Política

“Sí, faigo promesa”, con esta fórmula, Roberto Colunga, actual secretariu xeneral del Bloque por Asturies, prometía güei’l cargu de diputáu na Xunta Xeneral, en sustitución del dimitíu por discrepancies col so partíu Francisco Javier García Valledor.

Roberto Colunga comentó que llegaba a la Xunta “col ánimu de trabayar colos compañeros del Grupu y que tolos asturianos y asturianes síentanse identificaos col trabayu que facemos equí”.

Pel momentu, el políticu asturianista, utiliza l’asturianu nes sos intervenciones parllamentaries, como declaró a Asturnews, nuna entrevista concedida pol políticu al poco de conocese la noticia, “como’l restu de los cargos del Bloque por Asturies”, dixo “voi usar la llingua asturiana con total normalidᔠna Xunta Xeneral.

Roberto Colunga, voceru del Bloque por Asturies, va tomer güei xueves posesión del escañu de la Xunta Xeneral que-y correspuende dempués de la dimisión a finales de 2009 del miembru d’Izquierda Xunida, Francisco Javier García Valledor. Colunga declaró a Asturnews, nuna entrevista concedida pol políticu al poco de conocese la noticia, “como’l restu de los cargos del Bloque por Asturies” va usar “la llingua asturiana con total normalidᔠna Xunta Xeneral. Polo que s’espera que la llingua asturiana vuelva a sentise na Xunta habitualmente.

El Bloque, que concurrió a los comicios en coalición con Izquierda Xunida y Los Verdes, tendrá per primer vegada representación na Xunta Xeneral, anque’l presidente Areces paez nun enterase, yá que declaró estos díes, nun conceyu celebráu en Madrid, que “n’Asturies el nacionalismu nun tien futuru, ye mui minoritariu y nun va tener nenguna espresión significativa na política asturiana”, escaecieno que gobierna con un partíu, el BpA, que se define como talu.

Esti ye’l vidiu de les declaraciones d’Areces, nes que tamién comentó que Asturies ye “una comunidá con una identidá mui fonda” y que “podíemos facer d’eso un arma reivindicativa territorial con plena llexitimidá”. Sicasí, comentó qu’eso nun s’usa d’esi xeitu “porque Asturies siéntese fondamente integrada n’España, ye una comunidá que reclama la so identidá, demuéstralo porque tenemos una inmigración de va más de dos sieglos, porque nel mundu supimos lo que significa dir a otros sitios y ser acoyíos, y tener una visión amplia de la vida”, un fechu que según declaró Areces, “ayudónos muncho” pa tener otra perspectiva más abierta.

Entrevista n’Asturnews a Roberto Colunga

El Conceyu Abiertu pola Oficialidá, plataforma cívica qu’aconceya a más de 200 organizaciones que piden la oficialidá del asturianu na reforma del Estatutu, critica nun comunicáu les declaraciones a La Nueva España de güei, del diputáu del PP, Joaquín Aréstegui.

El CAO considera estes declaraciones como una amuesa de cinismu y inorancia al empar, “yá que pa la preservación de les llingües, el respetu pa los derechos de los falantes ye fundamental, y esto llógrase nel nuestru ordenamientu xurídicu al traviés de la declaración d’oficialidá, tanto del asturianu como del gallego-asturianu”.

Les organizaciones polítiques Andecha Astur y Partíu Asturianista refugaron conxuntament la posibilidá de qu’ente cinco y diez cerqueros gallegos pesquen nes agües interiores d’Asturies (les llendaes poles llínies imaxinaries que xunen los cabos del país), sumándose asina a la postura amosada estos díes por Rafael Rodríguez, presidente de los armadores de cercu asturianos, y Dimas García, de la Federación Asturiana de Cofradíes.

Los barcos del país vecín quieren pescar nes nueses agües interiores pa “garantizar la llegada a la rula de materia prima en cantidá abondo p’abastecer el mercáu”, pero los armadores de cercu asturianos (anguañu hai cuatru n’activu) refuguen tala posibilidá yá que los caladeros asturianos “tan lloñe del so meyor momentu” y afiten que’l desembarcu de más quilos de pescáu tendría comu consecuencia una baxada de los precios, yá de por sí ruinos.

Permitir esta primer entrada a los gallegos (que yá esquilmaron les sos propies agües) lo que va suponer ye esquilmar les agues asturianes, y non sólo impedir el desendolque de la flota asturiana (d’alcuerdu a la demanda que se reconoz qu’esiste) sinón “desaniciar lo poco que queda, al tener que competir colos gallegos y les sos técniques esquilmadores”.

Poro, Andecha Astur y Partíu Asturianista esixen a la Direición Xeneral de Pesca d’Asturies, la entidá con competencies p’apurrir les llicencies que necesiten los armadores gallegos, que “nun-yos permita faenar equí, atendiendo a les razones espuestes polos pescadores asturianos, igual que se fizo en 2008, cuando, de la mesma manera, denegaron les llicencies a los barcos foriatos porque la flota llariega que pescaba n’agües interiores yera suficiente p’abastecer el mercáu del país”.

Andecha y PAS conseñaron la responsabilidá política del Gobiernu d’Asturies “nel desaniciu del sector pesqueru asturianu destacando que nun se trata sólo de la so incompetencia na materia sinón del resultáu d’una planificación fecha a la escontra de los intereses d’Asturies dientru de la dinámica de sumisión del gobiernu a los intereses gallegos y a la política del Estáu español de desaniciu de los seutores económicos tradicionales n’Asturies y facer, pola contra, del nuesu país una provincia de xubilaos y camareros”.

D’otra miente, Andecha Astur y Partíu Asturianista van a pidir a los Ayuntamientos d’Avilés y Colunga (los barcos de cercu asturianos que furrulen anguañu abellúguense nos puertos d’Avilés y Llastres) que se posicionen sol tema y asina presionen a la Direición Xeneral de Pesca, organismu dende’l que se tien de tomar un determín nos prósimos díes, tres aconceyase coles partes afectaes.

Énte les declaraciones del nuevu presidente de la Real Academia Galega sobro la situación llingüística n’Asturies, nes que pidía la oficialidad del asturianu n’Asturies, sacante na zona más occidental, onde pidió esi estatus pal gallegu.

El coordinador d’UNA, Miguel Ánxel Díaz, recordó que les instituciones asturianes “tienen competencies esclusives sobre la política llingüística en toa Asturies, tamién na zona más occidental, y que la normativización correspuende legalmente a l’Academia de la Llingua Asturiana, por lo que nun tien sentíu reabrir artificialmente alderiques superaos pola realidá xurídica y social, nin discursos espansionistes que yá tendríen formar parte del pasáu”.

Miguel Ánxel Díaz recordó la posición d’UNA, consistente en “defender la oficialidad de la llingua asturiana, y tamién de la fala del navia-eo nel so ámbitu territorial”. Sicasí, clarió “la política llingüística tendría de ser realizada dende Asturies y ensin inxerencies o presiones dende’l país vecín” refiriéndose al Plan de Normalización del Gallegu aprobáu polos trés grupos parllamentarios en Galicia y que contempla aiciones n’Asturies.

Unidá Nacionalista Asturiana (UNA), comentó Díaz, aprovechó pa “recordar la discriminación llingüistica que carecemos n’Asturies a causa de la negativa del gobierno asturianu de reconocer plenamente los derechos llingüisticos de tolos asturianos, por lo qu’esixó al PSOE y a IX-BA-LV un alcuerdu pa la reforma del Estatutu qu’incluya la oficialidá del asturianu, y qu’asegure igualmente los drechos llingüísticos de los falantes del navia-eo nel so ámbitu territorial, y pidió que nun s’aprovechen les declaraciones de Ferrín pa reabrir antigües guerres o enfrentar al pueblo asturianu y el gallegu”.

Izquierda Xunida contestó a les declraciones feches estos díes pola nuevu presidente de la Real Academia Galega diciéndo-y que “s’esmoleza por conservar el gallegu dientro de les llendes oficiales de la comunidá”, y non hacia Asturies “una zona d’induldable identidá asturiana”.

La formación d’izquierdes cree que’l nuevu presidente de l’Academia Galega tendría d’esmolecese del “retrocesu” que sufre’l gallegu na comunidá vecina pola mor de “los planes en materia llingüística del popular Núñez Feijoo”.

Pa Izquierda Xunida “hasta va poco la política llingüística gallega yera la envidia de los asturianos falantes; de continuar los planes de Feijoo, Ferrín tendrá problemes más graves qu’ocupase del Occidente d’Asturies”.

Izquierda Xunida, que forma parte del Gobiernu d’Asturies, convida a la Conseyería de Cultura a reforciar la defensa del gallego-asturianu y del asturianu, principalmente “nuna zona como la Occidental que se siente escaecida”. Llamenta, amás, que la ‘fala’ o gallego-asturianu, sigue ensin ser oficial “pol nulu interés de PP y PSOE”.

El presidente de la RAG pide la oficialidá del asturianu y diz tar dispuestu a consensuar la norma eonaviega cola ALLA

El Conceyal de Cooperación, Cultura Tradicional y Lligua Asturiana afirmaba güei nuna rueda de prensa dada na Casa Conceyu de Xixón, que dempués de tener conocencia del casu d’un ciudadanu discrimináu por usar l’asturianu nel ayuntamientu del que ye tercer Teniente Alcade abrieron una investigación “pa saber quién foi la responsable” que conllevó “l’apertura d’un espediente disciplinariu” a la funcionaria en cuestión. Amás, afirmó que se “punxeron en contautu cola persona a la que nun-y permitieron usar l’asturianu” pa tresmiti-y que “too foi un malentendíu y les disculpase”. Sicasí, nun comunicáu unviáu pol ciudadanu en cuestión Ignacio Galán López-Dóriga, esti afirma que nun recibió disculpes “de naide, nin oral nin per escrito” y que Montes Estrada “miente” y usa “como cabeza de turcu” a la funcionaria, “cuando la máxima culpa ye de los responsables del Ayuntamientu”.

El ciudadanu en cuestión diz nun poder más “qu’ablucar énte les declaraciones del Conceyal Jesús Montes Estrada” yá que ye “total y absolutamente falso que recibiera nenguna comunicación nin oral nin escrita per parte del Conceyu de Xixón, nin de naide”, en referencia a les disculpes comentaes pol Conceyal.

Añade amás esti ciudadanu xixonés que “anque la funcionaria en cuestión fizo mal al tomar l’actitú yá conocida, nun ye la máxima responsable”. Pal ciudadanu denunciante “la culpa principal ye de los políticos del PSOE y IU-Bloque por Asturies que gobiernen l’Ayuntamientu de Xixón y que nun punxeron a disposción de los ciudadanos los documentos necesarios pa poder dirixise a esti organismu públicu n’asturianu”. Recuerda tamién que la culpa pue repartise “tamién colos encargaos de la Oficina Municipal de la Llingua”, a la que según comenta “se pidió’l Modelu Normalizáu n’asturianu necesariu pal trámite, ensin recibir respuesta nenguna”.

La so carta sigue “llamentando” que’l Conceyal Montes Estrada “mienta a la ciudadanía y use de cabeza de turcu a una funcionaria, cuando la so inacción ye la causante d’esti tipu de conflictos” y pon como exemplu de lo que denoma “contradicciones del conceyal Montes Estrada” que “denuncia a los medios de comunicación por nun usar los topónimos n’asturianu, delantre d’un cartelu del propiu Ayuntamientu nel que pue lleese namás ‘Ayuntamiento de Gijón’”.

El ciudadanu, diz unviar esta carta pa dexar constancia “de la manipulación y les mentires del equipu de gobiernu del PSOE y IU-Bloque por Asturies nesta cuestión” y recordar que nun quier “nenguna disculpa del Ayuntamientu, que de toes formes nun se me dio”, y pide “que se cumplan los drechos de los ciudadanos, ensin que pasen estes coses”.

Carta completa del ciudadanu

La destitución de Pepe’l Ferreiro ye pa UNA “un ataque frontal a la cultura y a la sociedá asturiana y una muesa de les polítiques autoritaries y vengatives del actual Gobiernu d’Asturies”. Pal partíu nacionalista “al marxe de los motivos que la Conseyería de Cultura espón comu causes pal despidu, que busquen una esplicación que nun se correspuende cola realidá social, económica y cultural del Museu”, la forma comu se fizo, “amuesa una total falta de respetu por quien llevantó una institución que güei en día ye un iconu de la cultura asturiana”, recuerden.

Miguel Anxel Díez, qu’asistió xunto con varios militantes d’UNA a la concentración de protesta enfrente la Conseyería de Cultura, manifiesta que “ ía lamentable que la Conseyería de Cultura tea en manos de personas capaces de tomar estas decisiones actuando por vendettas políticas envede guiase polos intereses de los asturianos” y añadió que “ía necesaria una fuercia política nel parlamentu asturianu que defienda ensin complexos la cultura ya los intereses d’Asturias pa evitar casos cumu esti”.

Ayeri pel tarde confirmábase’l cese de Pepe eL Ferreiro como director del Muséu Etnográficu de Grandas de Salime.

Jesús Iglesias, Coordinador Xeneral d’IX d’Asturies, calificó de “despropósitu absolutu” esta decisión y asegura que les presuntes esplicaciones daes nel Consorcio nun son talos, sinón la constatación d’un caprichu de la Conseyería de Cultura.

“Hubiéramos pidíos esplicaciones, pero éstes non nos convencen nin na forma nin no fondero.Güei concluyimos que nun esistir razones pa esti cese”, sorrayó Jesús Iglesias. Si los incumplimientos son antiguos y repitíos, como agora diz la Conseyera Mercedes Álvarez, ye incomprensible qu’el mesmu Consorciu lu caltenga hasta la fecha ensin quexa dalguna y los sos miembros deberíen presentar la so dimisión inmediata, esplica’l Coordinador d’IX.

Jesús Iglesias considera inaudito que se destituya al director d’un muséu que tien casi 400.000 euros de superavit na so cuenta d’esplotación y ye una referencia en tol Occidente de la rexón asturiana.

El Coordinador d’IX recuerda que’l representante de la Conseyería de Mediu Rural opunxo nel senu del Consorcio al cesar de Pepe El Ferreiro y que s’abstuvo nel nomamientu de Francisco Cuesta. Iglesias recuerda que’l muséu ye por, méritos del Ferreiro, cabecera de los de museos del Occidente en dura competencia col de Xixón, cabecera de rede d’Asturies. El Muséu recibió los parabienes de toos aquellos que s’averaron a les sos instalaciones y d’infinidá d’espertos, diz Iglesias. Ye más, el relevu de Pepe El Ferreiro introduz incógnites de futuru nel Muséu Etnográficu de Grandas, según el Coordinador d’IX.

Unión, Progreso y Democracia (UpyD) escoyía esta fin de selmana al so cabezaleru p’Asturies y Humberto Rodríguez Solla, profesor universitariu, doctor en Química y solteru de 35 años, consiguió facese col 70% de los votos. Preguntáu sobre la so opinión sobre la cooficialidá del asturianu nuna entrevista al diariu El Comercio, el primer llider electu del partíu centralista n’Asturies, dixo que’l so partíu tien “un respetu fondu al asturianu”, anque añadió “nun prevemos la cooficialidá”.

Rodríguez Solla comentó tamién que los asturianos “quieren un cambiu políticu porque’l PSOE ta en declive y nun hai oposición”. Asina, UPyD quier “condicionar gobiernos, más que pa entrar nun executivu de coalición”.

El nuevu presidente d’UPyD n’Asturies aspira a consiguir representación pal so partíu nos trés principales conceyos asturianos y na Xunta Xeneral, llista a la que cree que “lo lóxico” ye que la encabce él, anque habrá primaries nel partíu.