Política

Como ya venía sintíendose dende hai selmanes, los representantes del movimientu asturianista llingüísticu integraos nel proyectu de Podemos Asturies tuvieron de dar estes vacaciones de Selmana Santa un pasu alantre y dexar bien afitao que nun van permitir un programa electoral nel que nun te la OFICIALIDÁ con toles lletres y ensin lletra pequeña. Xune Elipe ya dexara nidia la so posición hai tiempu d’abandonar la formación llegáu’l casu y vieno acabante de afitalo otra vuelta.

Nuna información asoleyada esta selmana vacacional l’Axencia Europa Press falaba na so web de “distintes postures ante la reivindicación histórica de la declaración d’oficialidá de la llingua asturiana”, principalmente estremaes “ente los que prefieren someter esti puntu a votación ciudadana, como’l restu del so programa electoral, o bien los que consideren que se debe asumir como un derechu básicu”. Y recoyía declaraciones de dalgunos de los más nomaos militantes de podemos que son asturianistes nomaos y reconocíos ensin dubies al respective de la oficialidá como Xune Elipe, cantante de Dixebra, y Pablo Antón Marín Estrada, ún de los meyores escritores de nueso y candidatu nel conceyu Xixón.

Xune Elipe ya deciera formar parte del equipu de Somos Asturies y de la llista electoral de Podemos Avilés coles condiciones de que Podemos Asturies nun fuera una delegación madrilana y que nun se discutiera la reconocencia oficial de la llingua asturiana ensin ambigüedaes de dengún tipu nel programa electoral. Xustamente lo qu’agora dalgunos candidatos de Podemos tan entamando a plantegar cola fin d’apartar la oficialidá del programa o dexalo arrequexao como una propuesta a debatir.

Queda perpocu tiempu pa pesllar el programa y la non inclusión de la oficialidá podría pasar muncha factura a Podemos Asturies, que tien nel asturianismu una bona parte de la escasa cadarma organizativa cola que cunta.

El diputáu de nacional d’IX y candidatu a la presidencia d’Asturies, Gaspar Llamazares, denunció güei en Grandas de Salime el bloquéu incomprensible ya inaceptable” de la investigación arqueolóxica nel yacimientu del Chao de Samartin y anunció la formación va incluyir ente les sos prioridaes l’impulsu del mesmu. El candidatu d’IX anunció amás un proyectu de desenvolvimientu global qu’incluya acciones turístiques, económiques y sociales amás de les amestaes directamente a la investigación arqueolóxica.

“Queremos manifestar la nuesa decisión, la decisión del nuesu futuru Gobiernu, d’impulsar esi proyectu dende tolos puntos de vista: arqueolóxicu, por tolo que tien que ver cola cultura, non solo asturiana sinón cola cultura nun ámbitu globlal, pero tamién turísticu económicu, social, que creemos que ye bien importante pa una Cuenca como la de Grandas”. Con estes palabres, Llamazares, xunta la cabeza de llista d’IX pola circunscripción occidental, Aurora Valdés, y les diputaes Emilia Vázquez y Noemí Martín, visitó güei esti singular enclave convidaos pola Asociación d’Amigos del muséu Etnográficu de Grandas de Salime y el yacimientu arqueolóxicu del Chao Samartin.

Aurora Valdés reivindicó la importancia d’estos dos recursos a los que calificó de “motor de desenvolvimientu” nuna zona “largamente castigada pola despoblación y l’aislamientu”. La candidata d’IX pol Occidente d’Asturies a la Xunta Xeneral del Principáu, reclamó la máxima dilixencia pa facilitar l’apertura d’estes infraestructures, dada la so importancia pa tola zona.

Siguiendo’l vezu que vien afitando dende va años, Andecha Astur va facer so tradicional actu d’homenaxe nel Cementeriu de Pando de magar les 13:00 d’esti sábadu 12 d’ochobre, nun actu col qu’Andecha Astur quier dexar afitao que se “contrapón a la festividá istitucional del “Díi de la Hispanidᔠvindicando la soberanía y el socialismu p’Asturies”.

Otru añu más la formación política Andecha Astur fadrá un homenaxe na tumba del que fuere presidente del Conseyu Soberanu d’Asturies, amás figura cimera tantu na Revolución Asturiana d’ochobre del 34 comu nel movimientu obreru asturianu. P’Andecha Belarmino Tomás presonifica, como tolos años vien amosando, “al conxuntu del Pueblu Trabayaor Asturianu, cuya llucha pola llibertá y el socialismu namás que la represión militar del Exércitu español, primero de la República y llueu del franquismu pudieron pone-y torgues”.

Esti actu d’homenaxe y reivindicación d’esta figura y los fechos nos que participó, cellebrase otra vuelta nel Cementeriu Pando (Llangréu) de magar les 13:00 d’esti sábadu 12 d’ochobre, un actu col qu’Andecha Astur “contrapónse a la festividá istitucional del “Díi de la Hispanidᔠvindicando la soberanía y el socialismu p’Asturies”.

IX va presentar una llista pa la so votación por militancia y simpatizantes, na que namái van repitir dos de los actuales componentes del grupu parlamentariu y na que, de los 34 miembros, 27 son a propuesta de los conseyos políticos locales y 7 del conseyu autonómicu.

El coordinador xeneral d’IX Asturies, Manuel González Orviz, destacó esta mañana l’esfuerzu realizáu pa llograr una llista de consensu qu’inda ta ensin concluyir: “esti procesu sigue abiertu a la participación de militantes y simpatizantes que son los que van ordenar la llista, que na circunscripción central incorpora espresamente persones provenientes de la circunscripción occidental y oriental na nuesa creencia de la necesidá de qu’Asturies precisa una circunscripción única. Ello ye que la persona qu’encabeza esta llista y propónse pa númberu 2 ye de la circunscripción d’occidente”.

La llista, sigún esplicó’l coordinador y recueye la páxina web del partíu, tien vocación d’apertura, yá que s’acuten espacios pa otres organizaciones o referentes sociales: “Podemos amosar el prestu de fechu de que se va a trabayar de forma coordinada, con consensu y amás nun procesu nel que lo importante son les nueses propuestes y los nuesos métodos y non cualesquier otra circunstancia: interésanos más falar de los problemes de la xente que d’otres cuestiones”.

El diputáu d’IX d’Asturies, Gaspar Llamazares, vieno acabante d’asoleyar una nota d e prensa na qu’esixe esplicaciones al Gobiernu nacional sobre “l’espoliu del patrimoniu industrial de les fábriques d’armes d’Uviéu y Trubia tres l’alcuerdu de cesión de maquinaria suscritu pol Gobiernu ensin la participación de los sindicatos, el Conceyu d’Uviéu y el Principáu d’Asturies”.

Llamazares quier saber si piensa’l Gobiernu arrenunciar a esi polémicu alcuerdu de cesión, ordenando que nun sía publicáu nel Boletín Oficial del Estáu. Otra manera, pide midíes pa que’l patrimoniu industrial de les fábriques d’armes sía respetáu y curiáu hasta que pueda ser espuestu n’Uviéu, nos tarrenes de La Vega.

Na batería d’entrugues, el diputáu asturianu repite demanda de saber qué xestiones piensa realizar el Gobiernu pa la realmisión de los 55 trabayadores inxustamente despidíos de la fábrica d’Asturies y quier saber si ye cierto que les perdes de la empresa nel momentu nel qu’aprobóse l’Espediente de Regulación d’Emplegu yeren de 11.000 euros y non de 69 millones como argumentó la empresa Santa Bárbara-General Dynamics.

La iniciativa ciudadana pa entamar una agrupación d’electores de xunidá popular ye una iniciativa ilusionante y que recueye l’espíritu xunitariu y participativu entamáu reién en Ribeseya y por mor d’ello “les persones que dende l’ámbitu nacionaliegu y/o soberanista d’izquierdes venimos desendolcando la nuesa xera sociopolítica en Ribeseya y que nestos caberos años trabayemos nel conceyu de Ribeseya p’afitar Conceyu Abiertu, queremos asoleyar púlicamente la nuesa alegría pol nacimientu de la iniciativa popular Pueblu de cara a les vinientes eleiciones de conceyu de 2015”. Asina entama’l comunicáu col que se pide’l sofitu pa esta nueva propuesta electoral.

Dende la izquierda soberanista, dicen en COnceyu Abiertu, “atalantamos que Pueblu ye un espaciu afayaízu onde cualesquier soberanista va poder siguir desendolcando en Ribeseya polítiques movilizadores y d’empoderamientu popular, con unos plantegamientos que recueyen la esencia que motivó’l nacimientu de la nuesa organización y que permítennos sentinos cómodes. Además, préstanos enforma la idega de participar llibremente xuntu a persones qu’hasta agora o bien sofitaben otres opciones polítiques o preferíen nun facelo a nenguna en concret, ente un escenariu de división y onde nun esistíen mecanismos materiales que permitieran la so participacion n’igualdá, lo que nos paez que tien reflexu nun clima d’ilusión nel conceyu qu’anticipa que tamos énte un momentu hestóricu pa Ribeseya”.

Poro, anuncien que la militancia y simpatizantes de Conceyu Abiertu nel conceyu de Ribeseya “apostamos pola participación nos vinientes conceyos abiertos qu’entamen dende Pueblu y comprometémonos asina mesmo a potenciar y enanchar en tolo que podamos esta iniciativa que más allá de la unidá de la izquierda, significa la contruición d’una ferramienta d’auténtica xunidá popular, llamada a cambiar pa siempre la vida nel conceyu de Ribeseya. Nun nos queda nenguna duda de que tamos énte la oportunidá d’encadarmar una mayoría que va faer por primer vegada la política va dirixila la mayoría de vecinos y vecines del nuesu conceyu, faciendo asina realidá la másima de que solu’l pueblu salva al Pueblu”.

ºfoto1ªDende l’Asociación Cultural N’Ast vienen acabante de facer públicu’l so esmolecimientu nesti llunes poles declaraciones que, selmana tres selmana, vienen faciendo los cabezaleros de Podemos al rodiu la llingua asturiana. Y ye que, na so opinión, “determinaes postures públiques déxenmos plasmaos, más cuando vienen d’una formación política que, supuestamente, lleva naguando dende’l so aniciu por un cambiu sociopolíticu basáu, ente otres coses, nel fondu respetu a los drechos fundamentales de los y les ciudadanes, ente los que s’alcuentren, necesariamente, los sos drechos llingüísticos”.

Asina, en n’Ast dicen ver “qu’estes postures van dende’l más absolutu de los escaezos (nel pasáu “Manifestamientu pol Cambiu” del 31 de xineru en Madrid los cabezaleros de Podemos saludaren a los presentes en toles llingües del Estáu menos n’asturianu) al más absolutu de los desprecios (camentando que les llingües del Estáu, ente elles l’asturianu, son un factor qu’atenta escontra la xunidá d’España, sigún afitó Mª Eugenia Suárez, Secretaria Xeneral de Podemos en Gozón) pasando por una visión puramente folclorista más propia d’otres dómines, poniendo al asturianu como dalgo que-y presta ver a los turistes que vienen equí, “como la gaita” (que ye la que nel so intre amosó Daniel Ripa, candidatu de la corriente Somos Asturies a la Secretaría Xeneral de Podemos n’Asturies)”.

Mesmamente, nuna entrevista concedía a un diariu asturianu nel día d’ayeri, Tania González –eurodiputada asturiana y, por tanto, cargu públicu de Podemos– afitó, entrugada pola postura d’esta formación política énte la llingua asturiana, que na organización “nun hai una postura oficial, pero ye fundamental abrir l’alderique ente la ciudadanía asturiano, lo que nunca nun se fexo, pa saber lo que realmente pensamos los asturianos”.

º

Declaraciones que dexen ablucaos a los componentes de N’Ast, “nun sólo porque a estes altures en Podemos tovía nun heba una postura oficial, sinón pol nivel de les mesmes: en cuestión de drechos fundamentales, nun hai nengún alderique qu’abrir.

Énte esti panorama, dende N’Ast quieren recorda-y a Podemos “que’l drechu a emplegar la llingua propia ye un drechu reconocíu internacionalmente y que’l primer pasu pa esa reconocencia pasa necesariamente, nel casu del asturianu, pola so declaración como llingua oficial. Y daes les posibilidaes que-y apurren les encuestes a Podemos d’entrar na Xunta Xeneral con unos cuantos diputaos, quiciaes nun futuru prósimu esta declaración dependa de la so postura, polo que dende N’Ast queremos pidí-y a Podemos nun sólo que s’aclare col asuntu, sinón qu’apueste nidiamente polos drechos llingüísticos de los y les asturianes, pola OFICIALIDÁ DE LA LLINGUA ASTURIANA. Porque ensin oficialidá, nun va haber cambiu que valga”.

Izquierda Xunida va abrise entá más pala ellaboración del programa electoral cola puesta en marcha d’una plataforma informática na que cualquier persona va poder plantegar propuestes de forma individual, sigún desplicaron esti día nuna rueda de prensa’l coordinador xeneral de la formación, Manuel González Orviz, y la secretaria de comunicación, Mayka Barros, que describieron como se va participar por aciu la cuenta de facebook de los interesaos pa facer más cenciellu’l procesu.

Los dos responsables de la coalición presentaron esta mañana la nueva ferramienta cola que pretende facilitase la comunicación cola ciudadanía, que va ufrir la posibilidá de participación por aciu la cuenta de facebook de los interesaos en participar.

La plataforma, que va empezar a funcionar güei mesmo, forma parte de los nuevos mecanismos d’apertura d’Izquierda Xunida, cola participación como ún de los sos elementos clave, tantu no que se refier al procesu de toma de decisiones como d’incidencia política. Ello ye que el coordinador xeneral d’IX, Manuel González Orviz, aseguró güei qu’IX aspira a tener unes resultancies aceptables nos ámbitos municipal y autonómicu, con independencia de la última encuesta del CIS que, esclarió, ta plantegada pa unes elecciones xenerales. Sía que non, el máximu responsable d’IX Asturies, aseguró que la situación que tamién s’estrái del estudiu ye meyor que la de hai dos o tres meses, con una frenada de la cayida.

Mayka Barros resaltó lo cenciello del usu de la plataforma, que va tar colgada na páxina web d’IX (www.izquierdaxunida.com): “Pa poder aportar a la plataforma lo único qu’hai que faer ye rexistrase col facebook personal. Una vegada que te valides, te piden la to contraseña, entres y a partir d’ende puedes meter les tos aportaciones, que nun tienen que ser tampoco bien ellaboraes, depués pa eso yá se va ellaborar el programa. Va ser un buscador bien cenciellu, que te va dexar, al empar que faes una aportación pa lo autonómico, faelo para lo local, si asina lo consideres. Puede buscase per árees, onde va tar democracia, desenvolvimientu, economía ya igualdá y vase a buscar, tamién, por ámbitos, pa los conceyos”. La plataforma, señaló Barros, “ye una forma más de facilitar l’accesu de la población a los programes políticos. Ye daqué que yá se ta faciendo presencialmente pero que, entendemos que, a día de güei, que tamos toos conectaos al traviés de los facebooks y los twitters, ye un dar un pasu más pa que cualquier persona, ensin tener que tar nuna asociación o nuna organización, pueda faer una aportación a Izquierda Xunida”.
Plataforma participativa d’IX

Josu Juaristi, eurodiputáu de Los Pueblos Deciden, coallición de la que forma parte Andecha Astur, presentó esti día nel Parllamentu Européu una serie d’entrugues con solicitú de rempuesta per escritu, al respeutive de l’Autopista del Mar Xixón-Saint Nazaire, con oxetu de determinar si tal comu respondíó’l Gobiernu español en fecha 6-11-2014 a entrugues del Senaor Jon Iñarritu García (Amaiur), ta rializándose daqué triba d’auditoría a l’Autopista del Mar “en coordinación colos servicios de la Comisión Europea al cargu del proyectu Marco Polo”, o si nel so defeutu tien previstu la Comisión Europea llevar a cabu dalgún otru tipu d’investigación al respeutu de la suspensión de la llinia de ferry Xixón-Saint Nazaire.

Concretamente les entrugues fueron: “¿Tiene conocimiento la Comisión Europea al cargo del proyecto Marco Polo de que se esté realizando o esté en trámite alguna auditoría a la mencionada Autopista del Mar? De ser así ¿Cuál es la conclusión de la misma? O en su defecto ¿Cuándo se espera contar con dichas conclusiones? ¿Tiene previsto la Comisión Europea llevar a cabo algún tipo de investigación respecto a la suspensión de la linea de ferry Gijón/Xixón-Saint Nazaire?”.

Una vegada recibida la contestación a estes entrugues, y sumando a los fechos conocíos los datos que pueda facilitanos, Andecha Ástur tien la intención de presentar la oportuna denuncia ante la OLAF, al ser evidentes les siguientes irnegularidaes cometíes pola operadora LDLINES: – Nun se cumplieron los siete años de serviciu obligatorios, comu se contemplaba nes condiciones de la sovención. – Una de les empreses que forma parte del consorciu qu’esplotaba la llínia ye Suardíaz (con un 10%), que agora abre, tamién con soención europea, la mesma llínia (na que yá cunta col 100% de la nueva empresa) pero dende Vigo, ufiertando esta nueva ruta a la cartera de veceros que consiguió cola llínia Xixón- Saint Nazaire. – El nivel d’ocupación de la llínia Xixón- Saint Nazaire ye del 72 – 75%. Cabo pensar que na solicitú de sovención va figurar un estudiu de viabilidá, que se desconoz, pero que probatiblemente podría cuntar con menos d’esi 72% pa envalorar la rentabilidá que xustificara la sovención. – A la de xustificar la rentabilidá de la llínia sovencionada, la empresa fixo costar un gastu diariu por barcu de 12.000 euros, cuandu en rialidá, sigún ye públicu, y dende’l primer díi foi de 18.000 euros.

Per otru llau, Andecha Astur nun pue dexar de denunciar de nueu la incapacidá y desinterés del gobiernu del “Principado” énte la perda d’esta llinia, “qu’afonda’l nivel d’asillamientu yaincomunicación d’Asturies y cómu de nueu tola so actividá se llimitara a rializar declaraciones vagues a los medios de comunicación, qu’a fecha de güei nun tovieren denguna triba d’espresión práutica”.