Política

Iniciativa pol asturianu vieno de felicitar a los y les conceyales que xuraron o prometieron el so cargu n’asturianu en más de 24 conceyos d’Asturies y agora failo tamién col nuevu alcalde de Bimenes, Aitor García Corte (Partíu Asturianista) y l’alcaldesa de Peñamellera Alta, Rosa Domínguez de Posada (Foro) que tomaron posesión del so cargu n’asturianu: “Ye un xestu que celebramos pero qu’esperamos que venga acompañáu de la toma de les midíes necesaries pa normalizar l’usu del asturianu nel ámbitu de los sos Conceyos”

.

Amás, na toma de posesión de los nuevos diputaos y diputaes, na Xunta Xeneral d’Asturies, miembros de Podemos y d’Izquierda Xunida tomaron posesión del cargu n’asturianu y tán usando l’asturianu con normalidá na actividá de la cámara. Iniciativa celebra “esta situación qu’habría ser normal na cámara de representación de los asturianos y les asturianes, y esperamos qu’esta llexislatura seya tiempu de trabayar en xenerar consensos y dar pasos alantre pa meyorar la situación del asturianu y da-y les ferramientes necesaries pa garantiza-y el futuru, que pasen ensin dulda por declarar l’asturianu oficial. La cada vegada mayor normalidá nel usu del asturianu ente los representantes públicos de cásique toles fuercies polítiques dexa a les clares la tresversalidá de la llingua asturiana como patrimoniu cultural ya identitariu de tolos asturianos y asturianes, lo que pa Iniciativa pol Asturianu ye una bona señal que pue llevar a mayores pasos positivos pal idioma”.

L’empelgu que ficieron del asturianu nos actos protocolarios de toma de posesión dellos diputaos y diputaes d’Izquierda Xunida y Podemos ayeri nel plenu de la Xunta Xeneral satisfizo al asturianismu políticu y social, que quier ver nesta novedá un cambéu significativu. Dalgunes organizaciones asturianistes como la Xunta Pola Defensa de la Llingua felicitáronse por que “la mesa d’edá con representantes de Podemos demostró’l cambéu xeneracional, funcionó y, pela primer vez, punxo a andar esta décima llexislatura usando l’asturianu.

Esti fechu súmase al usu del asturianu nos actos protocolarios de toma de posesión de dellos diputaos y diputaes d’Izquierda Xunida y Podemos, y a un bon número de conceyales, alcaldes y alcaldeses de partíos de tolos colores políticos que yá lo fixeran el sábadu pasáu a tolo llargo de la xeografía asturiana.

Na Xunta Pola nun podíen amosar más convencimientu de que les coses paecen entamar a camudar: “Naguábemos por dir dexando atrás el tiempu nel que’l movimientu de reivindicación llingüística denunciaba los atentaos que vegada tres vegada venía padeciendo la nuestra llingua nesa mesma sede”.

Nunes declaraciones feches esti día, la XPDLA esperen “plenos nos que vamos sentir debater na nuestra llingua sobre investidures, aprobación de presupuestos, redacción de lleis o control al gobiernu. Esperamos tamién que lo que nun va ser un conflictu pal funcionamientu de la Xunta Xeneral (nun pue selo) seya tamién normal na vida de tolos asturianos y asturianes, y que l’usu del asturianu llogre d’una vez l’estatus de llingua oficial.

Nel comunicáu espardíu esti día, la XPDLA diz tamién que presta “ver na cámara que representa la voluntá del pueblu asturianu la grana semada en tantos años de reivindicación llingüística, porque bien sabemos que la Xunta Xeneral ye l’asamblea que tien que decidir pone-y fin a la situación de discriminación llingüística que sufren los y les falantes d’asturianu y que yá nun se pue sostener más tiempu.

Iniciativa pol Asturianu celebra como un ésitu’l fechu de que polo menos en venti de los conceyos que se constituin esti sábadu, dellos conceyales emplegaran l’asturianu o gallego-asturianu na so promesa o xura del cagu. Iniciativa organizó estos díes una campaña na que facía un llamáu a conceyales y alcaldes pa usar l’asturianu o’l gallego-asturianu na so zona, nel so xuramentu o promesa que facíen el sábadu nos 78 conceyos d’Asturies.

Nuna nota qu’espardió l’Asociación el mesmu domingu, describía que “no que cinca a los conceyos de les grandes ciudaes del centru d’Asturies, hebo representantes que xuraron o prometieron n’asturianu en Xixón, Avilés y Uviéu, con conceyales del PSOE, Foro, Izquierda Xunida y les formaciones venceyaes a Podemos”.

Amás, xuraron cargu n’asturianu o gallego-asturiano en Villaviciosa, Carreño, Llanera, Siero, Noreña, Mieres, Llangréu, Llaviana, Ribeseya, Cangues d’Onís, Peñamellera Alta, L.lena, Uviéu, La Ribera, Sobrescobiu, Pravia, Bimenes ya Ibias.

Dende Iniciativa pol Asturianu valoren “de forma mui positiva que l’usu del asturianu fuere tresversal y qu’usaren l’asturianu, como patrimoniu que ye de toos, formaciones de tou tipu: PSOE, les candidatures de Podemos (como Xixón sí puede, Somos Llangréu, Nós Ibias, Somos Siero, etc.) Foro, Izquierda Xunida, Partíu Asturianista, IAS, Conceyu Abiertu por Noreña, asina como otres formaciones llocales”.

Esti xestu, dicen n’Asocaición, “tien d’acompañase dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, recuperar y oficializar la toponimia tradicional, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques tresversales que-y dean presencia al asturianu en tolos ámbitos de la xestión de los conceyos”.

Dende Iniciativa pol Asturianu ufren tamién el so “asesoramientu a partir d’esti momentu y animamos a tolos conceyales y alcaldes interesaos en dar pasos a favor de la normalización a ponese en contautu con nós nel nuesu corréu contautu@iniciativapolasturianu.org o bien nes redes sociales de la organización en Facebook y Twitter. Nós vamos trabayar por ponenos poner en marcha alcuerdos y trabayar por llevar a los conceyos unes polítiques de normalización que favorezan una meyor situación pal asturianu nes alministraciones más cercanes a la xente”.

Pa Iniciativa, “nun basta col usu simbólicu del asturianu, sinón qu’ha trabayase por meyorar los drechos civiles de los ciudadanos y la normalización del idioma n’Asturies. Munchos conceyales pudieron ver güei en primer persona como-yos punxeron problemes pa facer una cosa tan cenciella como xurar el so cargu en llingua asturiana, como nos informaron delles formaciones”.

Los testos de xuramentu que lleeron (con diferentes versiones) los conceyales que decidieron facelo n’asturianu foron como’l que vien darréu: “Xuro, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu”.

Iniciativa pol Asturianu quier animar a usar l’asturianu (o’l gallego-asturianu na so zona) nel so xuramentu o promesa a los 942 conceyales y 78 alcaldes y alcaldeses que van tomar posesión de los sos cargos esti sábadu 13. Esti xestu simbólicu ye, na opinión de la organización, “una bona forma d’entamar los mandatos de les corporaciones teniendo presente la llingua propia d’Asturies”. En numberoses ocasiones conceyales y diputaos asturianos, ya inclusive esti añu una eurodiputada, yá xuraron o prometieron el so cargu n’asturianu.

Esti añu, y agora que’l compromisu cola oficialidá del asturianu tien más sofitu políticu esplícitu que nunca nes instituciones, ye un bon momento sigún Iniciativa “pa poner en práctica una de les ferramientes más útiles y más cencielles de da-y promoción al idioma, usala de forma normal ente los representantes públicos”.

Pala organización de defensa del idioma, “esti xestu tien d’acompañase dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques tresversales que-y dean presencia al asturianu en tolos ámbitos de la xestión de los concejos”.

Dende Iniciativa pol Asturianu ufren “el nuesu asesoramientu llingüísticu y animamos a tolos conceyales y alcaldes interesaos en dar pasos a favor de la normalización a ponese en contautu con nós nel nuesu corréu contautu@iniciativapolasturianu.org o bien nes redes sociales de la organización en Facebook y Twitter”.

Los testos de xuramentu y promesa pa conceyales que planteguen dende iniciativa son los que vienen darréu:

a. Xuramentu. “Xuro, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu”.

b. Promesa. “Prometo, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu”.

Testos de xuramentu o promesa p’alcaldes y alcaldeses:

“Xuro o prometo cumplir con fidelidá les obligaciones del cargu d’Alcalde/esa Presidente/a del Escelentísimu Conceyu de _______ con llealtá al Rei, y curiar y facer curiar la Constitución como Norma Fundamental del Estáu”.

El refugu a la impugnación de les elecciones del 24 M pola retirada de les papeletes de Andecha Ástur, que vieno acabante conocese, pon n’evidencia pa esta organización política “la falta de garantíes democrátiques, tantu más cuando los motivos pa refugala son falsos y contradictorios”. La Xunta Electoral Central (XEC) tornaba esti día’l recursu de Andecha Ástur “por nun concretar les meses nes que se produció nin el tiempu que duró esta”, magar que en na so denuncia “figuren 14 meses alcontraes nes que se retiraron les papeletes, el tiempu nel que tuvieron retiraes en dalguna d’elles, y ufiértase la posibilidá de declaraciones xuraes de ciudadanos a los que’l presidente de mesa negó-yos les papeletes pa poder votar a Andecha Ástur”.

Por si fora poco, la sentencia de la XEC nun coincide cola Xunta Elleutoral Provincial (XEPA) nos motivos polos que decide archivar la denuncia: “Nel primeru de los casos la XEC acota que nun se concretó les meses nes que supuestamente se retiraron les papeletes nin el tiempu que duró felicidá retirada, por que’l so motivu refuga la impugnación de les elecciones a nivel de Asturies”. Sicasí la Xunta Electoral Provincial de Asturies (XEPA) reconoz los fechos, ponlos en conocencia del Ministeriu Fiscal y refuga la impugnación en Xixón, por calificar los fechos de “irregularidá procedimental”.

Pa la organización nacionalista “con tan vergonzoses artimañas la JEC pon fin a la vía alministrativa pa la reclamación, y anque abre les puertes pa un recursu contenciosu-alministrativu, lo cierto ye qu’ésti se retrasará nel tiempu y por enforma que la razón ampárenos, la sentencia tardaría tantu en producise que sería totalmente invidable”.

Esti sábadu 6 de xunu, Andecha Astur aconceyará pa facer una valoración de les elleiciones. Con tiempu abondo pa facer un analís posáu de los resultaos elleutorales y de la situación na que s’afaya la impugnación de les elleiciones por mor de la retirada de les papeletes d’Andecha Astur d’al menos un centenar de meses elleutorales, la mañana d’ésti sábadu 6 de xunu, Andecha Astur aconceyará pa facer una valoración de lo que supunso esti 24 M y la situación política na que mos afayamos a consecuencia d’ello.

Comu base de les valoraciones tendránse les declaraciones de Paulo Arboleya, Candidatu Nacional d’Andecha Astur nestes elleiciones, quien declaraba ente otres coses, que “resultaos esperables, que marquen un puntu d’inflexón”, p’amestar tamién que “nun se correspuenden cola capacidá d’incidencia social y política d’Andecha Astur, y son un puntu d’inflexón qu’obliga a redefinir tol asturianismu políticu”.

Ana Castaño va sustituyir a Gaspar Llamazares nel Congresu de los Diputaos hasta final de llexislatura. La decisión foi anunciada esta tarde nel Conseyu Políticu d’IX Asturies qu’analizaba, ente otres cuestiones, les bones resultancies electorales llograes n’Asturies nes últimes elecciones autonómiques y municipales.

Ana Castaño ocupaba’l puestu númberu 2 de la llista d’IX al Congresu de los Diputaos y resultó electa como conceyala en Xixón nos últimos comicios, cuidando que va compaxinar esi puestu hasta la convocatoria de les próximes elecciones xenerales.

Nel escritu presentáu esti día pa impugnar les elecciones del 24M, Andecha Astur esplíca como demientres la xornada electoral y motivao al paecer por una errónea interpretación de la Xunta Elleutoral Provincial d’Asturies relativa a l’autorización de les papeletes en llingua asturiana presentaes por Andecha Ástur, dieron en retirar les papeletes n’español presentes a lo menos en 100 meses electorales alcontraes preferentemente en Xixón, pero tamién n’Avilés, Grau y Mieres, lo que supón un pergrave atentáu escontra l’exerciciu democráticu.

Amás de diches meses electorales habría que sumar otres munches que nun pudieron comprobar, pero de les que “tuvimos conocencia, lo mesmo que de qu’esti problema foi detectáu amás de pola mesma Xunta Elleutoral Provincial d’Asturies, siquier pola Xunta Elleutoral de Zona de Xixón, que tuvieron recibiendo consultes per parte de presidentes de mesa mientres tola mañana” y qu’obligó a la mesma a emitir una circulara a toos el presidentes de mesa especificando que les papeletes de Andecha Ástur “nun pueden ser retiraes de nenguna manera del Colexu Electoral”.

Los apoderaos de Andecha Ástur punxeron en conocencia de la Xunta Elleutoral de Zona de Xixón “casos concretos como’l del Distritu 6 de Xixón, secciones 18, meses A y B; y 19, meses A y B nos que foi necesariu que la Xunta Elleutoral de Zona de Xixón interviniera directametne acompañada pola policía municipal por que el presidentes de diches meses repunxeren les papeletes de Andecha Ástur. Diches papeletes fueron repuestes pasaes les 13.30 hores”.

Nuna nota de prensa asoleyada esti día, la Xunta pola Defensa de la LLingua (XDLA) crítica l’actitú represiva hacia l’asturianu na xornada electoral y pide a los partíos políticos pasos alantre pa iguar estes situaciones, depués de que la Xunta Electoral validara les papeletes n’asturianu d’Andecha Astur -anque namás nel recuentu y ensin poder aparecer nes meses electorales-. Esti partíu denunció qu’en plena xornada electoral y a lo menos nun cientu de meses taben retirándose les sos papeletes, colo que na XDLA atalante que ye “una intencionalidá represiva hacia’l nuestru idioma, dellos interventores reinterpretaron la resolución de la Xunta Electoral y retiraron toles papeletes d’esti partíu políticu”.

Pa la Xunta esta actitú “muestra la represión y el castigu exercíu sobre los asturfalantes y l’incumplimientu de la llexislación vixente, tanto a nivel asturianu como español y européu”. Por eso, la XDLA “pide a tolos partíos políticos que van tar representaos na Xunta Xeneral nueva que dean pasos alantre pa poner fin a estes actitúes propies d’un periodu predemocráticu”.

Y ye que la existencia de mayoríes nueves “va permitir -si les otres partes nun exercen un bloquéu- avanzar llexislativamente nel reconocimientu de derechos y nel desarrollu real d’una planificación llingüística afayadiza pal casu asturianu. De la mesma manera, hai que recordar qu’en tolos conceyos del país van tar representaos partíos políticos que llevaben nel programa un compromisu esplicitu col idioma de la nuestra tierra. La XDLA espresa la importancia -yá sía executándola dende’l Gobiernu local o faciendo propuestes dende la oposición municipal- de desarrollar una política lingüística a nivel de los conceyos. Quier dicise, dende les alministraciones más averaes al ciudadanu”.

Por mor d’ello, la organización pide “a tolos conceyos asturianos que dean pasos alantre na recuperación de la toponimia tradicional -hailu tovía que nun dio’l primer pasu pa empezar el procesu-, na estabilidá de los servicios de normalización y nos derechos llaborales de los sos empleaos, y nel desarrollu d’una política llingüística municipal, midíes que munches veces nun suponen nengún costu añadíu. Otra manera, hai que volver a insistir en qu’a nivel autonómicu ye preciso tamién dar pasos alantre p’acabar colos casos claros de represión exercíos contra les persones que quieren utilizar el so idioma na vida cotidina y nel exerciciu de los sos derechos democráticos como ciudadanos”.