Política

L’Aconceyamientu de Xuristes pol Asturianu unvió un comunicáu nel que denuncia “les llamentables manifestaciones feches pol señor Areces en Galicia”. Unes declaraciones énte les que l’AXA “vese nel casu de refierta-y a la ciudadanía asturiana que “L’emplegu públicu de la llingua propia ta proclamáu pela Organización de les Naciones Xuníes y el Conseyu d’Europa como drechu humanu imprescriptible ya independiente dafechu de les mayoríes polítiques de gobiernu”.

Amás, pal AXA “Tolos poderes públicos tan obligaos a cumplir bonalmente l’ordenamientu xurídicu (nesti casu la Carta Europea de les Llingües Rexonales o Minoritaries y la Llei 1/1998, d’usu y promoción del bable/asturianu) y los pautos que roblen (Plan pa la normalización social del asturianu, 2005-2007), al marxe de les sos comenencies”.

Los xuristes creen tamién que “pa saber cuala ye la opinión d’un pueblu hai que-y la entrugar primero. Poro, si’l señor Areces nun cree no que dicen les encuestes sociollingüístiques -que los más de los ciudadanos tán porque l’asturiana tenga un tratu asemeyáu al que reciben les otres llingües rexonales españoles- que convoque un referendum pa salir de duldes

L’AXA declaró tamién nel comunicáu que “El nome de la Ría del Eo; la colonización televisiva gallega del occidente d’Asturies; y les iniciatives parllamentaries a la gueta de la declaración d’oficialidá de la llingua gallega na fastera Navia-Eo, son problemes de presente y de futuru que meriten daqué más del minutu que’l señor Areces diz que nun quiso da-yos nel so alcuentru institucional col presidente de la Xunta de Galicia.

Darréu entamó una actividá pela montaña de Somiedu y embaxo’l lema “Independeica y socialismu”, un grupu de militantes de la organización independentista xuvenil “Darréu” xuntóse pa facer, el pasáu sabadu 19 d’abril, lo que la organización política xuvenil nomó como “I Marcha Montañera de Mocedá”.

Na mesma participaron mozos y moces de los conceyos de Ribeseya, Maliayu, Xixón, Uvieú, Llaviana, Samartin del Rei Aurelio, Noreña, Siero y Llangréu.

La marcha entamó a les once la mañana en Vil.lar de Vildas, nel conceyu de Somiedu y dende ehí la mocedá de Darréu xubió a la braña La Pornacal y a Braña Viel.la, onde se ficieron dos talleres de formación, según informen dende la organización.

Magar del mal tiempu con fríu, lluvia y ñeve, comenten “l’actividá desendolcóse dientro lo previsto, el bus garróse de torna a les ocho la tarde y tolos asistentes ficieron una valoración perpositiva de la mesma”

El presidente del Partíu Popular asturianu, y diputáu na Xunta Xeneral, Ovidio Sánchez, salió a la puerta principal del Parlamentu autonómicu pa saludar a grupu de persones ellí concentráu que pidíen la oficiliadá na reforma del Estatutu d’Autonomía, coincidiendo cola celebración d’una de les xuntes pa tratar la ponencia.

Según esplicó Fernando Ornosa, voceru del Conceyu Abiertu pola Oficialidá (CAO), colectivu que convocaba l’actu, Ovidio Sánchez, qu’entrara per otru accesu secundariu, salió pela puerta principal y saludó con un xestu a los ellí concentraos.

Tratábase de dalgunes decenes de persones, que se colocaron ante la entrada principal, con una gran pancarta na que se lleía la conseña ‘Na reforma l’estatuttu l’asturianu llingua oficial’. Contaron con presencia de gaiteros y cantaron dalgunes conseñes favoratibles a la oficialidá de la llingua. L’actu entamó a les 8.30 y prollongóse hasta les 9.15 hores. Ente los asistentes tuvieron los diputaos del grupu d’Izquierda Xunida-Bloque por Asturies-Verdes, Noemí Martín y Francisco Javier García Valledor.

El CAO va realizar estes concentraciones ante’l parlamentu autonómicu siempre coincidiendo colos conceyos previos a la negociación del estatutu d’autonomía. La próxima cita va ser el llunes 28, a les 9.30 nel mesmu llugar. “Y si cambien la hora, nós vamos cambiar la nuesa tamién”, finó Ornosa.

A les 9:30 de la mañana del llunes, el Conceyu Abiertu pola Oficialidá xuntó a más d’un centenar de persones na concentración que tenía convocada delantre la Xunta Xeneral, coincidiendo cola reunión de los grupos parllamentarios pa la discusión de la reforma del Estatutu d’Autonomía.

El CAO desixó a los grupos parllamentarios qu’encaren esta reforma estatutaria con responsabilidá y que dean a la llingua asturiana el rangu que yá debería tener dende va más de venticinco años.

La llingua asturiana ye la única llingua del Estáu que nun ye oficial. Ye hora de qu’esta situación vergonzosa y discriminatoria acabe, ye necesario un Estatutu d’Autonomía que reconoza los mesmos derechos llingüísticos a tolos asturianos y asturianes, falen la llingua que falen.

Los dos candidatos qu’apostaren con más fuercia pola normalización y promoción del asturianu na Universidá d’Uviéu fueron los vencedores de les elecciones a Rector celebraes ayeri n’Asturies y nes que taben llamaos a votar 28.000 miembros de la comunidá universitaria, de los que votaron un 28’41%. Gotor algamó un resultáu mui superior al esperáu, 3643 votos, un 49’29%, que lu punxieron a menos de dos décimes de la mayoría absoluta, y poro, de la victoria directa. Y Andrés, con 18 votos menos que Santos pero un porcentaxe, por mor de la ponderación de votos, del 22’56% (1731 votos) frente al 19’43 (1749 votos) de Santos y el escasu 8’72% (453 votos) de Cueto, el candidatu que nun facía referencia dala al asturianu nel so programa.

No que cinca a la participación, foi mui estremada por estayes, la estaya de profesores doctores, la que cunta con un porcentaxe mayor na ponderación, votó nun 91’95%, los profesores ensin doctorar y los investigadores llegaron al 63’37%, el personal d’alministración y servicios nun 88’69% y el sector con mayor númberu d’electores, el de los estudiantes, nun escasu 21’18%, que llegó a datos de namás el 8’07% na Escuela Xovellanos de Xixón, asitiada en La Llaboral.

Por estayes, los dos ganadores, que van pasar a la segunda vuelta sacaron desiguales datos, superando Gotor a los demás en toles estayes de votación. Vicente Gotor algamó 543 votos ente los doctores, el 49’73%, 327 (el 51’57) ente los demás profesores, 2328 votos ente los alumnos, lo que supón el 46’83 de los mesmos y 445, el 50’92, de los votos del P.A.S.

Paz Andrés sacó, pela so parte, el 21’6 de los votos de los doctores, con 236 electores, 138 votos de los demás profesores (el 21’6%), 1094 votos de los alumnos (un 22’01%) y 236 votos, el 30’09% del personal d’alministración y servicios.

El resultáu final tien d’esperar agora hasta’l del próximu miércoles 23, cuando va celebrase una segunda vuelta bien apretada, yá qu’ente los candidatos perdedores paez probable dalgún pactu cola candidata Paz Andrés.

La Universidá escueye esti martes Rector ente cuatro candidatos qu’incluyen nel programa midíes pa la normalización del asturianu

El grupu parllamentariu d’IX-BA-Verdes apuestó ayeri nun comunicáu por “reflexar na reforma del Estatutu d’Asturies les competencies de l’autonomía d’un mou asemeyáu a como lo faen los estatutos d’Andalucía y Cataluña”. Estos testos llexislativos afronten, p’IX una descripción de caúna de les competencies, desenrróllenla y definen el so conteníu. L’actual Estatutu refléxalu al traviés d’un artículu nel que se mencionen les competencies esclusives, otru nel que se mencionen les de desenrrollu llexislativu y otres que son de mera execución.

“Creemos qu’esa fórmula que s’utilizó nel estatutu d’Andalucía ye la que meyor propicia un incrementu del autogobiernu n’Asturies y esa sedrá la nuesa alternativa”, aseguró’l voceru d’IX-BA-Verdes na Xunta Xeneral, Jesús Iglesias.

Nesti conceyu decidióse entamar polos aspectos competenciales yá que los representantes de los grupos parllamentarios consideraron que podría ser más fácil averar posiciones nesta materia que n’otres, como por exemplu’l preámbulu qu’inclúi temes como l’asturianu y la capitalidá d’Uviéu.

Los parllamentarios tamién acordaron güei que los sos trabayos sedrán pa reformar l’actual Estatutu y non pa redactar unu nuevu. IX-BA-Verdes nun tien reticencies a que seya una reforma, siempres que quede claro dende un principiu qu’ésta s’afronta ensin prexuicios sobre cuál debe ser el resultáu del mesmu, esplicó Iglesias.

El llíder del Bloque por Asturias (BA), Rafael Palacios, aseguró estos díes en declaraciones a los medios de comunicación, que “nun reconocer la oficialidá del asturianu nel procesu de reforma del Estatutu d’Autonomía d’Asturies sedría un fraude y vulneraría los drechos de los ciudadanos”. Pal Bloque por Asturies ye tamién “increyible”, que “nel sieglu XXI heba ciudadanos d’un país européu lluchando polos sos drechos elementales”.

Según Palacios ye necesario “siguir lluchando escontra la desinformación, escontra los tópicos y escontra l’acción destructora d’una minoría intolerante que tien un odiu irracional a la llingua asturiana y qu’usa tolos medios al so alcance pa impedir la normalidá del idioma”.

Pal Bloque “rómpese’l principiu d’igualdá entre ciudadanos y col restu los ciudadanos del Estáu español”. Según dixo Palacios, “la llucha pola oficialidá ye la única reclamación constante na hestoria recién d’Asturies que sigue ensin resolvese”.

“Queremos un Estatutu que reconoza los mesmos drechos llingüísticos que tienen los ciudadanos d’otres comunidaes”, añadió Palacios, que recordó tamién que “la oficialidá nun quier dicir imponer la llingua a quien nun la quiera falar”.

La presidenta del PP de Xixón, Pilar Fernández Pardo, amuesó güei públicamente’l so refugamientu al equipu de trabayu designáu pol presidente del PP d’Asturies, Ovidio Sánchez, tres les últimes elecciones xenerales, pa facer trabayos previos a los congresos nacional y rexonal. El grupu ta encabezáu por Joaquín Aréstegui, Fernando Goñi y Agustín Iglesias Caunedo.

La intervención de Fernández Pardo se produxo nel marcu del aconceyamientu estraordinariu del Comité Executivu Rexonal que tuvo llugar güei n’Uviéu. Na mesma llinia que Fernández Pardo mostráronse otros dirixentes. La presidenta del partíu en Xixón, y vicepresidenta del PP asturianu, foi mui clara y especialmente tayante nel momentu d’esponer los sos argumentos. “Ni estuve, ni estoy, ni estaré en ese grupo”, espetó-y la llider popular a Ovidio Sánchez. Amás, Pardo espresó la so opinión negativa sobre esa triba d’estructures y dixo que les cuestiones que tienen de ver cola acción del PP n’Asturies, incluyíes les relatives a la reforma estatutaria, la oficialidá de la llingua o los presupuestos, tienen de decidise “dentro de los órganos del partido” y non fuera. Xixón tuvo un pesu perimportante nel conceyu d’esta mañana, onde nel mesmu sentíu que Fernández Pardo falaron dellos miembros de la so xunta local.

Tamién, les crítiques a esi grupu de trabayu ficiéronse dende representantes d’otres xuntes, que llegaron a denomala “estructura paralela” o “triunvirato de sabios”. La reunión foi especialmente tensa con numberoses intervenciones. Manuel Rodríguez, de Cangas del Narcea, reivindicó’l papel de la secretaría xeneral del partíu, dirixida por Reinerio Álvarez.

El secretariu d’área de conceyos de baxa densidá, Felipe Díaz Miranda, pidió respetu a los órganos que dirixen el PP y la convocatoria normal de xuntes directives y comités pa dialogar dientro del partíu. Especialmente sonáu foi’l falamientu del secretariu xeneral, Reinerio Álvarez, que dixo que’l mayor patrimoniu yeren les xuntes locales y los sos presidentes, cargando amás contra Aréstegui.

Dixo que los aconceyamientos fechos pol mencionáu grupu de trabayu cellebrárense ensin la presencia del secretariu xeneral, nin d’otros dirixentes del partíu n’Asturies. Asina, refugó esa dinámica, apoyó a Pilar Fernández Pardo y consideró negativa la formación d’otros órganos. El presidente del PP de Mieres, José Coto, defendió la so xestión y criticó les filtraciones feches por delles persones del so propiu partíu pa engochar la so imaxe, lo que tildó d’asqueroso. Igual qu’otros intervinientes, refugó que s’intenten acallar les propuestes de renovación.

Na so sesión del martes 8 d’abril el Conseyu de Gobiernu del Principáu d’Asturies aprobó’l Decretu pol que se determinen los topónimos oficiales del conceyu d’Ayer, que nunos díes va publicase nel Boletín Oficial del Principáu d’Asturies (BOPA). Con esti son yá 28 los conceyos asturianos que tienen la so toponimia oficial colos nomes tradicionales.

Esta selmana designóse a Humberto Gonzali como nuevu miembru del Comité Executivu Rexonal del PP. Esti Comité ye’l máximu órganu de gobiernu del partíu nel ámbitu autonómicu y la pertenencia a él implica, al tiempu, ser integrante de la Xunta Directiva del PP d’Asturies.

Ente otres, el Comité Executivu Rexonal tien la facultá d’ordenar, coordinar y controlar toles actividaes del partíu y adoptar les midíes necesaries pal cumplimientu de los alcuerdos y directrices emanaos de los Congresos y la Xunta Directiva, asina como la función d’ellaborar y adoptar informes y propuestes que se someterán al Congresu o Xunta Directiva correspondiente y de definir la estratexa xeneral de partíu y los sos pronunciamientos políticos y programáticos y afitar les llinies maestres de l’acción política de los estremaos grupos institucionales, aprobar los sos reglamentos y nomar y cesar a los voceros y cargos directivos d’aquellos.

Gonzali ye tamién dende va tiempu asesor del grupu municipal del PP xixonés, exerciendo los sos servicios como xefe técnicu cola xera d’asesoramientu de los conceyales d’esta fuercia política nel periodu corporativu 2007-2011, miembru de la Xunta Directiva de Xixón, presidente de la so Comisión de Cooperación y Solidaridá y en representación d’esti partíu ye componente de la Xunta Rectora de la Fundación Municipal de Cultura, Educación y Universidá Poular de Xixón, y Miembru de Númberu nel RIDEA.

D’otra banda ye tamién presidente del Círculu Lliberal. Como xestor cultural tien desarrollao numberoses actividaes, siendo l’entamador del foru lliterariu Arribada. Ye amás ún de los escritores más destacaos d’Asturies. Tien publicaos nueve poemarios, dos volúmenes de narrativa, traducciones dende’l catalán y francés, y numerosa obra en más d’una ventena de llibros colectivos.