Política

El Grupu Municipal Socialista del Conceyu d’Uviéu ta estudiando llevar a los tribunales el casu de la sovención que se-y concediere a la Fundación Gustavo Bueno pa la organización de les actividaes de ‘Oviedo Doce Siglos’. La noticia xurde darréu de que la Comisión d’Economía refugase, colos votos del PP, la propuesta del PSOE al alcalde pa investigar la cuestión.

L’anuncia fízola la coceyala socialista, Margarita Vega, que quiso dexar afitao que los socialistes critiquen la sovención de 600.000 euros que’l Conceyu concedió a la Fundación pa la organización d’una esposición, nel marcu de ‘Oviedo Doce Siglos’ y non la esposición mesma. Y eso por mor de que la entidá contrató a una empresa que tenía ente sos directivos a persones “emparentaes directamente cola familia de Gustavo Bueno, lo que prohíbe la Llei de Sovenciones”.

El Coleutivu Pola Xuntanza espublizó güei una «Xuntanza programática pa camudar Asturies», un documentu que pretende amosar “les llinies comunes de los partíos asturianistes/nacionalistes asturianos y facer xuntanza al rodiu d’elles” y nel qu’esti grupu ciudadanu de presión buscar soluciones pa “nun repitir otros 30 años de fracasu”, y lo que ye más grave tovía -recuerden, “a contemplar otros 30 años de desaniciu económicu, cultural y social de la nuesa Patria”.

El colectivu propón una “converxencia eleutoral con permanencia nel tiempu, que combine la defensa d’un común programa políticu de mínimos col respetu a la pluralidá ideolóxica”. Pa ello, nesti documentu busquen facer “un aproximamientu a posibles puntos de converxencia programático, amosando que la torga pa una unidá d’aición nel planu eleutoral tien que se buscar en campos alloñaos de la problemática programático”.

Pola Xuntanza nun inclúi nel so programa a la coalición Izquierda Xunida, que barrunten “nin ye nacionalista nin asturianista”, y recuerden “IX nutrióse de la cultura política del PCE, fondamente xacobín y sucursalista”, anque tamién afirmen que nel so programa políticu “recueye parte de les nueses aspiraciones”. La esclusión d’esta formación como axente a participar na Xuntanza “nun se debe solamente al calter oportunista de les sos promeses ‘asturianistes’, sinón a la incapacidá amosada pa desendolcar cualquier dinámica de rexeneración democrática n’Asturies dada la predisposición de les sos cúpules direutives a pautar gobiernos col PSOE, consolidando y lexitimando la estructura clientelar-caciquil que bloquia la sociedá asturiana”.

Pal colectivu Pola Xuntanza a los partíos sucursalistes hai qu’atacalos principalmente “non na so falta de compromisu pa cola cultura asturiana sinón na so incompetencia pa resolver (o inclusive “pensar”) los problemes estructurales de la sociedá asturiana”. Yá qu’observen que “la estratexa del sentimentalismu culturalista foi un atayante fracasu, pos por cuenta del so calter sectorialista foi reencauzada y ‘despolitizada’ pol PSOE al traviés de polítiques sectoriales de promoción cultural y llingüística”.

El documentu recueye amás importantes coincidencies programátiques que rescamplen nos documentos estatutarios y congresuales de les formaciones Andecha Astur, Partíu Asturianista o UNA, ente otros. Cuestiones relatives a la configuración política deseada p’Asturies, midíes económiques, sociales, de política cultural y llingüística, etc.

Descarga del documentu completu

Andecha Astur declaró ver “con bonos güeyos” la propuesta del Bloque por Asturies de convocar un 8 setiembre xunitariu pese lo inregular que resulta la so rialización al traviés de los medios de comunicación. Nun principiu y ensin tener más información que la conocida al traviés de talos medios, Andecha Astur “asumiría la convocatoria d’un Díi de la Nación Asturiana xunitariu esti 8 setiembre, entendiendo que básicamente coincide coles propuestes que vien presentando dende va dellos años comu consecuencia del firme comencimientu de que la situación d’Asturies precisa de la responsabilidá y xenerosidá de tolos axentes políticos y sociales asturianos p’aportar a puntos d’alcuerdu y trabayar conxuntamente polos llexítimos drechos ya intereses del Pueblu Asturianu”.

Asina mesmo, valoren “perpositivamente que’l BxA asuma de forma pública’l conceutu de Xunidá d’Aición que dende Andecha Astur se vien plantegando, y espera qu’esti Díi de la Nación Asturiana costituya un puntu d’inflexón que permita al conxuntu de les formaciones polítiques asturianes ensin escluxones entrar nuna dinámica d’alcuerdos lo más amplios posibles”.

Andecha pondráse en contactu col Bloque nos próximos díes “pa pidi-yos que concreten formalmente la so propuesta, esclariar y negociar dellos matices que consideramos importantes, y entamar coles midíes afayaíces pa facer rialidá esti Díi de la Nación Asturiana xunitariu comu un primer pasu na necesaria dinámica de Xunidá d’Aición de les formaciones polítiques asturianes”.

La páxina web “Pola xuntanza”, que nel añu últimu vien siendo llugar d’alcuentru ente los partidarios de la xuntanza de los partíos nacionalistes asturianos, anuncia güei la creación d’un colectivu de ciudadanos que “vien aconceyando con regularidá col envís d’analizar la situación del movimientu políticu nacionalista/asturianista nes sos estreames sensibilidaes”. La iniciativa entama agora un procesu de regulación formal pente medies de la creación d’una asociación, de nome “Coleutivu Pola Xuntanza”.

“La iniciativa –espliquen- ñació va más d’un añu al traviés d’internet”, onde se foi conformando esti grupu de ciudadanos esmolecíos “pola escasa presencia del nacionalismu asturianu nes instituciones”, que ye frutu, al so xuiciu, “de la dixebra de les fuercies d’esti calter, espardíes anguaño nuna riestra de siegles”, que consideren “tienen más coses en común que diferencies”.

El colectivu va celebrar un conceyu, el próximu 31 de xunetu, en Xixón, onde van decidir les persones que van ocupar los cargos del mesmu, y onde se van aprobar los sos estatutos internos. La idea del “Coleutivu Pola Xuntaza” ye afalar la creación d’una candidatura conxunta de les fuercies polítiques del espectru actual, evitando les inxerencies de fuercies como Izquierda Xunida, qu’a xuiciu del Coleutivu “vieno xugando coles ilusiones de los nacionalistes asturianos y perxudicando la evolución de los resultaos electorales de les formaciones realmente nacionalistes”.

L’oxetivu final ye consiguir lo que, dicen, “pue demostrase colos datos electorales de 2007”, aumentar al traviés de la xuntanza que piden, el númberu de conceyales nacionalistes y la presencia na más alta institución asturiana, la Xunta Xeneral.

Dende’l Colectivu afirmen tar abiertos “a toles persones interesaes en collaborar nesti oxetivu” y nes selmanes vinientes van entamar una rolda de conversaciones colos dirixentes de les fuercies nacionalistes asturianes, “pa esplica-yos los sos oxetivos y afalar un verdaderu alderique sobre la xuntanza, que lleve a un pautu responsable ente les formaciones”.

Web del Coleutivu Pola Xuntanza

La Plaza Mayor de Xixón a acoyer la presentación de la iniciativa “Democracy for Asturies” (Democracia p’Asturies) que tien por oxetivu “recoyer sofitu internacional” y ” favorecer un procesu de democratización cientru’l nuesu país”. La presentación ye pública y abierta a la participación de persones y organizaciones que compartan l’enfotu la iniciativa y camienten necesaria la campaña. “Democracy for Asturies” quier ser un ” llamáu internacional” de “denuncia” de la situación “predemocrática que carez Asturies anguaño”.

La Dirección Nacional del Bloque por Asturies caltuvo ayeri una xunta nel so llocal d’Uviéu pa preparar el conceyu que va tener llugar güei, xueves 15, colos otros partíos de la coalición na que tán anguaño: IX y Los Verdes. Nel mesmu va determinase’l futru de la xuntura d’estos partíos, en pallabres de responsables del Bloque “va analizase cómo queda la coalición, o si esiste yá o non”.

Dientro d’esti procesu de dixebra, el Bloque por Asturies solicitó constituyise como Grupu Mistu na Xunta Xeneral. La formación cunta cola representación del diputáu Roberto Colunga, que votó en contra de la Llei d`Axuste, razón que terminó por decidir al Bloque a salir del gobiernu d’Areces, nel que lleven, con un tiempu pel mediu fuera, dende l’añu 2003.

Dempués de dellos meses nos que Bloque por Asturies viniere dando amueses de maltar ente dalgunes decisiones del Gobiernu d’Areces, apoyáu por FSA-PSOE ya Izquierda Xunida-BpA-LV, la formación nacionalista anunció la so salida de los cargos institucionales colos que cuntaben, l’Axencia de Cooperación y de la de Discapacidá. D’esta manera Bloque por Asturies cola del Gobiernu d’Asturies, pero nun renuncia al so diputáu, Roberto Colunga, que llegó al cargu dempués de la dimisión de Francisco Javier García Valledor.

Esti xueves va celebrase un conceyu ente Izquierda Xunida y el Bloque por Asturies pa tratar esta crisis ente les dos formaciones, que tomen caminos estremaos no que cinca al Gobiernu d’Areces, yá qu’Izquierda Xunida, amás de Los Verdes, siguen formando parte del gabinete.

Los meses vinientes sedrán determinantes pa conocer el futuru d’estes dos formaciones, que vienen presentándose a les elecciones autonómiques en coalición dende 2003.

La organización d’esquierda soberanista, que recibió un convite al traviés del corréu electrónicu pa tratar problemátiques del conceyu, y tres d’aconceyar la so Asamblea Xeneral, asoleya un comunicáu nel que se desplica que nun se dan les condiciones mínimes necesaries pa entamar nengún contautu con MSU mientres qu’esta organización “tea vinculada col PSOE y siga los sos entamos ideolóxicos” polo que llamó a la so militancia a “que si de verdá tienen interés n’afondar na oposición a estos proyeutos faigan un apueste seriu y valiente pola ruptura col so partíu” y “trabayar dende un bloque social alternativu al malgobiernu d’Asturies y d’Uviéu”.

Comunicáu completu:

Aconceyada la militancia de Fai! n’Asamblea Xeneral Ordinaria, y no cincante a la propuesta d’aconceyamientu con esta organización recibida per parte de “Mocedaes Socialistes d’Uviéu” al traviés del so secretariu xeneral, Diego Asenjo, y la secretaria de MMSS, Aránzazu Pecharromán, pa tratar delles problemátiques del conceyu como les polítiques de mocedá, l’aprobación de la “ordenanza cívica” o’l conflictu pol pagu de Villa Madalena y COMAMSA, alcuérdase expresar lo viniente:

1) Fai!, organización d’esquierda soberanista asturiana, tien afitao nes sos ponencies estratéxiques, roblaes nes Asamblées Xenerales Estraordinaries, la participación a comuña con organizaciones de la redolada ideolóxica dende la esquierda, el soberanismu, l’ecoloxismu y la rede de movimientos sociales asturianos. Asina, tiénse participao xunto con munchos otros coleutivos políticos, sociales, vecinales, culturales nuna bayura de movilizaciones a la escontra de la citada “ordenanza cívica”, el racismu, la ocupación d’Iraq, Afganistán y el conflictu palestín etc. porque entiende que namás dende l’acumulación de fuercies de les organizaciones alternatives se puede dar rempuesta con puxu a estes problemátiques. 2) Fai!, arriendes del analís de la realidá política y social nel contestu nacional asturianu y del estáu español, interpreta de manera percrítica les posiciones ideolóxiques del Partido Socialista Obrero Español, teniéndoles siempres como enemigues declaraes dafechu de los intereses nacionales d’Asturies al tiempu que tamién de los derechos sociales de los y les trabayadores. Asina, como executores del postfranquismu monárquicu n’Asturies, la FSA/PSOE tien responsabilidá direuta na situación de crisis económica y social d’Asturies, col afitamientu d’una rede clientelar caciquil en comnivencia col sindicalismu vertical perfeutamente allancada en toles estayes del país. De la mesma manera, la FSA/PSOE vien agospiando, xunto col PP, les postures más antiasturianes no que cinca a la identidá d’esti pueblu. El so odiu a lo asturiano, la so llingua, la so cultura, la so historia…y los posicionamientos xeneraos d’esti ultraespañolismu xabaz son una costante na vida política y social diaria asturiana que nos toca carecer. Al tiempu, podríemos facer estensives estes crítiques a los posicionamientos del PSOE tamién nel estáu español onde tien una vergoñosa historia reciente de corrupción, opresión nacional, estroza ambiental, sumisión a los mandaos de la OTAN y ONU, illegalización d’idées, represión y desmantelamientu de los servicios públicos…qu’anguaño completen con una presencia imperialista n’Afganistán, coles rebaxes de los sueldos y les reformes llaborales que suprimen derechos de los y les trabayadores ente otros. 3) Per otru llau, Fai! analiza esta propuesta d’averamientu a coleutivos sociales y políticos d’Uviéu per parte de MSU como un intentu por facer un llaváu de cara enantes de les eleiciones nel conceyu al tar na oposición. Ye chocante, nesti sen, qu’esta bona disposición a escuchar el sintir de los movimientos sociales alternativos nun se dea n’otros conceyos nos que gobiernen o mesmamente a nivel del gobiernu asturianu. Tamién ye d’estrañar que MSU tenga enfotu por falar de les nules polítiques de mocedá existentes n’Uviéu cuando’l Conseyu de la Mocedá d’Uviéu ta xestionáu por una permanente de concentración ente’l PSOE y el PP al traviés de les sos organizaciones moces satélite, pa torgar la presencia nesti muérganu d’organizaciones sociales alternatives y non vinculaes políticamente ente les que taba Fai!. D’esta manera, MSU punxo’l so sofitu, ente otres llaceries, pa que güei n’Uviéu tengamos un presidente del CMU que tuvo sentáu demientres la so conferencia, col expresidente Aznar, nel día qu’insultó a los y les estudiantes de la Universidá d’Uviéu que protestaben pola so presencia na universidá asturiana. Por tolo espuesto, dende l’Asamblea Xeneral Ordinaria de Fai! entiéndese que nun se dan les condiciones mínimes necesaries pa entamar nengún tipu de contautu con MSU mentres qu’esta organización tea vinculada al PSOE y siga los sos entamos ideolóxicos, polo que se resolvió per unanimidá’l refugar cualesquier tipu de collaboración cola estaya moza del PSOE d’Uviéu, animando a la so militancia a que si de verdá tienen interés n’afondar na oposición a estos proyeutos faiga un apueste seriu y valiente pola ruptura col so partíu pa trabayar dende un bloque social alternativu al malgobiernu d’Asturies y d’Uviéu.

Pa finar, alcordóse treslladar públicamente esti posicionamientu énte los medios de comunicación.

La organización política Andecha Astur ta acabante de pidí-y a Mercedes Álvarez, Conseyera de Cultura y Turismu d’Asturies que’l teatru allugáu na Universidá Llaboral de Xixón y xestionáu al traviés de la empresa pública Recrea, dea “un xiru na xestión y programación”. Y ye que, según declaren dende AA, “nun se pue permitir el despilfarru económicu que Llaboral Escena vien suponiendo dende’l so aniciu”.

Los últimos datos económicos conocíos “ponen los pelos de punta” a Andecha Astur, yá que “dende agostu de 2009 a abril de 2010 la contratación d’espectáculos costó 445.149 €, de los que sólo se recuperaren 55.612 € pola venta d’entraes”.

A ello ha amestase “los miles d’euros que se marafundien na difusión de la programación; una publicidá que, polo que se ve, nun ta siendo nada efectiva. Estos númberos llamen a la reflexón, y más nos tiempos que cuerren, y, amás, ponen de manifiestu la escasa repercusión de los espectáculos contrataos ente’l públicu asturianu”.

La organización política entiende que “los beneficios de la cultura nun se miden en términos económicos, pero camienta qu’esti despilfarru nun se pue permitir, más cuando la programación de Llaboral Escena supón una gran parte del presupuestu de la Conseyería de Cultura y Turismu, cuandu esti añu se recortaren escandalosamente les sovenciones empobinaes a los Conceyos pa la realización d’actividaes culturales y cuandu rescampla l’ausencia de les artes escéniques asturianes na programación del teatru xixonés”.

Por too ello, Andecha Astur apurrió-y a Mercedes Álvarez una riestra conseyos, “útiles pa camudar la situación de Llaboral Escena”, son los que van darréu: “facer un estudiu previu pa conocer qué ye lo que-y presta ver a la xente; cuntar cola opinión del gremiu de profesionales asturianos dedicaos a les artes escéniques a la hora de diseñar la programación; rediseñar la publicidá de los espectáculos y la forma de difundila; apostar pola contratación d’espectáculos más populares y menos vanguardistes, ello ye, más atractivos pa la mayoría de la población; apostar pola producción escénica d’equí, contratando la mayoría de la programación con grupos y artistes asturianos”.

Yolanda González, vocera d’Unidá Nacionalista Asturiana en Xixón, pidió al Conceyu de Xixón la cancelación del Festival Aereu na ciudá, previstu pal mes que xunetu “yá que, amás de ser un espectáculu de corte militarista sustituible por otros más baratos y constructivos, como yá señalaron otros colectivos, supón un auténticu espilfarru en momentos nos que se plantega una baxada del gastu y nel que s’aplicaron importantes retayos a la política de festexos d’esti branu”.

L’agrupación xixonesa de la UNA camienta que “nestos momentos nos que s’intenta concenciar a la ciudadanía de la necesidá de recortar los gastos, qu’en munches ocasiones afecten a servicios básicos ya infraestructures, paeznos un marafundiu innecesariu que se celebre un festival aereu con un costu altu, que nun tien nengún raigañu na nuestra ciudá, que perxudica al mediu ambiente y que convierte la sablera nel escenariu d’una parada militar”.

Nesti sentíu González tamién quixo llamar l’atención sobre la falta d’información sobre les cuentes del festival, del que’l Conceyu ye patrocinador principal, y pidió que se faigan públiques les cuentes del mesmu; esactamente cuanto apurre’l consistoriu y cuanto nos cuesta a los xixoneses la infraestructura y la movilización d’efectivos del conceyu necesaria pa la organización”. La vocera d’UNA afirmó que “n’otres ciudaes suspendiéronse espectáculos semeyantes polos sos altos costos, que perpasen los 60.000 euros”.

Coles mesmes, y xuniéndose a les crítiques arramaes pola Asociación Inxenieros ensin Fronteres, UNA tamién ve positiva la eliminación del festival del calendariu festivu xixonés pol so calter militarista, yá que según Yolanda González “el conceyu ta retayando n’espectáculos d’otru tipu y calteniendo un Festival que, nun mos engañemos, básase na exhibición d’armamentu militar destináu a esaniciar vides humanes”.