Política

Arturu Xosé Bermeyu, Secretariu Xeneral d’Andecha Astur, entrevistóse esta fin de selmana col Diputáu d’Esquerra Republicana de Catalunya Joan Tardá, aprofitando la so presencia n’Asturies pa recoyer el gallardón “Pozu Fortuna” en Turón.

Demientres la entrevista repasárense estremaos aspeutos de la rialidá de dambes naciones y valorárense les postreres actuaciones del gobiernu central y la forma na que van afeutamos, non solo nel tarrén nacional, sinon especialmente social.

Arriendes d’ello valorárense formes y fórmules de collaboración y entamárense prósimos aconceyamientos ente responsables d’Estayes de Trabayu d’Esquerra y Andecha, esperándose prósimes niciatives y novedaes nun plazu prósimu.

Asina mesmo, y nel actu cellebráu nel “Pozu Fortuna” polos asesinaos pel franquismu que s’atopen ellí entierraos, tamién hebio ocasión de tratar con responsables de la organización del eventu, a los que se-yos reprochó’l remanamientu españolista d’estos fechos, qu’agora aprofiten pa reivindicar la República española, cuandu los asesinaos son asturianos qu’acababen d’independizase de la República española y que llucharon escontra’l franquismu comu asturianos del Conseyu Soberanu d’Asturies y Lleón.

El Conceyu de Llangréu aprobó a la fin de forma oficial la suspensión del proyectu de recintu ferial nos terrenos qu’ocupen los Talleres del Conde, en La Felguera. Nel vienres 28 de setiembre votóse nel plenu municipal la paralización de les obres col votu a favor de PSOE, Izquierda Xunida y PP. “Dempués de meses d’inactividá, silenciu y escurantismu”, denuncien dende CA, “estes últimes selmanes l’equipu de gobiernu del PSOE en Llangréu yá foi dexando clara la so posición y la situación d’esti proyectu”. Agora’l proyeutu ta suspendíu de forma temporal de manera oficial, anque too paez indicar que la suspensión del proyectu ye dalgo definitivo, espliquen dende la formación.

Dende Conceyu Abiertu por Llangréu piden “la dimisión de la totalidá de los responsables del equipu de gobiernu de Llangréu” polo que camienten ye “una xestión nefasta, nin tampocu de despilfarru de dineru públicu”, qu’amás “el gobiernu llocal trató d’esconder demientres dellos meses, llegando a mentir de forma clara a los llangreanos”.

Pa Conceyu Abiertu “la non finalización de proyectos ye la seña d’identidá del PSOE en Llangréu” y espliquen que “col dineru invertíu nesti fracasu, podríamos tener meyores equipaciones culturales, inversión n’industrialización o facer un desembolsu importante n’ayuda y prestación social”. Piden que s’investigue tol procesu d’esti proyectu, yá que “podríen dase irregularidaes importantes na xestión d’esti proyeutu, dalgo mui típico nes iniciatives qu’empobina’l PSOE n’Asturies”, denuncien.

“Faer Asturies. La política llingüística y la construcción frustrada del nacionalismu asturianu (1974-1999)” ye una obra de Patrick W. Zimmerman con versión asturiana de Cesáreo García Fernández. Asoléyala la editorial Trabe na so colección d’ensayu Batura. Nel llibru Patrick Zimmermam pon la mirada oxetiva y distanciada de quien nun ye del nuesu llar, con lucidez y, al tiempu, empatía, y fai un estudiu eshaustivu del movimientu asturianista, dende los tiempos de la nacencia de Conceyu Bable –y el so antecedente, l’asociación Amigos del Bable– allá pel añu 1974 hasta l’acabu del sieglu xx.

Tres más de trenta años d’esporpolle, l’asturianismu cultural, que dio más tarde, o quixo dar, en ser políticu, tien lluces y sombres en sí mesmu y en rellación colos partíos mayoritarios d’Asturies, que fueron quien a emburriar esti movimientu a la marxinalidá.

Nel terrén políticu, l’asturianismu tuvo ciertu puxu allá pelos años noventa del sieglu pasáu, de la que foi a llevar a la Xunta Xeneral un diputáu, representante de la xuntura ente’l PAS y la UNA. L’ocasu llegó cola perda d’esti diputáu y la atomización d’un movimientu que, si bien cuenta coles simpatíes d’una parte de la sociedá asturiana, nun foi a dar el saltu definitivu que lu llantara daveres como una posibilidá real de facer política con mayúscules.

Con un trabayu de campu –documental y oral– de gran caláu, l’autor céntrase nel casu asturianu como paradigma de frustración d’un nacionalismu que nunca nun foi a guarir na sociedá asturiana, bien a la contra de lo qu’asocedió n’otres comunidaes autónomes vecines, como Galicia, Euskadi, Cataluña o mesmamente Andalucía. Esi mesmu trabayu llévalu a amosanos les contradicciones d’una corriente que nació baxo’l franquismu y que nun s’adaptó apode a la nueva realidá del Estáu de les Autonomíes y de la democracia lliberal.

Patrick Alan Zimmerman (California, 1981) ye doctor pola Universidá Carnegie Mellon de Pittsburgh; esti llibru ye’l resultáu del trabayu fechu pa la so tesis doctoral, pal que pasó dellos meses n’Asturies faciendo entrevistes ya informándose.

Iniciativa pol Asturianu fizo llegar estos díes a la Casa Real una petición pa que la páxina web de la institución use l’asturianu, yá que la versión nueva de la mesma inclúi versión nel restu de les llingües del estáu español, pero non n’asturianu. Un fechu qu’Iniciativa pol Asturianu albidra como “una marxinación de la llingua asturiana frente al restu de llingües del Reinu”. La organización unvió tamién una carta a la Fundación Príncipe d’Asturies col mesmu oxetu, yá que la so web pue lleese hasta n’once idiomes, pero non na nuesa llingua. Pide a la Fundación que s’implique “na normalización y promoción del asturianu”.

Pa Iniciativa pol Asturianu, “el fechu anómalu de que la llingua asturiana nun seya entá oficial nun quita pa que la Casa Real use l’asturianu, yá que la normativa actual obliga a les instituciones a protexer y fomentar el so usu”, recuerden.

Pa la organización ye “especialmente llamentable” qu’una institución como la Casa Real, que-y da al so heriede a la corona’l títulu de Príncipe d’Asturies, “escaeza la llingua d’esti territoriu y nun la use nunca nin na so páxina web, nin en visites de los monarques o los Príncipes a Asturies”.

Por ello Iniciativa pol Asturianu solicita a Casa Real que rectifique y ponga a disposición de los ciudadanos una versión n’asturianu de la páxina web de la institución que se diz ser representantes de tolos ciudadanos del estáu.

Fundación Príncipe d’Asturies

Tamién ye d’especial relevancia pa Iniciativa pol Asturianu que la “Fundación Príncipe de Asturias” nun use l’asturianu en nenguna de les sos actividaes y que na so páxina web nun incluya al asturianu, cuando puede lleese hasta n’once llingües distintes, y cuando la otra fundación del Príncipe, la Príncipe de Girona, inclúi una versión en catalán como páxina principal y un llogotipu billingüe en castellán y catalán, recuerden dende la organización de reivindicación llingüística.

Iniciativa pol Asturianu reclamó tamién a la Fundación Príncipe d’Asturies al traviés d’una carta al so Presidente y Director, “un cambiu nesta política de marxinación de la llingua asturiana qu’exerce la entidá”, asina como un conceyu cola Fundación “p’avanzar nestes cuestiones y que la Fundación s’implique na normalización y promoción del asturianu”.

La directora xeneral de Política Llingüística del Principáu, Ana María Fueyo, dixo esti llunes que’l Gobiernu d’Asturies quier potenciar el deprendizaxe de la llingua asturiana en tolos centros educativos. En declaraciones a los periodistes mientres la inauguración d’una esposición filatélica en Xixón, Fueyo aseguró qu’esiste demanda de la llingua asturiana, como demuestra la incorporación de cuatro colexos esti cursu escolar na zona d’occidente.

Nesti sentíu, apostó por potenciar el deprendizaxe d’esta llingua en tolos centros educativos tantu n’educación Primaria, Secundaria y tamién nel ámbitu d’Infantil.

Amás, aseguró que la presencia del asturianu tien de ser “más clara y contundente” y con mayor presencia nos medios de comunicación, na enseñanza, toponimia y nes publicaciones. Unes declaraciones que llamen l’atención, sobre manera pocos díes dempués del recorte entá mayor de los fondos nes sovenciones a la llingua asturiana efectuaos por esti mesmu Gobiernu.

Énte l’aprobación per parte la Conseyeria d’Educación, Cultura y Deporte d’Asturies de la mengua nes sovenciones a la llingua asturiana nun 61,53% con respeutu al 2011, Iniciativa pol Asturianu amosó’l so refugu a esti xestu del executivu asturianu y reclama un inmediatu cambiu nesta midida.

Anque dende la organización entienden “les perdifíciles circunstancies económiques peles que ta pasando’l Gobiernu asturianu”, consideren “inxustificable” un recorte qu’algame los dos tercios “de la yá percurtia partida de 2011”.

D’igual mena, Iniciativa pol Asturianu quixo recordar al Gobiernu asturianu que “ye tamién responsabilidá de so garantizar que la situación que vive anguaño l’Academia de la Llingua Asturiana, qu’a diferencia d’otres instituciones del mesmu calter del Estáu como la Real Academia Espanola, l’Institut d’Estudis Catalans, l’academia de la llingua vasca o la gallega, seya iguada nel tiempu más curtiu posible”, yá que la institución asturiana sigue ensin recibir denguna aportación per parte l’Estáu español de la partida correspondiente a academies de les estremaes llingües del Estáu.

La Xunta pola Defensa de la Llingua Asturiana (XDLA) afirma que la reducción de la cuantía nes sovenciones a la normalización social del asturianu y el gallego-asturianu “va acarriar destrucción d’empléu na industria cultural n’asturianu”. El recorte publicóse nel BOPA del 13 de setiembre y supón 60.771,37 euros menos de sovención que lo previsto na convocatoria de mayu del 2012.

Pero ye qu’amás, respecto a la convocatoria del 2011, el recorte ye d’un 61,53% menos. La organización afirma que’l sector cultural n’asturianu “ye una industria grande que da trabayu a cientos de persones de manera directa o indirecta y que, en tiempos de crisis, necesita de l’apoyu de l’Alministración”. Por eso, pa la XDLA ye “llamentable y contradictorio que’l Gobiernu autonómicu anuncie planes pa crear empléu por un montante de 10 millones d’euros y, per otru llau, apruebe recortes nun sector como’l de la industria cultural n’asturianu, que yá ta mui mermáu pola crisis y pal qu’esta mengua pue suponer la reducción de puestos de trabayu, sía por despidos o porque ciarren empreses”.

Otra manera, recuerda que’l gran apueste cultural del Gobiernu asturianu ye’l Centru Internacional Oscar Niemeyer, cuando tien una deuda acumulada de más d’un millón d’euros. Una cifra que queda mui lloñe de les partíes destinaes a la promoción del sector editorial n’asturianu y gallego-asturianu, que van pasar de contar con una cuantía de 105.600 euros –según taba afitao na convocatoria de mayu del 2012– a tener namás que 84.480 euros, lo que supón una mengua del 55,30% en comparanza col 2011.

2

La organización afirma qu’este recorte “pon en peligru la viabilidá d’empreses qu’apuesten pol sector editorial na nuestra llingua”. Empreses que creen puestos de trabayu y que tienen el valor añadíu de da-y futuru al idioma, pero que tamién tienen qu’encarar la falta d’oficialidá y lo que supón trabayar pa una sociedá que nun ta mayoritariamente alfabetizada. Amás, recuerden la falta de visibilidá que tien el llibru n’asturianu nes llibreríes y, dalgo que ye más sangrín, nes mesmes biblioteques publiques.

La XDLA señala qu’esti añu, la crisis llevó per delantre’l selmanariu Les Noticies, l’únicu mediu impresu dafechu n’asturianu y con 16 años de trabayu al llombu. Sicasí, la respuesta de l’Alminsitración énte esta grave perdida ye dexar les ayudes a los medios de comunicación pol usu del asturianu en 127.759,63 euros, cuasi un terciu de la cuantía cola que contaron nel 2011, que foi de 373.500 euros. Otra manera, la organización recuerda que’l Gobiernu siempre premió a los medios en castellanu, otorgándo-yos les mayores partíes per riba de los que namás faen usu del asturianu, colo qu’esti recorte podría tar poniendo en peligru la existencia de medios de comunicación nel nuestru idioma, un espaciu que güei ta llindáu namás al sector dixital.

L’asociación recuerda tamién que la promoción del idioma propiu ye dalgo obligáu pola llexislación asturiana –Estatutu d’Autonomía y Llei d’Usu-, polo qu’en tiempos de crisis estes partíes habríen de ser prioritaries. Otra manera, los datos del déficit autonómicu que publicó’l xueves 13 de xunetu’l Ministeriu de Facienda asitien el saldu negativu asturianu nun 0,53% nel primer semestre del añu, lloñe tovía del 1,5% qu’hai de tope pal 2012, polo que xustificar la midida na aplicación de los alcuerdos del Conseyu de Política Fiscal y Financiera encaminaos al cumplimientu del oxetivu d’estabilidá del 2011 ye dalgo illóxico pa la XDLA.

El presupuestu pa llínies d’ayuda de Política Llingüística, qu’inclúi recursos pa editoriales, asociaciones, medios de comunicación, productores audiovisuales, conceyos y empreses, ta acabante carecer otru recorte del executivu de Javier Fernández. La Conseyería d’Educación, Cultura y Deporte anunció esti xueves nel BOPA que les sovenciones convocaes en mayu y agora en procesu de resolución sufren una mengua de más de 60.000 euros, del total de 381.200 euros, que yá suponía un amonarguimientu con respectu al añu anterior, lo que suma un total d’un 60% de tisoriazu pal asturianu con respectu a 2011. La cantidá llama l’atención si se compara con otres cuestiones culturales, como’l Centru Niemeyer, que tien en 2012 un presupuestu de 545.000 euros.

320.428,63 euros ye la cantidá final destinada a les ayudes a la normalización del asturianu, que vienen sirviendo pa poner en marcha iniciatives de normalización y da-y una mínima presencia al asturianu en medios de comunicación, y mundu empresarial.

El Real Institutu d’Estudios Asturianos (RIDEA) celebra un ciclu de conferencies y alderiques embaxo’l títulu “Idees pa una Reforma del Réxime Llocal n’Asturies” y esti miércoles Marta Friera Álvarez falará de «Les demarcaciones territoriales de los conceyos asturianos: orixe y singularidá». Sedrá a les siete la tarde nel salón d’actos del Real Institutu, n’Uviéu.

La formación Compromisu celebra esti añu’l Día d’Asturies en Carreño, conceyu onde la federación cuenta con representación municipal. Concretamente’l llugar escoyíu ye’l Llagar del Restaurante Casona d’El Carmen (Perlora).

L’actu políticu va entamar a les 12.30 hores del sábadu 8 setiembre, demientres que la xinta tendrá llugar a les 14.00 hores.