Plástiques

Esti xueves, 8 de xineru, inaugurase’l XXXIX Certame Nacional d’Arte de L.luarca n’Uvieu cola presencia de l’amuesa colectiva que ya visitare les localidaes de L.luarca, Mieres, Avilés y Xixón, pa depués treslladase a Madrid (febreru y marzu) y Llangréu (abril).

La esposición va allugase na Sala Cultural Caxastur nel Teatru Campoamor d’Uviéu y vapoer vese del xueves 8 al sábado 31 de xineru de 2009.

Conceyu Bable-Xixón y l’Atenéu Cultural Xuan María Acebal van celebrar güei, xueves 18 d’avientu, un actu de presentación de la recopilación de los 16 orixinales de la revista de cómics “EL LLAPICERU”, que Lluis Antón González dirixó dende l’añu 1988 a 1997. L’actu coincide col venti aniversariu del entamu de la publicación y va servir d’homenaxe a les persones que ficieron posible esta importante revista.

L’actu va celebrase na llibrería Alborá Llibros, a les 19:30 hores y va cuntar cola presentacia de dellos autores qu’espublizaron les sos viñetes na revista, la primera enteramente de cómics n’asturianu de la hestoria ya inspiradora d’otros munchos proyectos asemeyaos.

La presentación organízala l’Atenéu Cultural Xuan María Acebal, que prerparó un pequeñu trabayu alredor de la hestoria de la revista EL LLAPICERU, y Alborá Llibros, que va vender n’esclusiva la recopilación de los orixinales de la revista encuardernaos y espublizaos nuna edición en tapes dures con namás 100 exemplares numberaos.

LABoral Centro de Arte y Creación Industrial va ufrir esti vienres, día 19, parte de les obres incluyíes na Muestra Colectiva de Videocreación seleccionaes dientro de les actividaes del programa Identidaes, Arte y Sexo 2. Además, el sábadu, el Centru va ser l’escenariu de tres performances.

Fernando Bellver algamó esti llunes el Premiu Nacional d’Arte Grafico 2008 pola “so coherencia nel campu del arte gráficu desendolcando una obra d’enorme orixinalidá qu’evoluciona dende’l neo-pop al emplegu híbridu de la fotografía o la radiografía”.

El tribunal, presidíu pol académicu de Belles Artes Antonio Bonet Correa, taba compuestu por Eduardo Alaminos, Fernando Castro, José Marín Medina, José Manuel Matilla y Juan Bordes como secretariu y decidió tamién galardonar a Jan Hendrix col Premiu Internacional a les Aportaciones ya Innovaciones nel arte gráficu, pola so “capacidá de llevar les sos obres dende la superficie plana a lo tridimensional ya instalativo”.

Los artistes Alfredo Colunga, Caso (José Francisco Caso del Corro), Begoña Muñoz y Jaime Rodríguez inauguraron la so exposición “winners|loosers” en Bruxelles esti 17 d’ochobre con un actu nel que se proyectó’l cortometraxe “La palabra que falta”. Organizada por ASBRU (Asturianos en Bruselas) en collaboración con Michael Chia y patrocinada pola Axencia Asturiana d’Emigración, la muestra va poer visitase na Casa d’Asturias de Bruxelles hasta’l 31 d’esti mes.

Winnersloosers axunta per primera vegada en Bélxica la obra d’estos 4 artistas europeos, toos ellos nacidos y residentes n’Asturies. Begoña Muñoz, Caso y Jaime Rodríguez amuesen piezes realizaes con delles téunicas que van de la pintura a la fotografía, pasando pola ellectrografía, la escultura o la cinematografía.

La exposición va tar abierta al públicu hasta’l 31 d’ochobre durante los díes de selmana.

Pepe Monteserín, autor del cuentu n’asturianu ‘Ensin párpagos’, xunto a Antonio Acetal, el creador de les maquetes, presentaron ayeri la esposición sobre’l llibru que va durar un mes y que va contar con un cuentacuentos nes mañanes de los sábados y domingos. La muestra va exhibise na segunda planta del Muséu de Belles Artes d’Asturies.

Antonio Acebal firmó que nunca pensare en poder realizar una esposición d’esti cuentu, y mostróse mui satisfechu col resultáu de la esposición, con “un montaxe mui cenciellu qu’encaxa colo que quieren tresmitir les pieces”.

Pal autor del cuentu, Pepe Monteserín, el so nome debería apaecer en “lletres mui pequeñes” y ser el nome d’Antonio Acebal el qu’ocupare una mayor parte na obra puesto que-y paez “un pocu inxustu” y agradeció al artista que lu colocare “nesta peaña que son les sos ilustraciones”.

Roberto González-Quevedo, secretariu de l’Academia de la Llingua, recibió’l agradecimientu per parte del Director del Muséu tres la cesión de los derechos del llibru, y afirmó n’asturianu que ye un cuentu que “se viende y presta muncho”.

Pal conceyal de Cultura del Ayuntamientu d’Uviéu, José Suárez Arias-Cachero, “ye una manera de rellacionar el muséu más tovía con Asturies y pol tipu de temática del cuentu completar les actividaes que la direición de la pinacoteca tien dirixíes a atrayer a los neños al mesmu”. Consideró que ye una iniciativa “mui interesante dende’l puntu de vista artísticu y mui interesante dende’l puntu de vista d’unificación del asturianu”.

La directora xeneral de la Promoción Cultural y Política Llingüística, Consuelo Vega Díaz, afirmó tar encantada cola esposición puesto que “se muestren tres poderosos elementos culturales d’Asturies que son la llingua asturiana, la lliteratura y les artes plástiques en xeneral”.

La Sala Borrón d’Uviéu acueye la esposición pictórica del artista Santiago Lara, que se presenta baxo’l títulu “Kleingärten” y que pue visitase del 2 al 22 d’ochobre, de 11:30 hores a 14:30 hores y de 18:00 hores a 21:00 hores y los sábados de 11:30 a 14:30 hores.

Santiago Lara ye llicenciáu en Belles Artes pola Universidá Complutense de Madrid. El so itinerariu artísticu ta enllenu de galardones y beques como’l Premiu “Francisco Carretero” de la Diputación Provincial de Ciudá Real (2001), la Beca Leonardo da Vinci de París (2002), el Premiu “Antonio López García” (2005), la Beca AlNorte 2007 pol Proyectu “Bosque Interior” o la Subvención al proyectu “Hombre-Medicina” (2007). Ente 2000 y 2007 participó en gran cantidá de cursos d’especialización y formó parte d’estremaes esposiciones colectives.

Con “Brotes”, la serie pictórica de 2007 que presentó na so primer esposición individual en Xixón, Santiago Lara mostraba’l so interés por convertir la pintura nun mediu de comunicación esperimental qu’aunaba la herencia de lo tradicional con una impronta conceptual qu’abría horizontes a la espresión directa. Nesa estela, el pintor yá se manifestaba pa entós inmersu nel espíritu del so tiempu, nuna inequívoca vocación alemana, que se diba ver reforciada depués pola so condición d’artista en residencia na Kunstlerhaus Glogauer de Berlín. D’ehí surde la so nueva esposición “Kleingärten”.

Esti xueves 2 d’ochobre, a les 20,30 hores, na cai Gascona d’Uviéu, celébrase l’actu de la llectura del fallu del xuráu del Octavu Certame de Pintura “Gascona, el bulevar de la sidra” y darréu procederase a la entrega de los premios.

El meyor trabayu, a xuiciu del xuráu, va recibir un premiu de 1.800 euros y va entregase amás un accésit de 250 euros y un premiu al meyor cuadru presentáu por menores de 14 años. Al concursu de pintura de Gascona, sobre’l tema esclusivu de la sidra presentaronse esti añu cásique 150 obres.

Los Planes Municipales de Drogues y el Plan Rompiendo Distancies de Taramundi, A Veiga, Santiso d’Abres y Castropol convoquen esti concursu en trés categoríes d’edá: hasta 18 años, de 18 a 30 años y de más de 30 años.

La idea ye presentar semeyes que reflexen una visión positiva de los mayores. El primer premiu ye d’80 euros en bonu de material fotográficu y hai otros premios consistentes en xintes en restoranes de la rodiada.

El plazu de presentación finaliza’l 25 de setiembre. Pa más información pue llamase a los teléfonos: 985 646 701 y 985 634 133.

El IX Premiu Astragal, qu’organiza l’Institutu Asturianu de Mocedá en collaboración col Conceyu de Mocedá de Xixón, premió a los proyeutos “En_medio”, d’Ignacio Quesada de la Fuente, y “Bien aprés les tours et les soisons”, d’Amalia Rodríguez Ulman, de Xixón. Caún de los premiaos va recibir 8.000 euros pa reproducir los proyeutos presentaos nel espaciu y editar los sos catálogos.

El Premiu Astragal, que ta incluyíu na convocatoria añal del Institutu Asturianu de la Mocedá cola denominación xenérica Culturaquí, ta concebíu pa dar cabida a proyeutos artísticos ideaos específicamente pa la Sala d’esposiciones del Conceyu de Mocedá de Xixón y pa la so interaición cola ciudá onde ta allugada. A esta edición presentáronse un total de nueve proyeutos artísticos.

El xuráu, onde figuraben Ana Botella Díez del Corral, Jaime Luis Martín Martín, Pilar González Lafita y Fernando Gutiérrez López, distinguió los dos proyeutos premiaos pola so calidá artística espositiva, pola claridá de proyeición y pola viabilidá de la so execución.