Política

La Directora Xeneral de Política Llingüística de la Conseyería de Cultura del Gobiernu asturianu, Consuelo Vega, destacó ayeri la política de promoción, “mui fuerte”, del asturianu que, según comentó, l’Executivu autonómicu vien desenllorando nestes últimes décades. Dende’l so puntu de vista, esti llabor nótase “nuna presencia mayor de la llingua na vida social y cultural y nos medios de comunicación”.

Pa Vega lo que se “ta faciendo nes últimes décades y nes últimes llexislatures ye una promoción mui fuerte del asturianu, del so usu social y de la so difusión” col envís de “dar voz a les aspiraciones d’un conxuntu ampliu de la sociedá”. Asina, dende’l so puntu de vista, esta política “ta traduciéndose nuna recuperación del usu del asturianu, nuna presencia mayor nos medios de comunicación, nos campos de la vida social y cultural”, amás de dir “conquistando añu tres añu otros campos onde teníemos menos esperiencia, como ye’l campu científicu”, apuntó nel faciendo referencia al II Día de les Ciencies Asturianes, nel que participaba ayeri.

Roberto Sánchez Ramos, conceyal de l’Asamblea de Ciudadanos pola Izquierda (ASCIZ) pidió qu’Uviéu caltenga estos dos premios lliterarios y camienta que ye “un contrasentío aspirar a la capitalidá europea de la cultura mientres s’eliminen referentes culturales”. El conceyal presentó una mociómn d’urxencia nesi sen qu’evita la fin de lo que considera “puntos de referencia de la lliteratura asturiana y española”.

Dende Xuventú Asturianista camiente que ye “una vergoña” qu’el que foi’l primer alcalde na II República Española, l’asturianista republicanu federal Isidro del Río Rodríguez, nun tenga ninsiquier una cai en Xixón. Los más mozos del PAS entrúguense “si esto ye memoria histórica pal PSOE-IU y PP”, comentando que nesi casu “ye abondo selectiva”. Según la XA “paez que quieren escaecer ún de les persones qu’escribieron meyor hestoria democrática y positiva p’Asturies y Xixón”.

Pa Xuventú “ye bultable que los republicanos federales foron una fuerza perimportante (teníen dos diputaos electos algamaos per Asturies nes Cortes Constituyentes) y clave pa entender Asturies, y que trabayaron pol desendolcu cultural y d’autogobiernu del Pueblu Asturianu (faciendo proyectos d’estatutu d’autonomía, creyando ateneos culturales, etc”.

Los mozos asturianistes camiente qu’“A lo meyor lo que quieren dellos partíos como’l PSOE ye que nun mos alcordemos d’aquellos, los republicanos federales, que ficieron nel so tiempu les coses por y pa los asturianos demientres “otros” taben a otres coses. Amás, quiciabes nun quieren tamién que pensemos qu’ellos ficieron posible cola so presión la dimisión d’Isidro del Río”.

Por mor de too esto Xuventú Asturianista esixe al Ayuntamientu de Xixón que l’anguaño Plaza Mayor pase a llamase “Plaza Isidro del Río” n’alcordanza, comente “d’ún de los que nos sos ideales republicanos-federales (asturianistes) fexo posible daqué de llibertá pal nuesu país”.

El Secretariu de la Federación Norte de Ciudadanos-Partido de la Ciudadanía (C’s), Pablo Yáñez, concedió al periódicu dixital “El Librepensador” una entrevista na que comentaba la so opinión sobre la situación de les llingües del estáu español y la postura de Ciudadanos. Pa Yáñez el problema de la llingua asturiana “nun ye la cooficialidᔠyá qu’opina “lleva diez años funcionando como llingua oficial”, pola mor de la Llei d’Usu de 1998.

Yáñez camienta qu’esiste una dificultá pa establecer el númberu real de falantes “porque les asociaciones interesaes sumen los datos del lleonés, l’asturianu y el mirandés (yá en Portugal) pa “hinchar” les cifres y tratar de lexitimase con elles”. Reconoz Yáñez que’l procesu reinvidicativu “ganó más terrenu que l’aragones o el lleonés”.

Los, pa Yáñez, “grandes avances n’educación, toponimia, etc nun son suficientes pa los grupos nacionalistes”, a los que diz, “la oficialidá tampoco nun-yos serviría, non ensin avances no político”. Pa Yáñez “el gobiernu autonómicu, casualmente en manes del PSOE, da rienda suelta a un procesu d’inmersión llingüística que va acabar na imposición del asturianu”.

Na entrevista, el llider de la zona norte de Ciudadanos, fala tamién de la situación del lleonés, del que comenta “nun ta reconocíu como llingua nes instituciones” pero “UPL magnificó la demanda del lleonés, que nun ye social, sinón política”.

Pa Yáñez “con un 1% de falantes una llingua nun pue oficializase”, sedría pal políticu “una situación d’imposición llingüística”.

Entrevista completa

El PP de Xixón denunció estos díes “irregularidaes” nel pagu d’una factura del Festival Xixón 5º 40’, celebráu nesta ciudá nel mes d’agostu, al cargu de la Conceyalía de Cultura Tradicional y Llingua Asturiana. El Grupu municipal Popular pidió la comparecencia urxente del conceyal d’Educación y Cultura, el socialista Justo Vilabrille Linares, pa qu’informe na Comisión de Participación Ciudadana, “sobre la organización del Festival”.

Manuel Pecharromán y Francisco Rodríguez Cubiella, conceyales del PP, manifestaron nuna conferencia de prensa, que la citada ceremonia foi “un fraude, una burlla a los xixoneses y un timu que costó 1.800 euros”, qu’añaden, “sospechamos, fízose con una factura falsa”.

La contestación del Tercer Teniente de Alcalde y Conceyal de Cultura tradicional y Política Llingüística, Jesús Montes Estrada, xunto cola del so Asesor Roberto Colunga, nun tardó en llegar. Pa Colunga, la información dada pol PP “nun ye más qu’argumentos probes que busquen tapar otros asuntos propios”, y recordó “el grupu popular aprobó’l gastu na Xunta Rectora de la Fundación Municipal de Cultura “ensin dicir nada”, entrugándose Colunga si ye “nun saben lo que voten”.

Colunga comentó nel so día que Francisco Cubiella dixere que la web del festival “taba desenrrollada por una empresa venceyada al BNG”, cuando, según Colunga “ye 100% asturiana”.

Según Colunga “en realidá, lo que pasa ye que’l Partíu Popular ta en contra de cualesquier actividá que se faiga en Xixón en rellación a la cultura y tradición asturiana”.

Pa Montes Estrada esti ye un casu “utilización con mala fe del espediente, que ye tresparente dafechu”. Pa Churruca esti casu ye una “cortina de fumu sobre otros casos del PP, como’l Gürtel o los espedientes nos contendores”.

El conceyal quitó importancia a la factura de 1.551,72 € más iva, frente a más de 120.000 euros de gastu total del Festival “que, por muncho que se pongan, el Xixón 5º 40’ va repitise en 2010”.

La Xunta Xeneral d’Unidá Nacionalista Asturiana (UNA), muérganu más importante de decisión de la organización ente congresos, aprobó por amplia mayoría la pasada fin de selmana entamar lo primero posible una ronda de contactos con colectivos sociales, partíos políticos y persones ensin vinculación partidaria pa estudiar “llinies estratéxiques de trabayu conxuntu y valorar la posibilidá de presentar llistes electorales en 2011”. La Xunta Executiva d’UNA, va ser la encargada de llevar alantre esta estratexa que pue xorrecer les selmanes qu’entren.

L’oxeticu d’esta iniciativa ye poner en marcha una dinámica de trabayu, qu’en cualesquier casu tendría de ser roblada pol Congresu d’UNA en febreru, que visualice en toa Asturies, y sobre manera nos conceyos, la esistencia d’un tercer espaciu políticu asturianu y verde, que represente una alternativa real a PSOE-IU per un llau y al PP per otru. Esta dinámica tendría de definise en caún de los casos, anque la voluntá d’UNA, según aprobó’l fin de selmana la so Xunta Xeneral, ye que “s’espeye tanto na collaboración na actividá política práctica diaria, como na ellaboración de les llistes electorales en 2011”.

L’ámbitu de contactos definíu pola Xunta Xeneral d’UNA, enmárcase nos colectivos, partíos y persones “nacionalistes, asturianistes, d’esquierda y ecoloxistes, siempre que’l so ámbitu d’actuación seya municipal o asturianu, ye dicir, que nun respuendan a intereses ayenos a Asturies”. Sicasi’l Congresu d’UNA de febreru va ser el que defina tanto la llinia política como les estratexes o les hipotétiques xuntances electorales.

Per otru llau, la Xunta Xeneral d’UNA aprobó asina mesmo’l Reglamentu del procesu que va llevar al Congresu que tendrá llugar el 27 y 28 de febreru de 2010, dando-y asina’l pistoletazu de salida al procesu precongresual. Una Comisión Organizadora, que quedó constituída esti fin de selmana, va ser la encargada d’organizar los alderiques precongresuales y el procesu d’ellaboración de les ponencies y les enmiendes a les mesmes.

La Fundación La Izquierda d’Asturies va celebrar esti sábadu día 24 la conmemoración de la revolución d’ochobre del 34 con un Tren de la Memoria que saldrá de Mieres y dirá parando en Trubia, Uviéu y El Berrón, hasta llegar a Xixón. Esti Tren quier poner en valor “la llucha de los trabayadores nun episodiu que tuvo una relevancia mundial”.

El presidente de la Fundación la Izquierda d’Asturies, Manuel García Fonseca, presentó esti tren de la Memoria xunta’l coordinador xeneral d’IX d’Asturies, Jesús Iglesias, el coordinador d’IX de Mieres, Luis Álvarez Payo, y el responsable d’Organización d’IX d’Uviéu, Adolfo Saro, destacando la importancia y la relevancia d’esta cita cola historia y cola memoria.

Nel Tren, pal que nun hai yá billetes, van dir escultores como Adolfo Manzano, poetes como Xuan Bello o Vanesa Gutiérrez, o músicos como Roberto Serrano xunta diputaos como Gaspar Llamazares. El Tren va salir dende la estación de Feve de Mieres a les 10.30 hroes y llegar a Xixón a les 15.15 hores.

Manuel Fraga Iribarne, senador pol PP gallegu, ex ministru franquista, concedió estos díes una entrevista al periódicu asturianu La Nueva España na qu’afirmó nun tener “nada en contra de la cooficialidá de la llingua asturiana”, añadiendo “el bable desenrróse d’una manera mui peculiar y tengo la impresión de que nun ye nengún problema p’Asturies nin pa España”.

Pa Fraga, sicasí, “Los idiomes que tienen repercusión internacional van reduciéndose a dos: inglés y español”. Según l’ex presidente gallegu “Los idiomes ñacen y muerren y, pese a qu’hai un intentu de defensa de los establecíos, nun ye probable que consigan apoyu de grandes númberos de persones”.

Los comentarios del ex ministru franquista llamen l’atención, sobre manera, conociendo la opinión amosada nos tiempos últimos sobre la posibilidá d’oficializar l’asturianu dende’l PP d’Asturies

Entrevista completa a Fraga

L’Alcaldesa de Xixón, Paz Fernández Felgueroso, y l’Alcalde de Santa Tecla (El Salvador), Óscar Ortiz Asensio, roblaron güei vienres, a les 13,30, nel Salón de Recepciones de la casa conceyu, un protocolu d’intención d’hermanamientu ente dambes ciudaes, como pasu inicial pa qu’esti trámite se faiga efectivu nos próximos meses.

Nesti protocolu, resáltense les escelentes rellaciones que yá esisten dende va dellos años ente dambes llocalidaes, reforciaes polos proyectos de cooperación al desenrrollu qu’al traviés de la Conceyalía de Cooperación Internacional del Ayuntamientu se lleven realizando.

Precisamente, el puxu pa qu’esti hermanamientu se faiga posible llegó, según comenten dende l’ayuntamientu, “dende l’área dirixida por Jesús Montes Estrada”. La cooperación realizada pol consistoriu xixonés con El Salvador ye “una de les más importantes, yá que dende 1989, y hasta l’añu 2008, la suma de dineru empobinada a proyectos n’aquel país asciende a más de 1,650,000 €, y gran parte d’esos proyectos fueron en beneficiu de Santa Tecla”. De fechu, dende qu’un fortísimu terremotu devastase la ciudá nel añu 2001, dende Xixón destináronse 185.000 € pa paliar los efectos del seísmou y collaborar na reconstrucción.

Amás, dende va 2 años, esiste un conveniu de collaboración ente dambes ciudaes pa la capacitación del servidor públicu y el fortalecimientu de la democracia, que supunxo yá, nel so primer bieniu d’execución, l’aportación de 100.000 €, quedando pendientes otros dos años de desenrrollu.

Ésti ye’l sétimu hermanamientu de Xixón, y el primeru dende que va 14 años, la ciudá firmara l’alcuerdo cola Wilaya de Smara, de la República Árabe Democrática del Sah.ara. El restu de ciudaes hermanaes son Albuquerque (EE.XX.), Puertu Vallarta (México), Niort (Francia), Novorossiysk (Rusia) y L’Habana (Cuba).

D’otra banda, en paralelu a la robla d’esti hermanamientu, el Conseyu de la Mocedá de Xixón, y el Conseyu Xuvenil Tecleño, van entamar una collaboración pa que dambes ciudaes estrenchen tovía más los sos llazos. Pa ello, Jordán Suárez, Presidente del CMX, y Carlos Palma, Conceyal de Mocedá de Santa Tecla, van roblar un alcuerdu de collaboración mutua.

Santa Tecla ye la ciudá cabecera del conceyu homónimu y del departamentu de La Llibertá n’El Salvador. Tien una ewtensión territorial de 112 km² y una población de 153,698 habitantes (censu oficial, 2007). Dende l’añu 2000 ye gobernada pol alcalde Óscar Ortiz Asensio.

La ciudad fundóse l’8 d’agostu de 1854, por decretu del presidente José María de San Martín col nome de Nueva San Salvador, cola intención de sustituyir a la ciudá de San Salvador (que fueres gravemente dañada por un terremotu) como capital de la república. Anque posteriormente, en 1858, el gobiernu abandonó’l proyectu de treslladar la capital a Nueva San Salvador, esto noun impidió’l desenrrollu de la nueva ciudá que se convirtió nuna prósperu centru de producción cafetalera, siendo actualmente una de les ciudaes más desenrrollaes del país. En 2003, el nome de la ciudá foi llegalmente cambiáu a Santa Tecla, nome con que ha foi conocida tradicionalmente. El cambiu oficializóse a partir del 1 de xineru de 2004.

El Bloque por Asturies ta acabante denunciar, al traviés d’un comunicáu, “el despreciu que’l Partíu Popular demuestra un día sí y otru tamién pa cola la llingua asturiana”.

Según aseguren dende’l Bloque, l’últimu espisodiu d’estes característiques foi’l que “montaron los representantes de la derecha española” na Comisión de Cultura del Conceyu de Mieres a cuenta del usu de la llingua asturiana.

Pa la coalición asturiana, el PP “demuestra lo que ye la derecha y el nacionalismu español, da lo mesmo que sía Mieres o Zaragoza”. Amás, “da-yos igual nun respetar la llei, nin los derechos de los falantes”, denuncien.