Política

“Asturies ta nel camín necesariu p’ameyorar”, pero la cultura nun apaez nesi camín, al menos nel primer averamientu que conocimos esti día col entamu del Alderique polítucu del curso 2014 na Xunta Xeneral. Asina lo afirma’l Presidente del Principáu nel so discursu d’esti martes pela mañana nel que tamién defendió’l so estilu de relaciones col gobiernu central, realizó dellos anuncios de la so acción de gobiernu y omitió referencies a la necesidá d’aliaos pa les cuentes de 2014 o les discrepancies na reforma electoral.

A xuiciu de Javier Fernández, Asturies ta bien empuesta, cola estabilidá institucional y la xestión correcta como anclajes básicos. La recuperación económica depende de qu’antes se reactive España y Europa. Ve signos positivos na recuperación industrial, menor nivel de delda pública y datos de desempleguu menos malos que va unos años. Sicasí, el problema del paru sigue perende.

Con un discursu inclináu escontra l’optimismu y exentu d’autocrítica inauguró esta mañana Javier Fernández l’alderique sobre l’estáu del país de 2014, que llega nun momentu en que la solidez del so Executivu vese cuestionada poles discrepancies colos sos aliaos parlamentarios d’IX y UpyD. Na so intervención el presidente del Principáu tornó’l principal asuntu ente dambes partes, la revisión de la llei electoral, anque sí avisó de les consecuencies que podría tener que los sos socios materializaren la so amenaza de nun aprobar los presupuestos de 2014 en pagu pol refugu socialista a la citada reforma. Nesi escenariu “la rexón quedaría al arbitriu de la entropía y en riesgu de quebra social”.

Nuna intervención que superó la hora y media de duración, Fernández fixo una repasada refecha del so añu y mediu al frente del Gobiernu rexonal pero apurrió poques novedaes.

Andecha Astur fadrá’l so tradicional actu d’homenaxe a Belarmino Tomás esti sábadu nel Cementeriu de Pando de magar les 13 hores.

Otru añu más la formación política Andecha Astur fadrá un homenaxe na tumba del que fuere presidente del Conseyu Soberanu d’Asturies, amás figura cimera tantu na Revolución Asturiana d’ochobre del 34 comu nel movimientu obreru asturianu. P’Andecha Belarmino Tomás presonifica “al conxuntu del Pueblu Trabayaor Asturianu, cuya llucha pola llibertá y el socialismu namás que la represión militar del Exércitu español, primero de la República y llueu del franquismu pudieron pone-y torgues”.

L’actu d’homenaxe y reivindicación d’esta figura política asturiana va a cellebrase nel Cementeriu Pando (Llangréu) de magar les 13:00 d’esti sábadu 12 d’ochobre, un actu col qu’Andecha Astur “contrapónse a la festividá istitucional del “Díi de la Hispanidᔠvindicando la soberanía y el socialismu p’Asturies”.

Compromisu por Asturies anovó los sos cargos nacionales esti sábadu nel Conceyu Abiertu (máximu órganu ente congresos) celebráu en Xixón, onde se nomó voceru nacional a Daniel Fernández, actual voceru de la organización en Xixón.

La renovación de cargos realizose según el nuevu voceru nacional “dempués de que les compañeres y compañeros de l’anterior executiva punxeren en marcha tolos elementos necesarios por que Compromisu pueda realizar la so actividá, como colofón del procesu de federación ente Bloque por Asturies y Unidá Nacionalista Asturiana, cola integración de les persones independientes que se xunieron al procesu”. Daniel Fernández resaltó que “esti trabayu yera fundamental pal nuesu funcionamientu, pero pocu visible pa munchos militantes, pero l’actual executiva va poder rentabilizalo políticamente, polo que nun podemos más qu’estimar l’esfuerzu que fixeron de forma tan xenerosa”.

Daniel Fernández tamién quixo estimar l’aprobación de la nueva executiva por unanimidá y “l’enfotu de les mios compañeres y compañeros, qu’esperó poder devolve-yos trabayando tantu pa parar la política de retayos que lleven a Asturies a una situación más dura que nos peores años de la reconversión industrial, como por que recuperemos el nuesu pesu políticu ante’l nuevu procesu territorial que se ta abriendo, onde tenemos de tener una voz propia non supeditada a intereses ayenos a la nuesa tierra” concluyó.

El coordinador d’IX Asturies, Manuel González Orviz, alvirtió esta mañana al presidente d’Asturies, Javier Fernández , que la so posición sobre la reforma de la llei electoral pon en riesgu la estabilidá del so gobiernu. El líder d’IX criticó que’l PSOE, tres comprometese a la reforma, aprobase colos sos votos la propuesta del grupu d’espertos de la Comisión Electoral y, tres la so presentación a trámite, se descuelgue.

“Queremos mandar un mensaxe d’atención al Presidente, al presidente Javier Fernández: sabe que se ta xugando la estabilidá, puede malbaratar el difícil equilibriu parlamentariu frutu de les elecciones. Él va saber lo que quier, si caltener el estatus actual o apurrir la llave de la gobernabilidad a la derecha”.

Manuel González Orviz refugó que los compromisos del PSOE puedan dase por cumplíos pol fechu de presentar a la so tramitación la llei de reforma, más cuando, agora, los socialistes falen de “una mayoría reforzada”.

“N’Izquierda Xunida tamos cansaos yá de l’actitú del Partíu Socialista del permanente incumplimientu de los alcuerdos qu’algama coles fuerces polítiques. Nun nos gusta la lletra pequena de los contratos. Eso ye pa los tahúres, pa la gran banca y el capital. Nós somos de la xente qu’un apertón de manos significa un contratu”.

Qu’Asturies seya la “comunidᔠdel Estáu na que más baxa la inversión estatal dexa nidio tantu la política d’aniquilación a la que somete España a Asturies, comu la incapacidá cuandu non complicidá del “Principado” ye la crítica que fai esti día la organización nacionalista Andecha Astur darréu de les caberes noticies que sobre’l Presupuestu de 2014 se supieren.

Sigún Andecha “una vuelta más, les polítiques discrimitatories del Estáu español pa col nuesu país tornen a ser evidentes: Asturies ye la “comunidᔠna que más baxa la inversión estatal en 2014, y failo en condiciones: frente a una media estatal d’un amenorgamientu d’un 7,1%, n’Asturies los retayos algamen el 31%.”

Les cifres falen por sigo mesmes, y una vuelta más dende Andecha Astur tornamos a denunciar la política d’aniquilación a la que mos somete l’Estáu español, hipotecando’l nuesu presente y fundiendo’l nuesu futuru; y el patetismu y la incapacidá del “Principado”, tantu comu istitución impuesta dende Madrid comu en cuantes a los políticos ellí representaos que nun pasen de ser xestores alministrativos d’un gobiernu sucursal, valeru de conteníos y de voluntá política.

Andecha Astur considera qu’un gobiernu que pretenda representar a los asturianos nun pue permanecer infinitamente calláu y servil énte les contines agresiones del Estáu español, y acusa al “Principado” de ser a la fin un cómpliz necesariu de les polítiques de destruición del texíu económicu y social asturianu.

Izquierda Xunida refugó esta mañana los presupuestos Xenerales del Estáu, qu’al aplicase van suponer un agraviu comparativu p’Asturies y la vuelta de tuerca definitiva pal esmantelamientu del Estáu del Bienestar. El coordinador de la formación, Manuel González Orviz escenificó’l maltratu del Gobiernu del PP para col Principáu esplicando que, per cada euru conseñáu pa 2014 p’Asturies, el restu de les comunidaes van recibir, de media, 5 euros.

González Orviz refugó entrar nel analís pormenorizáu de les cifres yá que, dixo, les cifres “macro” despinten el drama qu’estes cuentes van acarretar pa millones de persones, que se van vese afectaes por retayos en tolos ámbitos. “Los presupuestos de 2008 a 2011 del PSOE, y del 11 y 12 del PP lo que fixeron foi desmontar l’Estáu Social. Cargase la Llei de Dependencia, cargándose la sanidá, la educación etc, etc.

Darréu celebra esti sábadu “un actu d’alcordanza y homenaxe a les víctimes del facismu d’ayeri y de güei, que dende la organización de mocedá nacionalista ententiende que ye pernecesariu pa “nun escaecer la nuesa hestoria y el sacrificiu y enfotu que punxeron los/es nuesos/es paisanos/es na llucha contra’l capital y el facismu”, señalen dende la organización”.

Manifiesten tamién que “les víctimes del franquismu siguen ensín un reconocimientu oficial y la mayoría de los familiares d’éstes siguen ensín saber el paraderu de les persones asesinaes pol facismu español”. Poro, la organización vindica “que tenemos qu’acabar con esta situación y faer un reconocimientu realmente dignu a los asturianos y les asturianes que defendieron el nuesu país inclusive cola so vida de les garres facistes”.

YPor eso, “la mocedá soberanista y revolucionario convoca a toles persones y coleutivos a los que-yos preste la iniciativa a participar nesti homenaxe. Esti actu de dignidá y alcordanza sedrá’l prósimu sábadu 28 na llocalidá llangreana de Frieres y entamará a les 13:30 hores. El llugar escoyíu ye dellau de la cancha de fúbol sala, onde s’alcuentra un monolitu n’homenaxe a los vecinos de Frieres y Los Sotos víctimes del franquismu”.

Izquierda Xunida d’Asturies reclamó güei la continuidá de les Parroquies Rurales como una parte de más de l’alministración y refugu la reforma qu’impulsa’l PP basada, según el coordinador del partíu, Manuel González Orviz, en criterios ideolóxicos y non d’eficiencia y eficacia alministrativa. Pa la formación, nun esiste razón dalguna por que estos entes alministrativos menores suman y ye imprescindible que se-yos dote d’un financiamientu estable. El máximu responsable d’IX Asturies entrevistóse esta mañana cola directiva de la Federación de Parroquies Rurales d’Asturies pa coordinar les sos acciones col fin de garantizar el futuru de les mesmes.

Manuel González Orviz destacó que les enmiendes presentaes nel so día por IX son coincidentes coles que tamién impulsa la Federación de parroquies coles mires de torgar que la reforma impulsada dende’l Gobiernu Central salga alantre. “Plantéguense una serie d’enmiendes que son coincidentes coles que plantega IX a la llei de bases de réxime local, que podemos resumir en cuatro: que les parroquies rurales sigan funcionando; que la la regulación pertenez a les CC AA, que tienen que rindir cuentes como ya vienen faciendo y que les de nueva creación caltengan les mesmes competencies”.

La hipótesis de qu’estes entidaes puedan sumir por una mala xestión, según IX, tien de revisase de forma que, en cuenta de la so disolución, créese una xestora. Manuel González Orviz señaló que, daes les bones resultancies de funcionamientu, nun tien sentíu que se-yos toque. Eso sí, reivindicó un nuevu modelu de financiamientu qu’estableza un fondu de cooperación, con mínimu fixu y un complementu variable deriváu de lo que puede ser superficie y población.

Pal líder d’IX Asturies, cuidando qu’una bona parte de los recursos de les Parroquies Rurales vienen de los aprovechamientos forestales, ye necesario que s’implemente’l Plan Forestal Asturianu: “Coincidimos al respective d’una meyora na xestión de los aprovechamientos forestales. Cuando se gasta más en quemes qu’en prevención de quemes, y ende’l plan Forestal tien que xugar un papel importante, ye que la política forestal nun ye la fayadiza”, dixo.

Dientro d’estos aprovechamientos forestales, Manuel González Orviz refiriose de forma específica a la producción d’ocalitu. “Hai dos variedaes, una híbrida. Coincidimos en que nun se deben introducir estes especies híbrides, que cola que tenemos ye abondo; segundu que nun ye necesaria mayor estensión forestal destinada a ocalitu pa les necesidaes que tenemos na Comunidá Autónoma. De lo que se trata ye d’una meyor xestión del aprovechamientu tocantes a producción per hectárea”. La esmolición pol futuru de la xestión de montes, esplicó’l coordinador, ye lóxica si tenemos en cuenta qu’el 46% de masa forestal asturiana ye titularidá de les parroquies”- Na xunta cola directiva de la Federación de Parroquies tamién s’encetó la Llei d’Agües, del canon por saneamientu, onde, dixo, hai total sintonía. “Coinciden en que s’escluyan a los ganaderos y llabradores del canon prácticamente nes mesmes postures que fueron presentaes nes enmiendes per parte d’IX, que tamién s’escluyan aquellos núcleos que nun tienen red saneamiento. Ellos plantegen un amenorgamientu de la distancia. Nós dicimos qu’aquelles viviendes que s’atopen a menos de cien metros que se-yos dea una moratoria pa la conexón, siempres y cuando que sía técnica y jurídicamente posible”.

El presidente de la Federación Asturiana de Parroquies Rurales, Andrés Rojo, aportunó na necesidá de la continuidá d’esta alministración. “Creemos que somos la entidá más cercana al ciudadanu y creemos que somos los que’l Gobiernu del Estáu quier pagar con nós estes reformes que nun son xustes: nengún presidente cobra, nun tenemos emplegaos y nun nos paez lóxico que quieran facer esto coles entidaes locales d’España”.

El secretariu de Política Municipal d’IX, Manuel Fuentes, fai nesti sen un llamamientu de “respaldu a la manifestación convocada mañana en Madrid pola FEEM” y alvierte de que “frente a los argumentos qu’utiliza’l PP pa xustificar la so desapaición, estes entidaes garanticen la cercanía y l’axilidá pal accesu a los servicios públicos, abaratando’l so costu tantu por faelos más accesibles como a la de la so xestión”.

Izquierda Xunida, al traviés del so secretariu de Política Municipal, Manuel Fuentes, espresa’l so “ampliu sofitu” a les reivindicaciones que defenden les Entidaes Locales Menores y del Mundu Rural. Nesti marcu, esta formación fai un llamamientu públicu de “respaldu a la manifestación convocada mañana vienres en Madrid pola Federación Española d’Entidaes Locales Menores (FEEM) contra la reforma de l’Alministración Local impulsada pol Gobiernu de Mariano Rajoy que, na práctica, va suponer si nun s’evita un golpe mortal pa la pervivencia de les mesmes, cuando non la so directa eliminación”.

La manifestación anunciada pa mañana vienres va empezar a les 12,00 hores y va escurrir dende la see del Tribunal Constitucional hasta la redoma del Palaciu de La Moncloa. Na mesma va haber una amplia representación d’alcaldes, conceyales y miembros d’Izquierda Xunida.

PP y UPyD vienen acabantes d’algamar un alcuerdu pa que la Llei Orgánica de Meyora de la Calidá Educativa (LOMCE) recueya espresamente que’l castellán sía la llingua vehicular na enseñanza de too l’Estáu. La incorporación d’esti nuevu preceptu va producise al traviés d’una transaccional que los populares ufiertaron a la enmienda presentada por UPyD a la disposición adicional trixésimu octava del proyectu normativu y que esti grupu aceptó, no que convierte la LOMCE nel mayor atentáu escontra les llingues autonómiques dende la Transición.

El testu alcordáu polos dos partíos recueye que les alministraciones educatives van garantizar el derechu de los alumnos a recibir les enseñances en castellán, llingua oficial del Estáu, y nes demás llingües cooficiales nos sos respectivos territorios. El castellán sedrá la llingua vehicular de la enseñanza en tol Estáu y les llingües cooficiales seranlo tamién nes respectives comunidaes autónomes, acordies con los sos estatutos y normativa aplicable.

L’alcuerdu daría la risa si nun fora tan grave lo que propón ya que llingua vehícula nun puede ser namái qu’una, colo que serálo’l castellanu por obligación llegal, sigún se desprende del artículáu que va proponese.