Política

Énte la intención del Bloque Nacionalista Galego (BNG) de que la Xunta de Galicia apruebe una llei que garantice la posibilidá de restituyir l’antroponimia y la toponimia na so forma gallega orixinal, y de que plantegase, si’l parllamentu gallegu llega a aprobar la iniciativa llexislativa, la robla de convenios con Asturies, Castiella y Lleón y Estremadura pa que los habitantes de les fasteres de “fala gallega” vean reconocíos tamién esos drechos, la organización política Andecha Astur recordo-y al BNG, “una vegad más”, que n’Asturies “nun se fala gallegu y que lo que sí se fala ente los ríos Navia y Eo (incluso más allá d’esti ríu), magar que seya una fastera de transición ente l’asturianu y el gallegu, ye una variedá llingüística asturiana y, poro, competencia del Gobiernu asturianu y de l’Academia de la Llingua Asturiana”.

Andecha Astur entama esta xornada dende va 13 años, como día de conmemoración del 25 de mayu y la soberanía de 1808 y esta edición ye más especial entá, según al formación “porque nesti 2010 celebra’l vixésimu aniversariu de l’aniciu d’AA”. Nesta ocasión, el Día d’Andecha va celabrase’l próximu sábadu 29 de mayu nes Escueles Vieyes de Villaviciosa, onde va tar instalada una carpa.

La xornada va empicipiar a les 18’00 hores y van desendolcase una bona riestra d’actividaes: música del país, espor tradicional, pasucais con banda gaites peles cais de la villa, actu políticu, espicha popular, y rematará con un Conciertu de grupos asturianos, a les 21:30 hores, nel que van participar Dixebra, Taranus y N’Ochebre.

Como ye vezu toles actividaes del Día d’Andecha son de baldre quitando la espicha popular que se va celebrar dende les 20:00 hores y que va tener un preciu de collaboración de 10€. Dende Andecha Astur animen a los vecinos y vecines de Villaviciosa y a la ciudadanía asturiana en xeneral a celebrar “esta xornada de convivencia, conmemoración, vindicación y folixa”.

La Xunta Electoral Central convoca trés beques individuales pa la instrucción y collaboración na realización de trabayos y estudios de calter archivísticu, bibliotecariu y documental rellacionaos cola actividá electoral y cola documentación obrante na Xunta Electoral Central.

Caúna de les trés beques va tener una duración de doce meses y la so dotación va ser de 1.100 euros brutos mensuales, tantu nel exerciciu 2010 como en 2011. La beca va poder prorrogase por un períodu máximu de seis meses. El plazu de solicitú remata’l 7 de xunu según les bases publicaes nel BOE de 18 de mayu.

La Fundación Nueva Asturies espubliza un númberu nuevu de la revista L’Asturianista. Nella recuéyense noticies de l’actividá del PAS, comunicaos, noticies d’actos, artículos d’hestoria y d’opinión, ente otros conteníos.

Descarga de baldre del númberu 5 de L’Asturianista

El Bloque por Asturies cellebró la so Conferencia Nacional y reafirmó la so total oposición a la construcción d´una planta incineradora n´Asturies.

El Bloque por Asturies va poner en marcha toles midíes sociales, polítiques y xurídiques pa torgar la construcción de la incineradora. El Bloque considera que la decisión unillateral de la Federación Socialista Asturiana d´impulsar la construcción de la planta incineradora ye un fechu gravísimu que motiva por sí mesmu´l rompimientu del alcuerdu de Gobiernu. El Bloque por Asturies valora que la coyuntura de crisis d´anguañu convierte´l proyectu de construcción de la incineradora en inviable a cortu plazu, pues ye dafechu irresponsable endeldar a los Conceyos y a la sociedá asturiana en más de 400 millones d´euros cuando se tán planteando midíes d´axuste xabaz a trabayadores, pensionistes y paraos.

Poro, hai un marcu de trabayu dende´l Gobiernu y la Xunta Xeneral, cola ellaboración y aprebación de la futura Llei de Xestión de Residuos, y dende los Conceyos col planteamientu de midíes alternatives a la incineración.

El Bloque por Asturies fai un llamamientu a la sociedá asturiana a la movilización contra esti proyectu que va en contra de la salú pública, el mediu ambiente y los intereses económicos de la sociedá asturiana.

Amás, el Bloque fae un llamamientu a la respuesta unitaria de los partíos políticos, sindicatos y sociedá asturiana, contra les midíes d´axuste económicu propuestes pol Gobiernu d´España que son una agresión a los derechos de trabayadores, pensionistes y paraos, y que pretenden facer pagar la crisis a quien más la sufre.

El Bloque por Asturies alcordó plantear a los sos socios de coalición, Izquierda Xunida y Los Verdes, la ruptura inmediata del alcuerdu de Gobiernu cola FSA, si les midíes propuestes pol Gobiernu d´España se materialicen n´acción de gobiernu n´Asturies, torgando´l desarrollu de les polítiques sociales, dende la izquierda, contemplaes nel alcuerdu de Gobiernu firmáu pola FSA, IU, LV y BA.

El Bloque por Asturies alcordó abrir de forma inmediata el diálogu con toles fuerces polítiques y sociales dispuestes a constituir una plataforma lo más amplia posible, de cara a les ellecciones del 2011, que permita plantear una alternativa d´izquierdes, asturianista y ecoloxista ante los proyectos agotaos de la FSA y el PP.

El Bloque por Asturies considera que´l ciclu políticu que fina nel 2011, necesita una respuesta xenerosa y unitaria que permita un futuru dignu pal nuestru país.

El Partíu Asturianista cumple 25 años d’actividá, convirtiéndose asina nel partíu asturianu con más años d’actividá política. Pa celebralo anuncien que van entamase actos por toa Asturies a lo llargo de los próximos doce meses, incluyendo conciertos, actos institucionales, homenaxes, actos políticos, etc.

Y esta fin de selmana entamen. Van facelo con dos actividaes un conciertu coral que se va a celebrar el sábadu a les 20:30 na Ilesia de San Xosé, en Xixón, y la instalación d’una carpa informativa, asitiada na redolada del Rastru de Xixón, ente les 10:30 hores y l’hora de zarru del mesmu.

La carpa supón l’entamu d’una campaña na que quier facese parte a tolos asturianos del proyectu del PAS, “que nun ye otru que sacar a Asturies del pozu na que la metieron los partíos gobernantes y l’oposición, despreocupaos polos asturianos”. El presidente del Partíu Asturianista, Xuan Xosé Sánchez Vicente, va tar presente na carpa que se va a instalar en Xixón, ente les 12:30 y les 13:30 hores, p’atender a los ciudadanos que quieran dar a conocer los sos reinvindicaciones y problemes.

Esti actu, ye, según anuncien dende’l PAS, “el primeru de munchos otros que nos próximos meses va llevar a la PAS a otros munchos conceyos asturianos, dientro d’una campaña de comunicación cola sociedá asturiana, na que quier arrexuntase a toles persones descontentes cola situación de Asturies, alredor del proyectu anováu deL PAS”.

Por motivos ayenos a la organización del actu y, por cuenta d’una votación urxente nuna moción de censura nel Parllamentu de Portugal mañana vienres pela mañana, Heitor de Sousa, diputáu nacional del Bloco de Esquerda invitáu a la conferencia esi mesmu día nel Auditoriu Palaciu de Congresos d’Uviéu, nun va poder asistir. Polo tanto, la organización vese obligada a aplazar l’actu.

Esti martes 18 de mayu pela mañana, la Xunta Executiva d’Unidá Nacionalista Asturiana (UNA) fixo pública una declaración na que solicita al gobiernu asturianu que s’entame un procesu pa recuperar la fecha del 25 de mayu como ún de los finxos más importantes de la historia asturiana. El coordinador d’UNA, Miguel Ánxel Díez, recordó que “la fecha del 25 de mayu conmemora ún de los acontecimientos más importantes na historia asturiana, onde Asturies entra na dómina contemporanea cola proclamación en 1808 de la soberanía de la Xunta Xeneral, la rebelión del pueblu asturianu en defensa de la llibertá, l’unviu d’embaxadores a Inglaterra, la creación del Exércitu Asturianu y el diseñu de la nuestra bandera”.

Pa Díez “esta datapasa tolos años ensin pena nin gloria y ensin nengún tipu de reconocencia institucional y yá ye’l momentu de camudar esta dinámica incluyendo’l 25 de mayu nel calendariu festivu asturianu”. UNA propón tamién que se recupere, reconoza y esparda la redolada de la Sala Capitular, onde tuvo llugar la xunta de la Xunta Xeneral y la proclamación de soberanía, como un llugar emblemáticu y simbólicu pa la identidá asturiana y pa la llucha pola llibertá.” El coordinador d’UNA fixo alcordanza tamién de que ye en 1808 cuando Xovellanos, por mandáu de la Xunta Xeneral, diseña “la bandera asturiana azul y oru qu’entá utilizamos los asturianos y asturianes anguaño”.

Unidá Nacionalista Asturiana (UNA) va celebrar el próximu martes 25 na Corrada del Obispu a la puerta de la Sala Capitular, como fixo nos últimos años, un homenaxe a los revolucionarios de 1808 que va cuntar con delles intervenciones rellacionaes colos acontecimientos.

El Partíu Asturianista va celebrar los sos primeros 25 años d’actividá con actos a lo llargo’l país. L’entamu de les actividaes va ser esti próximu sábadu 22 de mayu, a les 20:30 hores, na Ilesia San Xosé de Xixón. Ellí va celebrase un conciertu de la Coral Polifónica d’Asturies “Cruz de la Victoria”.

La entrada ye de baldre y el PAS convida a tolos ciudadanos a compartir la celebración de los primeros venticinco años de vida “d’un partíu que nun tien más compromosu que’l de la defensa d’Asturies y los asturianos”.

Amás, el domingu van entamar les actividaes na cai, cola instalación de carpes informatives n’estremaos llugares del país, entamando nesta ocasión en Xixón.

La revista Atlántica XXII afirma nun artículu del so númberu de mayu qu’Unidá Nacionalista Asturiana (UNA) va llevar como cabeza de llista al ex Conseyeru Francisco Javier García Valledor. Atlántica anuncia amás, que la candidatura de Valledor, que según la revista ta acabante finar la so militancia n’Izquierda Xunida, va incluyir a otres formaciones llocales venceyaes a UNA y a ex militantes d’Andecha Astur, xunto con independientes. Sicasí, y dempués de qu’Asturnews se punxera en contactu con Faustino Zapico, Voceru d’UNA, estes informaciones paecen desmentíes dafechu, yá que Zapico declara que “nun ye verdá que Valledor vaiga encabezar la llista d’UNA a la Xunta Xeneral, ye sorprendente cuanto menos, porque Valledor sigue siendo militante d’Izquierda Xunida”. Zapico, recuerda “naide de la publicación faló conmigo nin con naide de la Executiva, nun sé d’ónde sacaron les coses”.

Y ye que según Zapico, y pese a los rumores d’estos díes, n’UNA “nun tenemos mui claro quien va ser el candidatu”. Zapico diz que se ta buscando ser “alternativa real dientro d’un espaciu asturianista xunitariu” y que pa ello “nun val cola UNA y dellos adornos más”, afirma qu’hai que “cuntar con toos” y que nun s’entama por escoyer al candidatu, sinón “pol programa, la estratexa, etc.que cambiará dependiendo si al final UNA va sola o con otres fuercies”. Preguntándo-y pola so opinión sobre Valledor como posible candidatu, el voceru de la UNA diz que “ye aventurar demasiao”.

Atlántica XXII comenta nel artículu citáu que se “convidó” a participar a URAS-PAS nesta “aventura política” pero que la candidatura nun fructificó “porque Xuan Xosé Sánchez Vicente condicionó la so presencia a la garantía d’encabezar personalmente la candidatura electoral”. Faustino Zapico ñega tamién estes afirmaciones categoricamente y afirma que les conversaciones “siguen abiertes , anque nun podemos cuntar muncho más” y añade “nun sé d’ónde sacaron eses informaciones que s’afirmen tan rotundamente n’Atlántica XXII”. “Pamidea sintieron campanes y nun saben ónde”, remata.

Sicasí, reconoz “ta falándose con muncha xente”. Sobre un documentu que circula pa buscar apoyos a la iniciativa entamada por UNA, Zapico recalca “de momentu nun ye más qu’un borrador pero nun ye un documentu p’apoyar a Valledor, sinón pa crear esi espaciu alternativu del que falaba enantes”.

Anque Zapico paez nun reconocer avance nengún con Valledor, según pudo saber Asturnews,va delles selmanes celebróse una xinta en Xixón, na que participaron persones representatives de la UNA, xunto col ex diputáu Valledor y otres persones independientes a les que se taría “tentando” pa integrase nesta futura y enésima nueva “reinvención” de la izquierda nacionalista asturiana.

Alcuentros privaos como esti son probablemente’l niciu del rumor que circulaba estos díes ente los propios militantes d’UNA, y qu’afirmaba que’l día 25 de mayu diba presentase la candidatura de Valledor, lo que pa Faustino Zapico “queda descartao totalmente”.

Yá en 2009, Zapico saliere al pasu de les declaraciones de Valledor pidiéndo-y que “nun utilice a la nuesa organización como elementu de debate dientro d’IU” y que nun interferiera “nel procesu de xuntura de la izquierda nacionalista y verde que se ta faciendo n’Asturies alredor d’UNA”.