Política

La Comisión del Pautu Antitransfuguismu va tratar esti miércoles el casu del conceyu Piloña y l’acusación que’l PP ficiere de transfuguismu sobre’l conceyal d’IAS que-y diere l’alcaldía al PSOE y fore espulsáu de la formación nacionalista. El tema llévase al conceyu por pidimientu del PP, que considera que’l conceyal de Piloña, José Ángel García Fernández, ‘Allende’, espulsáu d’Izquierda Asturiana, sofitó que l’actual alcalde, el socialista Camilo Montes, gobernare nel Ayuntamientu.

A García Fernández espulsáronlu d’IAS y nun renunció al acta de conceyal. El PP considera que los socialistes gobiernen de manera “illexítima” y “escandalosa” en Piloña con un tránsfuga, calteniéndolu como primer teniente d’alcalde y miembru de la Xunta de Gobiernu.

La Casa Conceyu de Xixón acoyó’l vienres pasáu, 12 d’avientu, el plenu nel que se votó la propuesta del nuevu Conseyu Asesor de la Llingua Asturiana. La mesma foi presentada pol conceyal Jesús Montés Estrada “Churruca” y aprobada por unanimidá polos trés grupos que conformen el plenu xixonés: PP, FSA-PSOE ya IX-BpA-LV.

Sicasí, tamién hebo tiempu nesti plenu pa la discusión. L’edil popular Manuel Pecharromán, entrugó al conceyal de la izquierda “el porqué de la falta d’organizaciones como El Garrapiellu, la Fundación Belenos, la Xunta pola Defensa de la Llingua Asturiana o’l Conceyu d’Escritores Asturianos”.

Asturnews ufre’l vidiu completu de la parte del plenu onde se discutió la propuesta:

Aprobación y alderique del Conseyu Asesor de la Llingua de Xixón from izquierda xunida xixón on Vimeo.

Unión Asturianista, coalición permanente formada pol Partíu Asturianista y la Unión Renovadora Asturiana, celebró esti sábadu 13 d’avientu la so Xinta de Navidá nel Restorán El Pindal, asitiáu en Deva, Xixón.

Alredor de doscientes persones acudieron a la xinta, na que tuvieron llugar los dicursos de Xuan Xosé Sánchez Vicente y Javier López Alonso, presidentes del PAS y la URAS, respectivamente.

López describió na so intervención la situación económica asturiana y declaró que los partíos actuales “desconocen les fórmules afayadices pa la so solución”. Pela so parte, Sánchez Vicente recordó a los militantes de la Unión Asturianista, qu’a pesar de “los malos momentos electorales pa la formación, d’equí a dos años la situación pue cambiar”.

Énte los asistentes a la xinta pudo vese a políticos de dambes formciones, como Sergio Marqués, ex presidente d’Asturies y actual presidente d’honor d’URAS y Chus Cañedo, secretariu xeneral del PAS.

Andecha Astur valora positivamente l’informe del Conseyu européu sobre llingües minorizaes nel Estáu español “no referente al Asturianu yá qu’amuesa internacionalmente la falta d’interés del gobiernu asturianu y español na conservación de la llingua”.

La institución europea dexa, p’AA “perclaro” que ye necesaria la oficialidá de la Llingua asturiana y encamienta al gobiernu asturianu a facela oficial y fai delles recomendaciones pa meyorar la grave situación de la Llingua.

Andecha Astur encamienta’l gobiernu “a siguir los encamientos de la institución europea tocantenes a la protección de la llingua asturiana entamando pola propia oficialidá”. D’otra miente AA cree que’l gobiernu asturianu “debería avergoñase de les graves discriminaciones qu’indica l’informe”.

Pa Andecha Astur ye intolerable dafechu “que nos informes periódicos que l’alministración asturiana mandó al Conseyu mintiera deliberadamente y se punxere como escusa una falsa falta d’estandarización del asturianu y de una lliteratura fayaiza pa caltener la non oficializala, intentando con ello disimular que la motivación real de la non oficialidá de la llingua d’Asturies ye namás que política, una política xenocida, culturalmente falando, que namás busca la muerte lenta de la Llingua Asturiana, que como toles demás ye patrimonio cultural universal”.

Andecha Astur tamién quier señalar la responsabilidá tamién del gobiernu español “por nun cumplir los alcuerdos que firma, según el propiu informe y quier felicitar a l’Academia de la Llingua Asturiana, lo mesmo que tamién fai’l Conseyu Européu, pol so llabor demientres tos estos años por dotar a la nuesa llingua de tolos preseos pa la so estandarización”.

Informe completu del Conseyu d’Europa

El PACE, que se presentaba estes selmanes atrás na rede de redes y qu’entovía nun daba a conocer a nengún de los sos cabezaleros, anunció estos díes que va presentase a les elecciones europees próximes. El PACE, comenten los creadores, ñaz como un partíu “democráticu, europeísta, de calter rexenerador de la vida pública, interclasista y de progresu”, y el so oxetivu cimeru ta na defensa “de los valores europeos y de la identidá d’Europa”.

El so oxetivu cimeru ye “la UNIÓN EUROPEA a tolos efeutos y la defensa de los sos intereses”. Asina mesmo, afirmen que’l referente más claru d’esta forma d’entender esta cuestión “ta na trayeutoria de los pueblos celtes d’Europa”.

El PACE, sofitará, según continuen, “la costrucción d´una sociedá ensin prexuicios nin tabús, llibre de falsa y interesada correición política, onde la familia, la educación, les asociaciones y la implicación ciudadana na comunidá seyan el pegoyu fundamental”.

La so web www.pace-eu.com entovía ta en construcción pero tienen un corréu onde pue face-yos consultes, que pue atopase na so páxina.

El presidente d’honor del Partíu Popular respondió asina a la pregunta que-y ficieron esta mañana nun actu de Nueva Economía Fórum sobre la conveniencia de “ponderar el pesu de los nacionalistes na política española”. “Había que lo ponderar colgándolos de dalgún sitiu”, dixo l’ex presidente gallegu.

Ente la respuesta, el moderador entrugó “¿Pue ser más esplícitu?”, a lo que Fraga retrucó “el nacionalismu ye lo contrario de la defensa d’España, por definición”.

Manuel Fraga foi ministru de turismu nos últimos años del franquismu, presidente d’Alianza Popular y presidente de Galicia a lo llargo de delles llexislatures.

L’informe sobre los presupuestos de 2009 y el Pautu de Gobiernu que dió a la lluz esti día’l diputáu d’Izquierda Xunida, fai una fonda crítica a la partida presupuestaria de Política Llingüística, “empobinada a sovencionar la RTPA en 348.292 euros” amenorgando les sovenciones a l’Academia y la Rede de Normalización, pero tamién estudia les distintes partíes de Política Cultural, emigración y delles otres estayes.

Na negociación del Pautu de Gobiernu incorporose nesti programa 500.000 euros respeutu al créditu definitivu de 2008, lo que supón un xorrecimientu de 348.292 euros, respeutu del proyectu de presupuestos rechazáu en 2008, un 11,23%. Pero según Valledor, “al analizar a ónde va empobináu esi xorrecimientu alcontrámosno con que’l mayor aumentu se produz nel capítulu VI, inversiones en propiedá intelectual, que pasa de 40.000 a 338.026 euros, ye decir un xorrecimientu del 845% (338.026 €) que se dirixe a la RTPA pa programes n’Asturiano ,lo qu’amuesa’l tratamientu denigrante que se-y da a la llingua asturiana”.´

Valledor entrúgase retóricamente “¿por qué es necesario subvencionar en el Ente Público un programa realizado en lengua asturiana y no en castellano?, ¿es más caro realizar un programa en lengua asturiana que si se hace en lengua castellana?. ¿retransmitir, si se hiciese como se tendría que hacer, un partido del Sporting o del Oviedo, o del Marino, en asturiano sal más caro?…. Lo que se demuestra es la falta de voluntad política para desarrollar una programación en asturiano en la RTPA y lo que se pretende en realidad es seguir allegando fondos públicos a la RPTA que ya tiene su propio que se dirige a la RTPA para programación en asturiano, lo cual demuestra el presupuesto más que suficiente para lo que aporta a la sociedad asturiana, a pesar de los grandes profesionales de los que dispone”.

Valledor tamién dir tar ablucáu pol fechu de que s’incrementen un 8,5% les tresferencies corrientes, con aumentos pequeños en toes salvo en dos casos mui significativos nos qu’amenorga la sovención: “a los ayuntamientos (la rede de normalización) se reducen 30.800 €, un 7,7% y a la Academia de la Llingua se recorta 3.393 €, un 2,3% menos. Inexplicable, pero cierto”.

Irlanda va comprometese güei a celebrar un nuevu referendu pa desbloquiar el Tratáu de Lisboa enantes de payares de 2009 a cambiu de que nun amenorgue’l tamañu de la Comisión, como afita’l Tratáu y siga habiendo un comisariu por país. Los Ventisiete van ufrir amás garantíes adicionales al primer ministru irlandés, Brian Cowen, de que se va respetar la neutralidá militar irlandesa, que los temes de fiscalidá van siguir pautándose por unanimidá y que la UE nun va tratar la cuestión del albuertu.

Al traviés d’un comunicáu asoleyáu esti martes 2d’Avientu, dase anuncua de la creación del PARTÍU CELTA EUROPÉU (PACE), que va presentase a la so primer cita elleutoral nes elleiciones europees del añu 2009. En prósimes feches el PACE va facer una presentación pública nuna rueda de prensa.

El Partíu Celta Européu (PACE) diz nacer como un partíu democráticu, europeísta, de calter rexenerador de la vida pública, interclasista y de progresu, y el so oxetivu cimeru ta na defensa de los valores europeos y de la identidá d´Europa.

Nel comunicáu mentáu, entrúgase retóricamente “¿Por qué Celta?” y contestase que “los militantes del PACE, afirmen, basándose na historia, que los pueblos celtes fueron los que braeramente xuntaron étnica, cultural y socialmente´l continente européu por primera vegada. Les güelgues de la so civilización tan per toles fasteres d´Europa, dende la Polonia d´angüaño, Ucrania, Alemaña y República Checa, hasta Irlanda y Portugal, pasando pol norte d´Italia y llegando, tamién, hasta la Galitzia turca y Grecia. Roma fue una conquistadora militar y política que civilizó´l mundu mediterrániu y asimiló y camudó elementos culturales colos pueblos celtes que fueron los braeros europeos con antecedente -enantes de la conquista romana- y depués d´ella -la época na que los francos, los visigodos, los ostrogodos, los llombardos, etc.- faen la so apaición”.

Un oxetivu nidiu

Güei los militantes del PACE, dicen tener como oxetivu cimeru “la UNIÓN EUROPEA a tolos efeutos y la defensa de los sos intereses. Polo tanto creyemos que´l referente más claru d´esta forma d´entender esta cuestión ta na trayeutoria de los pueblos celtes d´Europa. L´oxetivu mas grande que se propón el PACE ye frenar y impedir que´l desendolcu, trunfante del orde criminal del mundu nesti entamu del sieglu XXI s´esparda por Europa. Los militantes del PACE, albidramos qu´esti orde criminal nun ye frutu de la casualidá y ve n´él un plan entamáu y encadarmáu por unos intereses económicos mundiales, supranacionales, que s´impulsa dende´l sionismu clásicu hasta les mil mafies y omertades (llei del silenciu mafiosa) de nuevu cuñu”.

Por tóu eso´l PACE propón una nueva ética y una nueva estética ciudadana pa Europa y pa los núclios del mundu hériedes del espíritu de llibertá y de xusticia céltico, “que faiga frente al destructor orde criminal mundial, con un orde cívicu européu, na creencia de que la unidá, decidida y dinámica, de los europeos va facer más débil –polo menos n´Europa- el procesu de dexeneración de la nuestra antigua civilización. La nueva ética-estética que propón el PACE naz del convencimientu nos ciudadanos europeos sobre la necesidá d´un cambiu”. D´una toma de postura activa a la escontra de la alienación cola que, albidren, “nos quieren confundir y someter los poderes fácticos mundiales, factores del orde criminal mundial. Esa toma de postura activa ciudadana, será propulsada pol PACE dende les instituciones, dende los medios y los canales d´información ciudadana a los que tenga accesu y dende les asociaciones. EUROPA NUN SE DEXA MANIPULAR”.

El PACE diz que “sofitará la costrucción d´una sociedá ensin prexuicios nin tabús, llibre de falsa y interesada correición política, onde la familia, la educación, les asociaciones y la implicación ciudadana na comunidá seyan el pegoyu fundamental”.

Páxina Web anunciada del nuevu partíu

Nuna entrevista concedida al selmanariu Les Noticies, Joaquín Aréstegui, voceru del grupu parllamentariu del PP na Xunta Xeneral, declaróse alredor de la Ponencia Política aprobada nel 15 Congresu del PP d’Asturies celebráu esti sábadu pasáu (de la qu’Asturnews yá adelantó información). Aréstegui foi l’autor d’esti testu nel qu’un apartáu taba dedicáu a la llingua asturiana. Pa voceru popular lo que quería dicir na ponencia “ye que n’Asturies la llingua nunca foi un problema, quier dicir, siempre se trato con muncha normalidá, non como n’otros sitios onde tán xugando a dar vuelta a la tortiella, como por exemplu en Cataluña, onde’l catalán tuvo prohibiíu y perseguíu a lo llargo de 40 años y agora intenten persiguir el castellanu”.

Según Aréstegui “Nesti sentíu n’Asturies vivióse mui bien, nunca hubo tensión llingüística nenguna y la xente fala lo que quier. Nun hai qu’imponer nada a nadie nin crear conflictos o barreres ente los asturianos.L’asturianu ye un patrimoniu de tolos asturianos qu’hai que lu cuidar y defender”.

Pal voceru conservador “diba ser una irresponsabilidá descomanada que viniere daquíen y acabara con ello” pa lo que’l popular cree que lo qu’“hai que facer ye comprender esi mensaxe, consiguir que la ciudadanía, de manera voluntaria, fale n’asturianu y defender el derechu d’aquellos que lu quieran usar, porque nosotros entendemos la llingua como un derechu y non como un deber”. El diputáu remató les sos comentando que nel PP son “contrarios a la imposición y a la oficialización porque consideramos que ye imponer a la xente coses que nun reclamen, pero tamién somos contrarios a que daquien cometa’l grave error de cargarse’l patrimoniu cultural que nos diferencia, o meyor dicho, que nos singulariza del restu de comunidaes autónomes”.

Pal popular “Son mui poques les que cuenten con una llingua propia” a lo qu’añade “soi un enamoráu de la llingua española y polo tanto préstame que los que tienen la so llingua propia la puedan utilizar tamién, porque l’idioma ye un vehículu de comunicación y precisamente ye eso lo que pretendía esplicar na ponencia”.

Ente otres declaraciones Aréstegui comenta na entrevista: “Hai una Llei d’Usu y Promoción que s’aprobó cuando gobernabemos nós onde l’asturianu, prácticamente, ye oficial. Lo que pasa ye que depués tán les voluntaes polítiques de desarrollar o non esa llei. Agora mesmo’l que-y pete pue usar la llingua y dirixise a cualquier alministración asturiana n’asturianu. Tamién se pue estudiar n’asturianu, escribir lliteratura asturiana, los anuncios nel Boletín del Principáu d’Asturies son billingües. Amás, tou aquel que quiera pue intervenir nel plenu d’un Conceyu o del Parllamentu n’asturianu. Tamos nun momentu onde la llingua nun ta prohibida nin hai restricción d’usu nenguna, pero lo qu’hai qu’intentar consiguir ye que cada vez más xente fale asturianu y asina cuando haya 20 diputaos que na Xunta Xeneral falen n’asturianu entós va falase asturianu y cuando haya 20.000 ciudadanos que se dirixan al so Conceyu n’asturianu se-yos va responder n’asturianu. El problema nun ye lo que nun se pue facer, sinon qu’ente toos hai que consiguir que se fale más, pero sinon se fala tampoco va pasar nada”.

El PP reclama na so ponencia política la “paternidᔠde la Llei d’Usu y niega “conflictu llingüísticu” n’Asturies