Política

La Conseyería de Cultura y Turismu, pente medies de la so Direutora Xeneral de Política Llingüística, Consuelo Vega Díaz, fizo una primer valoración positiva del autu del Tribunal Constitucional no que cinca a les rellaciones n’asturianu del ciudadanu cola Alministración del Principáu polo que supón d’aval a la Llei Asturiana d’Usu y Promoción del Asturianu y porque precisa dellos aspeutos xurídicos de la mesma.

“Esti autu, según los datos que manexamos nesti momentu, avala ensin duldes la constitucionalidá de la Llei d’Usu y Promoción del Asturianu, onde s’establez el derechu de los ciudadanos a dirixise n’asturianu a l’alministración autonómica”, declaró Vega.

Según al Conseyería citada “Dende la entrada en vigor de la Llei, el Principáu aplicó esi preceutu y almitió toles comunicaciones ciudadanes n’asturianu mandando la so traducción al castellán col envís de que les tramitara’l Serviciu de Política Llingüística”.

Amás Vega quixo recordar que nel añu 2009, “creóse la Unidá de Traducción, muérganu alministrativu empobináu xustamente a dar esi serviciu de traducción”.

La formación UNA celebró esta fin de selmana pasada’l so segundu Congresu, aprobando la ponencia d’estatutos, na se qu’introducieron delles cuestiones nueves. Aprobáronse tamién les llínies polítiques y estratéxiques “que tien de siguir la organización hasta l’añu 2011”.

Nel Congresu y na ponencia aprobada spresóse la necesidá urxente d’inxertar nel panorama políticu asturianu “una fuercia propia que sía a algamar influencia social y electoral” lo qu’UNA denoma “espaciu políticu asturianu que pueda ser referencial pa tolos asturianos y asturianes que piensen en clave nacionalista y asturianista, que busquen una alternativa d’esquierdes al binomiu PSOE-IX”.

La executiva nueva d’UNA ta formada por Belarmino López d’UNA-Mocedá, Faustino Zapico, voceru; Miguel Ánxel Díaz, coordinador; Roberto Holgado, secretariu d’organización, amás de repitir Tino Fernández, Yolando G. Huergo y Daniel Fernández.

El Comité Organizador del II Congresu d’Unidá Nacionalista Asturiana (UNA) que se fai esti fin de selmana nel Auditoriu d’Uviéu, comunicó güei que nesti momentu hai confirmada la participación de más de 20 delegaciones que van asistir al actu de pieslle. L’alderique de les ponencies política y d’estatutos tendrán llugar na xornada del sábadu, y el domingu fadráse l’actu de pieslle nel que van participar los convidaos y va presentase la nueva Xunta Executiva d’UNA.

Ente les delegaciones que yá confirmaren la so presencia nel Congresu alcuéntrense partíos políticos asturianos como Bloque por Asturies, Partíu Asturianista y Los Verdes d’Asturies y de fuera del país como la formación vasca Aralar y l’aragonesa Chunta Aragonesista. Nel congresu van tar presentes el diputáu de la Xunta Xeneral Roberto Colunga, en representación del Bloque, y el parlamentariu vascu Mikel Basabe, en representación d’Aralar. Tamién asistirán agrupaciones polítiques locales como ApN (Nava) y UICA (Carreño).

Pela so parte, el campu sindical va tar representáu polos sindicatos SUATEA y CSI que van univar delegaciones propies.

Amás de los partíos políticos, instituciones como l’Academia de la Llingua Asturiana, el Conseyu de la Mocedá del Principáu d’Asturies (CMPA), y la Xunta pola Defensa de la Llingua Asturiana confirmaren yá la so presencia, igual que lo fixeron otres organizaciones y colectivos de distinta mena como l’Asociación de Colectivos Asturianos (ACA), Belenos, Fai! o Xeira.

Ayeri, xueves 4 de marzu la FSA ya IX-Bloque-Los Verdes xuntáronse pa facer una valoración sobre’l grau de seguimientu del pautu de Gobiernu. Jesús Iglesias, d’IX, fizo un balance “más positivu nunos aspectos que n’otros” sobre la política llingüística del gobiernu0. Amás, anunció que se diba pidir a la subsecretaría del Ministeriu d’Educación un informe del que tuvo conocimientu l’Executivu qu’existía nesi departamentu y nel que s’aborden les posibilidaes de crear la especialidá de Llingua Asturiana na educación.

Iglesias destacó que se fixo “un análisis positivu de los avances na creación y el mantenimientu de los Servicios de Normalización Llingüística (SNL) nos conceyos” y que se sigue progresando nel marcu de les rellaciones cola Academia de la Llingua Asturiana.

El presidente del FC Barcelona, Joan Laporta, entamó esti llunes la so carrera hacia la Generalitat catalana abriendo una web personal (www.laporta2010.cat) de carácter políticu na que, magar lo anunciare, nun llegó a dexar nidio con qué formación política va trabayar pela independencia. La web, con 24 visites a la hora nesti primer día d’estencia acaba’l so mensaxe d’aniciu con un ‘Visca Catalunya Lliure’.

La web de Joan Laporta axunta toles ferramientes de la web 2.0 que s’empleguen davezu, de twitter a Facebook o YouTube y entama con una declaración de principios: “Voi siguir dedicando los meyores años de la mio vida al país qu’amo. Llegó’l momentu de servir toos xuntos a Cataluña”. El lema de la web ye también enforma nidiu de les intenciones y esmoliciones del presidente del Barcelona: “Agora ye momentu de sirvir al país”.

L’Agrupación de Uviéu del Partíu Asturianista (PAS) vieno acabante pedir al conceyal de Cultura del Ayuntamientu d’Uviéu, José Suárez Arias-Cachero, “qu’utilice y fomente el nome tradicional de les fiestes que se realicen na ciudá y nel conceyu n’asturianu”.

Sigún el PAS, “dempués de munchos años, l’Ayuntamientu y la Sociedá Uvieína de Festexos (SOF, poles sos sigles en castellán) saquen un cartel animando a la participación na fiesta baxo’l títulu ‘Uviéu de Antroxu'”. “Alégranos ver que poco a poco hai algún avanze”, señaló la nota, que reclamó “que’l nome de les distintes fiestes que se realicen na ciudá se treslladen al asturianu (San Xuan, Martes de Campu, L’Ascensión) según el nome de la ciudá: Uviéu”, añade’l PAS nun comunicáu nel que tamién aprovecha pa entrugar “qué pasa coles Ordenances Municipales que se diben a aprobar nel Consistoriu y qu’a día de güei nun se sabe nada. Nun sabemos si tán paralizaes o l’Equipu de Gobiernu y la Comisión de Cultura escaeciéronse de les ordenances”.

L’Aula Magna de la Facultá d’Económiques va ser el llugar onde mañana xueves, a les 12,30 hores, ufra una conferencia’l presidente de la Fundación FAES y expresidente del Gobiernu d’España, José María Aznar, sobre la situación de la economía española. Nuevas Generaciones del Partíu Popular, organizador de l’actividá, quier averar asina a los asturianos “ún de los temes más preocupantes na actualidá española, especialmente relevante nun contestu de crisis”.

Cuando van yá cuatro años dende la criación y funcionamientu del Procurador Xeneral del Principáu d´Asturies, entovía nun se fizo convocatoria pública dala pal accesu a los puestos de trabayu dependientes d´esi Muérganu, lo que supón pal Conceyu por Otra Función Pública que, “na práutica, la totalidá de la plantilla, que se pué consultar na web de la Procuradora Xeneral, integrada por diez trabayadores, fue nomada “a déu“.

La situación ye especialmente grave pal Conceyu por Otra Función Pública n’Asturies porque nos alcontramos delantre d’una Institución “que tien como función la defensa de los derechos fundamentales de los asturianos y asturianes, pente los que s’alcuentra’l derechu d’acceder a los puestos de trabayu del sector públicu en condiciones d’igualdá, reconocíu nos artículos 23.2 de la Constitución y 21.2 de la Declaración Universal de los Derechos Humanos”.

Asinamesmo, rescampla pal Conceyu “la hipocresía na qu’incurre esi Muérganu, al promover cátedres pa la Defensa de los Derechos Fundamentales mientres fraya l´exerciciu d´aquellos que dependen de la so esclusiva voluntá política”. Cola fin de poner torga a esta llaceriosa situación, el Conceyu por Otra Función Pública n´Asturies vieno acabante de “presentar denuncia énte la Comisión de Pidimientos y de Rellaciones col Procurador Xeneral de la Xunta Xeneral del Principáu d´Asturies, a la que-y correspuende controlar l´observancia de los derechos fundamentales y de les bones práctiques n´actividá alministrativa del Procurador Xeneral”.

Mañana miércoles 10 de febreru a les 17 hores nel local “Cafamilu” de les asociaciones vecinales del conceyu de Llanera, na cai Severo Ochoa de Llugo de Llanera tendrá llugar una RUEDA DE PRENSA onde la organización d’izquierda soberanista “Fai!” va a denunciar la política de prohibición que per parte del Ayuntamientu de Llanera se vien aplicando al usu de les instalaciones públiques (Casa la Cultura, Casa la Mocedá), fechos que se repiten dende hai tiempu con tol movimientu asociativu del conceyu. Per segundu mes consecutivu esta organización vien pidiendo un espaciu pa facer una charra pública que vien siendo torgáu, de manera gravísima, pola “Conceyala de Cultura y Muyer” del Partido Popular Belén López.

Na rueda de prensa aportaráse a tolos presentes un pliegu con una cronoloxía de los fechos y con documentos onde la propia alministración con firma de la conceyala se niega a almitir les solicitúes por tar redactaes en llingua asturiana, negando la so presentación nel rexistru por nun tar “EN CASTELLANO”, amás de l’actitú claramente antidemocrática que l’alcalde y la corporación municipal ta manteniendo.

Demientres l’actu darase anuncia de la convocatoria d’una movilización na cai pa esta selmana contra’l secuestru de les instalaciones públiques a los coleutivos de Llanera y contra la represión llingüística. Amás, comentaránse los apoyos que la organización ta teniendo d’otres instituciones, asociaciones y partíos qu’esta situación antidemocrática ta xenerando.

El PP solicita al Gobiernu rexonal información sobre los viaxes de l’Axencia Asturiana d’Emigración pal 2010, al traviés de la diputada na Xunta Xeneral d’Asturies, Elma Alonso, que desixó esti martes al Gobiernu rexonal la rellación de viaxes programaos pola Axencia Asturiana d’Emigración demientres l’añu 2010 pal desplazamientu de la Conseyera de Presidencia, Xusticia y Igualdá; la viceconseyera de Seguridá y Emigración y la directora de l’Axencia Asturiana d’Emigración.

El PP solicita’l presupuestu pa la realización de los viaxes y los númberos económicos nel que van imputaos dichos gastos, amás d’un llistáu de los viaxes realizaos al estranxeru pol presidente del Conseyu de Comunidaes Asturianes en 2008 y 2009.