Política

El Partíu Popular d’Asturies celebró esti sábadu’l so 15 Congresu Rexonal col lema “Crecemos Juntos”, un títulu qu’en dellos momentos del mesmu llegó a resultar irónicu. Momentos como la llegada, al final de la xornada, de Mariano Rajoy, al que partidarios del derrotáu Juan Morales abuchiaron mientres entraba nel Hotel Reconquista d’Uviéu. Ente los gritos pudo oyise’l d’una partidaria de Morales: “Güei ganó Areces, cuatro años más”.

La Ponencia Política, redactada por Joaquín Aréstegui, inclúi un puntu, el IV, dedicáu a l’epígrafe “Lengua”. Nel mesmu, el Partíu Popular declárase “contrariu al llevantamientu de torgues ente españoles y tovía más, ente asturianos” y considera “que’l nuesu patrimoniu llingüísticu ye una riqueza cultural de la que disfrutamos los asturianos pero nun ha ser nin un elementu d’enfrentamientu nin el so usu un fechu impuestu a los ciudadanos”.

El puntu 18 de la Ponencia’l Partíu Popular comenta que “enxamás esistió un conflictu llingüísticu n’Asturies” y recuerda que “la so creación artificial supondría una irresponsabilidá, un error de consecuencies imprevisibles”.

El Partíu Popular cree que “la llingua asturiana, nes sos diferentes variantes, ha ser un patrimoniu a conservar, defender y fortalecer”. El so usu, sigue la ponencia, “ha constituir un drechu pa los asturianos, pero nunca un deber”, el so usu nes Alministraciones Públiques “ha ser reguláu pa evitar la discriminación tanto p’hacia quien quieren facer usu d’él como p’hacia quien prefieren o namás puen facer usu del español”.

Nel casu del puntu 20 de la Ponecia Política, nun principiu apaecía redactáu asina: “Nesi sen el Partíu Popular recuerda que la esistencia d’una Llei d’Usu y Protección del asturianu, llei ambiciosa y en principiu suficiente, foi una Llei aprobada mientres taba nel gobiernu de la Comunidá Autónoma”.

Sobre esti puntu, nel que se reivindica la “paternidᔠde la Llei d’Usu, presentó una enmienda l’asturianista y asesor de Pilar Fernández Pardo, Humberto Gonzali, na que se quixo recalcar el fechu de que la Llei d’Usu ye “l’únicu desenrrollu llegal del Art. 4 del Estatutu d’Autonomía”. Amás, cambióse la redacción “llei ambiciosa y en principiu suficiente” por “llei ambiciosa y progresiva”. Sicasí, la Ponencia Política del Partíu Popular siguen ensin recoyer la reclamación d’oficialidá qu’insinuaren Gabino de Lorenzo, Pilar Fernández Pardo y otros llíderes del PP nes últimes elecciones estatales.

No que cinca al Estatutu d’Autonomía nuevu, el PP esixe qu’esti seya aprobáu al traviés del procedimientu de “consulta popular”. Imprescindible pal PP, “pa conocer el grau d’implicación de los asturianos”.

El Partíu Popular d’Asturies “apuesta porque esta Comunidá Autónoma seya una comunidá de primera”, diz la Ponencia y por ello “defiende, nel marcu de les tresferencies de competencies a les comunidaes autónomes, la consecución del máximu techu competencial pa la rexón”. Pal PP, “Asturies ha aspirar a disponer de los máximos elementos d’autogobiernu col que se dotaron otres comunidaes autonómes, pero siempres dende’l respetu a la Constitución de 1978”.

Pal PP “Asturies aspira a un autogobiernu de calidá pero non a plantegamientos secesionistes o d’alimentación d’agravios inexistentes”. Aspiramos a prestar a los asturianos servicios de calidá pero non a asumir competencies inabarcables o que conviertan al Estáu y a la Nación española nun país imposible o desarticuláu y ensin la capacidá de garantizar la imprescindible solidaridá ente españoles o la igualdá de toos ellos”.

Ponencia Política del PP, completa

Ente les novedaes del nuevu Gobiernu d’Asturies, recién nomáu pol presidente Areces tres los alcuerdos ente la FSA ya IX-BpA-LV, ta la creación d’una Dirección Xeneral de Política Llingüística, a cargu de l’hasta agora Directora Xeneral de Cultura y Política Llingüística, Consuelo Vega, que queda al cargu de la segunda de les estayes en solitariu.

Otru de los cambios qu’afecta a la Conseyería de Cultura y Turismu, que cambia de les manes d’Encarna Rodríguez Caña a les de Mercedes Álvarez. Amás la nueva estructura crea una Viceconseyería de Promoción Cultural y Política Llingüística, xestionada por Jorge Fernández León.

La Llei 3/1986, de 26 d´avientu, d´Ordenación de la Función Pública Asturiana define al personal eventual como aquél que realiza funciones de confianza y asesoramientu de los cargos políticos. Esti personal nómase llibremente y cesa, en tou casu, cuando lo faen los conseyeros que los nomen. Son los funcionarios políticos de los gabinetes de les estremaes Conseyeríes.

La mesma Llei dispón nel artículo 30 que les relaciones de puestos de trabayu contendrán los puestos que puen ser desendolcaos por personal eventual, asina como qu´eses relaciones sedrán públiques. Pela parte de so, l´artículu 12 del Estatutu Básicu del Emplegáu Públicu (Llei 7/2007, de 12 d´abril) establez que’l númberu de los emplegaos eventuales y les sos condiciones retributives sedrán públiques.

Según el Conceyu por Otra Función Pública n’Asturies, de recién creación eses disposiciones llegales “icúmplense de manera sistemática y dafechu pol Gobiernu asturianu, qu´omite y, en consecuencia, tapa, en toles relaciones de puestos de trabayu qu´aprueba y espubliza nel Boletín Oficial, la riestra de puestos reservaos al personal eventual, asina como les sos retribuciones”.

“Nun hai, polo tanto, xustificación llegal dala pa caltener na clandestinidá la llista de puestos de personal eventual y los nomamientos y retribuciones correspondientes a esos puestos”, afirmen dende’l Conceyu.

Nesi sen, “l’espardimientu reciente pela rede interna de l´Alministración asturiana de la relación de funcionarios eventuales al traviés d´un correu masivu involuntariu, allumó, d´un mou ridículu y prestosu, l´apagón intencionáu del Gobiernu”.

P’afitar el cumplimientu de la Llei , el Conceyu por Otra Función Pública n´Asturies anuncia la presentación inmediata de les aiciones llegales afayadizes empobinaes a “obligar al Gobiernu asturianu a incorporar los puestos del personal eventual y les sos retribuciones a les relaciones públiques de puestos de trabayu”.

El presidente del Congresu, José Bono afirmó estos díes que nun-y produz “perceguera falar nengún de los idiomes cooficiales del Estáu”, y opinó qu’había que regular l’usu del catalán, euskera y gallegu nel Congresu de los Diputaos.

Entrugáu por si permitirá en dalgún momentu que nel plenu del Congresu se fale nun idioma distintu del castellán, el presidente de la Cámara Baxa recalcó que cualquier cambiu sobre l’usu de les llingües cooficiales del Estáu “depende de los grupos y ha facese democráticamente”.

Por embargu, dixo nun tar dispuestu “a tener un plantegamientu histéricu” nesti sen si dalguién un día fai una cita culta, “p’apoyar el so argumentu, en catalán, euskera o gallegu a min nun me produz percerguera falar nenguna de les llingües citaes”, indicó. “Nun ye un problema de radicalizar, sinón de regular”, añadió.

La ex conseyera de Cultura del Principáu d’Asturies, Encarnación Rodríguez Cañas, amosó esti día la so satisfacción pol trabayu desendolcáu al frente la Conseyería nunes declaraciones a los periodistes tres del actu formal de cese y nomamientu de los conseyeros del Principáu.

Encarnación Rodríguez Cañas dixo que’l so trabayu tuvo dirixíu a “sirvir” a Asturies y a los sos ciudadanos.

Los nuevos conseyeros d’IX_BA_LV nel gobiernu asturianu, Noemí Martín y Aurelio Martín tomaron pela mañana posesión de los sos cargos como Conseyera de Bienestar Social, Vivienda y Cooperación y Conseyeru de Medio Rural, respectivamente, xuna la nueva Conseyera de Cultura, la socialista Mercedes älvarez, nun actui que se desendolcó na sede de Presidencia, n’Uviéu.

El presidente Areces calificó al nuevu de “bon equipu” y amosó la so satisfacción pol procesu de formación del Gobiernu, desplicando que yera necesario “reforciar” enerxíes pa trabayar nes situaciones perdifíciles del contestu económicu d’anguaño.

nun ye la primer vegada que se fala d’ello, pero esti miércoles, el presidente del Gobiernu, José Luis Rodríguez Zapatero, fizo anuncia de la futura creación d’un Ministeriu de Deportes na próxima remodelación que faiga y dexó afita la posibilidá d’algamar una nueva Llei del Deporte.

L’anuncia fízola na recepción al equipu de Copa Davis en La Moncloa, depués que’l capitán, Emilio Sánchez Vicario, encamentara a Zapatero la recuperación de la idega d’un Ministeriu de Deportes y la renovación de la Llei del Deporte. El presidente recoyó la idea y fizo l’anuncia de que crará esi Ministeriu nun futuru próximu.

Según anunciaron al traviés d’una nota de prensa, esta organización ta acabante ñacer col envís de torgar “el cáncanu del clientelismu políticu que carez la función pública asturiana, sofitando los principios constitucionales d’igualdá, méritu, capacidá y concurrencia nel accesu y promoción a la mesma y la tresparencia na so xestión”.

La organización constituyóse’l día 5 de payares como asociación abierta a tolos trabayadores pertenecientes a les estremaes Alministraciones Publiques asitiaes n’Asturies, “cualquiera que seya la rellación de emplegu que tengan coles mesmes”.

El Conceyu xurde nun momentu nel que’l Gobiernu d’Álvarez Areces, comenten dende la organización, pretende afitar y enanchar dafechu’l sistema de función pública clientelista, güei instituyíu y sofitáu na confianza personal y nel control políticu del personal, pente medies d’una nueva Llei de la Función Pública Asturiana, de la que yá se conoz l’anteproyeutu, na que s’inxeren “tolos preseos afayadizos pa degradar darréu los principios d’igualdá, méritu y capacidá nel accesu y na promoción profesional”, y les condiciones d’imparcialidá y oxetividá imprescindibles pa cumplir cola obligación de sirvir exclusivamente a los intereses xenerales de los ciudadanos y ciudadanes.

Los contautos col Conceyu puen facese al traviés de la dirección de corréu electrónicu cofpas@gmail.com o del blog www.otrafuncionpublica.blogspot.com onde dan más detalles de la so organización.

El diputáu d’IX-BA-Verdes, Francisco Javier García Valledor, albidra que la decisión adoptada ayeri na Xunta de Facultá de Filoloxía ye una decisión mui positiva na midida na que l’asturianu tendrá, per primer vegada, estudios reglaos na Universidá d’Uviéu, convirtiendo dalgo que debería ser normal, dende va munchu tiempu, nuna realidá.

Pa Francisco Javier García Valledor ye necesario destacar la unidá de la inmensa mayoría de los profesores de filoloxía que vinieron defendiendo y trabayando por consiguir que la nuesa universidá dea respuesta a una demanda y una necesidá pa la sociedá asturiana frente a aquellos que, ensin argumentos académicos y científicos, punxeron per munchu tiempu per delantre los sos prexuicios y les sos posiciones antiasturianistes, pa impedir esti drechu.

La decisión adoptada ayeri tien una enorme importancia simbólica y ye un primer pasu que tien de complementase con otros pa garantizar plenamente la mesma formación del profesoráu de llingua asturiana que del restu de materies -educación física, ciencies sociales, matemátiques- na educación infantil, primaria y secundaria n’Asturies: n’esti sentíu ye imprescindible que nel master que sustituirá al actual CAP (Cursu d’Actitú Pedagóxica) s’incluya una formación específica pa los titulaos que vaigan a exercer como profesores d’asturianu. Asina mesmo, resulta imprescindible que la Escuela de Maxisteriu, que forma al profesoráu d’Infantil y Primaria, aborde’l mismo procesu que la Facultá de Filoloxía, teniendo en cuenta que tienen qu’adaptar los sos estudios pa la so entrada en vigor nel cursu 2010-2011.

La organización Fai!, que se define como d’esquierda y soberanista, va entamar en Radio Sele, nel 106.1 de la FM, un programa que recupera’l nome del primer periódicu n’asturianu dafechu “Ixuxú!!”, qu’asoleyó en Xixón l’escritor Pachu’l Peritu a principios del sieglu XX. Esti “Magacín Sonoru Contrainformativu” va tener, “nun entamu”, una periodicidá quincenal y va emitise los domingos a les 19 hores.

Nel primer programa, los conductores del mesmu van facer dos entrevistes a fondu con miembros del CSOA La Reflexón y AHT Gelditu Elkarlana!, plataforma d’Euskal Herria n’oposición al tren d’alta velocidá.

Amás va tratase l’actualidá d’Asturies y del mundu, faciendo siempre una entrevista a un coleutivu o plataforma asturiana y otra internacional, sobre temes d’especial interés nos que nos fixar n’Asturies.

Pa cualesqueir petición o collaboración pue escribise a ixuxu@fai-asturies.org