Política

La Xunta pola Defensa de la Llingua Asturiana (XDLA) valoró al traviés d’un comunicáu y “de forma mui negativa” el determín de la Xunta Asesora de Toponimia del Principáu d’Asturies (XAT) de proponer al Conceyu de Carreño una forma doble pa Quimarán y El Pieloro, de manera que sedríen oficialmente Quimarán/Guimarán y El Pieloro/Piedeloro. Pa la organización en defensa de los derechos llingüísticos ye “un pasu atrás grave”, lo que consideren “modificación de formes que yá son oficiales dende’l 2005, sobre too cuando la propuesta de forma doble vien dende la mesma XAT, creada pa recuperar de manera rigorosa la forma tradicional de los nuestros nomes de llugar”.

De magar empezó’l procesu de recuperación de la toponimia tradicional nel 2004 foron munchos los conceyos que dieron el pasu de recuperar la forma popular na que los vecinos nomaron los sos llugares. Precisamente, foron los conceyos de Carreño, Llanes y El Franco los primeros de toa Asturies en ver oficializada la so toponimia tradicional al traviés d’un decretu publicáu nel BOPA en mayu de 2005. Hai que recordar que’l procesu de recuperación de los nomes tradicionales nun parte namás del criteriu de la XAT. Ella ye la institución encargada d’asesorar a l’Alministración sobre la toponimia del país, pero depués ye’l Conseyu de Gobiernu’l que dictamina la forma oficial, teniendo en cuenta los dictámenes de la propia Xunta de Toponimia, de los conceyos implicaos y les aportaciones de los ciudadanos, al traviés d’un periodu de consulta, como se fixo nel casu de Carreño. L’espediente de Carreño, al nun alcontrar oxeción nenguna, aprobóse ensin problema.

Sicasí, agora, y según la XDLA “gracies a la campaña de manipulación de dalgún mediu de comunicación que semó la confusión ente los vecinos y politizó un procesu que surdió del consensu y la necesidá de recuperar el nuestru patrimonio oral”, la XAT decide apostar por una denominación doble. Amás, según la nota de prensa del Gobiernu, failo por considerar les dos formes tradicionales: Quimarán y Guimarán, y El Pieloro y Piedeloro. La Llei del Asturianu, y la práctica de la XAT, nun almite oficializar dos formes tradicionales d’un topónimu, sinón la forma tradicional y la forma acastellanada. Y, nel casu de Quimarán o El Pieloro, como bien demostró’l trabayu de campu de la propia XAT, eses son les formes teníes por tradicionales pola xente d’eses parroquies. Pa la XDLA, esti cambiu d’actitú y l’apueste por una forma doble pola XAT ye un pasu atrás que sema la confusión sobre’l procesu y qu’abre una vía ensin xacíu. Al recuperar la toponimia, si hai una campaña mediática en contra, con poner una forma doble, l’asuntu ta resueltu.

La vocera de Bloque por Asturies-UNA Yolanda Huergo tresmitió’l pesar de la coalición pol fallecimientu del ex Presidente d’Asturies Sergio Marqués. Igualmente treslladó a los sos familiares y allegaos el pésame pola so perda.

Dende Bloque por Asturies-UNA nun podemos más que llamentar el fallecimientu de Sergio Marqués y amosar el nuesu respetu pola so figura como Presidente de Asturies, que siempre supón un compromisu col nuesu país y polo tanto dignu de reconocencia.La coalición súmase a toles persones que tán amosando’l so pésame por esta perda y el so respetu hacia la figura del ex Presidente asturianu.

N’Ast denuncia lo que camienta “un nuevu episodiu de la permanente invasión flamenquista”. En Noreña va cellebrase estos díes, 4, 5 y 6 de mayu un mercáu flamencu rocieru por decisión del gobiernu del conceyu, dirixíu pol PSOE, y que dende N’ast recuerden “llamentablemente famosu poles sos agresiones al conxuntu del patrimoniu cultural y llingüísticu del País”.

La organización camienta que “lo afayaizo nun país normal, ello ye, nun país non sometíu a dengún procesu de colonización cultural, sedría entamar espacios comerciales y festivos que vitalizaren tanto los elementos culturales autóctonos como al pequeñu comerciu llocal”, polo que denuncien que’l gobiernu llocal “opte por amestase a la dinámica flamenquista y promover un eventu aculturizador en collaboración cola empresa Heracles e Hispania”.

N’ast llamenta que “de siguise con esti procesu del flamenquismu, que nun hai qu’escaecer que ye la variedá más rancia y reaccionaria del nacionalismu españolista, va acabar hasta sustituyendo los elementos culturales asturianos na mesma Cuadonga, trubiecu de la nacionalidá asturiana”.

Poro, consideren que la situación ye “incaltenible” y dende N’Ast faen un llamamientu los vecinos y vecines del conceyu de Noreña pa manifestase viviegamente escontra esti eventu. “La Hestoria enséñamos que los pueblos invadíos nun tienen más camín pa evitar la so desapaición qu’el de la movilización y la llucha”, rematen dende N’ast na so nota de prensa al rodiu d’esta cuestión.

L’asociación cultural Faceira, que trabaya en Lleón pol futuru del nuesu idioma, informó que ta acabante recibir contestaciones negatives de les Conseyeríes de Cultura y Turismu y d’Educación de la Xunta de Castiella y Lleón a dos peticiones reclamando’l cumplimientu del artículu 5.2 del Estatutu d’Autonomía d’esta comunidá, y denuncia “la política arbitraria y discriminatoria de la Xunta de Castiella y Lleón contra los falantes de lleonés”.

Faceira presentó en septiembre de 2011 dos escritos énte les Conseyeríes d’Educación y de Cultura y Turismu de la Xunta de Castiella y Lleón, reclamando’l cumplimientu del artículu 5.2 del Estatutu d’Autonomía nel que se dispón que “el lleonés va ser oxetu de protección específico per parte de les instituciones pol so particular valor dientro del patrimoniu llingüísticu de la Comunidá. La so protección, usu y promoción van ser oxetu de regulación”.

Nestes peticiones, y según espliquen dende Faceira, interesáronse por conocer “el desenvolvimientu normativo del Estatutu d’Autonomía en materia de protección, promoción y usu del lleonés, l’adopción d’actuaciones efectives de promoción cultural, según la introducción del lleonés na enseñanza reglar en condiciones asemeyaes a les de la llingua gallega”, que s’imparte como asignatura optativa nos centros d’enseñanza primaria y secundaria dende va una década nes zones de Lleón y Zamora onde se fala esti idioma.

La Conseyería de Cultura respondió “con una simple carta na que nun se daba contestación a la petición fecha”. La Conseyería d’Educación, pela so parte, “directamente nun resolvió nel plazu llegal previstu la petición que se-y fizo”, polo que Faceira, “demandó n’avientu de 2011 a esta Conseyería por frayar tanto l’artículu 29 de la Constitución Española, como la Llei Orgánica 4/2001, de 12 de payares, reguladora del Drechu de Petición, incoándose’l procedimientu de Drechos Fundamentales 6/2011 que se sigue nel Xulgáu de Contencioso-Alministrativu númberu 1, de Valladolid”.

La Conseyería d’Educación, espliquen dende la organización lleonesista “al tener constancia de que fuera demandada xudicialmente y pa evitar la so conderga, dictó en marzu de 2012 una entainada resolución denegando la introducción del lleonés nel sistema educativu”.

Pa Faceira “la Xunta de Castiella y Lleón caltien no que cinca al idioma lleonés una política arbitraria, pues nun cumple l’artículu 5.2 del Estatutu alegando pa ello escuses mendaces que anulen dafechu’l sen de la norma, frayando amás de manera absoluto la Carta Europea de les Llingües Rexonales o Minoritaries del Conseyu d’Europa”, tratáu internacional soscritu pol estáu español nel añu 2001 y que recuerden “obliga a adoptar midíes actives de defensa y promoción de les llingües españoles con reconocencia estatutario, como ye’l casu del lleonés, y que la Xunta de Castiella y Lleón nun aplica a esta llingua”.

L’actitú de la Xunta de Castiella y Lleón ye pa Faceira “discriminatoria, una y bones énte la esistencia de llingües minoritarias en Castiella y Lleón, la Xunta protexe y promociona al traviés del sistema educativu de la Comunidá a dos d’elles, el gallegu y el vascu (idioma non reconocíu pol Estatutu de Castiella y Lleón), y niega la más mínima protección al lleonés, que ye la única llingua minoritaria a la que l’Estatutu reconoz un particular valor dientro del patrimoniu llingüísticu de la Comunidá”.

Esta discriminación, denuncien, “escuende una fonda hostilidá contra unu de los elementos de la personalidá cultural lleonesa”..

La UNESCO señala al asturlleonés nel so Atles de les llingües del mundu en peligru (París, 2010), como una de les llingües minoritarias del estáu español n’inminente peligru de desapaición, idioma que cunta en Lleón y Zamora con unos 25.000 falantes.

“La discriminación practicada pola Xunta de Castiella y Lleón, espliquen dende Faceira- evidénciase nes cantidaes que destina al programa de promoción de la llingua gallega nel ámbitu educativu nes comarques d’El Bierzu (Lleón) y Senabria (Zamora) nos cursos 2007-2008, 2008-2009, 2009-2010 y 2010-2011, y que fueron, respectivamente, de 452.767 euros, 537.245 euros, 578.298 euros y 589.288 euros; pal presente cursu escolar la previsión ye la de destinar a la promoción del gallegu 560.644 euros. Coles mesmes, en marzu de 2011 el presidente de Castiella y Lleón, Juan Vicente Herrera, por cuenta de la inauguración d’una escuela en Burgos onde s’enseña la llingua vasca afirmó que “nun hai nengún inconveniente por parte de la Xunta a collaborar col Gobiernu vascu na enseñanza del euskera, de la mesma manera que se ta faciendo en dalgunos otros centros educativos en Miranda de Ebro o n’otres zones estremeru de la comunidᔠ(ABC y El Mundo, ediciones de 9 de marzu de 2011).

Por embargu, denuncien, “dende la reforma del Estatutu d’Autonomía de Castiella y Lleón nel añu 2007, el presupuestu destináu pola Xunta de Castiella y Lleón a la protección y promoción del lleonés foi de cero euros”, anque se presentó dende la oposición parllamentaria una enmienda a los mesmos pa introducir una partida de 125.000 euros dedicada a la promoción y protección del lleonés, que foi refugada “ensin nengún argumentu pol Grupu parllamentariu del Partíu Popular”. Nel restu del dominiu llingüísticu asturleonés, Asturies y Miranda do Douro (Portugal), sí esisten midíes reales de protección y promoción d’esta llingua, incluyida la so presencia nel sistema educativu.

L’Asociación Faceira anuncia que va denunciar énte instancies estatales ya internacionales el repitíu incumplimiento del artículu 5.2 del Estatutu y de la Carta Europea de les Llingües Rexonales o Minoritaries del Conseyu d’Europa, “por mor de la política arbitraria y discriminatoria de la Xunta de Castiella y Lleón contra los falantes de lleonés”.

Esta mañana fízose l’escrutiniu de los votos de la emigración y el resultáu del occidente yera la noticia más esperada. Los votos de la emigración, 290 pal PSOE y 44 pa Foru, ficieron perder un diputáu a la formación de Cascos nel occidente, polo que los bloques formaos de Foru con PP y FSA-PSOE con Izquierda Xunida queden empataos a 22 diputaos. El diputáu d’UPyD, el partíu de Rosa Díez, va ser quien tenga la llave pa escoyer a los partíos que van gobernar Asturies los trés años próximos.

foto1>La FSA-PSOE ganó les elecciones n’Asturies con 16 diputaos, 1 más qu’en mayu de 2011. FORU baxó 3 diputaos, quedando con 13, y el PP caltién los 10 colos que quedó dempués de perder la metá de los diputaos na convocatoria anterior. Izquierda Xunida fízose tamién con un diputáu más y tendrá 4 no que queda de llexislatura. La gran novedá ye la entrada na Xunta Xeneral d’UPyD, con 1 diputáu, dempués de quedar a unos quinientos votos en mayu de 2011.

Colos resultaos actuales la suma de FORU y PP daría mayoría absoluta, con 23 diputaos, pero entá queden por sumase los votos de la emigración, que podríen dar al PSOE un diputáu más, a costa de PP o FORU nel occidente. Esto supondría que los bloques FORU-PP y PSOE-IX sumaríen en dambos casos 22 diputaos, tando en manes d’Ignacio Prendes, diputáu d’UPyD, decidir quién gobierna n’Asturies. Les posibilidaes de pactu y el resultáu final d’estes elecciones sabránse a lo llargo d’esta selmana.

Los partíos estraparllamentarios

L’orde de los partíos estraparllamentarios ye’l siguiente: Escaños en blanco, Equo-LV, Bloque por Asturies-UNA-Los Verdes, PACMA, PCPE, IDEAS, Andecha Astur, URAS, PDYC, MSR, SAiN, UCE, AEAR, Partíu Humanista, Partido da Terra Eo-Navia y PFyV.

L’asturianismu políticu queda entá más tocáu qu’en mayu de 2011. Bloque por Asturies-UNA-Los Verdes pasa de 6.191 y l’1’03% de los votos, a menos d’un 0’32% y 1.639 votos, Andecha Astur queda con 668 votos, y la URAS, que se presentaba agora ensin el PAS, pasa de los 2.953 votos colos que se fizo la coalición a 444 votos. Na fastera occidental, el Partido da Terra consigue namás 13 votos.

Resultaos completos de les elecciones

Per primer vegada dende l’algame de l’autonomía d’Asturies, el país va enfrentase a la convocatoria d’unes elecciones fuera de los plazos habituales, que coinciden siempres coles elecciones nos conceyos. Dempués de menos d’un añu de gobiernu, Foru xuégase agora la so continuidá, mientres PSOE y PP traten, unos de recuperar el gobiernu qu’ocuparon cuasi trenta años, y otros superar al partíu de Cascos pa lliderar el futuru gobiernu.

Mientres, Izquierda Xunida espera meyorar los sos resultaos y otros grupos, como UPyD, IDEAS o Bloque por Asturies-UNA-LV busquen entrar na Xunta Xeneral con polo menos un diputáu. El domingu 899.939 asturianos, n’Asturies, y 89.793, fuera de les nueses fronteres, tienen la pallabra última nes 1.615 meses instalaes en tol territoriu del país.

En total van escoyese 45 diputaos, repartíos agora de la siguiente forma: Foru 16, FSA-PSOE 15, PP 10 ya IX 4.

Asturnews va facer esti domingu un siguimientu de les elecciones y de los resultaos al traviés de la so cuenta en twitter @asturnews

L’asturianu medra nos programes de los partíos políticos

Dellos representantes d’Iniciativa pol Asturianu participaron en dos conceyos celebraos esti xueves con, per un llau los candidatos de Bloque por Asturies-UNA-Los Verdes, Rafael Palacios y Yolanda Huergo, y per otru, representantes d’Andecha Astur.

Estos alcuentro encuádrense dientro de la petición fecha pol colectivu a les 22 formaciones polítiques que se presenten a les elecciones autonómiques n’Asturies el proximu 25 de marzu. Pel momentu, Iniciativa pol Asturianu aconceyó, amás de con Bloque-UNA y Andecha, con Foru y Izquierda Xunida.

Nestos conceyos, Iniciativa pol Asturianu, felicitó a los representantes de les formaciones por usar l’asturianu a lo llargo de tola campaña, mesmo na so cartelería que na páxina web y nes intervenciones públiques de los sos llíderes. “Esta ye la meyor forma d’amosar el so compromisu col idioma”, declaren dende Iniciativa pol Asturianu.

Amás, Iniciativa pol Asturianu reconoció la importancia de qu’estes fuercies lleven nel so programa la reclamación d’oficialidá, a la que, reclamen, “habríen de sumase toles fuercies polítiques asturianes, pues más del 60% de los ciudadanos apoyen la declaración d’oficialidá”.

Iniciativa pol Asturianu ufrió a les formaciones el so asesoramientu y collaboración en cuestiones llingüístiques.

Dellos representantes d’Iniciativa pol Asturianu participaron nun conceyu cola diputada d’Izquierda Xunida, Emilia Vázquez, esti martes pasáu, 20 de marzu. Esti conceyu encuádrase dientro de la petición fecha pol colectivu a les 22 formaciones polítiques que se presenten a les elecciones autonómiques n’Asturies el proximu 25 de marzu. Pel momentu, Iniciaitiva pol Asturianu aconceyó con Foru ya Izquierda Xunida. A lo llargo del xueves va facelos tamién con Bloque por Asturies-UNA-Los Verdes y con Andecha Astur.

Nel conceyu con IX, Iniciativa pol Asturianu, recordó a la representante de la formación la necesidá de que les fuercies polítiques usen l’asturianu nos sos anuncios electorales en valles, televisión, radio, redes sociales, amás de nes intervenciones públiques de los sos llíderes, como meyor forma d’amosar el so compromisu col idioma.

Amás, Iniciativa pol Asturianu reconoció la importancia de qu’Izquierda Xunida lleve nel so programa la reclamación d’oficialidá, y recordó a la coalición qu’hai munches posibilidaes pa normalizar l’asturianu ensin qu’esto suponga nengún gastu pa l’alministración. Iniciativa pol Asturianu ufrió a la formación tamién nesi conceyu’l so asesoramientu y collaboración en cuestiones llingüístiques.

El candidatu a la presidencia del Gobiernu autonómicu d’UPyD, Ignacio Prendes, fizo unes declaraciones en La Nueva España nes qu’afirma que “Nosotros no somos partidarios de la oficialidad del asturiano”. Dende N’ast espliquen que nun podíen esperar otra posición “dende una formación política qu’articula tol so discursu alredor de la esaltación del nacionalismu estatalista y de la tecnocra¬cia, asina como a una pretendida superación de les ideoloxíes y de les clases sociales”.

De siguío xustifícase argumentando que n’Asturies nun esiste “una situación de bilin¬güismo real”. N’ast esplica que “lo que nun esiste n’Asturies ye una situación de billingüismu equilibráu social ya istitucionalmente, dándose una permanente presión estructural sobro la población asturfalan¬te pa que vaiga adoptando cada vuelta más la llingua española na so vida cotidiana”.

Pa N’ast, Prendes representa “al nacionalismu españolista xabaz” y que la única posición posible énte’l conflictu llingüísticu asturianu ye pa UPyD “la mesma negación del Otru y el falseamientu de la realidá sociolóxica del País”.

ç

Dempués por embargu declara’l llíder del partíu de Rosa Díaz que “la llingua asturiana es un patrimonio cultural, que sentimos como propio y que hay que cuidar y proteger”. Lo que pa N’ast ye “ pretender esponer una postura más ama-ble pa cola la llingua en sigo mesma pero d’una mena mui asemeyada a la del PSOE, ello ye, amenorgándola siempres a la categoría de reliquia cultural desprovista de cualisquier tipu de dinamismu social”.

A lo cabero señala que “en España ya hay demasiadas barreras y no estamos dispuestos a levantar ni una sola más”. Asina, declaren dende N’ast “con tal de torgar l’avanzar na reconocencia de la pluralidá llingüística del Estáu español ta más que dispuestu a siguir calteniendo les rellaciones de des¬igualdá y opresión sociollingüística qu’esisten nel País Asturianu, les cuales impliquen pa los asturianos una barrera nel exerciciu d’unos drechos humanos fundamentales: los drechos llin¬güísticos”.