Política

La XPDLLA ta acabante d’emitir un comunicáu nel que “llamenta” les declaraciones feches al respective de la oficialidá pola Directora Xeneral Promoción Cultural y Política Llingüística, Consuelo Vega, nes que la responsable dixo “nun ver consensu abondo pa la oficialidá”. Pa la XPDLLA estes declaraciones “suponen la confirmación del pocu conteníu que va tener esi cargu en manes de daquién que sigue de pe a pa les consignes más conocíes del nucleu duru de la Federación Socialista Asturiana”.

Con estes declaraciones, sigue’l comunicáu “Consuelo Vega vuelve a centrar el debate de la oficialidá non nuna cuestión de derechos ciudadanos sinón na pura y simple aritmética parllamentaria”. Dende la XPDLLA “cuando la FSA se niega sistemáticamente a dialogar o a buscar consensos sobre la oficialidá cola sida de qu’eso nun ta nel so programa electoral, o cuando identifica los votos a Izquierda Unida colos votos de tolos favorables a la oficialidá, quier dar el mensaxe falaz de que los votantes del PSOE tán en contra de la oficialidá”.

Pa la Xunta pola “Vega, coles sos declaraciones, ta confundiendo les élites refractaries de dalgunos partíos colo que ye’l sentir mayoritariu de la sociedá”. Pa la Xunta pola Defensa de la Llingua Asturiana “resulta llamentable que cuasi diez años depués d’aprobase la conocida como «Llei del Bable» –que s’incumple sistemáticamente en cuantes a la enseñanza, medios de comunicación y usu institucional–, la Directora Xeneral Promoción Cultural y Política Llingüística descubra qu’hai «un campu llegal mui grande col marcu llegal qu’existe agora»”.

La XPDLLA recuerda que Vega “cuando se-y pregunta polos casos de discriminación llingüística asocedíos a funcionarios qu’usaron l’asturianu nes sos comunicaciones cola Alministración autonómica, refierse a ellos como «casos anecdóticos», nun los incluye ente los derechos reconocíos pola llei y ve difícil formar a los emplegaos públicos pa que conozan l’asturianu”. Los responsable de la XPDLLA comenten que “Si esi va ser el plantegamientu d’una persona que diz pertenecer al campu asturianista, mal pue acabar la cosa cuando a pocos meses d’asumir el cargu asume tamién –y tan rápido– la visión restrictiva de los derechos ciudadanos que fai la FSA”. Pa la organización oficialista “la realidá oxetiva ye que n’Asturies, güei, depués de venticinco años d’Estatutu d’Autonomía, sigue habiendo un movimientu ciudadanu que reclama unos derechos llingüísticos qu’una clas política intransixente y provinciana sigue ensin reconocer”.

El Conceyu Abiertu pola Oficialidá sigue cola campaña pa llevar la reivindicación de la oficialidá a tolos conceyos d’Asturies. Pa ello, la organización, qu’axunta a docenes d’asociaciones, convoca pal sábadu 27 d’ochobre, una Caravana pola Oficialidá pel suroccidente asturianu. La marcha va percorrer los conceyos de Cangas, Tinéu, y Allande.

Siguiendo la filosofía qu’acompaña a les caravanes feches hasta agora, la movilización y les actividaes que l’acompañen van ser entamaes poles organizaciones y colectivos de los propios conceyos, asinamesmo les actuaciones musicales van correr a cargu d’artistes llocales.

Les actividaes d’esta caravana pel suroccidente van siguir de tarde en Cangas: los músicos Pedru Pereira, Rafa Lorenzo, Ambás, Diego Pangua, Dolfu R. Fernandez y Roberto Ablanedo van actuar a partir de les siete nel Teatru Toreno. Dempués del conciertu va facese un filandón nel Bar Caniecho. Toa una xornada de reivindicación a la que’l CAO convoca a tolos asturianos del suroccidente.

La Comisión Executiva d’IX d’Asturies pidio nun comunicáu esti fin de selmana la negociación “cara a cara” de los presupuestos cola directiva de la FSA. “´Los presupuestos son la iniciativa política más importante del añu, un documentu esencial na vida política autonómica y deben ser negociaos al másimu nivel, ente les direcciones d’ambos partíos”, declaró’l Coordinador Xeneral d’Izquierda Xunida d’Asturies, Jesús Iglesias.

Izquierda Xunida d’Asturies tamien quiso puntualizar que nun va sofitar unos presupuestos que nun pueda xestionar. Pa la coalición una de les garantíes del cumplimientu de los presupuestos ye precisamente que IX-BA-Verdes participe de la so xestión, ya que en pallabres de Jesús Iglesias la FSA “nun diba tener nengún problema d’aprobar unes cuentes más propies d’Alicia nel Pais de las maravilles sabiendo d’antemano que nun les iben a cumplir”.

IX cree necesario que los presupuestos xuban los recursos empobinaos a xenerar emplegu, que tengan especial sensibilidá nel problema de la vivienda con ayudes el pagu pagu d’hipoteques y que meyoren el gastu en política social. IX tamien recordó nel comuinicáu que los futuros presupuestos deberán sofitar la igua d’una rede educativa pública pa los neños de cero a tres años asina como la defensa de la cultura y la llingua asturana y les polítiques sostenibles de xestión del agua y otros recursos naturales.

Según ficieron saber al traviés d’una nota de prensa, l’Asociación Cultural N’ast “tuvo conocencia estos díes de la decisión de la dirección del Institutu de Llanes de ñegar l’asignatura d’asturianu a ente 15 y 20 alumnos de segundu de bachilleratu”. Según denuncia N’ast “la dirección desvió a estos alumnos a otres asignaturas alegando que yeren les más reclamaes”.

N’ast considera esti fechu “pergrave” y “una amuesa más de cuala ye la probetaya situación de la Llingua Asturiana nel sistema educativu, vulnérando’l drechu de los asturianos a deprender la llingua del país. Amás la dirección del istitutu ataca direutamente a l’asignatura nun respetando nin siquiera que seyan munchos más que los exisios nel cupu pa poder dar clas d’asturianu”.

N’ast exixe al istitutu de Llanes y a la Conseyería d’educación que tome les midíes afayadices pa qu’estos alumnos puedan a la fin estudiar asturianu y fine asina la persecución de la nuesa llingua y entremos asina nuna braera escolarización n’asturianu.

Nesti mes d’Ochobre ta acabante d’aportar a la aición política l’Ensame de la Mocedá Independentista y Revolucionario (EMIR), la nueva estaya de mocedá d’Andecha-UNIDÁ, que sigún asoleya la web de la formación nacionalista “ñaz col enfotu d’abrir un nuevu espaciu d’izquierda y soberanista ente la mocedá asturiano”.

EMIR quier ser tamién “un espaciu abiertu, democráticu, asambleariu y que fuxa de los fundamentalismos rancios y baratos anguaño esistentes n’otros sectores minoritarios de la izquierda nacionaliega”

. Sigún Andecha, “EMIR ñaz tamién col enfotu de contribuyir al proyeutu de la xuntura del nacionalismu d’izquierda n’Asturies que representa la coalición UNIDÁ”.

Con estos cuatru términos pue resumise en términos xenerales la ideoloxía de la nueva organización de mocedá nacionalista: “Un ensame nel que cualquier mozu o moza que se considere d’izquierdes, independentista y revolucionariu podrá participar activamente, militando o simpatizando, cola organización y les campañes que d’equí endelantre ésta desendolque”.

Sigún la nota de prensa na que se presenta la nueva formación de mocedá nacionalista, “EMIR quier aprovechar la ocasión p’afitar la UNIDÁ que va contribuir nun proyeutu políticu posible pal xorrecimientu y consoldamientu, asina como inxertamientu nes instituciones, de los nuesos idegales soberanistes”.

Dende les 19:30 hores va tener llugar na Plaza l’institutu, la popular Plaza’l Parchís de Xix´ñon un actu políticu y cultural de denuncia escontra la represión n’Asturies y en sollidaridá colos cinco cubanos presos y colos presos políticos en America Latina ya nel restu del mundiu. Esta iniciativa ta puesta en marcha pola Corriente Sindical d’Izquierda y el Comite de Sollidaridá colos Presos Políticos de Colombia.