Política

L’Asociación Nacional por la Libertad Lingüística (ANLL), organización de calter lliberal y españolista dirixida por Pablo Yáñez, estudiante de ciencies polítiques y dirixente del partíu centralista Ciudadanos-Partíu de la ciudadanía, denunció lo que considera un “despilfarru indecente”, la campaña de sovenciones pa la promoción del asturianu puesta en marcha como cada añu pol Gobiernu d’Asturies.

Nun comunicáu, ANLL critica l’usu d’esti dineru “nel texíu asociativu, les empreses priavaes, los medios de comunicación… mientres el Principáu rexistró en marzu la segunda mayor xuba de la tasa de desempléu de toa España”.

“Llamentamos el despilfarru de perres per parte del Gobiernu d’Asturies y nun podemos dexar de recordar que’l bable-asturianu nun figura nel Estatutu d’Autonomía como llingua cooficial”, añaden.

Estes cantidaes “esaxeraes” intenten según ANLL crear “un mimetismu con procesos como los de Cataluña, Baleares o la Comunidá Valenciana” y “mercar espacios de marxinación del castellán, o cuanto menos, una realidá llingüística inesistente n’Asturies”.

P’ANLL ta convirtiéndose en negociu “lo que tendría de ser namás una riqueza cultural”.

Blogue del colectivu ANLL

El Secretariáu de Cultura del Partíu Asturianista ta acabante pidí-y a Izquierda Xunida que termina cola so presencia nel Gobiernu d’Asturies. Y ye que los asturianistes afirmen que la formación tien una presencia “incoherente ya indigna presencia nel Gobiernu d’Asturies y nun entendió nunca cómo ye posible convivir nun gobiernu nel que se ye cómpliz de la marxinación llingüística que sufren munchos asturianos, diciendo defender a éstos”.

Nos últimos tiempos, y según el PAS “esta situación fíxose inda más inesplicable, una y bones el Gobiernu d’Asturies, del que nun s’escaezan, forma parte tamién IU-Bloque por Asturies, felicítase porque los funcionarios nun puedan usar l’asturianu cola alministración”

El PAS afirma que per parte d’Izquierda Xunida-BpA “nun hai más que silenciu ente estos atropellos sobro los derechos de los funcionarios”. Por ello, el Partíu Asturianista, pide a esta formación, que “si inda tienen un pocu de dignidá, abandone’l Gobiernu” y entrúgase si “¿acasu tán nel executivu asturianu namá p’asitiar a los sos dirixentes en puestos bien remunerados ensin importar lo que faigan los sos collacios de Gobiernu? ”

Pal PAS en toos estos años de Gobiernu de coalición PSOE-IX-BpA “nun se fizo más que dar pasos de tras na normalización del asturianu, cuestionando inclusive agora la Llei d’Usu del asturianu”, que recuerden “consiguió’l Partíu Asturianista nel tiempu del Gobiernu de Marqués, y que a día de güei sigue siendo’l mayor llogru pa la nuesa llingua, y l’única base llegal que dexa que el so usuarios defendan ante los tribunalesd’ataques como’l sufríu pol funcionariu Xurde Blanco”.

El Partíu Asturianista y Xuventú Asturianista entamen esti sábadu, 10 d’abril, un homenaxe a la figura d’Isidro del Río, al entender que la ideoloxía federalista, autonomista y asturianista del Partíu Federal Asturianu debe de ser recuperada y reconocida, y más cuando según el PAS “estes cuestiones polítiques nun son asumíes por nengún de los trés partíos políticos representaos nel Conceyu y na Xunta Xeneral”.

Nuna rueda de prensa asoleyada ayeri, el PAS diz que “tamos nuna comunidá onde l’autonomía política ye mínima, onde les esmoliciones pola situación de Asturies ta supeditada a les ordénes que da la cúpula de cada partíu dende Madrid, onde la defensa de toles sos señes d’identidá ye nula per parte de el que nos gobiernen”.

Por too ello convoquen esta concentración pa denunciar “esta des-memoria hestórica y pidir la reconocencia pa Isidro del Rio per parte del Gobiernu Municipal PSOE-IU”.

L’actu va realizase na Plaza Mayor de Xixón el próximu 10 d’abril a les 12:00 hores de la mañana, y ta abiertu a tolos ciudadanos. Nel mesmu van participar miembros destacaos del PAS y de la Xuventú Asturianista.

El próximu vienres 9 d’abril, a les 19:30 hores, n’El Parche (Plaza l’Ayuntamientu) d’Avilés, va tener llugar una concentración escontra la Reforma Llaboral qu’anguañu ta apautando’l Gobiernu cola patronal y los sindicatos CCOO y UXT.

Esta concentración ta convocada pola Corriente Sindical d’Izquierda, Partido Comunista de Asturies en Corvera, Fai!, Partido Comunista de los Pueblos de España, Unión Proletaria, Andecha Astur y Colectivos de Jóvenes Comunistas.

Na convocatoria afítase que “cris, paru, precariedá, vivienda inasequible, despidu gratuítu, xubilación a los 67 años, reforma les pensiones, recortes na Seguranza Social…,son dalgunos de los ataques a los y les trabayadores que tan apautándose nesta negociación de la Reforma Llaboral. Darréu d’ello, estes organizaciones, y toes aquelles que quieran amestase, tienen l’enfotu de llevar alantre una movilización tolos meses, cola fin d’algamar qu’esta crisis nun la pague la clas obrera, sinon los capitalistes que la causaren y los Gobiernos que la permitieren”.

El Gobiernu del Principáu va unificar dos de les direcciones xenerales adscrites a la Conseyería de Cultura y Turismu, la de Turismu y Patrimoniu Cultural, darréu del cese, por pidimientu propiu, de la qu’hasta agora fora Direutora de Turismu, Elisa Llaneza.

La conseyera d’Alministraciones Públiques y vocera del Gobiernu, Ana Rosa Migoya, desplicó na rueda de prensa posterior al conseyu de Gobiernu, que va ser l’actual responsable de Patrimoniu Cultural, José Luis Vega, el responsable de la nueva dirección xeneral.

Migoya esplicó que tres el cese por motivos personales d’Elisa Llaneza, aprobáu güei pol conseyu, el gobiernu plantegóse la reorganización, puesto que considera adecuáu vincular la bayura patrimonial y cultural d’Asturies cola promoción turística.

Dende va dellos díes entamóse una campaña internacional d’apoyu a la llibertá de los presos políticos cubanos entamada dende la páxina de la plataforma creada pa talu fin. Xuan Xosé Sánchez Vicente, presidente del Partíu Asturianista ta acabante firmar el so apoyu a esta campaña, xunto con otros miembros destacaos y militantes de la formación y conviden a los asturianos “a sumase a la campaña col so sofitu”.

Dende’l PAS camienten que “ta claro que l’apoyu de los demócrates ha tar colos que sufren la represión de los rexímenes totalitarios” y que ye “urxente” que’l réxime cubanu “se democratice y terminen les encarcelaciones pola mor d’idees polítiques”.

Recuerden que’l Gobiernu de Cuba “ha respetar los drechos humanos de los sos opositores y ye responsabilidá de nueso denunciar fechos como los d’Orlando Zapata Tamayo”, muertu en fuelga de fame “por denunciar estos crímenes cometíos por Fidel y Raúl Castro”.

El testu completu d’apoyu pue consultase, ente otres llingües, n’asturianu “gracies a les conversaciones ente los asturianistes y la dirección de la campaña”:

Pola llibertá de los presos políticos cubanos

Pola escarcelación inmediata y incondicional de tolos presos políticos nes cárceles cubanes; pol respetu al exerciciu, la promoción y la defensa de los derechos humanos en cualesquier parte del mundu; pol decoru y el valor d’Orlando Zapata Tamayo, inxustamente encarceláu y brutalmente torturáu nes prisiones castristes, muertu en fuelga de fame denunciando estos criménes y la falta de derechos y democracia nel so país; pol respetu a la vida de los que cuerren el riesgu de morrer como él pa torgar que’l gobiernu de Fidel y Raúl Castro siga esaniciando físicamente a los sos críticos y opositores pacíficos, condergándolos a penes d’hasta 28 años de cárcel por “delitos” d’opinión; pol respetu a la integridá física y moral de cada persona; roblamos esta carta, y encamentemos a roblala a tolos qu’escoyeron defender la so llibertá y la llibertá de los otros.

El presidente del PP d’Asturies, Ovidio Sánchez, acusó esti día al Gobiernu del Principáu y más nidiamente al so cabezaleru, el socialista Vicente Álvarez Areces, de recurrir a “continues sides” pa siguir incumpliendo promeses no que cinca al proyeutu de la Ciudá del Motor de Tinéu.

La Conseyera de Presidencia y Alministraciones Públiques, Ana Rosa Migoya comentó la decisión del Tribunal Constitucional coles siguientes pallabres: “Lo primero qu’hai que señalar ye que per parte del Tribunal Constitucional nun se produxo una sentencia, sinón un autu, y lo único que delimita ye la constitucionalidad o non de la nuesa Llei, de la Llei d’usu y promoción del asturianu nel artículu qu’establez que cualesquier ciudadanu asturianu puede dirixise a l’Alministración en bable o asturianu. Esto ye, lo que determina ye si ye constitucional esi preceptu. Determina que sigo y evidentemente normalidá absoluta per parte de l’Alministración asturiana. per parte del Principáu d’Asturies, siempres s’almitieren los escritos de los ciudadanos nes sos relaciones cola Alministración que se presentaben en bable o asturianu. Pero delimita puramente esto y non otres cuestiones”.

L’Asociación Nacional por la Libertad Lingüística (ANLL), organización de calter lliberal y españolista dirixida por Pablo Yáñez, estudiante de ciencies polítiques y dirixente del partíu centralista Ciudadanos-Partíu de la ciudadanía, ta acabante falar sobre la sentencia del Tribunal Constitucional sobre la Llei d’Usu, y camienten que “crea artificialmente un conflictu llingüísticu n’Asturies”.

L’ANLL alvirtió qu’esta decisión “pue ser un primer pasu pa la creación d’imposiciones llingüístiques n’Asturies”, yá que pa la organización la sentención “coloca de factu al asturianu como llingua cooficial n’Asturies ensin que tea asina reconocío nel Estatutu d’Autonomía”. Cuando amás, según ANLL se fai “ensin qu’esista una demanda evidente pa la cooficialización del asturianu per parte de la sociedá”.

Al so xuiciu, “ábrese un nuevu espaciu d’imposición, como los que munchos españoles sufren en Cataluña, Galicia, País Vascu, Baleares, Aragón o la Comunidá Valenciana”.

Blogue del colectivu ANLL

Unidá Nacionalista Asturiana declaró güei al traviés de la so páxina web “que l’Autu del Tribunal Constitucional constitúi un pasu nel reconocimientu de los drechos llingüísticos de tola ciudadanía asturiana”, y nagua porque esti pronunciamientu suponga “un cambiu nel tratamientu que, dende los poderes públicos, tán dando a la llingua asturiana y a los sos falantes”.

UNA llamentó tamién “qu’esti reconocimientu tenga de venir, curiosa y paradóxicamente, dende fuera d’Asturies”, lo que pa la formación “ye un nuevu síntoma del deficiente y noxante tratamientu que vien sufriendo la llingua asturiana per parte de los poderes públicos”.

Unidá Nacionalista Asturiana considera qu’esti autu “ye una prueba más de la necesidá d’una reconocencia oficial de la llingua asturiana nel Estatutu d’Autonomía, dándo-y asina l’únicu estatus xurídicu que merez”.