Con esti son yá 37 los conceyos asturianos qu’acaben el procesu pa la determinación de los sos topónimos oficiales.

Profesores de la Universidá d’Uviéun y representantes de delles entidaes ciudadanes presentaron esti día un blogue escontra la llosa de Santullanu onde se pon en cuestión el proyeutu de soterramientu de l’A66 nel so accesu al cascu urbanu d’Uviéu.

Los promotores del blogue, que s’alcuentra abellugáu na direición www.santullanosinlosa.org, albidren la llosa como daqué innecesario y peligrosa “pa la integridá de la ilesia de Santullanu y punta de llanza d’una operación urbanística de carácter especulativu sobre los terrenos de la fábrica de La Vega”.

Na presentación participaron los profesores de la Universidá d’Uviéu, Carlos Lastra y Sergi Tomé, asina como José Ramón Sariego, presidente de la Federación d’Asociaciones y Vecinos d’Uviéu y José Uría, presidente de l’Asociación Cultural La Escandalera.

La formación política Unidá Nacionalista Asturiana (UNA) espublizó estos díes en versión dixital l’informe “Menos de lo mesmo, 100 díes de política llingüística”. L’informe, espublizáu pola Estaya de Cultura y Llingua asturiana de la coalición, fai repás detalláu a la política lingüística nos 100 primeros díes del gobiernu PSOE-IX-BpA, n’Asturies.

Documentu na so versión n’asturianu