Política

La organización Iniciativa pol Asturianu anunció nuna nota de prensa que dempues d’estudiar los programes de los toles formaciones polítiques que se presenten a les elecciones autonómiques del viniente domingu 25 de marzu detecta que “cada vegada ye mayor el consensu que xenera la llingua asturiana y la so normalización”. L’espaciu dedicáu a la política llingüística ye cada vegada mayor y los compromisos más importantes, espliquen. Namás un partíu, UPyD, espresa la so posición contraria a la oficialidá de forma esplícita nel programa, mientres que 6 de los 10 partíos más votaos na anterior convocatoria, lleven nel programa la oficialidá del asturianu.

Iniciativa pol Asturianu recuerda tamién que “FSA-PSOE, FORO y PP, son les úniques fuercies que tovía nun asumen la necesidá d’oficialidánel so programa, anque incluyen cada vegada más acciones empobinaes a la normalización del idioma”.

D’ente tolos programes que pudieron consultar destaquen “la presencia en toos ellos de midíes favoratibles a la normalización del asturianu”, especificando la necesidá d’oficialidá ente los sos promeses electorales: Izquierda Xunida, EQUO-Los Verdes, Bloque por Asturies-UNA-Verdes, IDEAS, URAS, PCPE y Partido da Terra.

Dende Iniciativa pol Asturianu recuerden que les encuestes sociollingüístiques demuestren que “más del 60% de los asturianos apoyen que l’asturianu se convierta en llingua oficial n’Asturies”, polo qu’entienden que tolos partíos “habríen responder a esta demanda social que ye la ferramienta de la oficialidá, imprescindible pa que podamos conservar l’importante patrimoniu cultural y económicu que ye l’asturianu”.

Iniciativa pol Asturianu aconceyó con tolos partíos que quixeron facelo nesta campaña y ufriendo’l so asesoramientu, amás de pidir midíes más ambicioses en política llingüística, xunto a la yá mencionada necesidá de xenerar un consensu alredor de la necesidá de que se-y reconoza al asturianu l’estatus d’oficialidá, teniendo en cuenta que mientres han dase otros pasos y qu’esta nun va ser la solución definitiva pal idioma, pero sí un pasu imprescindible.

Dellos representantes d’Iniciativa pol Asturianu participaron nun conceyu colos responsables de Política Llingüística de la formación política Foru esti martes pasáu, 13 de marzu. Esti conceyu encuádrase dientro de la petición fecha pol colectivu a les 22 formaciones polítiques que se presenten a les elecciones autonómiques n’Asturies el proximu 25 de marzu. Pel momentu, namás Foru ya Izquierda Xunida respondieron a la petición de conceyu llanzada pol colectivu de reivindicación llingüística a les formaciones que van acudir a les urnes esti domingu viniente.

Nel conceyu, posterior a otru colectivu celebráu esti llunes en Xixón, nel que tamién participó Iniciativa pol Asturianu, recordóse a los representantes de Foru la necesidá de que les fuercies polítiques usen l’asturianu nos sos anuncios electorales en valles, televisión, radio, redes sociales, amás de nes intervenciones públiques de los sos llíderes, como meyor forma d’amosar el so compromisu col idioma.

Amás, Iniciativa pol Asturianu pidió a Foru qu’incluya midíes más ambicioses pa normalizar l’asturianu nel so programa, recordando qu’hai munches posibilidaes pa facelo ensin qu’esto suponga nengún gastu pa l’alministración. Amás, recordóse-yos que l’estatus d’oficialidá, si bien nun ye una solución definitiva pal idioma d’Asturies, ye imprescindible p’asegurar el futuru del asturianu.

Iniciativa pol Asturianu ufrió tamién nesa carta’l so asesoramientu y collaboración pa dar asesorar en cuestiones llingüístiques a la formación.

Jorge Espina, voceru d’Izquierda Xunida na Casa Conceyu de Xixón denuncia la desapaición del topónimu oficial y billingüe de Xixón, (Gijón/Xixón) a favor de la forma acastellanada, dende la llegada al gobiernu del conceyu de Foru Asturies, con Carlos Rubiera como conceyal d’educación, cultura y festexos, responsable de les competencies de Política Llingüística. Espina denuncia la desapaición de “Xixón” de “les campañes turístiques y hasta les comunicaciones oficiales de la institución”.

Por ello na próxima sesión del plenu, esti vienres, va entrugase “cuála ye la política llingüística de Foru”, pues dende Izquierda Xunida tienen “munches duldes”.

Pal voceru d’Izquierda Xunida ye “inesplicable” la situación y entrúgase cómo Carlos Rubiera, del que dixo “siempres foi un gran defensor de la llingua y unu de los primeros escritores n’asturianu”, puede nun tar dando pasos pa plantegar propuestes nueves.

Espina espera qu’esti vienres y col alderique plantegáu “tolos grupos puedan fixar posición sobre la política llingüística”.

La conceyala de Foru en Corvera, Teresa Domínguez, criticó estos díes que “la continua perda de sovenciones autonómiques per parte del Conceyu de Corvera”. “Si nel mes d’ochobre, el nuesu conceyu, a decisión del Alcalde, Sr. Vega, perdía una sovención de la Conseyería d’Educación pa la Escuela Municipal de Música, agora trátase d’un arrenunciu a una sovención concedida pol Gobiernu del Principáu pa la realización de distintes actividaes empobinaes a la normalización social del asturianu, como la Rotulación Toponímica de Dependencies Municipales o la Reedición del Llibru del Naciatu, ente otres actividaes”, esplicaron los responsables de Foru en Corvera.

En Foru Corvera dicen nun entender “que se critique al Gobiernu autonómicu de Foru Asturies por nun potenciar tolo relativo a la nuesa cultura y tradiciones, cuando en Corvera’l PSOE col sofitu d’IX, arrenuncien a les sovenciones concedíes pa la normalización de la nuesa llingua”. Teresa Domínguez solicitó conocer la razón d’esti arrenunciu nel postreru Plenu celebráu’l pasáu 28 de febreru y nun recibió nenguna contestación.

Dende l’alcaldía de Corvera respondióse diciendo que taba en marcha la contratación de personal pa la Casa de la Llingua, el serviciu de normalización del concyeu que nestos momentos nun ta funcionando, anque’l gobiernu llocal afirma qu’esta instalación “ye una prioridá”.

Pa los responsables del Conceyu la perda de les sovenciones “supunxo inclusive un aforru pa la institución, pues nun hebo ponese la parte complementaria a la sovención”.

La propuesta d’Izquierda Xunida pa la TPA ye crear una segunda canal n’asturianu, siguiendo’l modelu vascu y apartándose del de les demás televisiones autonómiques de comunidaes con una llingua propia, como Valencia, Cataluña, Baleares o Galicia. Esta segunda canal taría dedicada a conteníos culturales y deportivos. En cuantes al modelu de conteníos, apuesten por una televisón “qu’amuese’l so compromisu cola realidá d’Asturies”.

La organización Iniciativa pol Asturianu acaba de facer llegar a toles formaciones polítiques que se presenten a les elecciones a la Xunta Xeneral, una carta na que-yos soliciten l’usu del asturianu na campaña electoral viniente, de cara a les elecciones del 25 de marzu. Na carta la organización esplica a los partíos la necesidá de da-y presencia pública al asturianu dende l’ámbitu políticu, yá que, espliquen “nun se puede dar la espalda al idioma del pueblu al que se quier llevar a les urnes”.

L’asturianu, como elementu patrimonial de tolos asturianos ha tenese en cuenta a la hora de dirixise a ellos, recuerden, “tanto dende les instituciones públiques, como dende les privaes”, y ye por ello que piden a les fuercies polítiques qu’usen l’asturianu nos sos anuncios electorales en valles, televisión, radio, redes sociales, amás de nes intervenciones públiques de los sos llíderes.

Dende Iniciativa pol Asturianu espliquen que nun ye la primer vegada que partíos políticos usen l’asturianu en campaña, y piden agora “que se dea normalidá a la nuesa llingua nel procesu electoral, pues esta ha ser patrimoniu de toos”, recordando amás a les fuercies polítiques, que les encuestes sociollingüístiques recueyen la voluntá de los asturianos de que los sos políticos s’espresen, polo menos dacuando, na nuesa llingua.

El programa de política llingüística

Na mesma carta, Iniciativa pol Asturianu pidió a los partíos políticos “qu’incluyan midíes más ambicioses pa normalizar l’asturianu”, recordando qu’hai munches posibilidaes pa facelo ensin qu’esto suponga nengún gastu pa l’alministración.

Amás, recordóse-yos a les fuercies polítiques, que l’estatus d’oficialidá, “si bien nun ye una solución definitiva pal idioma d’Asturies, ye imprescindible p’asegurar el futuru del asturianu”. Iniciativa pol Asturianu ufrió tamién nesa carta’l so asesoramientu pa dambes cuestiones.

Cayo Lara, Coordinador Federal d’IX, realizó esta mañana, n’Uviéu, un llamamientu a la rebeldía de les comunidaes autónomes frente a los retayos en polítiques sociales, educación y sanidá que va llevar a cabu’l Gobiernu de Mariano Rajoy coles mires de cumplir col déficit.

El tamién voceru parlamentariu d’IX nel Congresu aseguró que les alministraciones autonómiques “nun son responsables” del déficit del país como sostien l’executivu central y soporten un porcentaxe de gastos en servicios públicos que xube hasta’l 33% cuando l’estáu gasta’l 22% y les autonomíes tienen un techu de déficit del 1,3% del so PIB y l’estáu el 4,8%.

En rueda de prensa, Lara, almitió que tanto comunidaes del PSOE como del PP cometieron “escesos” nos sos gastos, recordó que les autonomíes representen anguaño’l 33 per cientu del gastu públicu n’España y que lo dediquen sobremanera a financiar la sanidá, la educación y los servicios sociales.

Pela so parte, l’Estáu, recordó, gasta’l 22 per cientu de los fondos públicos n’España, pero pal pasáu añu afitóse como oxetivu un déficit máximu del 4,8% del PIB frente al 1,3% qu’impunxo a les comunidaes autónomes.

Según Lara, si’l Gobiernu central quier retayar gastos puede facelo en competencies propies como les polítiques de defensa y dispon amás de capacidá normativa pa llograr más ingresos recuperando tributos esaniciaos sobre les rentes del capital o fomentando seriamente la llucha contra’l fraude fiscal. “Solo colos 90.000 millones de fraude fiscal al añu nesti país cubriría’l déficit públicu”, desplicó’l Coordinador Xeneral d’IX n’Uviéu.

El candidatu d’IX d’Asturies a la presidencia d’Asturies,Jesús Iglesias, acusó güei al Gobiernu d’Álvarez Cascos de tomar como rehenes ala sociedá asturiana, de “apatayar” a los ámbitos de la sociedá vertebraos en redol a asociaciones, ongs o entidaes de distintu tipu quereciben tresferencies del Principáu al retener los creitos que tendríen derecibir, y de tar realizando “una agresión ensin predecentes” a losasturianos.

Iglesias realizó estes declaraciones en axuntándose cola Presidenta de l’Academia de la Llingua, una de les múltiples instituciones y asociaciones a les que’l Gobiernu d’Álvarez Cascos va retayar el sopresupuestu. Jesús Iglesias denunció que la prórroga presupuestaria de ForoAsturies inclúi un alcuerdu de retención de creitu del 20% a toles entidaes,asociaciones y On’g que recibíen una tresferencia a partir de la cantidá más baxa que resulte de les cifres del presupuestu 2011 o del proyectu refugáu pa 2012. “De la cifra más baxa, van quitar un 20%, lo que nel casu del’Academia significa qu’a partir d’un retayu del 27% del 2012 hai que suma-y otru 20%”, puntualizó Iglesias.

Iglesias sorrayó que Foru ta intentando convertir a lesasociaciones, ong’s y entidaes en prisioneros de la guerra de Foru col restu de fuerces polítiques p’amontar la presión por que se cometa “una illegalidá”, que la diputación permanente apruebe una llei d’endeldamientu. “Ye daqué refugable dende la perspectiva llegal y acencielles despreciable dende la iniciativa política”, afirmó’l candidatud’IX.

Pal candidatu de la coalición, la única iniciativa posible nesti momentu ye “que los ciudadanos tomen nota’l 25 de marzu” y voten un gobiernu respetuosu cola sociedá asturiana y que ponga los intereses de la sociedá asturiana per delantre de cualquier considerancia tactista, electoralista y pactista. “A partir d’ende, va ser posible retomar tou, dende llevantar la retención de creitu, establecer n’otros términos la prórroga ya inclusive ,si hai dilixencia aprobar otru presupuestu pa 2012 que solucione estos problemes que ta xenerando deliberadamente esti Gobiernu”, sostuvo. Dela mesma, dixo qu’Álvarez Cascos esforciase en magnificar el problema paintentar utilizar esa situación catastrófica como elementu de presión”.

“Creemos que los que carecen la retención de creitu y viven realidaes que ponen en riesgu la so propia superviviencia nun se van dexar manipoliar y van saber quién ye responsable esclusivu d’esta situación:el Gobiernu de Foru y Francisco Álvarez Cascos”, advirtio el candidatud’IX d’Asturies.

Nel casu de l’Academia de la Llingua, Iglesias afirmó que laxestión del Executivu “desmiente la pretendida vocación rexonalista y el supuestu compromisu de Foru cola cultura asturiana”, actitú que contrapuso cola d’IX que, asegura, caltien “cola mesma intensidá”el so compromisu col asturianu y la so esixencia de que sía llingua oficial del Principáu xuntu al castellán.

El presidente de l’Academia de la Música y voceru de la Xunta directiva de la SGAE desprecia l’asturianu y echa la culpa del desprestixu de los Premios de la Música a la esistencia del premiu al cantar n’asturianu coles siguientes declaraciones:”el premio a la mejor canción en bable no es muy seductor”. Una desclaraciones feches al periódicu El País frente a les que la Xunta pola Defensa de la Llingua Asturiana pide una rectificación inmediata “o la dimisión de Sabino Méndez”, responsable d’unes instituciones que, según la nota asoleyada pola Xunta “ganaron a pulsu’l desprestixu ensin falta d’agora buscar falsos culpables”.

Declaraciones n’El País

L’asociación N’Ast, n’escritu presentáu énte la Xunta Eleutoral Provincial solicitó formalmente a la mesma “que facilite a tolos asturianos l’exercer el so drechu a votar n’asturianu, emitiendo les papeletes eleutorales de toles candidatures presentaes a estes prósimes eleiciones del 25 de marzu en llingua asturiana y distribuyéndoles con normalidá nos colexos eleutorales”, pa dar acabu “d’una vegada” a lo que califiquen de “situación predemocrática que carecemos anguaño”.

Con esta petición N’Ast aguarda que se se fine “cola contradictoria situación agora mesmo esistente na que se validen les papeletes en llingua asturiana al empar que s’impide la so pre¬sencia nos colexos eleutorales”, lo que supón pa N’Ast “una incaltenible práutica d’apartheid llingüísticu col que se vulneren los llexítimos drechos y llibertaes de los asturianos en materia llingüística”.