Política

Según informe dende l’ALLA, güei vienres, a les 13,30 hores, la Presidenta de la Xunta Xeneral recibirá a la Presidenta de l’Academia de la Llingua Asturiana. L’oxetivu de la entrevista, de la que yá diere anuncia Ana Cano nel discursu institucional del “Día de les Lletres Asturianes” del pasáu 9 de mayu, ye treslladar al parllamentu asturianu la posición y propuestes de la institución llingüística no que cinca al tratamientu llegal qu’habría tener la llingua asturiana nel nuevu Estatutu d’Autonomía d’Asturies qu’agora mesmo tán negociando les fuerces polítiques asitiaes na Xunta Xeneral.

A tal efeutu, Ana Cano pidirá a María Jesús Álvarez que faiga llegar a la ponencia de la reforma estatutaria los plantegamientos y el compromisu de l’Academia cola solución definitiva de la cuestión llingüística. L’Academia de la Llingua Asturiana tien el máximu enfotu en que les sos propuestes y argumentos seyan acoyíos polos partíos políticos (FSA-PSOE, PP ya IU) col interés y atención que la sobrevivencia de la llingua histórica d’Asturies merez.

L’Academia de la Llingua presentó güei al parlamentu asturianu una propuesta d’aprobación de la oficialidá del asturianu na reforma del Estatutu d’Autonomía, al traviés d’una llei “consensuada” que desarrollaría los sos conteníos, y d’un acuerdu na cámara que diba fixar el presupuetu destináu a esti fin. Sigún informa Europa Press, la presidenta de l’Academia, Ana Cano, entregó’l testu de la propuesta a la presidenta de la Xunta Xeneral del Principáu, María Jesús Álvarez, al finar la sesión plenaria d’esta mañana, con intención de que la mesma seya tresllada a los grupos políticos que participen na redaición de la ponencia del nuevu Estatutu d’Autonomía.

Nel testu, entregáu plantéguense tres puntos. El primeru diz que “l’Estatutu d’Autonomía d’Asturies declara la cooficialidá del asturianu, xunto col castellán, de manera que se reconoz el derechu de los ciudadanos al so usu”.

Un segundu puntu esplica que “una llei del Principáu conseñará exautamente los conteníos que se-y quieren dar a la cooficialidá; ye dicir, el modelu d’oficialización. Tal llei habrá pautase poles fuerces polítiques parlamentaries ya inxerirá les fases de la so puesta en práutica”.

Por últimu, el tercer puntu esplica que “un acuerdu parlamentariu, robláu poles tres fuerces polítiques, va fixar, nun marcu de caltenimientu y estabilidá nel tiempu, el coste económicu de la cooficialidá o lo que ye lo mesmo, va señalar hasta ónde ye posible llegar económicamente na financiación d’esta figura xurídica”.

De la mesma manera, l’Academia ofreció “tola so capacidá y autoridá moral”, asina como la so “influencia social na collaboración coles instituciones” pa la puesta en marcha de la midida. Ana Cano destacó’l “tratu amable” d’Álvarez y anunció que la presidenta va proceder a treslladar la so propuesta a los grupos parlamentarios pa la so discusión.

El Gobiernu d’Asturies lleva años introduciendo nes escueles la educación billingüe… castellán-inglés. Nesi enfotu de los socialistes asturianos por introducir la llingua inglesa como llingua vehicular nes aules asturianes paez que la non oficialidá del inglés n’Asturies nun inflúi. Ainas, los padres asturianos siguen ensin poder escoyer escolarizar a los sos fíos na llingua propia d’Asturies.

El colexu públicu de Ventanielles, n’Uviéu, desenrrolla un programa pioneru cola integración del inglés nel enseñu de les asignatures básiques dende va dos años y el Conseyeru d’Educación, José Luis Iglesias Riopedre, anunció estos díes, que la esperiencia va espardese per otros 55 centros educativos asturianos, cuntando’l cursu que vien, con un total de 137 escueles de primaria y secundaria dientro d’esti programa de colexos billingües inglés-castellán.

Asina, nel cursu que vien 10 institutos de secundaria y 45 centros d’Infantil y Primaria van sumase al procesu. La conseyería pretende acercase asina al so oxetivu de qu’al final de la llexislatura’l 70% de los centros asturianos cunten con esti sistema, mientres que nun ta previstu nengún centru billingüe asturianu-castellán.

Polo que se ve con esta noticia, el Gobiernu d’Asturies apuesta polos procesos d’inmersión llingüística, siempres que nun seyan pa normalizar la llingua asturiana.

El senador socialista dixo esti martes nel Senáu qu’el so grupu políticu ye “probablemente l’únicu nel que se falen toles llingües d’España” y que nun quieren que los nacionalistes-yos den “denguna llección na defensa de les llingües”. A lo que paez, José Ignacio Pérez Sáez nun conoz la postura del so partíu n’Asturies nun nuevu exemplu de la falta de sintonía de la FSA colo que sofita’l PSOE nel Reinu d’España.

El Plenu del Senáu aprobó’l martes pela tarde por mayoría una moción pa que la Cámara promueva la reforma del so reglamentu cola fin de que s’ampare nos Plenos y comisiones l’usu oral y escritu de cualesquiera de les llingües que tengan el cálter d’oficial, colo que la llingua asturiana queda otra vuelta marxinada de la realidá social española pola testonería de los partíos mayoritarios de nun convertila n’oficial nel Estatutu.

La moción foi defendida pol portavoz de la Entesa Catalana de Progrés en el Senado, Carlos Bonet, y aprobada pol Plenu por 136 votos favoratibles, 116 en contra y denguna abstención.

El senador socialista señaló na so intervención que’l PSOE votó a favor de la mesma “porqu’entiende que España ye plurillingue” y que el Senáu tien de simbolizalo.

Nun comunicáu fechu públicu esti miércoles Izquierda Xunida critica enforma les declaraciones del Secretaríu d’Estáu de Facienda que suponen pala colaición n’Asturies l’afitamientu de que “la irresponsabilidá de los socialistes dexónos cola despensa vacía cuando vienen tiempos difíciles”.

Les declaraciones del Secretariu d’Estáu de Facienda confirmen la preocupación qu’IX lleva tiempu espresando. El Coordinador Xeneral d’IX n’Asturies, Jesús Iglesias, afirmó que “los socialistes apliquen polítiques de dreches: eliminen impuestos como’l de patrimoniu y despilfarren el dineru de toos con ayudus indiscriminaes como los 400 euros o los cheques bebé. Dilapiden recursos públicos y perdonen impuestos a les rentes más altes cuando hai munches necesidaes n’esti país. Una auténtica irresponsabilidá que tendrá consecuencies dramátiques pa munches families”.

Pal Coordinador d’Izquierda Xunida n’Asturies “Zapatero mercó votos pero la factura pagámosla toos: 5.000 millones d’euros. Son unos recursos fundamentales p’afrontar la crisis. La irresponsabilidá de los socialistes dexónos cola despensa vacía y avecínense tiempos difíciles. La situación ye mui preocupante. El Gobiernu tien los bolsos vacíos xusto agora que va ser necesariu más dineru pa prestaciones sociales, reforciar los servicios públicos, afalar la creación d’emplegu y garantizar les inversiones que necesita’l país”.

Jesús Iglesias aseguró que “n’Asturies la política del Gobiernu d’Areces va pel mesmu camín. El xiru a la drecha ye evidente. Apuesten pola enseñanza concertada mientres recorten los presupuestos de la pública, opten polos cheques bebé mientres refuguen la creación de más places públiques nes escueles de 0-3 años, o ponen en marcha la privatización de los servicios sociales n’Asturies. Son namás dellos exemplos del día a día del Gobiernu d’Areces”.

El Coordinador Xeneral d’IX n’Asturies tamién recordó que “la política de rebaxes fiscales ye un grave error del PSOE. La so deriva conservadora va tener consecuencies dramátiques nes persones con menos recursos. Ye imprescindible qu’abandonen esta apuesta política y recuperen les polítiques d’izquierdes y progresu”.

Esti vienres, nel plenu de la Xunta Xeneral, Jesús Iglesias va reclamar a Areces, mediante una pregunta parllamentaria, qu’esplique les midíes que tien previstes el Gobiernu asturianu p’afrontar la crisis económica.

Con estes pallabres volvía a afitar el presidente d’Asturies y llider socialista, Vicente Alberto Álvarez Areces, la posición na que lleva décades instalada la FSA-PSOE n’Asturies. Nuna entrevista n’El Comercio, recordó que la postura del so partíu sobre la situación llegal de la llingua asturianu “ye clara”, recordando que dicen “sí al asturianu,, al so usu y a la so promoción pela vía de la voluntariedá”.

El cabezaleru del Gobiernu d’Asturies comentó amás que “como nós, la mayoría de la sociedá asturiana apoya la promoción del bable, pero non la oficialidá”. Énte la posibilidá d’un posible posicionamientu definitivamente a favor de la oficialidá per parte del Partíu Popular el PSOE diba siguir diciendo “non”, a la reconocencia de los drechos de los asturfalantes.

La Xunta de Gobiernu del Conceyu de Xixón, formada pol PSOE ya Izquierda Xunida-BpA-LV, aprobó’l testu de la “Ordenanza municipal d’usu del asturianu nel ámbitu del Conceyu de Xixón”. Un testu que lleva tiempu n’espera poles diferencies ente les dos formaciones y que vien agora a sumase a otres midíes, que principalmente nel campu de la toponimia, veníen dándose nel conceyu con más población d’Asturies.

El testu respuende al párrafu del alcuerdu de gobiernu ente IX y el PSOE en Xixón, qu’incluyía l’aprobación d’esta ordenanza.

La intención del equipu de Gobiernu, ye en pallabres del voceru d’IX y tercer teniente d’alcalde, Jesús Montes Estrada ‘Churruca’, “ye facer un cambiu tranquilu”. Amás, aseguró que “van establecese contactos con otres alministraciones, empreses y entidaes que tienen presencia nel conceyu, como RENFE, FEVE Y Correos, cola fin d’afalales a qu’usen l’asturianu”.

El conceyal xixonés comentó qu’ente otres cuestiones “va buscase’l billingüísmu na señalización d’estes empreses y nes indicaciones acústiques qu’anuncien les paraes”, mientes que con Correos “lo que se quier ye acabar con dellos problemes que, al paecer, xurdieren colos cambios de toponimia”.

Amás, d’esta ordenanza va recuperae la figura del Conseyu Asesor de la Llingua Asturiana, que dimitió en bloque va tiempu y qu’agora ta pendiente de l’aprobación de la nueva ordenanza de Participación Ciudadana.

Churruca recordó que “a partir d’agora va quedar garantizada la posibilidá de presentar papeles n’asturianu nel ayuntamientu” y que “se llamen a les coses pel so nome, Cimavilla a Cimavilla y Samartín de Güerces a Samartín de Güerces”. Normalizar l’asturianu na sociedá, diz el conceyal, va ser agora “namás cuestión de tiempu”

Andecha Astur va cellebrar el sábadu’l XI díi d’Andecha pa conmemorar, un añu más, la declaración de soberanía de la Xunta Xeneral el 25 de mayu de 1808. El llugar de cellebración que la organización escoyó pa esta edición ye Noreña. Amás, los festeyos coinciden col decimu aniversariu del Conceyu d’Andecha Astur en Noreña.

Los actos, que van tener llugar nel parque de Los Arbolinos de Noreña, incluín una xinta popular al preciu de 6 euros, pasacais, y una actu políticu nel que van intervenir Pablo Perez, voceru del Conceyu de Noreña; Daniel Cueli, Secretariu Xeneral d’Andecha Astur; Marcos Menendez, voceru d Darreu, y Mariu Arbesú, Secretariu d’Organización d’Andecha Astur.

Ayeri, miércoles 21 de mayu, morría na so casa de Xixón y tres d’una llarga enfermedá, Manolo Méndez Pérez, “Manolo’l capitán”, como yera conocíu ente los militantes del Partíu Asturianista. Tenía 83 años.

Capitán de marina mercante, entamó la so militancia social nel movimientu asociativu de padres y madres d’alumnos y n’apaeciendo’l PAS sumóse al trabayu nesta formación. Dende la so xubilación trabayaba tolos díes na sede del PAS, llevando alantre tol trabayu alministrativu y d’organización interna.

La so familia, amigos y compañeros de partíu van despidilu güei nel Tanatoriu de Xixón, asitiáu en Cabueñes, a les seis y media la tarde.

Según fontes cercanes a la coalición Unidá, nun conceyu que se rumoreaba diba celebrase esti domingu 25 de mayu podría tomase la decisión de recuperar el nome de la organización Unidá Nacionalista Asturiana (UNA), organización política qu’apaecía nel añu 1987 de la xuntura ente l’Ensame Nacionalista Asturianu y la Xunta Nacionalista Asturiana, una escisión del propiu Ensame que xurdiera un añu enantes. Anque fontes d’eses organizaciones desmintieron pela mañana a esti diariu la celebración esi día d’un congresu, paez afitada la noticia que camuda’l mapa politicu del nacionalismu asturianu.

Unidá, formada anguaño por Izquierda Asturiana, Andecha Nacionaliega y Asturianistes sufrió dende les elecciones autonómiques de 2007 dellos problemes ente los que tán la disolución de la Mocedá d’Izquierda Asturiana (MIAS) y los problemes xudiciales ente la dirección d’Andecha Astur y los miembros de la escisión qu’agora formen parte d’Unidá como Andecha Nacionaliga, fechos que d’otra banda, quedaron vistos pa sentencia nun xuiciu celebráu va pocos díes.

Ente los miembros que pasaron pela UNA nel so día tán Xosé Suárez-Arias “Felechosa”, agora conceyal n’Uviéu pol PP, qu’encabezó la llista a les elecciónes europees de 1989, na que tamién taben Inaciu Iglesias, Francisco Alonso Mori, Carlos Lastra, Xosé Nel Friera, Pilar Fidalgo Pravia, Dubardu Puente, Dolfo Camilo Díaz y José Luis Carmona, ente otros munchos.

La UNA formó col PAS la Coalición Asturiana nel añu 1991 llevando nes siguientes elecciones autonómiques a Xuan Xosé Sánchez Vicente a la Xunta Xeneral d’Asturies. Nun tardó esta coalición en desfacese por mor de los problemes ente les dos organizaciones.

Llista de la UNA pa les elecciones al Parllamentu Européu de 1989