Política

Nel prósimu Conceyu Xeneral d’Andecha Astur trataráse ente otres custiones l’aniciu d’una candidatura xunitaria asturiana integrada na coalición na que participa xunto con Bildu y otres formaciones d’izquierda soberanista del Estáu.

La propuesta, que yá foi comunicada de pallabra al restu les organizaciones nacionaliegues asturianes, supodríe un pasu perinteresante pa espresar la xunidá d’aición en términos elleutorales y conocer tantu la capacidá d’actuación comu la rempuesta social.

A cámbiu de 400.000 euros más pa beques-comedor y llibros y l’aportación de 50.000 euros al premiu lliterariu Tigre Juan o la redacción del proyectu Cerámica Milenaria de Faru “Muséu Selito”, con 150.000 euros, nel ámbitu de la Cultura, y una bona riestra de cambeos con mayor inversión nel ámbitu social, Izquierda Xunida va sufrir al PP la posibilidá d’aprobar bel Ayuntamientu d’Uviéu los presupuestos pa 2014. L’apautamientu dexa en mal lugar a la FSA-PSOE que nun foi a aceutar propuestos asemeyaes palos presupuestos autonómicos.

Izquierda Xunida va abstener na votación p’aprobar el presupuestu d’Uviéu pa 2014. Roberto Sánchez Ramos anunció güei esta decisión dempués de llegar a un alcuerdu de 16 puntos col Partíu Popular, col que comprometen distintes inversiones pa la ciudá pal añu que vien.

El pautu inclúi cambeos y medríes de partíes por un importe superior a cinco millones d’euros, dando-y al PP la posibilidá de sacar alantre les cuentes d’añu próximu colos sos once votos, el sofitu de los dos conceyales foristas, agora non adscritos, y l’astención de lzquierda Xunida.

L’alcuerdu alcanzáu ente IX y l’equipu de Gobiernu inclúi un total de dieciséis puntos, ente los que destaca l’aportación de 1,5 millones d’euros pa planes locales d’emplegu, que van ser axustaos y apautaos colos sindicatos y axentes sociales, y nos que se van dar prioridá a les families con tolos sos miembros nel paru.

EL PP comprométese tamién a incluyir otra partida d’un millón d’euros pa la renovación y meyora d’instalaciones deportives y obres como les que van suponer los 150.000 euros al entamu de la construcción d’un polideportivu na zona de Trubia.

Ente les midíes de calter social inclúyese una partida de 200.000 euros p’ayudes “contra la probeza enerxética”, destinaes a facilitar qu’ente 3.500 y 5.000 families puedan faer frente a los gastos de lluz, gas, calefacción o agua caliente.

Tamién s’inclúin ayudes por importe de 100.000 euros pa families con dificultaes d’accesu a una vivienda digna, un alcuerdu pala inversión de 800.000 euros na compra de suelu pa vivienda y una dotación de 150.000 euros p’ayudes a la rehabilitación de vivienda, amás de la negociación col Principáu por que tresfiera al Conceyu la xestión de les viviendes d’emerxencia.

Otres partíes incluyíes son la redacción del proyectu Cerámica Milenaria de Faru “Muséu Selito”, con 150.000 euros; la reposición de la obra escultórica de Fernando Alba, con 60.000 euros; l’aportación al premiu lliterariu Tigre Juan de 50.000 euros, ya mentada, o la medría de l’aportación a la Federación d’Asociaciones Xuveniles d’Uviéu en 10.000 euros.

El pautu tamién establez sobre’l tresporte escolar que tolos cambeos qu’afecten a les llínees actuales van realizase “previu diálogu y alcuerdu colos vecinos afectaos”.

Compromisu por L.lena vien de refugar la decisión del gobiernu d’españa de que l’Alta Velocidá vaina quedar en Llión y que l’AVE nun aporte a Asturies al trabéis del conceyu L.lena. La decisión del gobiernu del Estáu español de que l’AVE quedar en Llión y nun llegue a Asturies tres l’anunciu realizáu de que tienen previstu construyir el intercambiador de vía en territoriu lleonés, resulta pa Compromisu “un insultu y una burlla al conxuntu de los asturianos y una manifiesta marginación”.

Como ye bien sabíu, la construcción de los túneles de la Variante garantiza la posibilidá de que l’AVE pueda llegar a tierres asturianes al traviés del conceyu de L.lena, una vegada rematada la fase final cola instalación de la catenaria y les víes, y resolviérense los problemes provocaos poles filtraciones d’agua. El nuesu grupu entiende que nestos momentos de crisis nun se lleve a cabu’l tramu ente La Pola y Xixón pol so altu costu económicu y medioambiental p’aforrar namá diez minuto de viaxe según los estudios realizaos. Pero cola fase principal de la obra de la Variante terminada dempués d’una importante inversión económica, nun esiste nenguna xustificación por que nun se construya’l intercambiador y la correspondiente estación de l’AVE en L.lena, garantizando d’esta forma que l’alta velocidá llegue a territoriu asturianu. Amás, los llenizos nun tamos dispuestos a qu’en soportando mientres años les consecuencies de les obres y el so impactu sobre la nuesa redolada natural, agora nun cumplan cola finalidá prevista.

Ante esta situación, dende Compromisu por L.lena consideren que ye necesaria una contundente respuesta per parte de la sociedá asturiana. Por ello, van presentar una moción al Plenu del próximu mes refugando les intenciones del gobiernu del PP y esixendo la construcción d’una estación d’AVE y del intercambiador en L.lena. Per otra parte, vamos solicitar tamién a los grupos con representación na Xunta, un sofitu esplícitu a estos pidimientos cuidao que consideramos que la reacción de la mayoría de los grupos parlamentarios asturianos ta siendo nula en dellos casos y tibia n’otros. Cabo recordar, que na pasada llexislatura, el nuesu diputáu del Bloque por Asturies, presentó yá una iniciativa parlamentaria nesti sentíu que nun llogró’l sofitu del restu de partíos.

La conseyera d’Educación, Cultura y Deporte, Ana González, desixó esti día al ministru de Cultura, José Ignacio Wert, la retirada de la xuba del 21% del denomináu IVA cultural. La conseyera asturiana realizó esti pidimientu, xuntu con lkos conseyeros d’otres trés comunidaes autónomes, demientres la Conferencia Sectorial de Cultura.

La responsable de Cultura y Deporte aportunó nos mesmos datos facilitaos pol Ministeriu de Cultura que reflexen un descensu del consumu cultural n’España. “La cultura ye cada vez menos accesible nel nuesu país”, denunció.

Compromisu por Asturies, Conceyu Abiertu, Izquierda Anticapitalista Asturies, Izquierda Asturiana y Andecha Astur vienen acabante roblar un comunicáu conxuntu nel que sofiten el derechu a decidir de Catalunya y piden facer bona aquella estrofa de la canción del gran Lluis Llach que dicía: “Si jo l’estiro fort per aquí / i tu l’estires fort per allà / segur que tomba, tomba, tomba / i ens podrem alliberar”.

EL comunicáu quier dexar afitao dende l’entamu que ·el pueblu catalán da un pasu mas na so xusta reclamación sobre’l derechu democráticu a decidir el futuru de so. Y, darréu, la España reaccionario que nun entiende de derechos nin de democracia, sal en barrena pa dexar nidio que nun va permitir daqué tan elemental como la cellebración d’una consulta democrática. Los qu’argumenten que la “soberanía reside nel Pueblu español”, son los mesmos que se doblen delantre los mandatos del gran capital financiero y de la Troika, los mesmos que mos roben, mos faen probes, mos reprimen, los que mos arrampuñen derechos sociales y civiles conquistaos con munchos años de llucha, sufrimientu y sangre”.

Pero, pa les organizaciones firmantes, “esti exerciciu de soberanía aniciáu pol pueblu de Catalunya nun pue sirvir a la derecha que representa Artur Mas p’afondar nes polítiques de recortes y d’expropiaciones sobre los bienes comunes. La soberanía ye un derechu que los pueblos tienen qu’exercer sobre TOLES decisiones polítiques, sobre’l propiu cuerpu, sobre les polítiques sociales y económiques, sobre la sostenibilidá ecolóxico del modelu productivu y de consumu, etc. Esto ye, el derechu a decidir de los pueblos tien que se realizar dende una radicalización de la democracia y, poro, tien que se llevar a cabu como oposición a les imposiciones del gran capital sobre los derechos y conquistes sociales”.

Defender el derechu d’autodeterminación de Catalunya ye, tamién, pa los firmantes “defender un Camín p’Asturies distintu al de la sumisión al gobiernu estatal, la falta de competencies, la corrupción, l’aculturización y la falta de derechos democráticos. Ye, en definitiva, defender la soberanía y, con ello, el derechu a l’autodeterminación d’Asturies y la vía que pue apurrir un futuru al pueblu asturiano acullá de lo que güei atopamos: paru, precariedá, emigración y represión”.

La nota fina faciendo alcordanza de que “el Réxime surdíu de la transición y la so Constitución del 78 reciben un importante güelpe. Tócamos agora, a l@s de baxo, esixir tamién que les naciones y comunidaes del restu del Estáu Español queden llibres de probeza y de paru, de recortes y desafiucios, llibres de banqueros lladrones y de políticos corruptos, llibres de fame y represión. Faigamos bona aquella estrofa de la canción del gran Lluis Llach que dicía: “Si jo l’estiro fort per aquí / i tu l’estires fort per allà / segur que tomba, tomba, tomba / i ens podrem alliberar”.

Nel primer aconceyamientu del mandatu actual que fixera’l Conseyu Asesor de la Llingua Asturiana del Ayuntamientu xixonés, el representante del Partíu Popular y presidente del CLA, l’escritor y xestor cultural Humberto Gonzali, demandara a los presentes un esfuerzu por adaptar los Estatutos d’esti muérganu a una verdadera y más efectiva pluralidá no tocante a les entidaes que trabayen na promoción de la llingua.

Nesi sen, Humberto Gonzali pidiera voz nel Conseyu p’aquelles asociaciones que, pola so relevancia, han ser consideraes como necesaries en tou ámbitu onde se faigan propuestes col envís d’esbrexar pola normalización del asturianu.

Agora, tres más d’un añu tramitación y un cambéu estatutariu, la propuesta d’Humberto Gonzali llega a bon puertu cola invitación a cinco asociaciones de defensa del asturianu a tar, en plenu derechu, nel Conseyu. Les asociaciones, que yá aceptaron la invitación, son L’Arribada, Xunta pola Defensa de la Llingua Asturiana, Reciella, Iniciativa pol Asturianu y El Garrapiellu.

El Conseyu Políticu d’IX alcordaba esti día presentar una enmienda a la totalidá al presupuestu d’Asturies, por 89 votos a favor, nengunu en contra y una astención, colo que la formación refugaba la propuesta del PSOE por entender que nun respuende a les necesidaes d’Asturies en reactivación económica y protección social y dexaba la puerte abierta a la prórroga presupuestaria. El coordinador d’IX asegura tender la mano a la negociación d’alcuerdu pero diz que pa eso’l presidente “tien que salir de la cueva”.

El Conseyu Políticu d’IX alcordó ayeri llunes la presentación d’una enmienda a la totalidá al presupuestu d’Asturies. Les razones pal refugu a les cuentes presentaes pol Executivu socialista pa 2014 son, tantu la insuficiencia de les previsiones del Gobiernu p’atender les necesidaes reales d’Asturies en reactivación económica, protección social, mediu rural y universidá, como la negativa del PSOE a incorporar les propuesta plantegaes por Izquierda Xunida n’ingresos y gastos.

Sigún se diz na web d’IX, “el Conseyu Políticu, por 89 votos a favor, nengunu en contra y una astención, tornó sofitar un presupuestu en llínea coles polítiques económiques de Mariano Rajoy, tal que el mesmu delegáu del Gobiernu, Gabino de Lorenzo, resumió pa pidir al so partíu que sofitara la propuesta de Javier Fernández. La falta de voluntá real del Gobiernu de Javier Fernández pa llegar a un alcuerdu quedó afigurada nel proyectu finalmente presentáu, y nel que nun se recueyen les propuestes d’IX pa executar polítiques actives contra la crisis y de protección a los más cutíos pola mesma”.

De los 112 millones de medría que se plantegaben per parte d’IX en materia de gastu, el presupuestu socialista namái incorporó 7,7 millones d’euros y de esa mesma cifra, n’ingresu, solo apaecen daqué menos de 10 millones d’euros. Na decisión del Conseyu Políticu d’IX “pesaron los incumplimientos per parte del Gobiernu socialista na execución de los presupuestos de 2013, onde, en planes d’emplegu, a 15 de noviembre, siguí ensin invertise’l 75% del presupuestu, o los más de 12 meses de demoranza pala percepción del salariu social, onde 6.000 persones atópense entá en fase de tramitación”.

IX va caltener les sos propuestes como referencia pa la tramitación de creitos estraordinarios, siguiendo cola mano tendida al Gobiernu p’axustar “un marcu presupuestariu y políticu que respuenda a les necesidaes reales de la sociedá asturiana”.

Esti próximu vienres, 20 d’avientu, a les 19H.00’, nel local social del Atenéu Obreru de Xixón (Calle Cuadonga, 7 – 1o Izda), va tener llugar una charra sobre’l Procesu 1001, nun actu que ta entamáu pola Fundación Juan Muñiz Zapico.

El 24 de xunu de 1972, nel Conventu de los Padres Oblancos de Pozuelo de Alarcón fueron deteníos los dirixentes de la Coordinadora Xeneral de Comisiones Obreres, empecipiándose’l denomináu Procesu 1001. Los 10 de Carabanchel: Marcelino Camacho, Nicolás Sartorius, Eduardo Saboríu, Francisco García, Fernando Sotu, Juan Muñiz, Francisco Acosta, Miguel Ángel Zamora, Pedro Santiesteban y Luís Fernández. El so xuiciu y condena convertiría-yos en figures públiques, víctimes de la persecución al movimientu obreru y n’especial a les Comisiones Obreres. Con repercusión estatales ya internacionales y con un ampliu movimientu de solidaridá, col consiguiente desenmascaramiento del réxime.

Aquél foi consideráu un xuiciu a la Clase Obrera y una demostración tanxible de la falta de llibertá n’España. La defensa de los encausaos tuvo desenvuelta por un grupu d’abogaos y abogaes pertenecientes a toes los enclinos del antifranquismo del momentu. Dende prestixosos xuristes como Marcial Fernández Montes, Alfonso del Cossío y Corrolada, democristianos como Joaquín Ruiz Giménez, socialistes como Enrique Barón, comunistes del PCE como Manolo López , Cristina Almeida y la ORT como Francisca Sauquillo, abogaos como Adolfo Cuellar, Guillermo García Lacunza (sustituyíu por Jaime Sartorius) y el mesmu José María Gil Carbayos.

Esti 20 d’avientu cumplense 40 años del xuiciu nel Tribunal d’Orde Públicu y por mor d’ello celebrase esti actu nel que van intervienir Francisco Campo Alberdi, Presidente de la Fundación Juan Muñiz Zapico, Rubén Vega García, profesor d’Hestoria Contemporanea de la Universidá d’Uviéu, Marcos Muñiz Torre, fíu de Juanín l’asturianu del Procesu 1001, y Luis Pascual, Presidente del Atenéu Obreru de Xixón.

El Xulgáu de lo Contencioso-Alministrativo númberu 5 d’Uviéu, en sentencia del 10 d’avientu del 2013 vieno acabante anular la resolución de la Conseyería de Facienda de 27 de mayu del 2013 pola que se convoca concursu de méritos pa la provisión de 476 puestos de xefe d’estaya del Principáu d’Asturies, declarando la nulidá de dicha resolución, recurría pol Conceyu por Otra Función Pública d’Asturies, por nun ser conforme a derechu.

El Xulgáu atiende na so resolución la práctica totalidá de les pretensiones plantegaes pol Conceyu por Otra Función Pública d’Asturies, dexando sin efectu la convocatoria al nun tar amparada nuna relación de puestos de trabayu (RPT) completa y abonda, que contuviera una descripción de les funciones de caún de los puestos convocaos. En palabres de la sentencia les funciones de los puestos de la convocatoria agora nula “nun tienen detrás un instrumentu ordenador onde apaezan reflexaes y nin se da pública conocencia”, tal como esixe la llei autonómica de función pública.

El voceru nacional de Compromisu por Asturies, Daniel Fernández, destacó que la sentencia del Xulgáu Mercantil númberu 1 d’Uviéu, que conderga a Vulcano y los sos directivos pola quiebra del estelleru Juliana, esclaria les responsabilidaes xudiciales del casu, pero agora correspuende al PSOE ya IX asumir les responsabilidaes polítiques por esti escándalu, porque se-yos alvirtió, tantu a nivel municipal como autonómicu, de lo que taba asocediendo nel sector naval, ensin que fixeren nada al respective, lo que-yos convierte’l cómplices políticos necesarios d’esta quiebra fraudulenta.

Dende Compromisu por Asturies destaquen que “tanto nós como dende’l mundu sindical, lleva alvirtiéndose al Conceyu de Xixón y al gobiernu d’Asturies, de la xestión fraudulenta que se taba llevando col sector naval de la ciudá, que’l so oxetivu indisimulado yera cerrar les factoríes faciéndoles non rentables de forma dolosa, pa lliberar el suelu pa un nuevu pelotazu urbanísticu” amás “la crisis del lladriyu, déxo-yos con cara de tontos”.

Pa Compromisu por Asturies “el papel del SEPI (Sociedá Estatal de Participaciones Industriales), foi fundamental ye esti fraude, yá que foi n’última instancia qu’apostó pola opción de dexar la xestión de Juliana a Vulcano, y onde PSOE ya IX punxeron tola responsabilidá incluyíes declaraciones quexándose pola so xestión, pero la realidá ye que si dende los dos Alministraciones, local y autonómica, gobernaes por ellos, enfrentárense políticamente a les decisiones del SEPI, estes nun podríen desenvolvese”, qu’amás “tamién respondíen naquellos momentos a la xestión del PSOE de Zapatero”.

Daniel Fernández asegura que “n’Asturies siempres pasa lo mesmo, les decisiones acaben tomándose dende Madrid, anque oxetivamente sían les peores escontra los nuesos intereses, y los políticos que dicen representanos espatuxen un pocu nos medios de comunicación pero acaten sumisamente dexando faer, pa garantizar los sos puestos nes llistes electorales” y “yá hai otra sentencia más que demuestra’l tipu de xestión en política industrial que llevaron a cabu PSOE ya IX cuando tienen responsabilidaes de gobiernu”.