Política

La fin de selmana vieno cargada de polémica n’Uviéu y l’asturianu volvió a protagonizala. La disputa entamóla’l vienres el conceyal de Cultura d’Uviéu, Xosé Suárez Arias Cachero “Felechosa”, que xunto a la presidenta de L’Academia de la Llingua Asturiana, Ana María Cano, presentaba los Premios Uviéu na carpa de LlibrUviéu. Nesi actu Felechosa comentó que trabaya dientro del Partíu Popular “pa convencelos de la necesidá de la oficialidᔠy que los verdaderos problemes nun veníen d’esta formación “sinón del PSOE, que garantiza los drechos d’otra minoría, como son los transexuales, pero nun lo fai colos asturfalantes”.

Nun tardaron en llegar les declaraciones del PSOE, al traviés del conceyal Manuel Ángel Rodríguez, que’l sábadu comentó que “comparar los drechos de los asturianofalantes y los de los transexuales ye más propio d’un abertzale que d’un demócrata”. Pal socialista uviedín, estes declaraciones son amás, amuesa de “la escandalosa falta de llexitimidá d’un conceyal con una trayectoria que demuestra qu’utilizó siempres l’asturianu pa ‘medrar”. Pal PSOE d’Uviéu, “la comparanza de la llibertá sexual de los españoles cola llexítima utilización del asturianu demuestra la filosofía d’un conceyal qu’entamó la so andadura nes proximidaes del nacionalismu radical y que güei se convirtió nel escribiente de los chistes sobre asturianu del alcalde”.

A los socialistes “lláma-yos l’atención” esta ardiente defensa del asturianu nun representante del PP, pa ellos, “el partíu más españolista de tol arcu políticu”, que comenten, “nos sos 17 años al frente del gobiernu municipal de la capital despreció los drechos del asturianu”. A lo qu’añadieron que “l’ayuntamientu d’Uviéu nun dio nengún pasu nel camín de la normalización, lo que si ficieron otres alministraciones”.

La polémica sigue abierta y de xuru que da más de sigo nos próximos díes.

Un vidiu apaecíu recientemente na rede, recuerda al traviés de les imáxenes de la época, la participación del anguaño Presidente d’Asturies, na manifestación convocada por Conceyu Bable en 1976, qu’axuntare a miles de persones y reclamó per primer vegada nun actu d’estes característiques el “bable nes escueles” y “l’autonomía rexonal”.

La formación política independentista Andecha Astur ta acabante de pidir formalmente la declaración del Día les Lletres Asturianes como día festivu “n’honor de la más grande seña d’identidá de tolos asturianos”. El Día nel que los asturianos rindimos homenaxe a la nuesa llingua “tien que ser claramente un día marcáu n’encarnáu nel calendariu”. La declaración del Día Les Lletres como festivu nun ye p’AA “dalgo raro yá que lo ye n’otros países del Estáu”.

P’Andecha Astur ye’l Día les Lletres de 2009 “ye’l momentu afayadizu pa que’l Día pase a ser un día festivu de los asturianos”. Ye “impensable y una aberración democrática”, pa la formación, que na próxima reforma del estatutu nun haya oficialidá.

Anque n’Asturies “ye sabío que la política carez de llóxica democrática, lo normal ye pensar que los dos grandes partíos españoles n’Asturies PSOE y PP, tres asimilar tarde y mal que l’asturianu ye una llingua, caltengan ente la nuesa llingua les mesmes posiciones polítiques que los sos compañeros de Galicia, Cataluña, Valencia, Islles Baliares, País Vascu o Navarra, en definitiva n’otros territorios onde hai una llingua propia distinta’l castellán”, declaren los independentistes.

La formación aclara sicasí, qu’“esto nun significa de denguna forma qu’Andecha Astur dexe de ver, nuna hipotética situación d’oficialidá, un día de vindicación nel Día Les Lletres. Perafitámonos na necesidá de que’l Día de Les Lletres Asturianes seya una xornada de vindicación pola dignificación y la normalización social del asturianu”.

La organización quixo declarar tamién les sos preferencies no que cinca l nuevu Estatutu, nel que “qu’avance faza la soberanía y l’autodetermín. Poro, como nacionalistes d’izquierdes mostrámonos contrarios a la farsa de la descentralización alministrativa y el falsu autogobiernu que nun avancen precisamente faza una mayor soberanía del Pueblu Asturianu, nin muncho menos faza’l so derechu d’escoyer llibre y democráticamente’l so futuru”.

El Conceyal de Política Llingüística y Cultura Tradicional de Xixón participó ayeri na presentanción de la XXIX Selmana de les Lletres Asturianes, que ta dedicada a la escritora xixonesa Mª Teresa González y declaró que facer alcordanza d’esta autora “ye facelo d’una muyer que volcó la so vida a la llucha por un trabayu dignu y pola cultura asturiana”. Asturnews ufre les sos declaraciones en vidiu.

La Conseyera de Cultura, Encarnación Rodrígue tuvo presente ayeri en Xixón, nos actos de la 29 Selmana de les Lletres Asturianes y comentó la obra de Mª Teresa González, qu’ufrimos agora n’Asturnews.

Con un discursu lleíu n’asturianu participó esti llunes Paz Fernández Felgueroso na presentación de la 29 Selmana de les Lletres Asturianes. Nel mesmu, fizo delles referencies a la obra de Mª Teresa González y remanó un asturianu que foi comentáu ente los asistentes, “polos continuos errores nos que cayó l’acaldesa de Xixón”, según comentarios de los participantes. Asturnews ufre’l discursu a los sos llectores.

La Islla de Man, que tien les competencies pa la edición de sellos, asoleyó una colección d’ellos dedicada a los países del arcu atlánticu o “países celtes”, ente los qu’incluyeron a Asturies, Breitz, Galiza, Alba, Eire, Cymru y Kernow. Los sellos incluyen la bandera de cada país y una fras nel idioma propiu del mesmu, incluyendo nel d’Asturies, la oración “un país que desanicia la so llingua pierde l´alma”.

La fras, de los sellos, distintu pa cada país, faen delles referencies a les llingües y a la so conservación. El que correspuende a Cornwall pon “Un home ensín la so llingua perdió la so patria”, el de la Islla de Man diz “Ensín llingua nun hai patria”, ente otres.

”L’aspiración del PP ye algamar el máximu techu competencial p’Asturies ensin colisionar cola Constitución española”, con estes pallabres anunció ayeri’l Partíu Popular d’Asturies la so intención d’algamar hasta 73 nueves competencies, que va presentar a Izquierda Xunida nun informe, nel que s’inclúi la creación d’una política autonómica asturiana.

L’escritor, xestor cultural, políticu del Partíu Popular y presidente del Círculu Lliberal, Humberto Gonzali, va formar parte de les Comisiones 1ª (Llingüística, Lliteratura y Tradiciones) y 4º (Derechu, Ciencies Sociales y Económiques), del Real Institutu d’Estudios Asturianos (RIDEA). Ye nesti marcu onde Gonzali, según les so declaraciones, “va aportar delles propuestes de calter asturianista p’averar la instutición a la realidá social y cultural d’Asturies”.

Humberto Gonzali pertenez al RIDEA como miembru de representación nomáu pol PP y apoyó la candidatura de Joaquín Fernández, xefe del serviciu d’Hematoloxía del Hospital de Cabueñes, que proponía “abrir caminos d’entendimientu ente l’Institutu y la Oficina de Política Llingüística del Principáu”, amás d’un cambiu d’actitú del Institutu, “de mou abiertu, per aciu los comunicaos correspondientes, sobre la llingua asturiana, y l’usu d’ella nos boletines, congresos y demás manifestaciones”.

Unes propuestes que nun pudieron llevase alantre, yá que, a la fin, el candidatu favoratible a la normalización, sacó 6 votos, frente a los 31 de Juan Ignacio Ruiz de la Peña, actual dirixente de la institución.

Coincidiendo col Día del Llibru l’hotel España d’Uviéu va acoyer a les siete la tarde un actu en defensa de la rede de biblioteques municipales cola presentación de Paco Abril y cola participación d’alredor de 25 persones del mundiu de la cultura d’Asturies “Reivindicando la defensa de la calidá del serviciu públicu de les biblioteques municipales y el trabayu de los profesionales que n’estos momentos sufren les consecuencies d’un importante recorte presupuestariu”, según declaró un conceyal socialista uviedín”.

Les organizaciones que formen parte d’esta plataforma son asociaciones de vecinos, organizaciones sindicales, clús de llectura, PSOE, ASCIZ y organizaciones profesionales de la documentación.

Ente los presentes van tar escritores, como Miguel Barrero, Ramón Lluis Bande y Vanesa Gutiérrez; periodistes, como Beatriz Bidau y Xuan Cándano; profesores como Sergio Tomé; actores como David Acera, persones rellacionaes col mundiu de la cultura, como Marco Antonio Velasco (asociación Lata de Zinc) y Lola Lucio (cofundadora de Tribuna Ciudadana).