Política

El Partíu Popular de Xixón presentó apocayá un ruegu na Xunta Rectora de la Fundación Municipal de Cultura, Educación y Universidá Popular del Ayuntamientu de Xixón col envís de pidir que se cumpla l’usu de los topónimos que dende va más d’un añu son oficiales nel conceyu de Xixón y que’l gobiernu municipal vien inorando na mayor parte los casos.

El representante del Partíu Popular nesta Xunta Rectora, Humberto Gonzali, presentó un ruegu que reproducimos enteru, nel que recordaba que dende’l PP “entendemos que toa adaptación nel usu alministrativu de cualesquier aspecto venceyáu colos usos llingüísticos vernáculos requier, pa la so óptima asimilación pol cuerpu llaboral, d’un razonable periodu de familiarización”. Sicasí, pa los populares “pasáu yá un añu dende la reforma de los topónimos del conceyu ye posible facer analís de la so aplicación”.

“Los miembros de la Xunta Rectora –sigue’l ruegu- son conscientes de la edición que la Oficina Municipal de la Llingua del Ayuntamientu de Xixón tien fecha colos nomes oficiales nuevos del conceyu”. Esti folletu fízose dientro d’una campaña informativa pa los xixoneses y sobre manera centrada nos trabayadores del consistoriu xixonés.

Camienten, asina los populares, que ye momentu de “ensin demora”, aplicar los topónimos oficiales del conceyu de Xixón “en toa aquella documentación de calter alinistrativo que tenga’l so orixe na Fundación Municipal de Cultura, Educación y Universidá Popular del Ayuntamientu de Gijón/Xixón”.

El secretariu d’organización de la Federación Socialista Asturiana (FSA), Jesús Gutiérrez pidió al alcalde d’Uviéu y candidatu popular por Asturies al Congresu de los Diputaos, Gabino de Lorenzo, qu’aclarie la so postura a favor o en contra de la oficilialidá del asturianu. Recordó-y amás qu’utilizar l’asturianu “nun ye ponese boína y gabardina y dar paseos pela playa San Llorienzo nin tampoco usalu pa ridiculizar al PSOE”.

El dirixente socialista cree que Gabino “ye falsu y namás quier dir de guai pela vida y falar castellán na intimidá”. Les declaraciones son la rempuesta de los socilistes asturianos a l’acusación de De Lorenzo sobre “la zuna que tienen los socialistes al asturianu” que l’alcalde “nun ye a entender”. Esta polémica fai que l’asturianu vuelve a ser el centru de les discusiones nesta campaña de les elecciones xenerales n’Asturies.

La sede del Real Institutu d’Estudios Asturianos celebró ayeri les elecciones a director pa los cinco años próximos y el sector contrariu a la normalización del asturianu na institución trunfó otra vegada cola elección del catedráticu d’Hestoria Medieval de la Universidá d’Uviéu, Juan Ignacio Ruiz de la Peña, qu’hasta agora ocupaba’l cargu de vicedirector y que lleva más de trenta años na institución. De la Peña presentó un programa nel que l’asturianu nun tenía presencia dala, mientres que l’otru candidatu, Joaquín Fernánez, planiaba otres midíes mui diferentes.

Y ye qu’anque Joaquín Fernández, xefe del serviciu d’Hematoloxía del Hospital de Cabueñes, nun quixo facer públicu’l so programa, fontes cercanes comentaron que’l doctor proponía nel so programa “abrir caminos d’entendimientu ente l’Institutu y la Oficina de Política Llingüística del Principáu”, amás d’un cambiu d’actitú del Institutu, “de mou abiertu, per aciu los comunicaos correspondientes, sobre la llingua asturiana, y l’usu d’ella nos boletines, congresos y demás manifestaciones”.

Otra de les propuestes estrella, que nun van llevase alantre dempués d’esta derrota, “pasaría per una declaración de principios ente l’Academia de la Llingua Asturiana y el RIDEA, un documentu d’entendimientu básicu, a partir del que se podría llegar a onde se quixera”.

A la fin, el candidatu favoratible a la normalización, sacó 6 votos, frente a los 31 de Juan Ignacio Ruiz de la Peña. Hebo amás, un votu en blancu. Ente los miembros con drechu a votu tán representantes 14 de los partíos presentes na Xunta Xeneral, l’Academia de la Llingua Asturiana, la Universidá d’Uviéu y los 26 miembros permanentes.

El Partíu Popular va pidir l’usu del asturianu nes actividaes y denomación del RIDEA

L’Asociación de Trabayadores de la Normalización Llingüística denunció al traviés d’un comunicáu que la Conseyería de Cultura “nun cumple colos servicios de normalización nos conceyos” y “la falta de sintonía qu’existe ente ellos y la institución”. L’ATNL, “preocupada pola eficacia de los sos servicios y pola estabilidá llaboral de los sos miembros”, vien defendiendo dende va años “la firma d’un conveniu ente’l Gobiernu del Principáu d’Asturies y los Conceyos”, midida que se-yos comunicó “paecía bien a la conseyera”, pero que nun se lleva alantre.

Pa l’ATNL, esti conveniu tenía que tar yá firmáu, pa evitar “qu’haya Servicios qu’interrumpan dos o hasta seis meses la so actividá, colo que supón eso pal procesu de normalización del asturianu y pa los sos responsables”.

Por mor d’ello, los servicios de Mieres y Samartín del Rei Aurelio tán pesllaos pel monentu y a la espera de financiación.

Per otru llau, la Xunta pola Defensa de la Llingua asturiana, refiriéndose a estos fechos declaró que “la Rede de Servicios de Normalización Llingüística forma parte de la propaganda institucional a la hora de vender el so enfotu pola normalización del asturianu, pero la Conseyería de Cultura nun va más allá nel so apoyu. A estes altures desconozse siquiera con qué presupuestu se cuenta pa da-yos continuidá a los Servicios qu’entá siguen funcionando. Tampoco nun se firmó’l conveniu ente’l Principáu y los Conceyos necesariu pa que los Servicios puedan facer el so llabor sin parones cada vez que s’acaba la subvención. La necesidá d’esi conveniu y la fecha pa firmalu (nel mes d’avientu pasáu) acordárase ente los trabayadores de los Servicios y la Conseyería”.

El cabezaleru del PP al Congresu y Alcalde d’Uviéu, Gabino de Lorenzo, vieno acabante d’acusar a los responsables socialistes asturianos de “xuegu suciu” y d’usar a la so “estaya de navayeros” p’atacalu. Ente esos “navayeros” taríen, según De Lorenzo, Jesús Gutiérrez, Pedro Sanjurjo, Jesús Morales, Paloma Sainz, Alfredo Carreño o Mariví Monteserín.

Al traviés d’una carta pública dirixida al secretariu xeneral de la FSA, Javier Fernández, recoyida por Europa Press, esta vegada en castellán y non n’asturianu como venía faciendo, l’alcalde d’Uviéu dixo que toles declaraciones d’esos líderes socialistes tienen como “denominador común” el “insultu” y la “inxuria: Qué estratexa más frívola y qué poca finura política demuestren: llancen per delantre a la estaya de navayeros del partíu, incluyía la ‘Dama d’Oru’, pretendiendo reservar en Madrid al incorruptu Álvaro Cuesta”.

“Güei ye Jesús Gutiérrez que me compara con Mortadelo o Filemón y táchame de groseru y burru; ayeri foi Fernando lastra quien me calificó de payasu y bufón”, señaló. Sicasí, el dirixente ‘popular’ da por termináu’l xuegu y diz a los socialistes que si quieren alderiques, que los faigan “cola so propia conciencia”.

El secretariu d’Organización de la FSA-PSOE y coordinador de campaña de los socialistes asturianos, Jesús Gutiérrez, aseguró’l llunes que’l cabezaleru de llista del PP por Asturies, Gabino de Lorenzo, busca cualquier escusa pa llibrase de los alderiques electorales col candidatu socialista.

Dende esti llunes día 28 de xineru, la Oficina de Política Llingüística camuda la sede a les nueves instalaciones de Buenavista a u ya se treslladaren otres Conseyeríes nestos caberos meses. La Oficina de Política Llingüística dexa les sos tradicionales estancies nel Palaciu de la Plaza’l Sol y tendrá dende esti día como direición la cai Eduardo Herrera, “Herrerita”, ensin númberu, 1.ª planta, n’Uviéu. Nestos camudamientos son normales los problemes pa contautar telefónicamente y anque se caltién l’actual númberu (985106741) pidese emplegar el corréu electrónicu (opllarrobaprincast.es) al menos problema pa contautar pol teléfonu.

El candidatu del PP por Asturies al Congresu de los Diputaos y alcalde d’Uviéu, Gabino de Lorenzo, recomendó-y esti vienres al presidente rexonal del PP, Ovidio Sánchez, que se dedique a “trabayar” pa ganar les elecciones del 9 de marzu “en vez de tar a toes hores preocupándose pol futuru del so sillón presidencial”. “Vas acabar mareáu de tanto da-y vueltes –al sillón–“, dixo-y De Lorenzo a Ovidio, nun testu escritu n’asturianu amestáu, que ta quedando afitáu como’l llinguax políticu d’esti enfrentamientu internu qu’entamare cola desginación del Alcalde d’Uviéu como candidatu al Congresu.

El númberu ún del PP por Asturies, nunes declaraciones escrites en ‘amestáu’ dirixíes al presidente de los ‘populares’, diz que los asturianos tán “fartucos’ de tanta “engarradiella interna” n’alusión a la polémica surdida sobre la ellaboración de les llsites y alvierte que pa esi enfrentamientu “naide cuente” con él.

De la mesma manera, De Lorenzo pide-y a Sánchez que “s’una al equipu” que “ta lluchando p’algamar una victoria histórica nes próximes elecciones xenerales”. Recuerda de la mesma manera al so compañeru de partíu que pese a la so gran trayectoria en política nun algamó tovía ganar unes elecciones. “Lleves una llargúisima carrera política y entovía nun sabes lo que ye llamber unes elecciones”, diz-y nel so escritu a De Lorenzo a Ovidio Sánchez. Por ello, insíste-y en que s’una al so equipu pa “ver como presta”. “Fai casu de mí Ovidio, que nun t’engañé nunca”, acaba De Lorenzo.

El Conseyu de Gobiernu aprobó ayeri’l decretu pol que s’afiten los topónimos tradicionales de Samartín del Rei Aurelio como los oficiales. Esti procesu, que respuende al Plan de Normalización y a la Llei d’Usu y Promoción del Asturianu, qu’establez que los topónimos d’Asturies van tener la denomación oficial na so forma tradicional. Con esti son venticinco los conceyos cola toponimia aprobada.

Amás, estos díes, anuncióse qu’ún de los oxetivos de la nueva Xunta de Toponimia va ser la ellaboración d’un mapa oficial d’Asturies, a escala 1:200.000, cola toponimia tradicional y agora oficial.

Anunciólo estos dies l’Ayuntamientu de Llangréu, l’Academia de la Llingua Asturiana va sumase al proyectu de la casa de los Alberti , un edificiu onde ta creándose un centru de la cultura asturiana, cola firma d’un conveniu pol que quedará afitáu l’asesoramientu de l’ALLA “pa dotar de conteníu al centru de la cultura asturiana de la casa de los Alberti de Ciañu”.

La Comisión de Cultura del Ayuntamientu de Llangréu aprobó nel so conceyu últimu un borrador del conveniu que va firmase. Nel documentu afiten que “L’Academia de la Llingua va asesoranos a la hora d’establecer los conteníos del centru y la so programación y tamién ta previsto qu’aporten documentación y un fondu de publicaciones”, según declaraciones d’Ana Oliva Rodríguez, conceyala de Cultura del Ayuntamientu de Llangréu.

El conveníu ye según la conceyala “asemeyáu al que firmó nel so día l’Academia col ayuntamientu de Xixón”. La Casa de los Alberti foi remocicada pola escuela taller de la Fundación Comarques Mineres (Fucomi) y anguaño tán rematando los últimos trabayos d’esti edificiu barrocu del sieglu XVIII que quier convertise , nuna referencia de la cultura asturiana con salón d’actos, sala d’esposiciones y una biblioteca especializada en temes asturianos. Nos próximos meses va buscase firmar una alcuerdu tamién cola Universidá d’Uviéu.

Les elecciones a Rector de la Universidá d’Uviéu calienten motores y los candidatos tán yá de precampaña. Unu de los primeros n’abrir la web electoral ye’l químicu Vicente Gotor Santamaría, que na web usa l’asturianu pal lema principal de la so campaña, anque eso sí, debaxo del castellán y xunto al testu n’inglés, nun tamañu de lletra inferior. El lema escoyíu ye “Axúntanos la Universidá”. Sicasí, esta amuesa de bona voluntá paez amosar que’l candidatu caltién el compromisu que firmare va cuatro años cola Xunta pola Defensa de la Llingua Asturiana.

Nos anteriores comicios Gotor firmare un decálogu que la XPDLA espusiere ensin ésitu hasta los últimos díes de la campaña, cuando’l químicu rectificó, dexando solu nel refugu del asturianu a Juan Vázquez.

La campaña entamada nel so día pola XPDLA col lema “Nin Vázquez, nin Gotor, La pita pa Rector”, foi retirada cola ruptura pública d’un cartelu pol Xulio Casado, representante de la organización, cuando Gotor firmó’l decálogu. Sicasí, esto nun foi abondo. A la fin, Gotor quedó a namás 152 de la victoria y Vázquez fízose cola victoria. Gotor tien agora una nueva oportunidá d’amosar el so apoyu al asturianu dientro de la Universidá. La fecha clave, el 15 d’abril que vien, día de la votación.

DECÁLOGU PAL EMPLEGU DE LA LLINGUA ASTURIANA NA UNIVERSIDÁ D’UVIÉU QUE FIRMÓ VICENTE GOTOR EN 2004

1.- Asturies vive nuna realidá de billingüismu; poro, la Universidá tien de caltener, potenciar y curiar la llingua d’Asturies y de los asturianos. Defenderáse’l billingüísmu en toles sos estayes.

2.- Propondráse y defenderáse la implantación de la llicenciatura de Filoloxía Asturiana y la titulación de Filoloxía Asturiana en Maxisteriu.

3. Dende’l Rectoráu propondráse y defenderáse, ente los órganos de gobiernu de la Universidá, que la imaxe corporativa de la Universidá d’Uvieu tenga un emplegu únicu oficial billingüe asturianu-castellanu, n’igualdá de condiciones pa dambes llingües. Esto afectará a la retulación de dependencies, los impresos oficiales y páxina web de la universidá. Asinamesmo, dende’l Rectoráu propondráse y defenderáse que l’atención al públicu y, en xeneral, toles comunicaciones esternes y internes de la Universidá d’Uvieu serán billingües, lo qu’habrá de conllevar la formación y reciclaxe de los profesionales correspondientes. La docencia y la redacción de los esámenes podrá facese nes dos llingües. Nos casos nos que la ufierta docente lo permita, los estudiantes podrán escoyer docencia n’asturianu o en castellanu.

4. Dende’l Rectoráu propondráse y defenderáse, ente los órganos de gobiernu de la Universidá, la puesta en marcha d’un Serviciu de Normalización Llingüísticu, afitáu por comisiones nos respectivos campus universitarios, que se coordinarán pa entamar midíes col xacíu de normalizar l’emplegu de la llingua asturiana na Universidá.

5. Dende’l Rectoráu propondráse y defenderáse, ente los órganos de gobiernu de la Universidá, la puesta en marcha d’un Plan de Normalización de la Llingua Asturiana con unes estratexes, oxetivos y tiempos determinaos.

6.- Redactaráse un Reglamentu internu del usu del asturianu na Universidá d’Uvieu.

7.- Fadránse unos Presupuestos específicos de la Universidá d’Uvieu destinaos a la potenciación y puesta en marcha de les midíes oportunes al rodiu de la normalización y promoción de la llingua asturiana.

8.- Habrá una llinia d’ayudes específiques pa la difusión n’asturianu, lo mesmo en tesis, trabayos, ponencies, investigaciones, conferencies…

9.- Fomentaráse y promocionaráse la investigación al rodiu de la filoloxía asturiana y la llingua asturiana al travies d’ayudes.

10.- La Universidá d’Uvieu tien de dir faciendo camín, siendo un promotor y dinamizaor pa que la normalización de la Llingua Asturiana seya un fechu real y visible pa la comunidá tanto universitaria como la sociedá asturiana en xeneral.

Páxina web de Vicente Gotor, candidatu a Rector