Política

El xueves 22 d’avientu, a les 17,00 hores, na sede de la Conseyería de Cultura y Deporte, constituyóse la Xunta Asesora de Toponimia del Principáu d’Asturies, presidida pol nuevu Director Xeneral de Política Llingüística, Alfredo I. Álvarez Menéndez. La nueva Xunta Asesora nun tien grandes novedaes no que cinca a la so composición y ta formada amás de pol presidente, yá citáu, por José Miguel García Arias, Director Xeneral d’Ordenación del Territoriu y Urbanismu, como Vicepresidente y por cinco vocales y una secretaria.

Los vocales son Cristina Bellón del Rosal, Directora Xeneral d’Alministración Llocal; Ramón d’Andrés Díaz, en representación de la Universidá d’Uviéu; Ana María Cano González, en representación de l’Academia de la Llingua Asturiana; Julio Concepción Suárez, en representación del Real Institutu d’Estudios Asturianos; Fernando Álvarez-Balbuena García, profesor de la Universidá d’Uviéu y espertu en toponimia asturiana, designáu pol Conseyeru de Cultura y Deporte; Felipe Fernández García, Caderalgu d’Análisis Xeográficu Rexonal de la Universidá d’Uviéu y espertu en cartografía temática, designáu tamién pol Conseyeru de Cultura y Deporte, y Mª Antonia Pedregal Montes, Xefa del Serviciu de Política Llingüística.

Nesta sesión constituyente, marcóse como oxetivu de trabayu acabar la revisión de los topónimos correspondientes a parroquies y noyos de población de los 78 conceyos asturianos. Frutu del llabor desenrrolláu dende 2004, 49 conceyos asturianos yá tienen oficializada la so toponimia tradicional, otros 14 tan en fase de tramitación y queden 15 por iniciar l’espediente, según informen dende la propia Conseyería de Cultura.

Fonsu Suárez (Xixón, 1991) participara’l xueves que vien, 15 d’avientu, na Tertulia Enrique García Rendueles con una ponencia sobre la cuestión nacional nel pensamientu marxista. Suárez , estudiante de Filoloxía de la Universidá d’Uviéu, ye militante de Fai! y de Conceyu Abiertu por Xixón. Dende bien de mozu participa en dellos movimientos sociales y plataformes estudiantiles. Anguaño lleva los blogues “D’ayuri a nenyuri” (http://dayurianenyuri.blogspot.com) y “Estratexa y táctica” (http://estratexaytactica.blogspot.com).

Na so charra Fonsu presentará dalgunes pincelaes sobro la concepción de la cuestión nacional na obra de Carlos Marx y Federicu Engels, desmintiendo dellos mitos sobro l’antisoberanismu de los autores y exemplificando sobro too na so opinión sobro’l casu irlandés. Plantegarará tamién tamién les visiones de les más importantes corrientes marxistes, destacando sobro too’l conflictu ente la visión leninista y la trotskista y luxemburguista.

Mui penriba comentará delles esperiencies hestóriques comu Rumanía, Corea y Cuba y la so aplicación nel Estáu español al traviés de teóricos como Iñaki Gil San Vicente y de organizaciones polítiques como’l MDT catalán. Analizaráse tamién en comuña si Asturies ta o non preparada pa la independencia baxo un modelu socialista de sociedá y qué fadría falta pa empobinar esi camín dada la situación d’anguaño.

Acabóse’l bipartidismu na representación asturiana pal Congresu de los Diputaos. Dempués de cuasi una década de repartu d’escaños ente PP y PSOE, dos fuercies representen a los asturianos en Madrid. Izquierda Xunida y Foru Asturies entren nel Congresu con un diputáu caún faciendo baxar a la suma PP y PSOE cuasi un 21% de los votos que tuvieron en 2008. Una tendencia que se da en tol estáu, onde la suma de PP y PSOE baxó un 11%, pero que n’Asturies supunxo’l doblu de porcentaxe. El PSOE pierde n’Asturies más de 128.00 votos y el PP cuasi 62.000, pesie a la so medría en tol estáu. Xuntos sumaben en 2008’l 84’68% de los votos, mientres qu’agora sumen namás alredor del 64%.

La primer fuercia n’Asturies con dalgo más de 220.000 votos y el 35’41% de los votos ye’l Partíu Popular, que pierde un diputáu y queda con trés nel Congresu. El PSOE, que fuera primer fuercia en 2008, queda col 29’19% de los votos de los asturianos y pierde tamién un diputáu, dexando la so representación en 3 escaños. Foru Asturies, que ñació va menos d’un añu consigue un diputáu y dalgo más de 92.000 votos, el 14’77% de los votos emitíos, que lleven a Enrique Álvarez Sostres a Madrid. Gaspar Llamazares, que se presentaba nesta ocasión por Izquierda Xunida d’Asturies-Los Verdes, va representar a Asturies en Madrid con más de 82.000 votos y el 13’24%, lo que supón una xuba pa la formación de cuasi’l doblu de porcentaxe frente a 2008, cuando nun consiguieron diputáu por Asturies.

Como asocediera nes elecciones autonómiques de mayu, Asturies cambia dafechu la composición del repartu de parllamentarios, anque nesta ocasión con menos fuercia, por mor del menor pesu de Foru Asturies nestos comicios.

En cuantes a les fuercies estraparllamentaries, UPyD sigue siendo, como en mayu, la quinta fuercia política, con cuasi 25.000 votos. Más lloñe tuvieron EQUO con cerca de 4.000, Escaños en blanco con 2.500 votos, el partíu animalista PACMA con más de 2.100, PCPE con unos 1.180 y Andecha Astur con unos 1.080.

Perbaxo de los 1.000 votos tuvieron Hartos.org, PUM+J, PDYC, SAIn, PH y UCE, la formación con menos votos, qu’algamó 202.

En cuantes a l’aventura de FAC en Madrid, los resultaos nun fueron los esperaos pola formación, que falaba de consiguir dos diputaos nesta comunidá autónoma. FAC foi octava fuercia con dalgo más de 6.000 votos, mui lloñe de consiguir un diputáu.

Los resultaos nel Senáu por Asturies dieron un vuelcu. Si en 2008’l PSOE consiguió 3 senadores y el PP 1, nesta ocasión ye al revés. Vicente Álvarez Areces, ex presidente d’Asturies, va ser l’únicu representante d’ente los socialistes asturianos nesta cámara, col 28’63% de los votos.

Pol Partíu Popular van ser senadores, Isidro Fernández Rozada, Laura Sampedro Redondo y Mario Arias Navia.

Los siguientes candidatos más votaos fueron los de Foru Asturies ya Izquierda Xunida, anque lloñe d’algamar la plaza nel Senáu.

N’Ast, dempués de conocer la decisión de la Xunta Electoral provincial “nel sen de que nun va cumplir cola so democrática obligación de garantizar que los asturianos podamos utilizar la nuesa llingua nes prósimes eleiciones del 20 de payares”, al prohibir que les papeletes n’asturianu puean ufrise nos Colexos Electorales, úfrese a repartiles a les puertes de los colexos electorales.

Enantes de llegar a esti estremu, solicita, sicasí, “que la Xunta Electoral asuma la so responsabilidá a la hora de cumplir con preceptos democráticos universales y facilite papeletes en llingua asturiana pa estes próximes eleiciones”, lo que pa N’ast sedría la única posible garantíz de respetu pa colos drechos llingüísticos de los asturianos. Amás esixe a la Xunta Electoral que considere válidos los votos que s’emitan nesa llingua.

Una vegada más los drechos de los asturfalantes vense golpiaos pol Gobiernu d’España nunes elecciones. La Xunta Electoral provincial acaba de ñegar l’usu de les papeletes redactaes n’asturianu impreses pola formación Andecha Astur, que yá nel pasáu tuvo dellos enfrentamientos cola xusticia por esti mesmu tema, dándo-y la xusticia a la fin la razón.

Andecha Astur recurrirá esti alcuerdu que prohibe les papeletes n’asturianu y emplaza a Gobiernu d’Asturies y Academia de la Llingua Asturiana a intervenir en defensa de los drechos llingúísticos de los asturianos.

La resolución de la Xunta Electoral provincial “homologa les papeletes en llingua asturiana presentaes por Andecha Astur, pero prohibe espresa ya inxustificablemente que puean ser ufríes nos Colexos Electorales el próximu 20-P”, espliquen dende la organización.

Esta midida supón que “los votos emitíos en llingua asturiana sedrán consideraos válidos, pero nun podrá ufrise les papeletes en llingua asturana nos Colexos Electorales”, lo qu’Andecha Astur cuida “supón que non solo dicha Xunta Electoral nun asume la so obligación democrática d’ufrir a los asturianos la posibilidá d’emplegar la so llingua nacional pa votar, sinon que prohibe qu’otres organizaciones, Andecha Astur nesti casu, puean suplir esta deficiencia”.

Pa la formación política “esti alcuerdu la Xunta Electoral aplica un auténticu “apartheid” llingüísticu darréu que permite utilizar les papeletes n’asturianu siempres que se traigan de casa, pero prohibe la so presencia pública nos llugares destinaos a la votación”.

Pa esta organización política ta claro que si nun prohibe tamién les propies papeletes débese a la sentencies del Tribunal Costitucional español que nel añu 2000 dío-y la razón a Andecha Astur nel sen de poder utilizar l’asturianu nes elecciones.

Énte esta nueva “espresión de l’anormalidá democrática que se vive n’Asturies, na que se mos ñeguen los nuesos drechos llingüísticos más evidentes”, espliquen dende AA, la formación decidió recurrir esti alcuerdu.

L’Academia de la Llingua Asturiana emitió esta tarde un comunicáu nel que da la so opinión sobre los problemes xurdíos col emplegu del asturianu per parte d’aquellos ciudadanos asturianos que quieran exercer el so derechu al votu emplegando esta llingua, denunciaos por Andecha Astur. L’ALLA amuesa nesti testu el so más “fondu rechazu” y tresllada “a la opinión pública asturiana y española” lo que califica d’“actitúes discriminatories que de contino vien sufriendo l’idioma de los asturianos en cada ocasión en qu’ésti quier ser usáu en situaciones d’especial relevancia política y alministrativa”.

Pa la institución asturiana “acordies col so mandáu estatutariu de mirar polos derechos llingüísticos de la asturianos”, encamienta “cola mayor enerxía” a la Xunta Electoral Provincial que faiga “los mandaos afayadizos pa qu’esa situación d’anormalidá pa col asturianu se corrixa urxentemente”.

Amás, l’Academia, fai alcordanza nesti comunicáu de que “situaciones como éstes sedríen impensables nuna situación d’oficialidá de la llingua de los asturianos”, polo que-y pide a la Xunta Xeneral del Principáu y a les fuercies polítiques que n’ella s’alluguen que, d’una vegada, s’apauten p’algamar un estatus definitivu d’oficialización del nuesu vieyu idioma”.

L’agrupación llocal de Bloque por Asturies-UNA en Siero ta acabante facer una denuncia pol incumplimientu de la toponimia asturiana oficializada nel so conceyu nel BOPA del 11 d’agostu del 2009 y dempués d’un llargu procesu nel que recuerden “implicóse a muncha xente”. Y ye que pa Bloque-UNA albidra “inalmisible” que dempués de dellos años cola toponimia oficializada “se llanten unos lletreros nel encruz de Mudarre faciendo burlla de tou esti llabor y poniendo nomes que yá nun son oficiales va años”.

Nel encruz mencionáu apaecen señalizaos varies veces “Pola de Siero”, “Gijón”, “Langreo” y “Gargantada”. Los decretos d’oficialización de la toponimia de Llangréu/Langreo y Gijón / Xixón son tovía anteriores al de Siero (25 de xunetu del 2005 nel casu del primer conceyu y del 20 de setiembre del 2006 pal segundu). “Dende eses feches los únicos nomes oficiales son La Pola Siero, Llangréu/Langreo, Gargantá y Gijón / Xixón”, recuerden dende Bloque-UNA.

Ye por ello que piden a la corporación de Siero que nun “nun inoren los sos alcuerdos plenarios y los decretos del Conseyu de Gobiernu del Principáu d’Asturies”, yá que “Nun pue ser parte consentidora nesti atropellu a la llexislación, a la toponimia tradicional d’Asturies y al llabor y l’esfuerciu del propiu Conceyu”. Por ello piden al gobiernu llocal que se ponga en contactu colos responsables estatales de la obra ya “igüen esta situación y eviten que se reproduza nel futuru”.

En dos díes, dos comunicaos sobre la cuestión llingüística. La formación Foru Asturies paez esforzase por esparder el so mensaxe no que cinca a la llingua asturiana. Nel últimu comunicáu, tituláu “L’asturianu, patrimoniu común” y espublizáu en versión billingüe, asturianu y castellán, Teresa Alonso, diputada y responsable de Política Llingüística del partíu de Cascos fala de la necesidá de “algamar un consensu de mínimos” y del “compromisu moral” qu’han tener los asturianos “de tresmitir l’asturianu a los sos fíos”.

Esti ye’l comunicáu completu:

L’ASTURIANU: UN PATRIMONIU COMÚN

Queremos que l’asturianu pase de considerase un problema a ser lo que realmente ye: una parte esencial del nuestru patrimoniu cultural. Un patrimoniu cultural que los asturianos heredamos, como pueblu y como país, de los nuestros mayores y que tenemos el compromisu moral de tresmistir a los nuesos fíos.

Promover l’asturianu non nos empequeñez. Engrandeznos. Fomentar la llingua asturiana nun nos cierra les puertes al mundu. Abrenosles. Defender el nuesu idioma vernáculu nun nos fai menos españoles. Fainos más. La nuesa riqueza llingüística tien de sirvir como preséu vertebrador d’Asturies; pero tamién d’España, proxectándose al restu de comunidaes autónomes y a la esfera internacional.

Llevamos demasiaos años dando-y vueltes a la tema del asturianu ensin terminar d’aportar nenguna solución. Y nun puede ser tan difícil. Nun lo ye, de fechu. Tenemos un estatutu que nos manda promover el bable. Disponemos d’una llei d’usu que regula la manera de facelo. Y esfrutamos d’una Constitución que considera que’l nuestru idioma propiu tien de ser oxetu d’especial respetu y protección. Nun podemos facer del nuestru idioma una arma de confrontación. El futuru del nuestru patrimoniu llinguísticu nun pue depender de los equilibrios ente partíos: L’asturianu nun pertenez a nenguna ideoloxía. L’asturianu pertenez a tolos asturianos. Por eso faise necesariu, por eso faise imprescindible, por eso faise obligatoriu algamar un consensu de mínimos tocante a esta cuestión.

María Teresa Alonso Pérez

Comunicáu na páxina de Foru Asturies

Esti 24 d’ochobre cumpliéronse 100 díes del nomamientu de les persones responsables de les conseyeríes del nuevu gobiernu asturianu. Y dende la Xunta pola Defensa de la Llingua quieren facer un analís de los resultaos de les oportunes entrevistes cola Conseyera d’Educación y col Director Xeneral de Política Llingüística, responsables directos del enseñu y de la normalización social de la llingua asturiana, pa tresmiti-yos les correspondientes demandes “pa facer frente a la situación actual de marxinación y falta de derechos”. Les impresiones que treslladaron na XDLLA a los medios de la que salieron d’aquellos conceyos foron relativamente positives. Pero nestes feches, “ta caducando aquel marxe d’enfotu”, y por mor d’ello dicen querer “empezar a ver midíes y fechos concretos que confirmen qu’aquelles impresiones primeres nun yeren namás fumu”.

Ye’l momentu de los fechos pala XDLA: “ye’l momentu de saber si tamos o non énte l’enésimu engañu al asturianu y a los derechos de los falantes. Ye’l momentu p’alcordase de la llacerosa situación que sufre l’idioma nel sistema educativu, nos medios de comunicación y na propia Alministración. Ye’l momentu pa que les Alministraciones a lo menos tengan a bien dar cumplimientu al marcu llegal vixente. Ye’l momentu de que los falantes d’asturianu dexen de sentise y de ser ciudadanos de segunda; y pa eso fai falta que paren les declaraciones d’intenciones baleres, les dilaciones, los xuegos florales, los cálculos interesaos y les estratexes electoralistes”.

Nuna nota de prensa asoleyada esit día, la XDLLA reflexona que “nunos tiempos complicaos no económico como nos que tamos, nun podemos consentir que los recortes sían una sida pa la vulneración de los derechos de les persones nin pa los incumplimientos de la llei. Hai que recordar que la gran mayoría de midíes normalizadores, con voluntá política, tienen un coste cero pa los presupuestos y la ciudadanía: cumplir les lleis, respetar la toponimia oficial, visualizar el idioma nos medios y na Alministración pública, nun suma nengún gastu y sí amiesta derechos, oportunidaes y desarrollu. Pa esto namás hai que tener presente, nes acciones de gobiernu, la importancia d’un patrimoniu fundamental de tola ciudadanía que, pola so fraxilidá, necesita d’un compromisu inequívocu na so difusión per toles cañes de les alministraciones, los medios de comunicación y el sistema educativu”.

Pala Xunta Pola, “llevamos bien d’años viendo pasar gobiernos, conseyeríes, direcciones y oficines…. y vamos siguir viendolos pasar porque la llingua asturiana siempre ta ehí, la llingua sigue y lo que cuenta ye lo que se fai mientres se ta en cargu. La llingua ta ehí siempre, pero amenazada polos mesmos peligros: falta d’igualdá xurídica, de presencia na vida pública, de normalidá na enseñanza y nos medios de comunicación, falta de visibilización na Alministración… Si se sigue ensin facer nada, dexando’l tiempu pasar, faciendo dexación de funciones, la complicidá y culpabilidá pa cola agonía del idioma va ser la mesma que la de munchos responsables anteriores que tampoco quixeron o supieron da-y la vuelta a esta desastrosa situación”.

La nota de prensa de la XUnta Pola fina diciendo que “ye un tiempu pa pensar, pero tamién pa cumplir, pa facer… Cumplir les lleis y decretos que nos asisten y que, sistemáticamente, la propia Alministación desprecia y inora. Facer y tomar les determinaciones que faigan que la llingua asturiana tea presente con normalidá en tolos aspectos de la vida pública y que la población que s’espresa nella tenga asegurada la so igualdá xurídica al traviés d’un marcu d’oficialidá nel Estatutu d’Autonomía”.