Política

Les declaraciones de Francisco Álvarez-Cascos multiplicáronse estos díes, dempués d’anunciar la so marcha del Partíu Popular. Esti miércoles, nel diariu El Mundo afimró que “siempres” apoyó l’asturianu “como un fenómenu cultural y un fechu diferencial asturianu”, anque matizó “la imposición de la oficialidá del bable na Alministración ye un escesu que perxudica la recuperación del propiu bable”.

Álvarez-Cascos, que vien refiriéndose estos díes a Asturies como “país”, esplicó que “n’Asturies falar de país ye un llinguaxe enraigonáu nes nueses meyores tradiciones”.

El gabinete de prensa del presidente del Gobiernu d’España, José Luis Rodríguez Zapatero, fizo llegar a los medios una semeya del presidente sumándose a la campaña “yo doi la cara pola oficialidá”. El mandatariu lleonés declaróse na nota de prensa “falante d’asturlleonés y por tanto comprometíu col futuru de la mio llingua”. Na mesma nota plantégase la posibilidá de dedicase, dempués de dexar la so actual etapa como presidente estatal, “a afalar la creación d’una comunidá autónoma asturlleonesa col asturianu como llingua oficial”. Zapatero esplica na nota de prensa “la llingua ye un patrimoniu común de lleoneses y asturianos, y pue ser un importante elementu pa la xuntura d’estos dos territorios”.

El Presidente Zapatero esplicó yá n’otres ocasiones como vivó la so infancia mui venceyáu a la llingua asturlleonesa. Crióse na ciudá de Lleón onde la llingua tenía poca vitalidá yá na so mocedá, pero los sos güelos veníen de pueblos del norte de la provincia onde la llingua inda taba mui viva. El presidente cuntaba nuna ocasión n’El País como “sentía les pallabres de mios güelos y hasta llegar a la escuela namás sabía falar asturianu”.

La previsible fin de la carrera de Zapatero na política estatal pue ser la causa de que’l presidente lleonés destape agora’l so amor pola so llingua materna, qu’afirma na nota de prensa “enseño a les mios fíes na Moncloa”.

Les reacciones de la FSA-PSOE nun se ficieron esperar. Esta mesma mañana, el candidatu socialista a Presidente d’Asturies, Javier Fernández, dixo ver “mui intersante” la postura de Zapatero. “Acatamos la postura del Presidente y vamos promover una reforma del Estatutu d’Autonomía nesi sen”, dixo Fernández al referise al estatus d’oficialidá plantegáu pol Presidente Zapatero.

Fernández esplicó na mesma rueda de prensa que “les decisiones que toma’l partíu en Madrid adóptense inmediatamente como propies, asina que pronto vamos entamar les conversaciones cola Xunta de Castiella y Lleón pa entamar el procesu de xuntura con Lleón”.

Pela so parte, la pre candidata popular a Presidenta d’Asturies pol PP, Isabel Pérez-Espinosa, presentó la intervención de Gabino de Lorenzo sobre esta cuestión. L’anguaño alcalde d’Uviéu, dixo ver nes declaraciones de Zapatero “un pasu más nel so camín p’acabar con España”. De Lorenzo afirmó qu’anque él usa l’asturianu siempres que-y apetez “Zapatero nun pue venir a imponémelu agora”. Pérez-Espinosa aplaudió la intervención del alcalde.

¡¡¡INOCENTES!!

La plataforma ciudadana y soberanista “Democracia p’Asturies” celebra esti vienres, 17 d’avientu, de magar les seis y media una charra-alderique alredor de la Constitución española “y como afeuta a Asturies esti modelu d’ Estáu español y supuesta democracia”. L’actu va facese nel llocal de la Corriente Sindical d’Izquierda n’Uviéu

L’actu, que va tar moderáu por Javier Cubero y va cuntar con trés ponentes: Nacho González, per parte del Bloque por Asturies, Iván Martínez, militante d’Andecha Astur y Fonsu Suárez militante de la organización Fai!.

Dende “Democracia p’Asturies” conviden a tolos ciudadanos interesaos a acudir a l’actu y “dar la so visión sobre como afeuta la Constitución del Reinu d’España al desendolcamientu del nuesu país, a sentir les opiniones de los representantes d’estes organizaciones polítiques y a dar suxerencies a les mesmes, como tamién a la plataforma democrática”.

El Partíu Asturianista denuncia la revista publicada pol periódicu estatal El País, con más de 100 fueyes a tou color y que’l PAS afirma “pagamos tolos asturianos”. Javier Fernández, candidatu socialista a la pesidencia d’Asturies, pidió nel so blogue que la xente lu merque, recuerden los asturianistes na so denuncia pública.

El PAS amuesa’l so descontentu “paguen la propaganda del PSOE el funcionariu col sueldu rebaxáu, paráu ensin empléu o ensin empléu y cobertura social, pensionista cola pensión conxelada, ciudadanu cola sanidá rebaxada en prestaciones, empresariu o autónomu al que nun-y paguen o-y retiren les inversiones” y añaden “amás pagamos toos por duplicao, porque los partíos yá reciben otres ayudes, a parte d’estes estraoficiales”.

Amás el PAS añade, “págase una montonera de perres a un empresa que nun ye asturiana” y recuerda otros casos “como cuando en Xixón repartieron polos buzones un llibrín de propaganda del Conceyu que nun se sabe quién pagó” o cuando “se partieron pelos buzones de tolos asturianos miles de llibros titulaos “Construyendo Asturies”, en papel couché y a tou color que, constituyendo propaganda del gobiernu del PSOE tampoco sabía naide quién lu pagaben”.

“Esto ye, que lo faen col dineru de los asturianos y cómo los llamen “tontos” na so cara”, remata’l comunicáu del PAS.

Unidá Nacionalista Asturiana vieno acabante pedir esti día, per aciu del so voceru Faustino Zapico, la dimisión de la Conseyera d’Alministraciones Públiques pola cenciella razón de negase a cumplir les sentencies xudiciales qu’anularon el nomamientu a deu de 350 xefes de negociáu.

Pa UNA que’l maxistráu Jose Ramón Chaves tenga que llegar a amenazar a Ana Rosa Migoya con aiciones llegales contra ella, paque d’una vegada acate les sentencies en materia llaboral, son la constatación del despreciu de la Conseyera y del gobiernu de PSOE ya IX pol Estáu de derechu, y una prueba más del procesu de patrimonialización qu’entamaron na Alministración Pública asturiana.

Faustino Zapico destacó que “una responsable política tea negándose sistemáticamente a cumplir sentencies nel so área de responsabilidá, simplemente, inhabilítala pal cargu”. Amás estendió dicha responsabilidá a tol gobiernu asturianu yá que “son frecuentes les amueses de sofitu del Presidente del gobiernu asturianu a la Conseyera d’Alministraciones Públiques, ensin que s’oyera la más mínima crítica per parte del PSOE ya IX”.

Pa UNA esta actitú ye sobe manera grave porque s’axunta “al intentu de llegalizar la <> per parte de PSOE ya IX pente medies de la reforma de la Función Pública que perpetraron” y qu’esperamos que “la xusticia paralice, porque nun ye otra cosa qu’arreblagar perriba del Estáu de derechu pa que l’Alministración Pública nun oya y nun vea lo que nun-y interese a los gobiernos de turnu, y controlar políticamente a los funcionarios de carrera que quedarán subordinaos a unos responsables con puestos que van ser de llibre designación”.

Pa cabu Faustino Zapico llamentó “la baxa calidá democrática del gobiernu de PSOE ya IX qu’asumen los procedimientos como molesties y la independencia de los funcionarios como estorbises a la so acción de gobiernu” y recalcó que dende “UNA acudiremos a toles instancies polítiques precises p’acabar con estos abusos, y el primer pasu pa camudar la dirición del gobiernu asturianu ye la dimisión de la Conseyera d’Alministraciones Públiques, Ana Rosa Migoya” acabó.

La Conseyería de Cultura y Turismu anunció los detalles del so presupuestu pal añu 2011. Nun hai bones noticies pa la llingua asturiana, la partida pa política llingüística va reducise un 6’3%, qu’anque ye una cifra menor a la baxada xeneral de la Conseyería, del 13’85% supón una importante cantidá en cifres tan baxes como les destinaes a la normalización. Asina la conseyería va destinar 2.810.569 euros a la política llingüística, cifra que baxa dende los trés millones de les anteriores cuentes. Mientres, otres obres como’l Centru Niemeyer d’Avilés, va recibir esti añu más de 12’6 millones d’euros, pa unes obres que lleven consumíos otros munchos recursos yá.

Caltiénse sicasí la cuantía de 230.000 euros pa l’Academia de la Llingua Asturiana, mientres los Servicios de Normalización Llingüística de los conceyos van tener un presupuestu total de 931.109 euros.

De los 101,5 millones d’euros del presupuestu total, 34 millones van destinase a la promoción cultura, archivos y biblioteques (38,6 nel presente exerciciu) y 15,6 millones a la promoción turística.

Caltiénse la partida de la Fundación Príncipe d’Asturies, el RIDEA o’l Festival de Cine de Xixón.

Los resultaos electorales camudaron dafechu’l panorama políticu catalán. El “tripartit” del PSC, ERC ya ICV, que gobernaba dende 2003, primero con Maragall y darréu con José Montilla, sufre una ablucante baxada. El PSC algama’l so peor resultáu hestóricu, con namás 28 diputaos (18,32% de los votos) dende los 37 que teníen, Esquerra pierde once diputaos, quedando con 10 y ICV-EuiA pasa de 12 a 10. Artur Mas, cabezaleru de CiU consigue facese col Govern de la Generalitat col 38’47% de los votos y 62 diputaos.

La xornada de votaciones foi tranquila y cuntó cola participación d’un númberu importante de catalanes, más de trés millones cien mil, el 59,95%, trés puntos más qu’en 2003, contra toles previsiones. Sicasí, la nueche foi movida, sacante pa CiU que vio dende’l primer momentu mui clara la so victoria.

El PSC entamó meyor pero foi pasu ente pasu perdiendo diputaos hasta quedase nos 28 colos que peslló la nueche. Montilla, Presidente de la Generalitat hasta güei, anunció qu’amás de nun ser candidatu a la presidencia del país, tampoco nun lo sedría a la dirección del PSC. La anécdota de la nueche electoral foi un güevu qu’acabó sobre la tiesta de Miquel Iceta, voceru del PSC cuando salía a reconocer la derrota yá cuando s’espublizaron los primeros sondeos a pie d’urna. L’asaltante gritó-y “rojo de mierda”, “Viva España” y “me habéis quitado el trabajo”. Iceta nun sufrió más qu’un sustu.

En contra de lo que-y pasó al PSC, Esquerra llegó a tener namás 8 diputaos y acabó faciéndose con 10 gracies al so pesu nes comarques interiores. Otra de les sorpreses de la nueche foi la de Plataforma per Catalunya, formación ultraderechista xenófoba, qu’en dellos momentos llegó a tener 3 diputaos, y a la fin quedó fuera del Parlament.

Pela so parte Ciutadan’s, formación de calter centralista y antinacionalista, caltuvo los sos trés diputaos, colos qu’entró en 2003, xubiendo en votos pesie a la escisión de dos de los sos diputaos, que pasaron a UPyD, formación que, por ciertu, quedó, con poco más de 5.000 votos, perbaxo d’otres como’l CORI, que llevaba de cabeza de llista a l’artista Carmen de Mairena.

Solidaritat Catalana, la formación lliderada por Joan Laporta, ex presidente del Barça, y que defende un procesu d’independencia unillateral nesta mesma llexislatura vio como tenía aseguráu dende l’entamu un diputáu, pero non el del so cabezaleru, hasta que los resultaos fueron meyorand y llegó a consiguir 3 puestos en Barcelona y unu en Girona, llegando con fuercia al Parllamentu Catalán, “van pautar –recordó Laporta- namás con quién garantice un referendum”.

Y el Partíu Popular, qu’esperaba muncho d’estes elecciones nun salió mal paráu, anque llegó a cuntar con 20 diputaos nel recuentu, los 18 consiguíos (col 12,33%) permiten a la formación presumir de los meyores resultaos de la so hestoria en Cataluña.

Otres fuercies con esperances d’entrar nel Parlament quedaron fuera, ye’l casu de Reagrupament,escisión d’ERC, que se fizo con 39.922 votos, Escons en blanc, con 18.600 votos; y Els Verds, con más de 15.000.

Revive la nueche electoral na canal Twitter Asturnews, pasu ente pasu, dende’l pieslle de los colexos electorales hasta la celebración de CiU y les reacciones de los demás llíderes políticos catalanes.

Resultaos completos de les Eleiciones

Asturnews informa de los resultaos y declaraciones de la nueche electoral catalana dende’l pieslle de los colexos electorales. La información pue siguise na canal d’esti diariu en Twitter Asturnews.

Esti vienres, 25 de payares, Rafael Palacios, voceru del Bloque por Asturies, va tar na Sociedá Cultural Xixonesa, de magar les ocho la tarde, pa falar del so proyectu políticu, dientro del ciclu organizáu por esta sociedá embaxo’l títulu, “Qué ye ser d’izquierda, qué ye ser socialista”.

El voceru de Cultura y Turismu del grupu parllamentariu socialista na Xunta de Castiella y Lleón, José Ignacio Martín Benito, rexistró la pasada selmana una entrugar alredor de la promoción del lleonés, recoyida nel Estatutu d’Autonomía de la comunidá y esixida nel mes de mayu pol Procurador.

Nesa fecha, el plenu algamó un alcuerdu sobre la proposición non de llei presentada pol grupu socialista sobre l’impulsu de la llingua asturiana. La resolución esixía a la Xunta “impulsar el lleonés dientro del patrimoniu llingüísticu de la Comunidá, con midíes empuestes a la so protección específica, en coordinación coles alministraciones públiques competentes” de la que-y encamentaba a “cumplir el mandatu establecíu nel artículu 5.2. del Estatutu d’Autonomía, y, conforme al mesmu, regular la protección, usu y promoción del lleonés”.

Énte los incumplimientos del Gobiernu de Castiella y Lleón el PSOE insiste sobre la cuestión.

Per otra parte, el diputáu socialista rexistró tamién otra entruga pola que quier saber qué actuaciones llevó a cabu la Xunta de Castiella y Lleón pa dar cumplimientu a la resolución aprobada nes Cortes autonómiques el 7 de xunu de 2010 sobre la tradición oral de ‘El Filandón’. Nesa fecha, la Comisión de Cultura y Turismu de les Cortes autonómiques aprobó una proposición non de Llei, presentada pol grupu socialista y transaccionada col grupu popular. Por dicha resolvimientu les Cortes encamentaben a la Xunta de Castiella y Lleón a “empecipiar los estudios pertinentes col fin d’establecer un nivel de protección, incluyíu’l de Bien d’Interés Cultural, pa la tradición oral de ‘El Filandón’ del Reinu de Llión, tamién llamado ‘serano’ nes provincies de Zamora y Salamanca”.